tgoop.com/Alfoatm3/10930
Last Update:
حگه الحسين بطيحتك يتغير
شفت المهر رد للخيم يتعثر
ماينعرف رايح جاي
يصرخ يشيال الواي
ــــــــــــــــــــــــــــــــــــــ
يالعايف اختك تنتظر
ما تدري بالصاير
حسينك رجع حاير
العسكر اعليه داير
لحد ما تگرب للخيم
اعرفنه ابو اليمه
كلسا عثر جدمه
بعازة اخو يلزمه
مشيت الفاگد تنعرف
من بعيد يتلوه
بي موجره الخوه
يحتظر كل خطوه
يكسر الخاطر بالمشي
ردلنه متخوصر
واعله العده ينضر
يضحگون من يعبر
من شكله وضعك ينعرف يالكافل
مو ذاك ابو طول الحلو رد مايل
لمن گعد خويه وياي
يصرخ يشيال الواي
ــــــــــــــــــــــــــــــــــــــ
هسه انه احير بيا اخو
بالردلي يتعثر
لو بالبقه موذر
دوهني ابو الاكبر
كل ما تگرب للخيمه
الگه اثر من رد
يم طولك امدد
شفت الدمه عالخد
متشابگ وياك اشكثر
من حيرته علومه
وريحتك بهدومه
ونترست الحومه
شسويت يحزم الضهر
بحسين وعياله
جا وگف دلاله
ريتك شفت حاله
كل ولده طاحو ما رجع يتلوه
اشايف حسين ورد الي مو هوه
گلي شلگه وتاه الراي
يصرخ يشيال الواي
ــــــــــــــــــــــــــــــــــــــ
عباس اول ما رحت
حسين نعصر كلبه
وبي فرحت الغربه
مجانك ولا طبه
يم خيمتك راح ورجع
ردلي وشفت وضعه
من يحجي ما سمعه
مخنوك بالدمعه
ويگلي خاف انه بحلم
ماهوه بالوادم
عباس ضل نايم
ولاكتر بي سالم
يختي اخلي بالحضن
يرد للترب شفته
ما رضه من شلته
لو بيدي ما عفته
يحط خده اخيج اعله رمل جدامي
عباس مات اعله النهر بس ضامي
الخاطرنه ماشارب ماي
يصرخ يشيال الواي
ــــــــــــــــــــــــــــــــــــــ
سولفلي حالك شيبت
يعينه الله ابو سكينه
من شافك ابعينه
گال الي اموذرينه
سولفلي اول ما وصل
كلي شفت جسمه
وجفوفه مو يمه
يصب للنهر دمه
حيرني ارسه المنشطر
لا ينشد ويرهم
لا يصح ليه مرهم
العامود ما يرحم
ماكو اثر لعمامته
دورت ما هيه
مدري انه مابيه
لو يمي مدميه
من جفوفه وعيونه النزف والهامه
تغيرت الگاع وضيعت لعمامه
يگلي نزف دم هواي
يصرخ يشيال الواي
ــــــــــــــــــــــــــــــــــــــ
يالماشي عني ما گلت
شلون بكلب زينب
بياحيل اضل انحب
من ابطي تتسلب
وحسين اذا ضل للضهر
ما وذره العسكر
بلياك ما يكدر
ويموت ابو الاكبر
بكل الاحوال الوحد اضل
من غيرك شعندي
ما طالعه الوحدي
لا ينسطر خدي
خليت حسبتي شكثر
كل ساعه الي حسبه
يابو الفضل صعبه
وگفتي ويه الغربه
ماعرف الراي ابكربله من دونك
ياهو اليرد لأرض الوطن بضعونك
دوهني الحسين بهاي
يصرخ يشيال الواي
ــــــــــــــــــــــــــــــــــــــ
مو حمل صحرة نينونه
موش انت تدريني
بهودج مخليني
مرعوبه تلگيني
شلون اوگف بنص الزلم
وكربله ما ترحم
ماكو مره تنضم
وهاي الي ما ترهم
من امشي لازم محملي
الوادم يعرفونك
ما تغفل اعيونك
ولا امشي من دونك
حيرت حتى البالمهد
محتار يم محتار
گعدو ازغار اكبار
اعليك ادمع مدرار
طبتي وياك وطلعتي بنص غربه
الماي الخذك يابو الفضل ما شربه
يالگطعت خويه جلاي
يصرخ يشيال الواي
بسام قابل الياسري
خدر الفواطم
لنشر القصائد الحسينية (@Alfoatm3)
#اللهم_عجل_لوليك_الفرج
BY خدر الفواطم لنشر القصائد الحسينية
Share with your friend now:
tgoop.com/Alfoatm3/10930