tgoop.com/ALshoely12/8851
Last Update:
وزن الجلمه ونص
قصيدة ام البنين
ام البنين بحسره ..ثكَل المصيبه وسره
موت الفواطم ياحيدر ..موت الفواطم
صعبه القضيه ومره..ترخصني كون الزهره
موت الفواطم ياحيدر..موت الفواطم
حارت بامرها...وموت الاخذها
*١
علي جِيْتك عليه كحلت عيني
اصير امُهم بعد فاطم تسويني
صعب هذا القرار وعزتي وديني
خدم لحسين يابو حسين خليني
هل الامر جائز شرعه ..ماخذ قراره بطبعه
تعذرني فاطم ياحيدر..تعذرني فاطم
شفت اليتم والدمعه..والمات ياهو يرجعه
تعذرني فاطم ياحيدر..تعذرني فاطم
الدمعه اجرها ...وموت الاخذها
*٢
فرق بيني وبينج فاطمه الزهره
يابضعة محمد بالكَلب جمره
محال القارنج وياي تاه امره
اصيرن خادمه ومنونه للعتره
للزهره اعلن الحداد..فركاها مرد الفواد
غيرلي اسمي ياحيدر..غيرلي اسمي
من يسمعون الاولاد..بيهم جروح التزداد
غيرلي اسمي ياحيدر..غيرلي اسمي
منك ردتها ... وموت الاخذها
*٣
شرف كل الشرف اتسمه خدامه
للسبطين واختهم ارفع الهامه
مو كل حرمه اتلامس اجدامه
تطب بيته عزيزه وشايله احلامه
خليني اصيرن قدوه..وللزهره اصبح فدوه
اخدم بنينك ياحيدر..أخدم بنينك
الدنيا صارت حلوه..بخدمة علي واللبوه
اخدم بنينك ياحيدر..أخدم بنينك
كَلبك عرفها ...وموت الاخذها
*٤
امهم انه يشهد ربي ع الحاله
اصيرن خادمه لحسين واطفاله
اذا فديوم يطلب روحي يجراله
اعز من روحي هو وعيني هماله
اتمنه اضمه بصدري ..حته الهوه لايدري
روحي لبنينك ياحيدر..روحي لبنينك
مثل الكمر ياعمري..نوره حياتي وقدري
روحي لبنينك ياحيدر..روحي لبنينك
اقسم باثرها ... وموت الاخذها
*٥
بعد موتج يفاطم مابقه والي
علي مكسور كَلبه دافن الغالي
عمت عيني عليهم نامو كَبالي
دمعهم كَام كَبل العين يبرالي
ياريت اشيلن همه.. ولبيته اصيرن نعمه
دمع اليتامه ياحيدر ..دمع اليتامه
ماريده يفكَد أمه ...ويذكر حياته ويتمه
دمع اليتامه ياحيدر..دمع اليتامه
عند الله سرها...وموت الاخذها
*٦
علي أنته الدليل بدنيتي للدين
شمس فوكَ البريه التايهه صوبين
العرف قدرك علي يفديك العينين
تظل نور انته للشيعه يابو الحسنين
ابكَبري احطن اسمه..ع الباب اخلي رسمه
وحشه المكَابر ياحيدر..وحشه المكَابر
كل ساعه انه اشتمه...يصبح ضوه للظلمه
وحشه المكَابر ياحيدر..وحشه المكَابر
ادفني يمها ...وموت الاخذها
*
ش/ جبار عبد الزهرة الشويلي
قراءة الفاتحة لروح والدي
الشاعر جبار عبد الزهرة الشويلي
الدماء تنتصر.... والسيوف تنكسر
https://www.tgoop.com/ALshoely12
BY الشاعر جبار عبد الزهرة الشويلي
Share with your friend now:
tgoop.com/ALshoely12/8851