tgoop.com/Aljnahe/10493
Last Update:
ألتفت وحدي بقيت ومحد وياي
ردت طاست ماي لچن ماكو ماي
فكرت بيك وبجيت
انته باچر لواجيت
ماكو ماي
ـ ـ ـ ـ ـ ـ ـ ـ ـ ـ ـ ـ ـ
دربي هوه يگود بيه الخـــــــطوه مجهوله احطها
امشي لاچن چني واحد يمشي بس عيونه سدها
وين ماشي وين اريدن وباب ياهو اتعــــنه ادگها
صعبه اليمشي ومايعرف بالديره
غربه ألمن وجه ويــــن يديره
حيره بعينه الدنيه تصير زغيره
شلون ابو نفس عزيزه يدگله باب
وتكبر الحيره لون يم وادم اجناب
والله حيره تحيرت
.انته باچر لواجيت
ماكو ماي
ـ ـ ـ ـ ـ ـ ـ ـ ـ ـ ـ ـ ـ ـ ـ
حيلي راح وگلبي ضامي وعله حايـــط انتچيت
وانته باچر تجـــــــوه ماكو صعبه لوحدك هويت
وانه يمكن ماي احــــــصل وانته يمه ومارويت
تعطش يم الماي ويابــس كلبك
الجاري جم مره يجرحك ويعذبك
وهوه من يعطش يتروه يشربك
ماي اشرب مااظل عطشان محتار
وانته بخيامك تشب وبگلبك النار
تريد تنهض بس هويت
وانته باچر لواجيت
ماكو ماي
ـ ـ ـ ـ ـ ـ ـ ـ ـ ـ ـ ـ
هيه ليله وادري موتي گلــــــبي لاچن مطمئن
تصير لطفالي انته والد تعـــــطف عليهم تحن
تلمه بحضانك حميد وكــــــــــل بنات ينسبن
طايح تنضر فرت كل ايتامك
بحومه تركض تتسلب گدامك
وزينب هيه زادت بيك ألامك
تكعد وياها حميده تواسي بيها
وباچر سكينه حبل جاتف اديها
تصيح يالكافل دريت
انته باچر لواجيت
ماكو ماي
ـ ـ ـ ـ ـ ـ ـ ـ ـ ـ ـ
طوعه اوصيها لحميــــده وباچر توصل الوصيه
تگلها ابوچ اهواي ســــــــلم گبل لحظات المنيه
بس رقيه تصد قميـــــــصك بالخيول العوجيه
تنزف تنضر بتك هاي اجروحك
بحسره مذهوله تصدلك وتنوحك
گامت لراس الرمح تريد اتلوحك
تخاف لوصاحو عليها الطفله معروف
راسك ع رماح باچر بنـــتك اتشوف
تگله بويه تسلبيت
انته باچر لواجيت
ماكو ماي
ـ ـ ـ ـ ـ ـ ـ ـ ـ
انه هم بسيف اموتن بــــــس فرق كلش چبير
مااطيح اگبـــــال اختي وحيره مثلك مااحير
منهلي مـــــحد شاف موتي ولايلموني بحصير
انه مااوگع يم واحد غالي
ذبحي محد شاهد من عيالي
وترك اطفال اترك وي چتالي
ع الرمح محد يرفعه راسي ينشال
وانته راسـك ع الرمح جدام العيال
مامتت وتسلبيت
انته باچر لواجيت
ماكو ماي
ـ ـ ـ ـ ـ ـ ـ ـ ـ ـ ـ
متت گبل الطــــيحه اني ماشفت حسره والم
طفل ماعندي بمماتي بحضني ويذبحه السهم
وماحرت امه شگلـــــها تـــنطر اباب الخيم
صعبه حل اگماطه وارد يضمك
تگله ارجع بـــيك شلون لأمك
وحدك وكل الدنيه ادور لچمك
مصابي والله يهون يمك مايقاس
والفكد تنگــال والله لمثل عباس
ع القصر من سلميت
انته باچر لواجيت
ماكو
علي مظلوم الجناحي
@Ali_aLgenaih
BY قناة الشاعر الحسيني علي مظلوم الجناحي
Share with your friend now:
tgoop.com/Aljnahe/10493