tgoop.com/Aljnahe/9257
Last Update:
يوم واحد ماتعده علينه مامر
كلشي بيچ بساع يازينب تغير
چنــي فارگتج عمر
هواي متغيره شكثر
يوم واحد
ـ ـ ـ ـ ـ ـ ـ ـ ـ ـ
عين مطفيه بــــسهم وبعين شفتچ
انه مامعقوله اضـــــــيعچ ماعرفتچ
حته صوتچ مختــلف بذني ونبرتچ
صوت مبحوح اختنگ خويه بعبرتج
انه من فوگ الرمح وبعين اصدلچ
ذابل ومذاك الاول خويه شــكلچ
فراگي وياچ الـظهر
هواي متغيره شكثر
ـ ـ ـ ـ ـ ـ ـ ـ ـ ـ
خويه وجهچ ماعرفته موش الاول
حــــــيل متغيـــــر ولونه هم تبدل
بس اثر جويات جدمچ خويه اندل
خطوتج تعثر اشـــــوفن گوه تنزل
حمر حيل اعيونچ وذابل جفنهن
باچيه چنچ عمــــر رايح نضرهن
باقي بخــــدوچ اثر
هواي متغيره شكثر
ـ ـ ـ ـ ـ ـ ـ ـ ـ ـ
ماعرفتچ منحني يــــاخويه ظهرچ
نگلت جدامچ ثچيله ايدچ بخصرچ
مال طولچ بالهوه الخـــطوه تعثرچ
الچلمه ماتطلع تمـــوت اباب ثغرچ
يميل ويه الريح طولچ يالعــــقيله
ونگلت اجدامچ احس كلش ثچيله
جبل مكسور الظهر
هواي متغيره شكثر
ـ ـ ـ ـ ـ ـ ـ ـ ـ ـ
شفتچ اطيحين چم مره من جيتي
بياعلي گوه نهـــــــضتي ونتخيتي
ع الجمر تمـشين خويه ومادريتي
عينچ عله الگاع وبسكته بچيتي
وين طولچ خويه يالممشاچ هيبه
وصوتچ الكرار ليه مـــــن يجيبه
حافي والحومه جمر
هواي متغيره شكثر
ـ ـ ـ ـ ـ ـ ـ ـ ـ ـ
هادله متونچ اشــوفن حافي تمشين
من الخيم للتل طريقچ طوله خمسين
صعتي فوگه وانه اسمعچ من تنادين
راسچ مــــشيب نزلتي ودمعه بالعين
هيه هاي ألي اجت بالگوه تمشي
نزلتي موزينب تغير خويه كلشي
مشيبه وبعينچ نهر
هواي متغيره شكثر
ـ ـ ـ ـ ـ ـ ـ ـ ـ ـ
شفتچ المغرب وحيــده من بقيتي
لاخيم ويتاــــــــــم عندچ ونوليتي
ابعــــــباتچ كلهه لاذت من حويتي
ياهو حط ايده عله متنچ انحنيتي
لواجت ايد اليتامه فوگ المتون
تنحنين بساع ينزل دمع العيون
السوط بمتونچ حفر
هواي متغيره شكثر
علي مظلوم الجناحي
@Ali_aLgenaih
BY قناة الشاعر الحسيني علي مظلوم الجناحي
Share with your friend now:
tgoop.com/Aljnahe/9257