تركنه اديارنه ولـحسين رحاله
وخـدام لخدمـكم دوم نـقـراله
بأسم المهدي موكبنه
نزور حسـين واجبنه
ــــــــــــــــــــــــــــــــ
مـوكب خـاتـم الـيمـه ــ جاي وشال راياته
حب حسين موضوعه ــ يكطعهن مسفاته
هجرنه اديارنه وجينه ــ كلمن هوه وأهاته
انصـار الغـالي سـمونه ــ موكبنه بـمجراته

نطوي الكاع احنه طويي السجاده
والـمـات بـطـريـقك صـار ميـلاده
بـروح النخوه رحبنه
نزور حسـين واجبنه
ـــــــــــــــــــــــــــــــ
درب الرحمه والغيره ــ درب العـزب بجفه
وشفنه الكـرم مالـينه ــ نعجز لمن نـوصفه
كمـر هاشـم تـلكانه ــ بيده السمره والترفه
أهـلا ظل يـنـاديـنه ــ هـله بزوارنه الـكـلفه

رحب بينه راعي الزود والغيره
مملوح السوالف اسـمه تـكبيره
كـافـل زيـنب يـحبنه
نزور حسـين واجبنه
ـــــــــــــــــــــــــــــــ
مـكـعــوده نـوايـانـه ــ جنهن عكدت الرايه
عـفنه بيـوت اهالينه ــ طلعنه اليوم مشايه
زلم حسـين والكافل ــ كلـها بـشـغف عنايه
طـرينه المـدن كـلـها ــ وعدنه كربله الغايه

والرادود يقـرا ومحلى كلمـاته
من يكول زينب تجري دمعاته
شيخ انصاره يكتبنه
نزور حسـين واجبنه
ـــــــــــــــــــــــــــــــ
نضره يا أبو سكينه ــ الـهاي الـقافله نضره
وي زيـنب تـعـنيـنه ــ ليك بدمعه وبحسره
نواسي ابنك المهدي ــ نواسي امك الزهره
يامـذبوح ياضـامي ــ هـاي ابابـك الـفـقره

خـدام الحسـين وهايه رايتنه
نواسيها الأميرة الغيره شالتنه
زينـب ديـن تـطلـبنه
نزور حسـين واجبنه
ـــــــــــــــــــــــــــــــ
نشـكر ربنا رازقـنه ــ بأسـمـك من تسمينه
خدامك يبو السجاد ــ وانته تصير والينه
خطينه العهد بالدم ــ تعـلم سـيدي البينه
واحنه بالمهد نهواك ــ وبالـخدمـه تـربينه

مـوكـبنه نشـامه وليك وفـايه
مانرجع كتبناها اعلة كل رايه
نطوفك هذا مطلبنه
نزور حسـين واجبنه
ـــــــــــــــــــــــــــــــ
تمت بعون أسد الله الغالب
العبد الذليل علي الكعبي

روح الخـدم والـزوار يابوعلي
كلمن اجاك يناديك عايف هلي

رازقني امشيلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
ونعـم مـنك مـولاي ــ مـشـيتنه بـدربك
منريد دنية ولا مال ــ يالـحاطنه بكلبك
يحسين نقسم بحسين ــ عشاك ونحبك
يا آية وإحرف من نور ــ بكلوبنه نكتبك

اجنون عابس مولاي بينه صفت
مو بس الجدام ارواح ليك عتنت
يـادمـع نـبچيلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
عـنـاي يـتـبع عـنـاي ــ رايه بظـهر رايه
عباس نهتف عباس ــ يروينه من مايه
هذا عراقك يحسين ــ مـزروع مـشايه
عفنه البيوت جيناك ــ منطيك حجايه

ياكمر قاضي الحاجات من نسئله
توبة الحر احنه نتوب في كربله
مولاي نحچيلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
هذا التسابق مولاي ــ كـل عـام يتكرر
مأجور مأجور هواي ــ كلمن مشه اكثر
لمن نطوفك يحسين ــ جن طفنه عالكوثر
ماكو مـتاعـب وياك ــ بينه الـعزم يكبر

ازغار واكبار نصـيح ماكو تـعب
وكله خـدم لـزوار هـذا الـشـعب
ياعشك نرويلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
شياب وبحيل الشاب ــ من ينذكر أسمك
كلهم يصيحون حسين ــ هنياله اليخدمك
مذبوح ويلاه عطشان ــ بعـيـونه نرسمك
من اجل دين المعبود ــ جاري نهر دمك

نقسم قسم بلعباس مانوفي الك
وشاهدنه كلمن عداك طاح وهلك
جم كاع نطويلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
اجيال من بعد اجيال ــ يحيـون هالـذكره
طوفت ضريحه مولاي ــ تـعدل الـف عمره
سمونه حجاج حسين ــ حـجينه بالـفطره
خدام ماخذنه الشوك ــ يحسـين للحـضره

انته نبضنه والروح انته الضوه
ودربك ابد ماعـفناه والقل هوه
بكلشي نضحيلك
يابوعلي دخيلك
كلمن اجاك يناديك عايف هلي
ــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

اميرتكم اجت يحسين مهظومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
اجـت زيـنب يبـو السجاد مـحنيه
وين اخـواني صاحت حـيل مابيه
جيـت مـخـدره ورديـت مــســبيه
من احرورة الكاع اجدامي مچويه

روحي جروح بيها هواي مهمومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
صـــارن اربـعـين أيام مــشـتـاكـة
حسين الغالي والله يـتـعب فراكة
لـزيـنبـكم تنـوح وتنـحب الـنــاكـة
كلبي نفطر خوية بجرحه وشواكة

يمك اشكي حالي متوني ملجومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
غـربت زيـنب ادري الـي تـبچيكم
مصـاب المـر عـلية أشـكد يأذيكم
جيت من السبي بلدمعه احاچيكم
مـذبوحـين وانتو الكـون بيديكم

رحت مـيسره ورديت مشـتومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
ياعـباس شـاهد جـرحـي بمتوني
ومن كـثر البواچي ذبـلن جفوني
بسياط وحجر ياخوية ضـربوني
بت حيدر علي والناس كرهوني

وزينبكم تـراهـا حـيـل مضلـومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
هيه الميت اخوها بيش مرتاحه
كـلبي من العرج مكطوع سباحه
حال الطير روحي الكسرو جناحه
لا ميت ولا من سـمعو اصياحه

علينه الناس بيها احقاد مسمومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
وصلت كبوركم أنه وطـفت بيها
ورايت كمر هاشم كمت احاجيها
زيـنب تنـشـتم يا حـيـف تـالـيها
المـن عايـشه الـمـيتين اهـالـيها

جارح كلبي موت حسينه ويومه
اميرتكم اجت يحسين مهظومه
ـــــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

مـن الحـبيب الـغالي ــ
هاي الرساله اقراها
زينب اجت مهظومه ــ
واحنه نجـي ويـاها

يابت علي علي وياج
تسـبيح هـذا مـمشاج
ـــــــــــــــــــــــــــــــــ
حسين دز النه الـرساله ــ
بيها كاتب ــ اجت زينب
وين خـدامـي الـغـياره ــ
خـلها تـطلـع ــ كلها تنحب
رجعت ومحني ظهرها ــ
ام خدرها ــ بشوك يلهب
انصـيح يازيـنب غـريبه ــ
والمـصيبه ــ عـالـتـسلب

ليـش بحـبل مجـتوفه ــ
ويـلاه عـقـيلة حـيدر
حـيـل الـزمـن مـاذيها ــ
ومـن الـعتب تتـعـثـر

جبريل صـوته ينعـاج
تسـبيح هـذا مـمشاج
ـــــــــــــــــــــــــــــــــ
مـن قـريـناها بـدمـعنه ــ
والمـواجع ــ بينه فزت
ويلي عالرجعت اسيره ــ
ياهظمها ــ بحيره ضلت
وياها متعنيه الـنشامه ــ
بروس اهلها ــ تنوح ردت
جروح واويلـي عـمـرها ــ
مـن صبرها ــ الروح ملت

اخت الذبيح الضامي ــ
شافت هظم ماصاير
مـن السـبي متعـوبه ــ
دايس اخوها الحافر

زيـنب جـرح لكـينـاج
تسـبيح هـذا مـمشاج
ـــــــــــــــــــــــــــــــــ
سكنه هاي وهاي رملة ــ
وهاي ليلة ــ بنوح كصدن
والعليل نشوفه يبچي ــ
وين ساعي ــ لكربله الون
الفاقلة من الشام هايه ــ
كلهه غربه ــ دموعه يحچن
بالمواكب مـر ضـعنهم ــ
ونحسبلهم ــ والكلب حن

بفيض الـدمع رحبنه ــ
ونصـيح أهلا بيـكم
صـوت اليحبكم ناده ــ
اروحــنه ننـطـيـكـم

يام الـخـدر فـهـمـناج
تسـبيح هـذا مـمشاج
ـــــــــــــــــــــــــــــــــ
الدرب كله بصوت واحد ــ
صاح زينب ــ يـاغــريبه
حسـين والكافل اخوتچ ــ
ذبـحوهـم ــ يـا مصيبه
كـلبج الـمـاشـاف راحـه ــ
بس نوايب ــ يا نصيبه
وعالنـهر عـباس مـيـت ـــ
يالعـقـيلة ــ منين اجيبه

يــالحــره يـالـعلـويـه ــ
جرحچ بعـينچ بـاين
والزمن عذب روحچ ــ
مارحم بيچ وخاين

جبـل صـبـر قـريـنـاچ
تسـبيح هـذا مـمشاج
ـــــــــــــــــــــــــــــــــ
وصـل ضعـنچ توه الطف ــ
والكلب رف ــ يم اخوتچ
وسـفه ما كامـو يـلاكوچ ــ
لمن سمعوا ــ ناده صوتچ
هظم جـاسچ اه يم عون ــ
كـلمة شلـون ــ ما تفوتچ
اشـكد تـمنيتي تمـوتنـي ــ
وي لحسين ــ ردتي موتچ

تمنيتي موتچ زينب ــ
بالـعاشـر وصـعبات
من شفتي منحر دامي ــ
وشفتي كثر طعنات

وناده الـشمر سبيناچ
تسـبيح هـذا مـمشاج
ـــــــــــــــــــــــــــــــــ
تمت بعون أسد الله الغالب
العبد الذليل علي الكعبي

صوت هز الكائنات
بعد ماتسوه الحياة
راح ابوي وفاض دمعـي
وباجر يكسرونه ضلـعي
بعد ماتسوه الحياة
ـــــــــــــــــــــــــــــ
صاحت املاك السمه وقامت عزاء
وحـزنت الـحــور وتـنـوح الأنـبياء
البكة براسچ فاطـمه مـات الـضياء
وبـظـهر حيـدر علـي بـان انـحـنـاء

موت الغالي يعذب غالي
كاعد حيدر يبچي كبالي
مجروحه الجلمات بعينه
وغير الهم لا ما يصفالي

فاطمه حيدر يكول
ليش عفانه الرسول
صعب وضعه نار وضعي
وباجر يكسرونه ضلـعي
بعد ماتسوه الحياة
ـــــــــــــــــــــــــــــ
أنه روحي منالجسد ماخوذة ليش
بالمصايب والهـظم لو ردت اعيش
خلاف ابويه كـلبي يصبر بله بيش
ثكل حملي الجان وزنه مثل ريش

اليفكد والد الله يعينه
مايـرتاح ابكـل اسنينه
والآهات تـصير متاعه
وصيح الوالي مخلينه

جرحي ناده يالحنين
بويه رايـح عني وين
وياك اسولف هذا طبعي
وباجر يكسرونه ضلـعي
بعد ماتسوه الحياة
ــــــــــــــــــــــــــــــ
كـمت ادور بويه عـنك كـل مـچان
الـراحه مــامـرت عـلـية ولا أمـان
طـولك وفيـك يـغـالي يمـي جـان
خذك مني ومارحمني بيه الـزمـان

شـالو نعـشك لـو دلالـي
يالموتك غيرها احـوالي
محنيه وانحب حاچيني
بعيوني الدمعه وبخيالي

خيط او بشمعة اصير
يحرك بروحي السعير
ليش عايف كـلبي انـعي
وباجر يكسرونه ضلـعي
بعد ماتسوه الحياة
ــــــــــــــــــــــــــــــ
مـن أجلنا الباري خـالق هالابحار
وخـالـق الليل وضلامه والـنـهـار
والفلاك بجف علي مـن الله قرار
للـيحبـنه الـجـنة للـيبـغـضنه نـار

الله بكيفه فارض حبنه
بعض الوادم ليش اضدنه
أنه الزهره وهاي اولادي
فـراكك يابويه يـعذبـنه

حـتما يحركـولي باب
بـويه ووكـع عالتراب
ولا تـروح بـلهـفه ادعـي
وباجر يكسرونه ضلـعي
بعد ماتسوه الحياة
ــــــــــــــــــــــــــــــ
بويه باجر تنسطر من عندي عين
تون زينب والحسن ويلاه حسـين
وكلبي يشبع ضيم لاحزانه رهين
اغفه واصحه كلت وينك يالحنين

باجر غربه اتصير الدنية
وزهرائك تـوكـع مـحنية
محسن من يموت اكبالي
واتـخيـل زيـنب مسبية

علي ابمحرابه يطـيح
والحسن جبده جريح
بالـجروح لكربله اسـعي
وباجر يكسرونه ضلـعي
بعد ماتسوه الحياة
ــــــــــــــــــــــــــــــ
تمت بعون أسد الله الغالب
العبد الذليل علي الكعبي

مـاشـي بلـيل دفـان
شايل نعش الاحزان

دافن ضواي الغالي
والهجر عذب حالي
ــــــــــــــــــــــــــــــــــ
دفن الحبايب موسهل يحني الظهر
وأنه المشـيت بليلي وابـالي الـصور
بهمومي محد يدري من هاي البشر
ضلع المحنه بروحي حسيت نكسر

بابي الهوه من لـوح
منـي مـاخــذ الروح

شكبره جرح دلالي
والهجر عذب حالي
ــــــــــــــــــــــــــــــــــ
فوك الـمتن شـايل احـسن دنيـتـي
وبالكون كـله ماحـصل مـن غربتي
حيلي كـضه مـن شـيعـتهه زهـرتي
مات الامان ابعيني عاشت حسرتي

ينبض كلبي ويكـول
ماتـرجـعـلي معقـول

نـوح ودمـع بخيالي
والهجر عذب حالي
ــــــــــــــــــــــــــــــــــ
ماشـايف الغـربه وعـشتها بالـدفـن
حـكه الـيفارك حـكـه يـاعـالـم يـون
ماحزن كلبي وهسه فايض بالحزن
كل يومي تجرح بيه بس كلمة وإن

الغـربة تارسه العين
راحـت ام الحــسين

ذاك الـكـسر يبرالي
والهجر عذب حالي
ــــــــــــــــــــــــــــــــــ
زهرة حـياتي دافـن بنـص الـترب
ورديت امشي وأعثر بكـل الدرب
ياحيرتي لدار من اوصـل واطـب
ما الكه بيهه العافيه ومات العذب

زينب كـاعـده تنـوح
وانه بطولي الجروح

ضلت صورها ابالي
والهجر عذب حالي
ــــــــــــــــــــــــــــــــــ
أنه علي الما أنكسـر شـو منكسر
بالترب دافلي سمه وكمره وعمر
عيوني من كد البچي صارن حمر
زينب تون كلبي يون مات الصبر

بحايط بيتي نيشان
دم مكسوره الغصان

طـيحتهه تتراوالـي
والهجر عذب حالي
ــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

اسمع حديث ضلوعي
وركـز عـله مـوضوعي
داري عـلـي حـركـوها
ونزلت غزيزه دموعي

بيا دين انه يطلبوني
روح الله ويشتموني
كلـمـة وإن أسـمـعـها
والسطره فوك عيوني

انـذال ومـابيهم رحـمـه
وين الخاين والمو زلـمه
هجمو عالدار وهضموني
مات ابني وماكالو زحمه

زهراء ويلي يازهراء
ــــــــــــــــــــــــــــــــــ
سر الحياة أنه اسـمي
كوثر لاجن صب دمي
وبـعـد الابـو خـلـونـي
ملجومه وابچي بهمي

لـمـن أجـو عـصروني
بكسر الضلـع عافوني
أنه الامـيـرة بعـرشي
بذاك الحقد ضربوني

اشكف سوط ونار بجفي
ومـارد الـظالـم لا يعـفـي
زيـنب ناحـت نـادت يمه
لجروحي المدمع مايكفي

زهراء ويلي يازهراء
ــــــــــــــــــــــــــــــــــ
محـسن وكـع عالغبره
عـشت الالم والحسره
فوك الترب ظل دامي
مـات الضوه الأنتضره

صـاح الحـسن يـايـمه
حيـلي الـوداع يهدمه
حـنيتچ امـن افـكدها
بسنيني اكـبـر صـدمة

حيدر بيه يدرون موصه
ونتاحت الهـم هالـفرصه
مـا بيهم خـيـر يتـعـاتـب
وماعدهم كطرة البلكصه

زهراء ويلي يازهراء
ــــــــــــــــــــــــــــــــــ
النحره يصب دم باجر
شـافـاني ضـل يكـابـر
بعيـونه شـفت الغـربه
وشافاني ليلي العاشر

مـعــتـازچ يـحاچيـنـي
بـس وحـدي لتخليـني
شاف الـضلـع مـتكـسر
من كلـبه ون احسيني

ضليت امسح دمعه عيونه
وباجر بالخـيل يـسحكـونه
كـل دمـعه التنزل لجروحة
مسجلتها الزهره ومضمونه

زهراء ويلي يازهراء
ــــــــــــــــــــــــــــــــــ
ركـز بـعـد واسـمـعــني
صـعبه عـلـي يـودعني
حـيله نـهـدم حـسيـته
بضلمه ومشه وشيعني

بخطواته ويـلاه يعـثـر
الـيكدر صـبح مـايكدر
يـنـادي حـبيبة كـلـبـي
روحتچ سـيف بـمنحر

مـيته وهم بچتني جروحه
صعبه الواحد يـدفن روحه
حيدر دافن روحـه وراجـع
ضلت بس همـومه ونوحه

زهراء ويلي يازهراء
ــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

زهرتي من طفه اكبالي ضواها
جروحي نزفت ودمها الجـواها
الـمـصيبه الـمـاتـمـر بيه مـثـلـها
غريبه أم بيتي محد سـاعـداها

روحي صاحت هظمتي الجبيره
الحـيـل احـبها نحـيـله وكسـيره

ودمعت العـالمـه ــ كل جبل تهدمه
ونت مـنل هـظم ــ ويلي يـافاطمه

منها محسن وكع ــ وانه كلبي نشلع
عاشـرت حيرتي ــ والونين انسمـع

الخايف عليها من الخطر
سورة حمد خدها نسـطر
جفن الزجية احـمر صفه
وراعي الـصبر كـوه صبر

جره دمعي يازهراء
ــــــــــــــــــــــــــــــــ
العشت وياها كل عمري بسعاده
جرحها خله كلبي هـمـومـه زاده
حنينه الـزهره وبـروحـي شـلتها
حـسافه جف نـذل يـمها يتـمـاده

ومـن اجـاهـا ونـضـرها وحـيـده
بكل صلافه وحـقد يـرفـع ايـده

المايحب حيدره ــ يسطر الطاهره
غيره مايمتلك ـــ وبـايـع الأخـره

جره نهر الحزن ــ قرب جنه الدفن
فاطمه بياوضع ــ من كسرها تون

وهـنـا بــده نـوح الـسـمـه
جـرحـك علـي مـا أعظـمه
دمـعـك يـصب مـاينكـطـع
وروحـك عـلـيهه مـهـشـمه

جره دمعي يازهراء
ــــــــــــــــــــــــــــــــ
اودها وروحي متـعـلـمه عـليها
العـمـر ظلمـه اذا مـابيه حجيها
يسولف كلـبي راحت مــن اديه
وجرح عـاشرني يـا ذاكه بچيها

بابي أشوفه وتخضر حسرتي
وكلبي احسه يسيل بدمعـتي

أنه ذاك الأسد ــ حيلي كله ركد
يم ضلع فاطمه ــ دمعي ينزل مدد

شيعتي ضحكتي ــ قادمه غربتي
مايمـرني الهنه ــ وعايش بلوعتي

جــمـره بدليلي شتنـطـفـي
جرحي اعله طولي شيختفي
أنه عـلـي وجـن مو عـلـي
دافن كـلب كلـلـش وفـــــي

جره دمعي يازهراء
ــــــــــــــــــــــــــــــــ
الزمن لا ما رحـمني وعذباني
برحيل الزهره تعبني ودهاني
أسولف والدمع تارس شليلي
اكوم وتبقى الجروح بمچاني

صبحي غـربه ومسيتي أذيه
وكـتي كــله أحـــــن للــزجيه

راحت ام الحسن ــ عمري ضيم ومحن
حزنه بجه الحجر ــ علي فاكد وطن

عشت شابع قهر ــ دمعي مثل المطر
فـاركت فـاطمه ــ وأنه كلبي نكسر

حـيـدر جبيـره مـحـنتي
من عندي راحت زهرتي
شفت المصايب والجرح
ودارت عـلـيه دنـــيــتـي

جره دمعي يازهراء
ــــــــــــــــــــــــــــــــ
رجعت امن الدفن لاكتني زينب
تنـادي امـي ويـن بحيـره تنحب
كـلـت ما ترجـع ومـيـته الحبيبه
وبعدها موتي يمي شفته يكرب

جـرحي نفسه جـرحـها أشـوفـه
حرت اضمده لون يجري اعوفه

عشن نفس الالم ــ عن ضلع ماسلم
نـوحي ماينتهي ــ بالكلب جم سهم

ياحزن مـاكـضه ــ وكسرة المرتضى
تبقى طول الزمن ــ بعين كل الفضه

تنوح السمه وتبجي الأرض
وكل سـاعه روحـي تنقبض
مفـارك ضـوه مفـارك نـفس
دمعـي ومـصابي الـمايفض

جره دمعي يازهراء
ــــــــــــــــــــــــــــــــ
تمت بعون أسد الله الغالب
العبد الذليل علي الكعبي

انه كلبي أسير معناها
بجنحي اطير بسماها
الله يـكـول ونـبيه
فاطم أجمل هدية
صوت الحب يدوي بيه
انه خادم يازهراء
ـــــــــــــــــــــــــــ
وردة حب يحمل وحي الله ــ ما شاء الله
ولـون الجنة تـغـير شـفـنـاه ــ ما شاء الله
مـوعـد باريـنه ويه اليهـواه ــ ما شاء الله

شــــتريد تــقــدم مــن تـهـوه
شي كون بمعنى الحب يسوه
فـاطم هـاي ام كـل الـصـفـوه

قــد اعــطيـنـاك يـا طــه
زهرة على الكون تتباهه
روح الهادي ووصيه
فاطم أجمل هدية
صوت الحب يدوي بيه
انه خادم يازهراء
ـــــــــــــــــــــــــــ
قطعة انخطت فوك الأرجاء ــ بسم الزهراء
جبــريــلـچ رادود الـعـلـيـاء ــ بسم الزهراء
دعه كل امـلاكه بـلا استثاء ــ بسم الزهراء

اول شخصين بهل الدعوة
ادم والـي تــــهــوه حــوه
تزداد الفرحة بكل خطوة

كل واحد چاي لأجل الرب
مـن الرحـمـن صار أقـرب
يحصل رتبة العلية
فاطم أجمل هدية
صوت الحب يدوي بيه
انه خادم يازهراء
ـــــــــــــــــــــــــــ
فوك احتفلوا واحنه معيدين ــ بسم ام حسين
يدرون احنه بحبـها مجـانين ــ بسم ام حسين
ورد انطش بس متشوفه العين ــ بسم ام حسين

كل طيرة تغازل طير ابيض
حب عـذري ولا مـايتعـوض
وبـكـلـمـات الحـب تتـلـفـظ

لوحة عـشاك عذرية
عالدنيا تفيض حنية
وبعطور النرجسية
فاطم أجمل هدية
صوت الحب يدوي بيه
انه خادم يازهراء
ـــــــــــــــــــــــــــ
تمت بعون أسد الله الغالب
العبد الذليل علي الكعبي

انسانية ــ لو حوريه ــ زهراء زهراء
ـــــــــــــــــــــــــــــــــــــــــــــــــــــ
وجه السماحه ــ بين صباحه ــ
ومن المـعالي نـوره نزله
كوثر الهي ــ بـسـمـه نبـاهي ــ
يسري فلكها كوكب زحل

مبهور كـل الشافة وسأل
هالنور حـاشـا مـن الخلل ــ هالنور هالنور

بالنبض سؤال ــ شنو سره هالجمال
للملى اتضح ــ والكلب صدح ــ انسانية
ـــــــــــــــــــــــــــــــــــــ
ليلة اماني ــ فرحة وتهاني ــ
هليلة حلوه بم الحسن
هيبة حفلنه ــ رايـة أمـلـنه ــ
نادينه كلنه رغم الزمن

ياريت جفها علينه تمد
ياريت تقبل سر الحمد ــ ياريت ياريت

مايرد محال ــ كلمن اسمها كال
كلبك نشرح والكلب صدح انسانية
ــــــــــــــــــــــــــــــــ
بسم الزجية ــ أجمل هدية ــ
بالبشرى احلى بيعة شرف
من حامي جاره ــ صوت الغيارى ــ
والزهره تعرف اهل النجف

بخلاص ــ ايمـاني وقـنـبري
بخلاص ــ هالصوت المنبري ــ بخلاص بخلاص

همة الرجال ــ تتجلة بالفعال
لفاطم نجعل والكلب صدح ــ انسانية
ــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

❓هل تريد أن تنال رضوان الله❓

إقرأ هذه الرواية..📜

🔺عن الإمام الجواد(عليه السلام):

ثلاث يبلغن بالعبد رضوان الله تعالى:
🔹كثرة الإستغفار.
🔹لين الجانب.(أي:سهولة المعاشرة)
🔹كثرة الصدقة.

💡وهنيئا لمن اجتهد فيها كلها💡

ماتنحسب يالكاظم اجروحك
ضيم الخرابة العايش بروحك

غريب .. بس تنعة الغريبة
غريب .. ما يخلص نحيبة
@@@@@@@@@@
سابع حجج رب السمه ..
ناصب شفت طف الخيم
جرحه الجبير يعذبه ..
او الحزن وي كلبه رهم
بركان بجروحه الجمر ..
حيله عله حسين انهدم
واويلي عظمة امصيبته ..
نزلت دمعات الصنم

المهيوب ليش بحيرته وضيمة
اوبكلبة تدوي نار جم خيمة

غريب .. يسئل عن حبيبة
غريب .. ما يخلص نحيبة
@@@@@@@@@@
العايش اجفوف مكطعة ..
عالشاطي وبسدهن جبل
هاذ الجره والي جره ...
فكر الزمن منة انذهل
موسى بن جعفر حالتة ..
بالغربة وويون عل أهل
او من المصاب العايشة ..
كل لحظة يتمنة الأجل

المهظومة روحه الموت يتمنة
طيحات جده اهواي لجمنه

غريب .. بعيونه المصيبة
غريب .. ما يخلص نحيبة
@@@@@@@@@@
بالظلمة والسندي بحقد ..
عالوجة صار يضربة
هاذه امام الرافضة .....
مشيبتة حيل الغربة
ابدلالة حسرة منذبح .....
وجروح بي متخضبة
ضيمة الخرابة بلسجن ....
مرمرة او فطر كلبة

مذبوح يجري المدمع ابخدة
يون اعلة غالي عالنهر زندة

غريب .. كل اهله سليبة
غريب .. ما يخلص نحيبة
@@@@@@@@@@
بعيونة هيمه او عايلة .....
تايهة ومحد ليهة
حيطان سجنة تون صفت ..
من دمعتة اليجريهة
جلماته يا رب السمه .......
ليش الزمن ماذيهة
زينب غريبة ابلا أخو .....
طاح الكبل يحميهة

موسى ابن جعفر كل معاناته
بحبل اليسر مجتوفة عماته

غريب .. حسراته رهيبة
غريب .. ما يخلص نحيبة
@@@@@@@@@@
يل رافضه صبوا الدمع ..
حالتة الكاظم كلفة
والله السلاسل قاسية ..
امن اجدمه ولحد جفة
عايش صبح حبل اليسر ..
والدم كثر من نزفة
شصاير بروحه الطاهرهة..
هاذ ابو روح الترفة

سم الشماتة يكطع ابجبدة
حسراته ليش بكلبه متوسدة

غريب .. وجروحه لهيبة
غريب .. مايخلص نحيبة
@@@@@@@@@@
تمت بعون أسد الله الغالب
العبد الذليل علي الكعبي

يابويه جرحك مو سهل
دموعي اناديك ــ بدموعي اناديك
ــــــــــــــــــــــــــــــــــــــــــــــــــــــــ
جريح وجرحك ابعيني أشوفه بويه واتحسر
علي القالع حصن خبير عجيبه بـمشيتك تعثر
دمه من راسك لجدمك ايسيل وحكي اتـحير
ضلام الدنية بعيوني دحاجيني يبو الحسنين

مـحتاره حيـره ياعلي
واطيب اتانيك ــ دموعي اناديك ــ
بدموعي اناديك
ــــــــــــــــــــــــــ
مشيتك بطولك الهيبه اجيت ولن يسندونك
حسن وحسين اصد ليهم عله كيفك يمشونك
دمـعهم يروي ماصاير ومـخافـتهم يلجمونك
طفح روج الحزن بيهم يـوالينه فجعنه البين

يالغالي مفجوع الكلب
كل ونة عليك ــ دموعي اناديك ــ
بدموعي اناديك
ــــــــــــــــــــــــــ
احس اعلى السفر ناوي تمهل واسمع الـعندي
اذا عـنـي رحت بويه غريبه ابقى أنه الوحدي
اشـم ابثيابك وابـچي صبح كـل الزمن ضدي
غريبه بغيبة عيونك هظم يابويه مالي العين

اكعد بعد محد الي
ياجرح ياذيك ــ دموعي اناديك ــ
بدموعي اناديك
ــــــــــــــــــــــــــ
أحبك واعـرف تحبني اعله فراكك ولا اكدر
ابوي العايش بروحي اذا تمشي الحزن يكبر
يشيب راسي والعينين دمعها من يهل احمر
حزنه ياجرح راسك نشاهد وضعك الموزين

دكـتـور وتشافي العلل
انته الموصفيك ــ دموعي اناديك ــ
بدموعي اناديك
ــــــــــــــــــــــــــ
كلف وضعك يبو اليمه الطبيب انطه خبر موتك
تـحيرنه يبـو زيـنـب نحل جسمك ضعف صوتك
بملامح وجهك نلاحضه بادينه نـشـيله تـابـوتك
نشيعك يعني صرنه ايتام بزغرنه ياعلي مشيبين

بجنة عدن يا ابا الحسن
من ننجمع بيك ــ دموعي اناديك ــ
بدموعي اناديك
ــــــــــــــــــــــــــ
تمت بعون أسد الله الغالب
العبد الذليل علي الكعبي

السلام عليكم ورحمة الله وبركاته
كل عام وانتم بالف خير وصحة وسلامة يارب

كل عام وانتم من الحسين ع أقرب وأقرب يارب