tgoop.com/ALshoely12/9030
Last Update:
قصيدة بفكري صور
ياعلي بفكري صور ..رايد اكتبهه شعر
باب وجفوف وحرب..فاطمه دمعج يصب
ياعلي بفكري صور
صوره اوله شاهدته فاطمه بيه حزينه
يم ابوهه تنتحب باجر ايبين ونينه
شافت ايام صعبه ابد مامرن علينه
فاطمه تفكَد ابوه الله يستر ياحنينه
يانبي مثلك حمل ..ضيم وبكَلبه امل
الله اكبر ياعرب ..فاطمه دمعج يصب
ياعلي بفكري
*
ثاني صوره اتخيلته جان يوم الوداع
بعد ماكَمنه ابتهلنه لودعه لله داع
راح من عدنه نبينه الحزن اصبح مشاع
السقيفه وبحقدهم ابتده حكم الرعاع
ياقلب شال الحزن .. هلن ايام المحن
بسمار ضلعي انضرب..فاطمه دمعج يصب
ياعلي بفكري
*
ثالث الاحزان صوره من ظلعه الطاهره
نبت البسمار بيها واسقط المحسن تره
كَام يدفعه ويطكَه وهيه بت خير الوره
يامحمد حال بنتك حامل وباب اعصره
ياعلي شوف الزمن ..اندار كلهه بالحزن
باب خيبر والحرب ..فاطمه دمعج يصب
ياعلي بفكري
*
رابع الايام صوره للحسن جبده انمرد
مات مسموم يجعده والكرم بيه انفكَد
طاح جبده بين اخوته لهذا يومج مابرد
ليش ياجعده اشجنينه ياهو انطاج العهد
بَين مسموم وصريع ..ضاع بحساب البقيع
بلا حرب وبلا ذنب..فاطمه دمعج يصب
ياعلي بفكري
*
صورة المذبوح بالطف ذكرتني بالمسيح
الفرق مذبوح اهله مارجع واحد جريح
الصليب الصار رمحه راسه عالي كالضريح
بس اخوته علشريعه نايمه وجن تستريح
ياعلي شنهي الخبر ..وين جوده والنهر
خنصر وجف انسلب..فاطمه دمعج يصب
ياعلي بفكري
*
صورة السادس عجيبه تنسبي ام الخدر
كَبل مايحركَ اخيمهه اطفال رضع تنحر
فوك علهزل ضربهه ويشتم بسيد البشر
علك الروس بعواسل الحده ضعني الشمر
شفت انواع الصور ..مرن وجنهن دهر
زينب اتبات بدرب ..فاطمه دمعج يصب
ياعلي بفكري
*
اه من صوره رقيه صرخت اتريد الحسين
الطشت مشتاق الهه شافته ايشع بالحنين
نادت العمه الكفيله راح اموت من الونين
تبجي بصوت الطفوله وينه حماي الضعين
ذاب قلبي من القهر..دموعي صبن كالمطر
عقل ماظل وفكر ..فاطمه دمعج يصب
ياعلي بفكري
*
#_الشاعر جبار عبد الزهرة الشويلي
٢١/صفر/١٤٤٠
BY الشاعر جبار عبد الزهرة الشويلي
Share with your friend now:
tgoop.com/ALshoely12/9030