tgoop.com/Aljnahe/9373
Last Update:
وين عايفني ورحت وين الحنان
بات بعيوني الدمع راح الامـــــان
بويه طالت سفرتك
ليش عـايف وردتك
يابو الحنان
ـ ـ ـ ـ ـ ـ ـ ـ ـ ـ ـ ـ ـ
بويه ياوجه الصبـح غيابك اللحظه بجرح
ليلي مايعرف صبـح جروحي تدي
اسأل ومـــــــحد يرد انه مو مــــــالت بعد
للعطش بعـــدك اشد مرد چبدي
زغيره ونضر للخــيم نار وخيـــــول وزلم
ردلي بجـــــدامي ألم ليش وحدي
وين افر يالكـــــــــتر الگاع متـروسه جمر
بس اصــيحن انسطر فوگ خدي
چنت اخاف واركض بحظنك اطيح
هسه ع التربان وجروحي تصـــيح
وين راحت شبگتك
ليش عايف وردتك
ـ ـ ـ ـ ـ ـ ـ ـ ـ ـ ـ ـ ـ
اركــــض ودمي يصب وين ماروح انــــضرب
ليش ترچــــــيه انسلب مو زغيره
المثلي مـــــاتعرف تون تگوم من حضن لحضن
حضن ابوهه الهه وطن وهيه اميره
تـــــعيش دوم مدلله زغيـــــره والها منزله
ماتـــــظل مـــــعلعله تعيش حيره
بيــــــن اهله ماتحس تغيب لوتطـــلع شمس
مــــــحد يمرها ويمس ويالعشيره
وين ألمن التــــجي وياهو انتخيه
وماكو خــــــــــير بالمعاره واعتنيه
لمحه لوصد نضرتك
منيه صارتك شوفتك
ليـش عايف وردتك
ـ ـ ـ ـ ـ ـ ـ ـ ـ ـ ـ ـ ـ
خدي بيـــــه دم ودمع بويه ســـــــلابي طمع
جفه بـخدودي انطبع بويه سبني
بويه كــــــلمن تنهضم تشكي ابوها من الالم
هذا طگـــــاني وشتم وذاك جرني
يمسح دمـــــوع الجفن تروح شـوغته بحضن
يگله يبنيـــــتي ويحن ليه ادني
تشعر تحـــــس بالامان تشمه وتشـبگه بحنان
ع الوجه بســـمه تبان يگلها امني
عگب حضـــنك مايصح والگه دفو
وين احــــــــــصل مااظن مثلك ابو
وين ألكه برئفتك
ليش عايف وردتك
ـ ـ ـ ـ ـ ـ ـ ـ ـ ـ ـ ـ ـ
السوط بمتـــوني اكل دمي مــــــن اذني نزل
ثوبي نار ومـــــــشتعل راح خدري
بويه لوصيـحن چنت گبل مااحچـــي شردت
بويه بـــــس ماكملت تگلي أمري
صدگ تنساني شعجب انخه وعيــوني تصب
ترضه تالي انـــــسلب بيه تدري
تدري ليـــــلي مانمت بحظن عمتي وماكلت
حـــضرو نوگ سمعت بينه تسري
نوگ هزل حــــــضرو باچر رحيل
وچتفونه بالحـــــبل والدم يسيل
وانه انــطر ردتك
ليش عايف وردتك
ـ ـ ـ ـ ـ ـ ـ ـ ـ ـ ـ ـ ـ
زغيره مومــــالت سبي وجهي مـــن لون العبي
غربه والحـــادي اجنبي وين عمي
امشي وي مــوتي سوه السوط بمـــتوني ألتوه
والله يلچــــــمني الهوه يجري دمي
الليل يگـضي ع الترب والدمع ســـكته يصب
بحــضن امي وانضرب انه وامي
گمت اخاف من الصبح تصير كــل ديره جرح
نضـــرت الوادم رمح بينه ترمي
سوگ دخلوهم امر حادي الضعون
واشد من السيف نضــرات العيون
كلشي غربه بغيبتك
ليش عايف وردتك
ـ ـ ـ ـ ـ ـ ـ ـ ـ ـ ـ ـ ـ
انـــــشد ومــــــحد يرد واحســـب ايام البعد
ديره ديــــــــــره بالنشد دمعي جاري
وين ابوي شعطــــــــــله سكت كلمــــــن اسأله
يــــــــــصير ظل بكربله بيه داري
ابد ماصـــــــــــدگ نسه وبيــه مامر چم مسه
جرح يومي اتنفــــــسه بأنتظاري
بس احـــــــسنه قريب ويسمع الون والنحيب
ليش اصيحه ومايجيب يطفي ناري
ردت شوفك لـــــــــــچن موهذا ردت
شلون اشبگك وانته بس راس بطشت
الموت اجاني بردتك
ليش عـــايف وردتك
يابو الحنان
علي مظلوم الجناحي
@Ali_aLgenaih
BY قناة الشاعر الحسيني علي مظلوم الجناحي
Share with your friend now:
tgoop.com/Aljnahe/9373