tgoop.com/Aljnahe/9290
Last Update:
معذور مايدري الگمر
لاويــن وداها الدهر
تبات بخرايب عگب الحبايب
زينب وحيده
ـ ـ ـ ـ ـ ـ ـ ـ ـ ـ ـ
مايدري عباس الگمر حال العقيـــــــــله
مهضومه والمدمع دمه گامت تسيــــــله
مجتوفه تصعد عالهزل ماعدها حيــــله
ماتحتمل فرگه الاهل كلش ثجيـــــــــله
وداها لاوين الوكت
مدمعها مابطل يكت
كل ظنهه خايب عگب الحبايب
ـ ـ ـ ـ ـ ـ ـ ـ ـ ـ ـ
متكلفه بيتام اصبحت بيد السبـــــوها
محتاره المن تلتفت لمن خـــــــــــــذوها
تربي الضعن لمن مـشه الحادي وحدوها
اطفال خاف من الهزل لو وگعــــــــــوها
مربيه عين عله الهزل
لايوگع بــغفله طفل
واليها غايب عگب الحبايب
ـ ـ ـ ـ ـ ـ ـ ـ ـ ـ ـ
ساعه العليل تناضر وساعه اليتــــــــامه
والصوط بيه من الضرب تارك عــــــــلامه
والشامت بعينه اسهام گام يتــــــــــرامه
وچلمه الـــــشامت بالگلب صوب سهامه
والخله ونتها تزيد لوم المـــــــــــــــــلامه
تلجمها تاذيها الناس
لوحچو بسم العباس
فوگ الترايب عگب الحبايب
ـ ـ ـ ـ ـ ـ ـ ـ ـ ـ ـ
شلون حاديه الضعن للكوفه جـــــــــــابه
وخلاها زينب والحرم وسط الخـــــــرابه
نادت ومدمعها يهل مثل السحــــــــــــابه
اليفكد اخوانه بشدد يكتل عــــــــــــذابه
مهيوبه چانت وام خدر
تاليها يـــــسبيها الشمر
وين الاطايب عگب الحبايب
ـ ـ ـ ـ ـ ـ ـ ـ ـ ـ ـ
زينب تشاهد من اجـــــت بدمع النواضر
بسراها لمن طالبت ذيج العشـــــــــــاير
وتشوفهن لمن مشن والگلب حـــــــــاير
وچل ليل وحدتها بهضم والحزن دايـــر
ظلت وحيده وتنتضر
بلكت عشيــــرتها تمر
والگلب ذايب عگب الحبايب
ـ ـ ـ ـ ـ ـ ـ ـ ـ ـ ـ
بالغربه لاحيل البقه والوجه ذابـــــــــل
وذيج الرسوم اتغيرت والدمع سايـــــل
تسألها عن زينب هنـــــــــد حگها تسايل
فر بيها دولاب الزمن والوكت مايـــــــل
ضيعت زينب مادرت
ذيچ الرسوم تغيـرت
شافت مصايب عگب الحبايب
ـ ـ ـ ـ ـ ـ ـ ـ ـ ـ ـ
للطاغي ودوه الضعن ودتها الايــــــــــام
وفرحان من طب الضعن ومعيد الشـــام
مجتوفه والمجلس نضر يانضرته اسهــام
وحسين راسه بالطشت وتصـــــدله بالام
ينـــــشده وزيد الالم
وين اخوتچ وين العلم
وين الگرايب عگب الحبايب
زينب وحيده
علي مظلوم الجناحي
@Ali_aLgenaih
BY قناة الشاعر الحسيني علي مظلوم الجناحي
Share with your friend now:
tgoop.com/Aljnahe/9290