tgoop.com/Aljnahe/10463
Last Update:
هل الهلال ..مرت سنه ع اجروحي والشام
هل الهلال.. ولسه انجوي من نار الخيام
چم موت بعيوني شفت
چم مره مت ومامتت
هل الهلال
هل الهلال والعمر طال
سنه مرتني وگول شلون عدله
المات محضوض وانه مفروض
متت بالعاشر ولا اصعد الهزله
المثل حالي هواي اهون من يموت
من زغر دهري رسم بعيوني تابوت
سلوتي دمعي بحياتي وابچي بسكوت
العمره لوعات والفرح ماغلط مره وصل بابه
العمره لوعات ينطر المن ماترد راحت احبابه
فرح مامرني وشفت
چم مره مت ومامتت
العمره ماخاف ولاحزن شاف
هذا يسحب عمره ماشايف جروح
العاش بالاه وكته راواه
بس جسد يمشي تشوفه بلايه روح
انه اخلص من مصيبه وگعلي مصيبه
من عمر خمس وغزاني الوكت شيبه
وانه ذاك اليختلف حته بنحيبه
منهو مثلي حته بيام الفرح تنزل دمعته
منهو مثلي من زغير لليوم مابردت جمرته
من الظيم طفله وشيبت
چم مره مت ومامتت
گلت دهري تالي عمري
اكتفه والصار بيه انتهه وصار
وكتي خوان بجرحي فنان
كربله ضمالي بيها اجروحي الاكبار
اخذ مني كل اخوتي وكلشي ماظال
وحدي ظليت بهضم يهد حته الاجبال
لملي حزن الدنيه كله والفرح شال
الصار بيه ماسده لواحد ولاصار بمره
الصار بيه حافي اركض وانه عمري مخدره
خمسين عمري وركضت
چم مره مت ومامتت
منهو مثلي راحو اهلي
وحرگو خيامي عليه فوگ الايتام
فكري محتار خيل والنار
وكلها عمه تصيح وانه ابين ظلام
اكض واحد خايفه يفر ثاني مني
هذا نار بثوبه ذيج تصيح اذني
وذاگه اشگف عنه بالسوط ع متني
جلجل الليل وروس اخوتي ع رماح يمي
جلجل الليل وباچر سبي ينادون بسمي
بروس اخوتي انضر بتت
چم مره مت ومامتت
كلها شمات والخدر مات
الچلمه اقوه من السهم تاذي الدليل
الفاگد اخوان يبقه حيران
وانه كل اخوني ع غبره مچاتيل
وحدي ظليت وشماته كلها وياي
الماي بعنادي يجيبه وطشره احذي
وانه ماتو كل خوتي بحسره الماي
الشمر صار زلمه يتهدد عليه وعنده حراس
الشمر صار يوگف اگبالي برمح بيه راس عباس
راداني اصيح وماصحت
چم مره مت ومامتت
اذكر وچان يمي جيران
سنين مايدري علي عدهم ابنيه
تالي للسوگ ادخل بنوگ
وناس ملتمه الضحه وصاحو سبيه
صعبه ترجع ديره بت شيخ العشيره
وزينب ع الكوفه رجعت بس اسيره
بداري مروني الگبل بيها اميره
العمر چانت تطلع بموكب واثر ماالها ينشاف
العمر چانت دخلت الكوفه اسيره وبيها ينطاف
ديوان بالكوفه ادخلت
چم مره مت وماتت
تالي للشام واه يالشام
معيده بيه الناس وتلگونه بدفوف
شتم وحجار زغار وكبار
لتمت الوادم علينه واليجي يشوف
من يزيد ومجلسه بتنه بخرابه
ونامت الليل اليتامه ع الترابه
رقيه گعدت من حلم وتصيح بابه
الها جابو راس ابوها وحضنته مذهوله هيه
الها جابو حضنته وماتت بحسرتها رقيه
رقيه بجفوفي ادفنت
چم مره مت ومامتت
علي مظلوم الجناحي
@Ali_aLgenaih
BY قناة الشاعر الحسيني علي مظلوم الجناحي
Share with your friend now:
tgoop.com/Aljnahe/10463