tgoop.com/AFKARMB3THRA1/1403
Last Update:
يوم عرفة
أهمّ يوم في حياتك كلّها
من فجر يوم ( الثلاثاء ) إن شاء الله هتبدأ أهمّ ١٦ ساعة في حياتك كلها
١- صيامه ... يُكفّر سنتين من الذنوب .. سنة قبله وسنة بعده
٢- الدعوة فيه مُستجابة ( واسألوا من جرّب ) ...أصحاب الحاجات والهموم والكروب والأمنيات ... أمامكم ١٦ ساعة ذهبية الدعوة فيها لا تُردّ ... ١٦ ساعة تقدر تصنع قدرك فيهم بإيدك بالدعاء .. ماذا تنتظر يا محتاج ؟؟
٣- قال بعض السلف : كنّا ندّخر حاجاتنا ليوم عرفة .. ليقيننا أن الدعوة مُستجابة في هذا اليوم .... فما حجّتك ؟
٤- قال أحد الصالحين : والله ما دعوتُ دعوة يوم عرفة وما دار عليها الحول إلا رأيتها مثل فلق الصبح
قال الإمام الأوزاعي ( أدركتُ أقواما كانوا يخبِّئون حاجاتهم ليوم عرفة )
٥- أكثرُ يوم يعتق الله فيه الرقاب من النّار ... في الحديث (ما من يوم أكثر من أن يعتق الله فيه عبداً من النار من يوم عرفة ) ..... إن لم تُعتق رقبتك من النّار في هذا اليوم فمتى تُعتق يا مسكين ؟؟؟
٦- كما هو معلوم إن ربنا جلّ جلاله بينزل ( كل ليلة ) في الثلث الأخير من الليل .... أما في يوم عرفة ينزل سبحانه وتعالى من أول النّهار .... ليسمع شكوى المظلوم .. ويستجيب دعاء صاحب الحاجة .. ويرفع همّ المهموم .. ويجبر قلب المكسور .... ويشافي المريض … وينزل الكرامات والفتوحات
٧- ( ١٦ ساعة ) فقط لو استغلّتهم صحّ ممكن يغيّروا مجرى حياتك كلها ... وتصنع قدرك بنفسك بإلحاحك بالدعاء فيهم ... بس بشرط إنك تكون بتدعي من قلبك ... بقلب حيّ صادق ... وتكون منظّف طريق الدعاء من وسخ الذنوب ...وتدعي وأنت معلق قلبك بالله ( وموقن بالإجابة ) وإنّ نتيجة الدعاء بتاعك أيّاً كانت هيا الخير والمصلحة ليك
٨- إن استطعت أن تعتكف يوم عرفة من صلاة الفجر حتي صلاة المغرب فلا تتردّد... وإن لم تستطع فحتماً من صلاة العصر حتي آذان المغرب ... ما تخرجش من المسجد من بعد العصر ... خد من العصر للمغرب ساعة قرآن وساعة دعاء
٩- جهزوا أمانيكم ...وحوائجكم.. فإذا كان الله تبارك وتعالى ينزل للسماء الدنيا كل ليلة (نزولاً يليق بجلاله) ..فإنه لاينزل في نهارٍ من أيام الدهر إلا يوم عرفة .. فعظّموا ما عظّم الله
⭕️ هات ورقة وقلم من دلوقتي ... واكتب فيها كل الدعوات الل نفسك فيها ... وكل الحاجات الل تتمنى تشوفها وتلمسها ....والذنوب الل أرهقتك ومش عارف تبطّلها .... ومن بعد صلاة عصر يوم عرفة حتى آذان المغرب استقبل القبلة وارفع ايدك والهج بالدعاء ... ادعي دعاء الغريق ... ادعي ببكاء ....ادعي وكأنّه آخر يوم ليك في الدنيا
١٠- في الحديث ... (خير الدعاء دعاء يوم عرفة ...وخير ما قلتُ أنا والنّبيون من قبلي ...لا إله إلا الله وحده لا شريك له، له الملك وله الحمد، وهو على كل شيء قدير) ...
ردّد هذا الذكر ١٠٠٠ مرة يوم عرفة
١١- تصدّق بأي مبلغ في هذا اليوم.
١٢- ما تخليش الشيطان يدخلك من باب ( الذنوب الل مغرقاك ) وإن مفيش فايدة .... مهما كانت ذنوبك ومهما كان بُعدك عن الطريق بسبب أو حتى من غير سبب إياك أن تقع في هذا الفخّ ...الباب مفتوح في هذا اليوم ادخل حتى لو هتدخل بالزّق... ادخل يمكن ما تخرجش تاني ... ادخل يمكن دي نقطة الانطلاق
١٣- بنفضل كل سنة في رمضان نتجادل عن ليلة القدر كانت في أي ليلة ومحدش بيبقى متأكد كانت امته بالظبط ومع ذلك بنجتهد العشر الأواخر كلهم علشان نُدركها ...إنما يوم عرفة معلوم ومعروف ومحدد فملكش حجّة علشان تضيعه أو يخونك التقدير ... خلّص أشغالك من دلوقتي وفرّغ نفسك من دلوقتي واختم كل ارتباطاتك ومشاويرك من دلوقتي ... يوم الإثنين ده اجتماع خاص مطوّل مُغلق بينك وبين ربنا
١٤- نصيحتان للبنات :- يوم عرفة يوم عبادة .. يوم تحقيق المعجزات ... يوم الرحمات ... يوم النفحات ...يوم العتق من النار ... ليس يوم لتنظيف البيوت ...ولا يوم للتسوّق ... ولا يوم للنوم ...ولا يوم للراحة....ما تضيعيش فرصتك في الترويق والتنفيض وترتيب البيت والإستعداد ليوم العيد .. فرّغي وقتك وخلّصي مهامك قبل يوم عرفة ....أو ابدأي بعد مغرب يوم عرفة
١٥- بالنسبه للحيّض : أخدتي الأجر بالنية إن شاء الله .. عباداتك كما هي غير منقوصة إلا الصلاة والصوم .. إقرأي قرآنك من هاتفك أو من المصحف بحائل ...مسبحتك معاكي أكثري من الذكر والتكبير والاستغفار .....خدي نصيبك من الدعاء .....تفنّني في صنوف الطاعات والقُربات .... وفضل الله واسع
وأخيراً .... التليفون والنت معانا علطول في كل وقت وكل ساعة ... ما استفدناش حاجه منهم .... والنت ومواقع التواصل في يوم زيّ ده هيخسّروك حاجات كتير ... هيخسّروك تركيزك ... وخشوعك ... وحضور قلبك .... بلاش النت اليوم ده ... اقفل بيانات النت من الفجر للمغرب ... انقطع عن دُنيا النّاس ... جرّب العزلة لله في أهم يوم في حياتك
يا ضيعة العُمر وخيبة الأمل وحسرة القلب إن فرّطت في دقيقة من هذا اليوم
- الشيخ عمرو جمال.
BY ﮼افكار﮼مبعثرة❤️
Share with your friend now:
tgoop.com/AFKARMB3THRA1/1403