· ယခု ရက်သတ္တပတ်ထဲ မတရား ဖမ်းဆီးခံခဲ့ရသူတို့အနက် မြို့နယ် ၅ မြို့နယ်တို့မှ လူ ၈ ဦး၏ ဖြစ်စဉ်ကို သိရှိလိုက်ရသည်။
· သင်္ဃန်းကျွန်း၊ ဗဟန်း၊ တာမွေ၊ မင်္ဂလာတောင်ညွန့်နှင့် တောင်ဥက္ကလာမြို့နယ်တို့၌ ဖမ်းဆီးခံခဲ့ကြရခြင်းဖြစ်သည်။
· ရှာဖွေဖမ်းဆီးခံရသူ ၄ ဦးနှင့် ရမ်းသမ်းဖမ်းဆီးခံရသူ ၄ ဦးတို့ ပါဝင်သည်။
· ရှာဖွေဖမ်းဆီးခံရသူ ၄ ဦးမှာ ရွေးကောက်ပွဲဆန့်ကျင်သောကြောင့်ဟုဆိုကာ ဖမ်းခံရသူ ၂ ဦးနှင့် စစ်မှုထမ်းအတွက် ရှာဖွေဖမ်းဆီးခံရသူ ၂ ဦး တို့ဖြစ်သည်။
· ရမ်းသမ်းဖမ်းဆီးခံရသူများမှာ လမ်းမပေါ်သွားလာနေစဉ် ဖမ်းဆီးခံကြရခြင်းဖြစ်သည်။
· နာမည်ကျော် အနုပညာရှင်တို့၏ အတွင်းရေးများကို ဝေဖန်ပြောဆိုသူ အွန်လိုင်း ဆယ်လီ သမီးဆိုး (ခ) သက်ကိုကို ကို မင်္ဂလာဒုံလေဆိပ်၌ စစ်ကော်မရှင်မှ ဖမ်းဆီးခဲ့ပြီး ၆၆ (ဃ) ဖြင့် အမှုတပ်ထားကြောင်းလည်း သိရသည်။

· အောက်တိုဘာလ ၁၁ ရက်နေ့တွင် အင်းစိန်အကျဉ်းထောင်မှ လွတ်ရက်စေ့၍ လွတ်မြောက်လာသည့် နိုင်ငံရေးအကျဉ်းသား ကိုဇော်ဝမ်းမောင်ကို ထောင်ဘူးဝ၌ စစ်ကော်မရှင်မှ ပြန်လည်ဖမ်းဆီးသွားကြောင်း မီဒီယာသတင်းများမှ သိရှိရသည်။
· အကြမ်းဖက်ပုဒ်မ ၅၂ (က) တပ်ပြီး လှိုင်မြို့နယ်၊ ပိတောက်ရဲစခန်းသို့ ဖမ်းခေါ်သွားခြင်းဖြစ်သည်။
· ကိုဇော်ဝမ်းမောင်သည် အသက် ၅၃နှစ် အရွယ်ရှိပြီဖြစ်ပြီး ၈၈ ငြိမ်းချမ်းရေးနဲ့ ပွင့်လင်းလူ့အဖွဲ့အစည်းတို့၌ ပါဝင်လှုပ်ရှားခဲ့သည့် နိုင်ငံရေးတက်ကြွလှုပ်ရှားသူတစ်ဦးဖြစ်သည်။
· သူ့ ဇနီးနှင့် သား ၂ ဦးတို့ကိုလည်း အကြမ်းဖက်စစ်ကော်မရှင်မှ ဖမ်းဆီးပြီး ထောင်ချထားသည်။

· ရန်ကုန်မြို့မှတဆင့် ရခိုင်ပြည်နှင့် မလေးရှားနိုင်ငံများသို့ ပို့ဆောင်မည့် မူးယစ်ဆေးဝါးများကို စက်တင်ဘာလကုန်ပိုင်းတွင် ဖမ်းမိခဲ့ကြောင်း စစ်ကော်မရှင်မှ သတင်းထုတ်ပြန်ထားသည်။
· ငွေကျပ် ၁၉၅.၈၅ ဘီလီယံခန့်တန်ဖိုးရှိ အိုက်စ် ၃၄၃၈ ကီလိုဂရမ်၊ ကတ်တမင်း ၂၁၉၈ ကီလိုဂရမ် တို့ ဟု ဆိုသည်။
· လှည်းကူး၊ ရွှေပြည်သာ၊ ထန်းတပင်၊ သုံးခွ၊ လှိုင်သာယာနှင့် တွံတေးမြို့နယ်တို့၌ ဖမ်းဆီးမိခဲ့သည်ဟု ဖော်ပြထားသည်။
· AA အဖွဲ့မှ ပို့ဆောင်ဖို့ ပြင်ဆင်နေခဲ့သည်ဟု အမည်တပ်ထားသည်။

· စစ်မှုထမ်း အမှတ်စဉ် ၁၅ သင်တန်းဆင်းကြောင်း အကြမ်းဖက်စစ်တပ်မှ အောက်တိုဘာလ ၁၀ ရက်တွင် သတင်းထုတ်ပြန်ထားသည်။
· တိုက်ကြီးမြို့နယ်ရှိ ဂျိုးဖြူ တတက ၁ မှ လူ ၂၄၀ ခန့် သင်တန်းဆင်းလာကြသည်ကို ၎င်းတို့ ထုတ်ပြန်ထားသည့် ဓာတ်ပုံများအရ သိရှိရသည်။

· အောက်တိုဘာလ ၁၀ ရက်နေ့ မနက်ပိုင်းတွင် အကြမ်းဖက်စစ်ခေါင်းဆောင် မင်းအောင်လှိုင် ရန်ကုန်မြို့ထဲ ရှိနေခဲ့သည်။
· ရန်ကုန်-ဒလ တံတားသစ်သို့ ကွန်ကရစ်သွန်း တံတားဆက်ဖို့ဆိုကာ ကနဦး လာရောက်ခဲ့သည်။ ထို့နောက် အရှေ့ဒဂုံမြို့နယ် လေးထောင့်ကန်ဘက်၌ စစ်မှုထမ်းဟောင်းများအတွက် တည်ဆောက်နေသည့် အိမ်ရာထဲ ဝင်ရောက်သွားခဲ့ကြောင်း စစ်ကော်မရှင်မှ သတင်းထုတ်ပြန်ထားသည်။
· ယခင် ဇန်နဝါရီလကလည်း ၎င်းတည်ဆောက်ဆဲအိမ်ရာကို မင်းအောင်လှိုင် ဝင်ရောက်သွားခဲ့သေးသည်။ အဆိုပါအိမ်ရာနေရာကို စစ်မှုထမ်းဟောင်းမြို့အဖြစ် တည်ဆောက်ဖို့ ရည်ရွယ်ထားသည်ဟုလည်း ဆိုသည်။

· ပိုက်ဆံ ကျပ် ၅ သိန်း ၅ သောင်းပေးပါက ၅ ရက်အတွင်း ပက်စ်ပို့စ်အပြီးရနိုင်ကြောင်း စစ်ကော်မရှင်မှ ထုတ်ပြန်ထားသည်။
· ပုံမှန်အတိုင်း ဆက်လုပ်လိုသူများလည်း ကျပ် ၄ သောင်းခွဲဖြင့် QR ယူနိုင်သည်ဟု ဆိုသည်။

· ယခု သီတင်းပတ်အတွင်း ဧည့်စစ်လူရှာဖြစ်စဉ်များအနက် မြို့နယ် ၅ မြို့နယ်မှ ဖြစ်စဉ် ၅ ခုကို သိရှိခဲ့ရသည်။
· မင်္ဂလာဒုံ၊ ကမာရွတ်၊ သင်္ဃန်းကျွန်း၊ တောင်ဒဂုံနှင့် မြောက်ဥက္ကလာမြို့နယ်တို့၌ ဖြစ်သည်။