[لشهادة الزهراء عليها السلام ١٤٤٦ ]

يافاطمه وصارت صدك ... شاء القدر ان نفترك

          ويبقى سؤالي سؤالي سؤالي

          تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ماخفت يوم بدنيتي بس جنت خايف افكد

بيا  وكت  ياأم الحسن  وحدي  بدارج اكعد

امضيع بشر جو الترب وطبع المضيع ينشد

ولو  شايفه  زينب امس تشتم مجانج وترد


   وتكلي امي راحت ... كتلها بويه ارتاحت

          وشنهو البكالي البكالي البكالي

          تعود  الليالي  الليالي  الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وماينوصف  حالي ابد  ولاحال  ايتامج   هاي

هاي  اول  مره احس  امدوهن  يزهره بلا راي

وغسلتج   بدمعي  لأن  ادري الكسر ياذيه ماي

ذبحتني السطره البيها اثر بجتني يازهره هواي 



ساكت وتحجي دمعتي  ... ابداري صارت غربتي


           ومو زين حالي حالي حالي

           تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

انصاب ضلعج  وانه كلبي  بغيبتج  هم انصاب  

ويوميه   بعيوني من افز  يافاطمه  دمة الباب

عاتبت جفي  شلون هال  اعليج  يازهره اتراب

ماتحلى يم زينب بعد دنيه الخذت مني احباب




  راحت بسمة الدار  ... وكابل عيني بسمار

          
            ضل بيتي خالي خالي خالي

            تعود الليالي الليالي الليالي ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وماجانت  ابالي  ابد  ابيوم  اطلع  ابتابوتج

ولمثل  عمرج يم حسن ماحاسب انه  لموتج 

كلساع اشم عطرج لجن مشتاك اسمع صوتج 

وحسين  ينشدني شكثر عنج شكله امروتج ؟


يكلي معقوله الحنينه ... راحت يبويه وماتجينه


             ودمعه  يلالي  يلالي يلالي

             تعود الليالي الليالي الليالي ؟


الشاعر الحسيني: عباس محمد الحميداوي

١٤٤٦.٢٠٢٤ شهادة الزهراء عليها السلام الروايه الأولى

[ميمر لشهادة الزهراء ١٤٤٥]

دمعة محب ...المن تصب؟ ... واخذ الجواب من الكلب

هاي الدموع أعلى امصاب ... ام الحسين الزهره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

امصاب الزجيه كلف صايب جبدي

حاير انه اختم بيش لو بيش ابدي

وابهاي الليالي  الله  يعين  المهدي



ايمامك يون ... من الو (أن) ... بذنه لحد هسه ترن

سطرة جفنها وكل سوط ...طكاها بعد العصره 


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ادافع  وياهم  مره واصرخ  ليش

يابن قحافه جامع  اعليه الجيش

فاطمه  انه  الماتريدوها  اتعيش


ابحقد وغضب ... جامع حطب ... هجمو علي اشهد يرب

المحسن نذبحه تكولون ... وامه ضلعها نكسره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بسمار باب الدار طب حد ريتي 

الهوه اشتمه براحه هاي امنيتي

وتنشدني زينب خوما اتجويتي


وانه الجمر ... لاح الكسر ... انهض وعالكاع انهطر

الدم ترس حوش الدار ... والعين صارت حمره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

لهاي المصايب دمعة الشيعه تكت

وكلمن يلومك عاللطم كله اسكت

هم تجي  مثل الزهره يالايم بت ؟


الضرك شنو؟؟ ... وانت منو؟؟ ... ماخذك بالدين الغلو

ماعاجبك شيعي تصير؟ ... ومنك  علي  يتبره

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

كل سنه هاي البدعه  منكم تنثار

تكولون اصل مايوجد لكل الصار

ابهذا   الكلام  الله  يعين  الكرار


تتشكك فئه ... وانت النأى ... ابرايه وكلامك منشئه

كل فكر ضد خط الدين ... افلان وفلان امصدره


الشاعر؛ عباس محمد الحميداوي

٢.٢٣.١٤٤٥.٢٠٢٣ شهادة الزهراء عليها السلام

[ثكيل ... بين الزهراء وأمير المؤمنين علي حين وداع الزهراء ١٤٤٤ ]
      
         فاطمه توصّي على فراش الموت

         ياعلي  ابليل  انت شيل  التابوت

يل منهدم كل حيلك ...  ... اكعد اريد احجيلك

                       ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياعلي موت  وحياة   الدنيه  هاي  امقسمه

والموت موعد لانسبقه ولا احنه الي نقدمه

ونزل هلمره أعلى دارك يريد  ياخذ  فاطمه

وياعلي  عندي  وصايا  الكلب  حيل  اتألمه




          ابحالي تدري والجره اعليه وصار

          مابيه  اعيشن  بعد  فعل  البسمار 


وعن الكسر شرويلك ... ... اكعد اريد احجيلك

                      ياعلي ... ياعلي


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياعلي  الله يصبرك  ابحين  لحظات  الغسل

ياعلي   المنظر  عظيم   ومنه   رايح  تنذهل

وابزاويه  من الدار  حيدر  لمن  تنظر  تتعزل

يطول نوحك من تناظر بعيني شمسوي النذل



        لازم يفيّض صبرك هواي هواي

        لمن تغسّلني  ياحيدر  بل الماي

        
  جمرة حزن اتخليلك ... اكعد اريد احجيلك

                     ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياعلي كلمن ظلمني وحّرف انواع الحديث

والكال ماكو نبي مات وبعده يتورث وريث

الكسر ضلعي  خليفه  عدهم ودينه حنيث

مااريده بساعة اتشيل النعش هذا الخبيث



         
           من  نار ربنا  منهو  الهم  منقذ

          ذيج العصابه الجان منهم قنفذ


واصبر ياحامي ادخيلك ... اكعد اريد احجيلك

                       ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياعلي  ضكت الهضيمه بحين موت الوالده

شفت موقف البيه روحك ابلا شعور امعوده

ابغلفه  وتنادي  يايمه  وابكبر   هيه   امدده

علي ذوله ايتامي يمك وسرمد احزانج بده



         موعد رحيلي اقترب ويمكن حان

          واتعهد  كبري  واقره يمي القرأن


    استمع خل ترتيلك ... اكعد اريد احجيلك

                    ياعلي ... ياعلي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وعمت عيني على زينب من زغرها مدوهنه

شوفها   باري   دمعها   المالها   ساعة   هنه

الدهر  بيت  المصايب  على اسم زينب بنه

تنسبي   وتموت  أهلها   هاي  كلها  امدونه



            وياعلي زينب تفز وكت الليل

           ولصب دمعها رايده منك حيل


واسيها من تشكيلك ... اكعد اريد احجيلك

                   ياعلي ... ياعلي


الخادم: عباس محمد الحميداوي

لشهادة الزهراء عليها السلام

(لسان حال أمير المؤمنين وهو يدفن الزهراء عليها السلام )

تنشدني روحي بالخبر  وجبت الدرب احجيلها

الشايله همومك علي أعلى امتونك انت تشيلها

مذهوله روحي وتسئل  ... ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بين  اصدك  خبر موتج بين اصدك حيل عندي

حاير  ابوحشتي  دونج  وابفرحتي الدنيه تبدي

هسه  لو افترض  عفتج ابهذا كبرج وارد وحدي

شرد اجاوب عين زينب شرد اجاوب عين ولدي



     يافاطمه اليمج علي فتحي اعيونج لجله

    الموت أسهل عد علي ومصيبتج مو سهله


  تفتحيلي عين اتأمل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


هاهيه    ويعني   انسه  الهلا    لداري من  اردن

يل  اخذتي حيلي اسمعي يم وجه وارسوم ذبلن

كلت عينوني اعلى نعشج امتوني يافاطمه هدلن

اتخيلي شكد صعب موتج علي عيونه اعليج هلن


  
   صعبه الرجل يافاطمه تفضح أحزانه الدمعه

  من حكي انوحج فاطمه يلجنه شمعه وشمعه

   والشمع ابدمعه يذبل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


ياضوه  ومشكاة  نورج  ابدونها  اتعثر  مشيتي

الاسود ايلوك أعلى روحي الابيض يلوك لحيتي

دار  حزنج  يبت  طه  من  ادفنج ايصير  بيتي

الدمعه  والا آه  وحسرتي  يزيدن  لو  مااجيتي




    جا حيدر  اشيحمل  كلب  وكلكم  امودعينه

    أعلى افراك  طه وبضعته  حيدر  الله يعينه 

  ياعمر بس لا تطول ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

رايحه   ياعطر   شيلة   امج  وانفاس  عودج

والله ودي كلبي يوكف واترك الدنيه اعلمودج

الفرحه والراحه يفاطم غايبات  ابلا وجودج

اجفوف انجاس الخليقه وسفه اطشر ورودج



     صبت  على  حيدر  محن يافاطمه عظيمه

    عايش ابو كلمة وأن وتموتين شكد هضيمه


    الموت اضن مايندل ... معقوله فاطم ترحل

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياكعبة  حزن  روحي الجنت اكعد اشكي يمها

من بعد  أنفاس ريتج الروح مصيوبه بسهمها

محد  بكثرج  يزهره  فهم روحي شنهو همها

همي  جان  أدوم  فرحة روحج  وتنسه آلمها




   يافاطمه وشاء القدر ادفن فرحتي ابيدي

   رجعيلي  رجعيلي  بعد هذا صبح ترديدي


  ويانعمه ماتتحصل ... معقوله فاطم ترحل


الخادم: عباس محمد الحميداوي

شهادة الزهراء عليها السلام

  ( ثكيل ... كتبت القصيده على لحن القصيده التراثيه .. رحنه بضعينه )
         

               ضايع كبرها ... ... تدري بخبرها


   جم نفس شح بريتك ... ... وتبني كبرها امنيتك


                 يامنتظرها ... ... تدري بخبرها

____

تشيد هل الكبر اعلى جيتك مرهون

من  تثئر   لفاطم  يسرها   المكنون

ويلمهدي كون الكلب يحجيلك كون

امك  وره الباب العده الكل يدرون





                الظالم دفعها ... ... وهشّم ضلعها


   بعيونها الدمعه تروج ... ... بين الالم لاجت لوج


      وجف من سطرها ... ... تدري بخبرها

__

اجتمعو  عليها  اجموعهم وتتألف

من  الكسرها  والذي  طك  بجف

وجه الورد بسياطهم ضل  ينزف

وكل  هذا   ويردون  ونتها تخف






          عاشت ضليمه ... ... هايه اليتيمه


حتى لدمعها مخلين ... ... تبجي بوكت مو وكتين


          ويالم كسرها ... ... تدري بخبرها

__

شضام الدهر لامك ياغايبها شضام

وين   الصحابه  اليدعون  الاسلام

كوم  الخلافه  اطلعو  اول  ضلام

مرتاحت  الزهره  بفعلهم  ومتنام




            مهضومه راحت ... ... ولا مستراحت


ومن الكسر نسمع صوت ... ... ام الحسن ليش تموت


               بزهرة عمرها ... ... تدري بخبرها


___


البضعه النقيه ل طه عاشت بضعه

من    الايام   واذبلت   جن  شمعه

وهو  شيعيش   الكسروله   ضلعه

وصت   بعلها  الكبر  كون  تضيعه




            فعل السقيفه ... ... وشور الخليفه


وشوط البجي والحسره ... ... كصّر عمرها الزهره


           ابذمة العصرها ... ... تدري خبرها

___

ضلت  بحسرتها  الصعب  تشكيها

وي روحها هل المحنه ماتحجيها

ضمت  دمعها  عن  نظر  حاميها

وآه    الضلع   جانت  تردد  بيها





              ابرمشة جفنها ... ... دم نزف منها


   وسطرة الخد تخفيها ... ... خافن علي يصد ليها


                 باقي اثرها ... ... تدري بخبرها



•°°°°•
الخادم - عباس محمد الحميداوي

شهادة الزهراء عليها السلام

(لسان حال الزهراء قبل وفاتها مع الحوراء زينب ١٤٤٥)

يمي اكعدي ارد اشوفج ... زينب عليه ليش خوفج

               تروحين غاد والي تردين

             مااخفي عنج حالي موزين

                    يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

قلقانه ماعندج آمل من علتي اكومن وابره

تنرسم  بعيونج صور امن اديرن ليه النظره 

زينب  تره   ذني   اليجن  اخر  ايام  الزهره

خوفي على ذخرج علي موتتي زياده لكسره



زينب المده مو طويله ... افراك النبي عذّب دليله


             شيسمّيه عام الماخذ اثنين ؟

             مااخفي  عنج  حالي موزين

                    يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

زينب يباب لجم  آلم زينب  لفظ بيه غصه

من كسرة  ضلوعي تره منانه  تبدي القصه

زينب بعد طاري الفرح مااله بعمرج فرصه

زينب  بعد عندج عمر بضيم ياهو يخلصه



زينب الموت اعليه عينه ... لو كلت زينه شلون زينه؟   

              كافي  يزينب   لا تنوحين

             مااخفي عنج حالي موزين

                  يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

تدرين  بيه   كل  نفس  يلجم  كسر  ضلعيني

وتدرين   يبنيتي   انه  بالكوه   افكن   عيني

اثمنطعش عمري وذوبلن شبساع كل اسنيني

وماجني  ياذيني   ضلع  لمن علي يحاجيني



مثل الخيال الجسم ناحل ... مابيه شي كدامه اماثل


               خايفه يناظر سطرة العين

             مااخفي عنج حالي موزين

                  يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يمدللت   منزل   علي   زينب   يبسمة  داري

من يامصيبه ابدي الج يم  عون يله  اختاري

اعلى الهامه لو من الجبد لو من ذبيح وعاري

كلنه  نعوفج بالهضم  ودمعج  بخدج  جاري 



ام الرازيا رايح يسمونج ... اتموت الاحبه اكبال شوف اعيونج


            من المحسن واخرها الحسين

             مااخفي  عنج  حالي موزين

                     يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مشتاكه اشبكج للصدر مشتاكه اشم انفاسج

تدرين  ياذيني  الكسر  ريت  الكسر لاجاسج

ادني  يبنيتي الي  جن  بده  الشيب  براسج 

جا شيصير زينب لو وكع احسينج وعباسج



يمه العمر كدامج ولخوانج هموم ... واحد يشيلونه برمح والثاني مسموم


             بين  الزلم  رايح تركضين

           مااخفي عنج حالي موزين

                يازينب  ... يازينب


الشاعر؛ عباس محمد الحميداوي

١٤٤٥.٢٠٢٣ شهادة الزهراء عليها السلام

(نزله ... على لحن قصيده كل عشيره وعدها بيرغ مالها )


هايه ليالي الزهراء ياشيعه خل نحييها

___

الثقل    الاكبر  لا  بل  كل   الثقل

يوكع اعلى اجتافكم يهلل الفضل

وكلتو  نحيها  ونعم  كول  وفعل

ارواحكم للزهره  شمعه  وتنشعل


ونيران باب الزهراء بدموعكم نطفيها

____

بدون  ماتحكمه  روح  العاطفه

خلي   الشيعي  يوضح  موقفه

خل  دمعته  للكسر تصبح شفه

وكون  كل  دمعه  ب  آه  ملفله



لجروح فاطم ياريت اعمارنه نفديها

____


ننتظر    ايامها   ابشوك  وفخر

و بل العزاء انعزي ابنها المنتظر

هاي  امه وامنه مكسورة ظهر

صلى الله عليها ولعن الله عمر



اكثر   من  الانفاس  اهاتها  ندريها

____

 ريتنه  نواسيها   فاطم   ريتها

 المنسطره  خدها يويلي ابيتها

ابدمعتك   اتواسيها  لو  هليتها

فاطمه  تستاهل  اشما انطيتها




من النار للجنه اهناك ايديك تاخذ بيها

____

هيه محنيه وضلوع الها انطون

وكّور  اهمومه عليها هل الزمن

انفاسها مشكاة  نور أم الحسن

الماجرن  لحزانها  ريت  انعمن


الماصبت اعلى ام حسين بلطم كون اعميها



''''''''''''''''''''''''

الخادم ؛ عباس محمد الحميداوي

محرم الزهراء ولياليها .

'''''''''''''''''''''''

(تجليبه للشهادة الصديقه الكبرى فاطمه عليها السلام1443 )


فاطمه ايتيمه العدو يدرونها

وهل  اليتيمه تعمدو ياذونها

___


ابياشريعه ويازعامه وياحكم

وياخلافه الصدرت هذا الجرم

ينكسر  ضلع  اليتيمه  وتلطم

فوك كسر الضلع سطر عيونها


___

الجرم اصبح  لهل  الخلافه   اتباع

زمره قادت  مجتمع  نحو الضياع

النبي بنعشه وهمه عدهم اجتماع

ولحد   هسه   ناسنه   يمجدونها


__

اصبحو من بعد طه اهل القرار

وحتى  دمع العين خلوله مسار

لو   تون  بليل  لو  بس   النهار

شوف حتى ادموعها يمنعونها

__

بالمايعقله  حدث  العاقل فأن

عقلَ  لا   عقل  يملك   لاذهن

اليود  طه  ينطق  بكلمة و أن

اذن  بس  بغضائم  يخفونها

___

بجفها   اثر  للنار  ولسوط  العده

وعلى فراش الموت ويلي مدده

ومن  تكوم اعلى الجدار مسنده

وكالخيال انحلت  وانحل  لونها



_

تشهك  ابكل  نفس ياعظم الامر

وجان حتى الحجي يلجم بلكسر

شافت  انواع  الالم  بهذا   العمر

جا لون  كبرت  شنو  يشوفونها

____

تنظر    لحيدر   وتعاين  دمعته

مجتف  بأمر  النبي  وبوصيته

لون صد  لها  بجه  ولو  شافته

هم تصب دموع حسره شلونها

____


وهاي دولة جرم المنشئ مو بعيد

ومهّدت    بفعالها    لدولة    يزيد

حتى زينب من تطب سوك العبيد

مو   جريمه   بشامهم  يحدونها

""""""""""
الخادم ؛ عباس محمد الحميداوي

شهادة الزهراء عليها السلام

'''''''''''''''''''''''''''

(لشهادة الزهراء ١٤٤٦)

مالحكنه نودع طولج ... ... ايتامج هيج يكلولج

           غمضتي العين يازهره بساع

            ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عادات اليريد يموت ... يوصي تحضر احبابه

يتوادع وداع افراك  ...  ابحسره وناره لهابه

ومحد ودعج للموت ... والمثلج يوجع امصابه

شنسه العين لوضلعج ... وحيدر عّذبه بابه



  والباب الباب اذاني ... وابجي هواي خلاني

            ويازهره اعليج هنيال الكاع

             ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

المن عيوني ضميتيه ... الخد  وعينج  الحمره

لمن غلست جسمج ... شفت الضلع والسطره

حكج الموت بيه راحه ... الج من لوعة الكسره

ورحتلي منكسر ضلعج ...  وحيدر منكسر ظهره



الهضمتني اهواي وبجتني ... زينب عنج من نشدتني


            ودمع الأيتام ايزيد الاوجاع

             ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنتي بسمتي ابهل الدار ... يزهره وراحت البسمه

والدنيه  بيج  صابتني   ... وخلت  بالكلب  لجمه

كلشي  يريدج ترجعين  ...  كلشي  اشتكاك  لليمه 

وبله   بيا وكت  حيدر  ...   بيته  محّزن  وظلمه



وانه بيا حال واتعوفيني ... أظلم داري وظلمه سنيني

          من ضيعتج هم عمري الضاع

           محد    منج   شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ادير بوجهي ماكو انتي  ... وي ميل الصبر افتر

ادنك راسي كمت بساع ... اشوف حسين مااكدر

الحسن ماينوصف حاله ... عينه امن الدمع تمطر

وبزينب  فركتج صعبه  ... العذاب بزينبج يكبر



عيون بنيتي تسولف حزني ... ذني امصايب فكدج ذني

         وهالمره اجروح ايتامي اوساع

          محد    منج    شبعان   وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بعد ماضل الي بدنياي ... عكبج  راحه  نفسيه

ردت باخر نفس يمج  ... وتموتين  أعلى  ايديه

يتيمج مدري ابو ايتامج .. رجعي وشوفي البيه

ترس راسي الشيب بساع ... وحيلي مايرد ليه



مو حيدر هذا يكلولي ... اوكف واولادي يتجولي

           اجدامي تعثر كامت كلساع

             محد  منج  شبعان  وداع



خادم وشاعر أهل البيت : عباس محمد الحميداوي

١٤٤٦.٢٠٢٤ شهادة الزهراء عليها السلام

#١٤٤٦ محرم الزهراء

[لسان حال زينب الحوارء بعد شهادة امها ١٤٤٦]

           ابحالي اشصار؟ ... ويلي ييمه

           وكلما  اصد نار ... انلجم لجمه

           وزينب يتيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

انه زينب يأام زينب شسولفلج حرت حيره

يايمه  بعدنه ازغار  وفركتج جانت اجبيره

مو بس النه أم جنتي انتي احنينت الديره

فراكج مو حجي ينكال يبيّن بينه تفسيره


       ابكل المعاني ... مرسوم المصاب

       فكدج عماني ... يم ضلع ماطاب

       هاي الهضيمه ... زينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وسواد  اتبدل بعيني كلشي مو فقط هدمي

علي  يشبع  بجي ونياح ابكل مره كعد يمي

كتله امي خدها احمر الرمل يلجم بخد امي

انه من شد الجفن حيدر يم الضلع كل همي



     ينلجم هم خاف ... وتنزل دموعج

    ميته وعلي شاف ... كسرة ضلوعج

       قصتج آليمه  ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بتابوت وطلع  بليل علي  بس  مااخذني  وياه

وموقف   شيلت   التابوت  من  الدار  ماانساه

وياهي التنعى ليه اعليج وصيح وياها واويلاه

وانتي   الحتى  ماعندج  كبر  يازهره واتعناه



         عفتي مجانج ... يم ضلع مكسور

        ونظرة حنانج ...  دفتنها   الكبور

         ابكلبي وضيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نحيله  شكد  نحيله انتي وعلي مايكدر يشيلج

وتتعافين من  ضلعج  علي  شكد  جان يدعيلج

امر الله ويريد يصير ومن هضمي اردن اشكيلج

ييمه  البيت   يخنكني  وكلشي  بداري  يبجيلج



            ولا ماننامه  ... بدونج الليل

         ولدمج علامه ... بالباب ياويل

      امصيبه عظيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بعد ويه الضلوع  اهناك بالطف هم الي لوعه

كلتيلي يطيح حسين وخيل التسحك ضلوعه

ومو بس   خيل يايمه اخيي  كلف  موضوعه

يلم اوصاله السجاد مجموعه أعلى مجموعه


       وخنصره والراس ... ينكطعن ادري

       وماعندي عباس ... واحتار بأامري

        وماعندي خيمه ... وزينب يتيمه


الشاعر الحسيني: عباس محمد الحميداوي

١٤٤٦.٢٠٢٤ شهادة الزهراء عليها السلام الروايه الثالثه

(نزله لشهادة الزهراء عليها السلام ١٤٤٦)

كوم بويه ياعلي ... راحت الزهره من ادينه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يعّظم الله اجرك ياحمّاي الحمه

ايتام صرنه راحت  امنه فاطمه

راحت   الجانت  اهواي  امألمه

ضلوعها  وعيونها  يجرن  دمه


كوم بويه ياعلي  ... نودع ام روح الحنينه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بويه   حاجيناها  يايمه صحت

انه يم   الراس   ياحيدر  رحت

حسين يم اجدامها يكلك طحت 

وزينب  بهذا  العمر  يمها  نعت


كوم بويه ياعلي  ... واسمع أعلى أمنه شقرينه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنه مشتاكين  تحضنه  وتطيب

نعيش  وياها بعد ماصح نصيب

الماتت امه منين ام طيبه يجيب ؟

يضل بس للدمع والون والنحيب


كوم بويه ياعلي  ... الك مدري شلون اجينه ؟

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ليش عافتنه يابويه امنه ابعجل

من ادينه  غفله  ماخذها الاجل

بس عبايتها  واثر  دمها اليضل

وآه  يالبسمار  بالزهره  اشعمل ؟


كوم بويه ياعلي  ... انغسل الزهره الحزينه


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عطر  جفها  ابهاي  سبحتها يفوح

وبعد   من   نريدها   المن  نروح

راحت امنه وهاجت وياها الجروح

وبويه   حركناها   لا  مابيها روح


كوم بويه ياعلي  ... بعد راحت ماتجينه


خادم أهل البيت : عباس محمد الحميداوي

١٤٤٦.٢٠٢٤ شهادة الزهراء عليها السلام الروايه الثالثه

اعظم الله اجركم في ذكرى شهادة الزهراء عليها السلام والحمد لله تمت نشر قصائد لشهادتها على مدار الثلاث روايات ... لاتنسونا من صالح دعائكم اخوكم عباس محمد الحميداوي ١٤٤٦.٢٠٢٤

(نزله ...ليلة ام البنين ... ام البنين تخاطب العباس قبل خروج الضعن )

عباس   ها يبني   وياك  الي  حجايه

معصبي هاك اخذه وشده على الرايه

__

ماحاجه بعد ارجع ووصيتي اكررها

زينب بنص عينك ياوليدي تحفرها

ينكسر كل خاطر من كسر خاطرها

التامر  تضل  هيه  ومحد  اليامرها



عباس   ها   يبني   زينب   تره  الايه

معصبي هاك أخذه وشده على الرايه
__

امها   نسب  عالي  ونور  اعتلى ضيه

امك    بت  شيوخ   بس  امها  علويه

اعلوم   التشيل  الراس تفّرح البدويه

وكل عطوه وي خصمك يلشهم منفيه




عباس ها يبني لشمر لاتسمع اشوايه 

معصبي هاك اخذه وشده على الرايه

__



من  تاخذ المعصب وتشده  بالواكم

يبقى  كلب  زينب  مستر  بطرواكم

والله  تره يدري  لحيدر من انطاكم

يدري  الخدر  باجر  يتماشى وياكم



عباس   ها يبني   هايه   تره   الغايه

معصبي هاك اخذه وشده على الرايه

__

معصبي   من  يلوح  ويناظره  اخيك

يطمئن  زينب   بعدها  ابفيهه  اوفيك

عباس  زينب  ورد  ينسكي  من  ميك

ونوماسها  ابزودك  بل المعركه اوعيّك



عباس ها يبني   رضاهم  صير  شرايه

معصبي  هاك اخذه وشده على الرايه

_

عباس تفدي حسين من الكاروك ناذرتك

وتصير ظل عن الشمس لو مشت اختك

مناطره  اتوافي  ارباي  وزينب مناطرتك

الضعن  من شال  وطلع كله  على  بختك



عباس  ها يبني  اعرفك  للوفه  ثايه

معصبي هاك اخذه وشده على الرايه

___

اتلث   نجوم   اخوتك  وانت  بدر  كامل

ومابيك شي مايل بس سيفك تره المايل

عباس اريد اصياح خصمك ليثرب واصل

ماريد    زعلانه    ترد  زينب   يبو  فاضل



عباس هايبني النهر جيبه ابكل مايه

معصبي هاك اخذه وشده على الرايه



الخادم: عباس محمد الحميداوي

١٤٤٤

( قصائد أم البنين عليها السلام )


هذا الامر قد يجب توضيحه .. للحزن هم موجوده تسبيحه


        الحسره بدمع والونين ... تسبيح  أم  البنين


*

لفاطمه تسبيحة جانت  بس عباديه

تفتر  السبحه  للذِكر  بنفحه  قدسيه

وتبسيحة الهم والحزن عد  الكلابيه

جانت على حسين وهله تون يوميه



بعد الفروض الخمسه جم دمعه .. وتقره دعاء الفركه كل جمعه


           الويلي على الحسين ... تسبيح أم البنين

**

عن  موقف الحره  صوره لو نصورها

شجره بخريف النايبه بظل أعاصرها

ام  البنين  افراك   المذبوح   كاسرها

التتنطر  الغالي  يرد  الموت  ناطرها




الما كايله  لحسين  يايمه ... شاء القدر من البجي تعمه


         منذور شوف العين ... تسبيح أم البنين

 

*

للسبط اجت يوم الضعن كوض  بأسفاره

وكالتله ذوله اربع زلم لخدر النسه نطّاره

يقدمهم  أبني  الكمر  ومزامطه  باأيثاره

ولمّن  ينعاهم  بشر  يحسين احلا بشاره




ذوله اربعه بحبك انه مجندتهم .. لايردون بدونك موصيتهم


             ابلهب نار الحنين ... تسبيح أم البنين

****

خبرني  عن  حسين  يابشر  وتهل دمعتها

وذيج   الجموع  الحاضره   الحره  طرتها

خبرها ابن حذلم وحجى عن  فعل بزرتها

كالتله حجيك يابشر هروش الكلب فتتها



فوك القناه راس حسين كلها .. انغمى عليها وحاله ذهلها


             ولطم هاي الايدين ... تسبيح أم البنين


*

حتى  بتاريخ  الوفاة اشكد  وفيّه الحره

رحلت بعد  ثالث  رواية  للبضعه  الزهره

أم   البنين   العاطفه   بيها   خلت  جمره

تدري بلحسين انجتل لاجن بقت تتنظره





شابحه العين لجيت الوالي .. وتكول اطب البيت والكاه خالي


             يايمه رحتو وين ... تسبيح أم البنين




الشاعر : عباس محمد الحميداوي

شهادة أم البنين

تجليبه الى سيدتي أم البنين عليها السلام)



يقين اصعب علل انتي التشافيها

باب الله انتي والحاجات تكظيها


____

 اذا من المرض متعوب  ندري الحل

 ندك   بابج   وكل  الصعبه   تتسهل

يبرى الاعمى والاخرس والي انشل

  ماتصعب   وحق  عباس  ندريها



__


شما احسب فزعتج الي يتيه العد

كل حاجه  الاجيج  اعليها  ماتنرد

 انه  ادري  بجفوفج  ما ترد  احد

 الايد    التنمد   ابابج    تترسيها

____


 حاشا   اليدك   بابج  يرد  يتندم

 كريمه احنه نعرفج والخلك تعلم

اشلون ترد ادين اليبجي واليلطم

حاجه وطالبج وادري تخلصيها



___


اريدن من حضرتج هاي البشاره

وادري  انتي الذي تسويلي جاره

محلفج   ببنج   ويمناه  ويساره

تمت   حاجتك   رايد  تكوليها


___


كرم الله الكريم وهل الكرامه انطاج

وباب   لكل   مصيبه   ربج  اختاراج

يزعل  ابو  فاضل ويرضى لرضواج

والله  لهل  القداسه  كال  اعليها


___

لحبيب الله انطيتي اربعة شبان

ومن  اجل  العقيله مقدمه قربان

الج كلمن يدير الوجه مو خسران

كريمه والصعاب انتي  التحليها


___


ها  يم  الكمر  جفي الج ممدود

بت اجواد انتي ومنع لهل جود

يم باب الكرم لامايضل معكود

دمعتي ردت ماينكطع جاريها




الخادم : عباس محمد الحميداوي

(ميمر .. بين ام البنين والعباس قبل الخروج من المدينه)



امك تريد اتوصيك عباس جم اوصيه

_

تكله اعلى اخيك بالك تعز روحك

عباس  خلي  السهم  كبله يلوحك

وياه   لاتتساوه   حت  بجروحك


ياكمر شع وسط الكون وعم علكره الارضيه

___


بالك    واشد   بالك   لون    ماتفديه

الينطي اصبع اجفوفك اريدن تنطيه

المثلك   بعد  ماحاجه  مره  نوصيه



خنصر اذا انطه احسين كله انه انطي ايديه



__



صب دم اكليبك ياخو زينب بجفه

ولو مشى خل ممشاك يبني  خلفه

ربيتك    وادريك    راعي    الكلفه



حجياتي اريدن عباس بذنك تضل ترجيه


__


من  الماي  لاتشرب  واهو   يتلضه

وفرض  الوفه  اديه  وبدم اتوضه

 عباس   اذا   ترجع   الي  ماارضه



لو ترجع وياك حسين لو مااريد الجيه

__

  لو  غرفه  من  الماي  بيدك تغرف
 
من احرورتك خلي الشريعه تنشف

ذب للنهر   جفك   لون   كلبك  رف



تشرب لذيذ من الماي وعطشانه جم علويه

__


تشرب   واخيك   نار   تشب  بكلبه

وحاول شما  تحاول توصل الجربه

 عبد  الله اخذه  وبيدك  انت شربه


خلي يرتوي من ضماه وشرب بديك ارقيه


___


لكل  الوفه اسمك اريدن مقياس

وبوجه تاريخ الدهر تضل نبراس

زينب  اريد  تكول  وفه  العباس



ماريد منك تقصير حت لو يكون اشويه



•••••••

الخادم عباس محمد الحميداوي

محرم الحرام

 ( لسان حال أم البنين عليها السلام مع الحسين قبل وفاتها..١٤٤٥)           

           كاعده   ابيتي  واحس  بغربه

           ضلعي مامكسور وانه محدبه

ابحين اجه ينعى بشر ... ... روحي حسيت بكبر

            ضلعي مامكسور وانه محدبه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

شالو   عافيتي  لمن  شال  ضعن  ابني  وطلع

وكاعده ابنص داري لاجن احس دلالي انصدع

آه يابشر ابن  حذلم   ابصوتك   اكليبي انشلع 

اتكول  راحو  كل  بنينج  اولا ولد سالم رجع

           وكبل لايحجي بشر حاجيته

         كتله هسه حسين طب لبيته؟

  وكالي نحرو نحر  ... ... روحي حسيت بكبر

          ضلعي مامكسور وانه محدبه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنت اظن يلتم شملنه ونرجع للكعدتنه ذيج

ويلي  يارواح  الاحبهم  كون  تنباع اشتريج

حسين يمه هاي بنتك مو انته الكتلها اجيج

وين غايب عن نظرها الضاله بحيل الرجيج



               متانيتك  ترد  عود النوبه

             ورجع من الي نتاني ثوبه 


روحي مو مالت صبر ... روحي حسيت بكبر

        ضلعي مامكسور وانه محدبه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

كمت  يوميه  اروحن  اكعد  بدارك  واصيح

وتجي وتكابلني زينب وننعى يوليدي الذبيح

هيه عالعباس تنعى وانه الك دمعي اليطيح

يمه   والدمعه  عليكم  ضنك  دلالي  تريح


             يمه اطب للبيت والكاه خالي

            اودعتكم   غالي  يمه  ابغالي


  الك ذكرى بكل كتر ... روحي حسيت بكبر

           ضلعي مامكسور وانه محدبه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

خمست اكبور انه اسوي واكعد ابصفهن غديت

هذا  كبر  حسين  اكتب  ذاك كبر ابني اكتبيت 

وعلى  ولدي   مااونن  اعليك  يوليدي  نعيت 

وينعصر كلبي من اضوك الماي لو منه ارتويت


             ضامي  ميت  يااعز اولادي

           ماي عيني اعصر لوني غادي


   الك مشتاكه شكثر ... روحي حسيت بكبر

           ضلعي مامكسور وانه محدبه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

شنهو عيشت روحي بعدك المن اتشم الهوه

علّه   المفارك  ييمه  وهاي  علّه   ابلا   دوه 

الموت اجاني وكبلوني يمه واكتابي انطوه

واقنع بروحي واكولن اجو كل ولدي سوه



              وماكو واحد منكم اتعناني

             ردت  متنك يابني الشالاني


   وانتهت قصة العمر ... روحي حسيت بكبر

           ضلعي مامكسور وانه محدبه



   الشاعر: عباس محمد الحميداوي

١٤٤٥.٢٠٢٣ ذكرى شهادة ام البنين عليها السلام

[تراث ( اهوازيه ) لسان حال ابو الفضل العباس عند رحيل امه ١٤٤٤]

من أرض الطفوف اليوم ... اجت ولدج يبدويه

من سمعو الموت احذاج ... اجينالج فرد جيه

****

الهواشم قافله اتعنت ... والانصار اجت كلها

ومثل مارحنه من يمج ... ردينه ابقوافلها

اجينه وتنعه اخيتنه ... واحنه دموعنه نهلها

واحنه منكبين اعليج ... منيتج صعبه نحملها



سبب موتج يريته الباب

ومثل الزهره ضلعج عاب

ولفينه العمامه انكاب ... وبجه احسين وعلاويه


***

سمعت حسين يم زينب ... كال احجايه وألّمنه

يم عون ابدمع سجاب ... كلها احنه تيتمنه

كبل هم امنه ام عباس ... بزر شركتها وتحبنه

ويزينب كل بشر بلكون ... يفدي ارويحته لبنه



وفدتنه ام الشهم كلهم

ومانشدت اشصار الهم

بس نشدت فعايلهم ... عظيمه هاي المريه

****

يحره يلفكدتي الشوف ... بكثر ما للدرب تربي

الزهره جايه تغلسج ... وتكول لزينب اتكربي

يبنيتي انتي جيبي الماي ... وعلى جفيني صبي

وخلنه انجهز ام عباس ... الفدت أولادها لتعبي



تجازي ارباج والفزعه

اجت فاطمه تصب دمعه

اتكول اليوم شمضيعه ... مضيعه التنعى ليليه


***

وكفتي اشكد اباب حسين ... وبحين الدفن حاضر

يكلي ايعّظم الله أجرك ... وحاله يكسر الخاطر

تشابك وي اخيه وصاح ... راحت ام كلب شاجر

حسن تدري شكد نادت ... اويلي احاه من العاشر



تنادي وتطلم الخدين

يمه حسين يمه حسين

وينك ياافتاش العين ... لحد ماجتها المنيه


**

ييمه والج صار انياح ... وعد هاشم صفت ثلمه

وشالو نعشج أهل الجود ... وساده وعرب ملتمه

بس يايمه حال حسين ... صريع وبلعرى جسمه

يريتج حاضره اتشوفين ... ضل اوحيد ابو اليمه



ومو بالغربه من رحتي

ولا من العطش متي

ولا علترب اخو عفتي ... ولا رحتي انتي مسبيه



الخادم: عباس محمد الحميداوي

٢٠٢٣ .١٤٤٤ هجري

٥/١/٢٠٢٣ ليالي ام البنين عليها السلام

# الليله الرابعه
(لسان حال ام البنين عليها السلام ١٤٤٦)      

        أم  اربع ولد ... تالي تضل وحيده

       تلهج بالحمد ... تصيح حسين اريده

      اغايبه ماحملته ... يمته يردلي يمته 

        انه ام البنين انه  ... انه ام البنين انه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عندي  اربع  ولد يناس ... بيهم  مزدهر  بيتي

وعيني صبّحت تنشد ... وخنكه انفاس البريتي

امس    راحو   اكللها  ... شبساع  انتي حنيتي  

لانتفاشل اوي حسين ... يروحي وزحمه تاليتي


     ومابيه  انتظر ... ولابيه امشي للطف

    مشتاكه شكثر ... ولامني الدمع  جف

   ابشيباتي انتظرته ... يمته يردلي يمته

     انه ام البنين انه  ... انه ام البنين انه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

واحس   الشوك البكلبي  ... مو لولادي بيه لهفه

عايش وي روحي حسين ... وعليه رحتله  كلفه

شلون اغفه ويهود البال ... وحسين بخطر يغفه

توني يله شفت الخوف ... كبل الخوف ماعرفه



       مااكتب عتب ...  يجرح  كلبه  ادري

    عافوني اشسبب ... ريته يكضي عمري

     بكليبي وحسرته ... يمته يردلي يمته

     انه ام البنين انه  ... انه ام البنين انه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

المغرب  يكتل  المغرب ... وعجيبه روحي ماتصبر

انه مايندك اعرف الباب ...  ويمه   كاعده   وانطر

انه اموديه أربعة شبان   ...   وبيهم   آنه   مافكر

بالي  منشغل  بحسين    ... ليله ادعي بسلام يمر


        حسين وزينبه ... ذوله اكليبي همه

       وليدي  احسبه ...  وهو  يكلي  يمه

       والعندي بذلته ... يمته يردلي يمته

     انه ام البنين انه  ... انه ام البنين انه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وصورهم  بيه   تتلكه ...  كل مابيتي  اطبنه 

اوداعي الجان وياهم ... اوداع  افراك  أحسّنه

عليهم دمعي ماساكت ... وأون باليوم الف ونه

اخاف ادروب طف حسين ...  اليه  مايرجّعنه



         ايموت الأمل ... كل  يوم الصبح

       وياهوه السئل ... بكلبي جم جرح

     كل غالي فكدته ... يمته يردلي يمته

     انه ام البنين انه  ... انه ام البنين انه


٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اتفنن  دهري  ابتعبي ... وخلاني أعلى هالحاله

مره  اشتم  دخان اخيام ... ومره  انظر  أطفاله

مره اسمع صهيل الخيل ... اثاري تسحكه خياله

ومره اسمع بجي نسوان ... وركضه وحيرة بعياله



      واحبال السبي ... بيدي   جنها  تنشد

       وسبط النبي ... بنص الحومه ممتدد

     نظراتي لركبته ... يمته يردلي يمته

     انه ام البنين انه  ... انه ام البنين انه


الشاعر الحسيني: عباس محمد الحميداوي

١٤٤٦.٢٠٢٤ محرم الحرام