tgoop.com/Abduqahhorov_Abduvahob/1046
Last Update:
Бу ҳаётда кимдир яхши ҳаёт кечириши учун, албатта, кимдир ўзини қурбон қилади.
Аста-секин улғайганим сари, ҳаётнинг мен кўрмаган, эшитмаган, ўйламаган қирралари намоён бўлмоқда. Эркак киши улғайган сари, шунчаки ишлаши эмас, балки кўпгина нарсалардан воз кечишга ҳам тайёр бўлиши керак экан.
Бугун Сурхондарёга келдим. Қўқондан Тошкентгача таксида келдим. Тошкентдан Сурхондарёгача самолётда учдим. Ҳаво 42 даража иссиқ. Йўл давомида атрофни кузатиб, чуқур ўйга толдим. Уйимдан сафарга чиқар эканман, айланиш кўринишидаги иш мажбурияти туфайли оиламдан узоқлашдим.
Йўлда кетар эканмиз, кимдир шу иссиқда сварка қилмоқда. Кимдир томда шифер қоқмоқда. Нонвойлар тандирга нон ёпмоқда. Йўл ишчилари опен-бюджетдан ютган маҳаллаларни асфальтламоқда. Перевалга чиқар эканман, турли фура ва машиналарда одамлар юк ташиб кетмоқда. Иссиқда, панада ГАИ ходимлари ҳужжат текширмоқда ва ҳоказо…
Қисқаси, ҳар бир эркак оиласи учун турли қийинчиликлар билан юзма-юз келмоқда.
Кеча мен ҳам салқинда ухлар, салқинда ўйнар эдим. Отам эса иссиқда ишлаганлар. Бугун менинг фарзандим салқинда дам олмоқда, мен эса ухламасдан ишламоқдаман.
Ер юзида жуда кўп касблар бор. Ҳар биримизнинг ота-онамиз биз яхши яшашимиз учун турли касбларда, турли қийинчиликларга қарамасдан меҳнат қилишган. Улар ишлагани учун сиз ва мен салқинда дам олганмиз, болалигимизни хурсандчилик билан ўтказганмиз.
Бугун тушунганим шуки: агар отангиз ва онангиз сизни оддий, оғир меҳнат билан катта қилишган бўлса — сиз улар билан фахрланишга мажбурсиз! Чунки улар ўз орзуларидан кечиб, сиз учун машаққатларга чидашган.
Бугун мен отам мени тракторда ер ҳайдаб, онам бўлса ўқитувчилик қилиб катта қилганларини фахрланиб айтаман. Менинг отам ва онам буни уддаладилар.
Аммо менинг фарзандим мендек фахрлана олмаслиги мумкин. Чунки унинг дадаси иссиқда ишлаб, орзуларидан кечиб эмас, салқинда ўтириб, ўз орзулари ичида, фақатгина кам ухлаб, уни катта қилмоқда.
Дада, сиз мен яхши яшашим учун жуда кўп нарсалардан воз кечган эдингиз. Сиз ўз вазифангизни ало даражада адо этдингиз. Чунки бугун ўғлингизни бошқа шаҳарга олиб бориш учун самолётлар навбатда турибди. Ҳа, у энди хоҳлаган вақтида, хоҳлаган жойига, хоҳлаган транспортда бориши мумкин.
Дада, сизга катта раҳмат. Бугун мен сиз орзу қилган ҳаётда яшаяпман.
Илтимос, отам ва онамни дуо қилиб қўйинглар. Чунки сизлар билан ўз фикрларини бўлишиб, тажрибаларини ўртоқлашаётган бу инсонни айнан улар тарбия қилишган.
👉 @Abduqahhorov_Abduvahob
BY Abduvahob Abduqahhorov | Blogi📝
Share with your friend now:
tgoop.com/Abduqahhorov_Abduvahob/1046