الحلقة الثامنة👇💛

#قصص_الانبياء(٢)
#السيرة_النبوية_إيمان_شلبي
#الحلقة_الثامنة
#نزول_الوحي

وقفنا المرة إللي فاتت عند محمد بن عبد الله لما كان بينام ويشوف رؤيا ويلاقيها اتحققت أول ما يصحى من النوم زي ما شافها بالضبط،
وقلنا إنه كان بيمشي في الطريق فيسمع صوت من وراه بيقول:
السلام عليك يارسول الله ولما كان يبص واره مكنش بيلاقي حد فمكنش عارف إيه الصوت ده،
كان في الفترة دي بيحب يختلي بنفسه، يعني يكون لوحده يتعبد، واحنا قلنا إنه مكنش بيعبد الأصنام؛ لأنه كان عارف بفطرته إن في إله للكون ده،
وخلال سنين حياته والأحداث إللي حصلت له من حادثة شق الصدر، ده غير إن الأنبياء بصفة عامة معصومين من الشرك قبل الرسالة زي ما شرحنا في قصص الأنبياء،
وكمان الكلام إللي سمعه من بُحيرى الراهب والناس إللي كان بيشوفهم بيدعوا لدين إبراهيم زي
《 قِس بن ساعدة و زيد بن عمرو بن نُفيل》
فكان عارف إن في إله ليس كمثله شيء، وإن له طريقة معينة في العبادة،
فكان بيخرج للجبال ويقعد أيام برة البيت يتدبر ويتفكر الإله خالق الكون ده ويتفكر في أحداث حياته إللي عدت وكأنه كان مستني حاجة👌
وعبادة التفكر دي عبادة عظيمة هشرحها لكم بعد ما احكي لكم قصة زيد بن عمرو بن نفيل ،
لأن قصته عجيبة فعلا🙊
احنا عارفين إن الناس في الجاهلية كانوا بيعبدوا الأصنام وكان في بقايا من أهل الكتاب من اليهود والنصارى،
ففي يوم من الأيام لما كان أهل مكة اجتمعوا مرة يذبحوا ذبيحة عند صنم لهم،
انعزل عنهم كم رجل كده، منهم زيد بن عمرو بن نُفيل، وورقة بن نوفل.. قالوا لبعض:
والله الناس دي بتعبد حجر لا يضر ولا ينفع...الله يخلق البهائم وينزل لها المطر من السماء ويُخرج لها العشب من الأرض تأكله والناس يذبحوها لغيره😑
فقالوا لبعض: طب والحل😕

قالوا : خلونا ندوّر على الدين الصحيح 👌
فكل واحد راح في طريق يبحث عن الدين الحق، ورقة بن نوفل قابل راهب من رهبان النصارى ،
فتعلم منه النصرانية فتنصر وبقى على دين عيسى عليه السلام وبقى عالم في النصرانية،
زيد بن عمرو بن نفيل قابل واحد من علماء اليهود فسأله عن الدين الحق فقعد يشرح له الدين فزي ما تقولوا مقتنعش😑
إنتم عارفين تحريفات اليهود في التوراة😶

فسأله عن دين تاني فالعالم اليهودي قال له:
الدين الوحيد إللي أعرفه غير اليهودية هو إنك تكون حَنِيف،
فقال له: يعني إيه حنيف🤨...فاليهودي قال له:
إنك تكون على دين إبراهيم👌
طيب إيه هو دين إبراهيم😓
قال له : معرفش ..ده دين قديييم اندثر محدش يعرف عنه حاجة🤷‍♂️
فمشي وسابه واستمر يبحث عن الدين، لحد ما قابل واحد من علماء النصارى سأله عن الدين،
فحصل معاه زي برده ما حصل مع اليهودي، لأن برده النصرانية كان دخل فيها تحريف،
احنا بنتكلم في أكثر من خمسمائة سنة بعد رفع عيسى عليه السلام 😅
والإنجيل محدش بدأ يكتبه إلا بعد مئتين سنة من رفع عيسى عليه السلام، فحصل تحريف في الإنجيل.

☆الإنسان إللي فطرته سليمة لما بيسمع حاجة في الدين غلط قلبه بيحس إن في حاجة غلط...مش مرتاح..مش متطمن😑
ومن هنا جاء حديث :
" استفت نفسك وإن أفتاك الناس وأفتوك"
وحديث:
" اسْتَفْتِ قَلْبَكَ وَاسْتَفْتِ نَفْسَكَ ثَلَاثَ مَرَّاتٍ، الْبِرُّ مَا اطْمَأَنَّتْ إِلَيْهِ النَّفْسُ ،
وَالْإِثْمُ مَا حَاكَ فِي النَّفْسِ وَتَرَدَّدَ فِي الصَّدْرِ وَإِنْ أَفْتَاكَ النَّاسُ وَأَفْتَوْكَ"
يعني ممكن مثلا حد يفتيك بحاجة إنها حلال و بعدين حسيت من قلبك كده إن إللي بيفتي ده بيألف وانت من جواك مش متطمن وقلقان...فهنا بقى لا يجوز العمل بالفتوى لو إنت مش متطمن لها تخيلوا🙊

مثلا يعني الشيخ إللي يقول النمص حلال مطلقا أو النمص حلال لو بإذن الزوج...المرأة هتحس من جواها هتحسي بإنها مش مطمئنة كده😐
وهتلاقوا فتاوى كتير كده فعلا تسمعوها تحس إن القلب مش مرتاح لها 😥
أهه لو حسيت بكده مينفعش نقول أنا مليش دعوة أنا هاخد برأي الشيخ وخلاص وحطها في رقبة عالم واطلع سالم🤓
لا يا جماعة مينفعش..مفيش الكلام ده 😅
الفتوى من المُفتي مش هتخلصك من ربنا لو إنت شكيت ولو للحظة من جواك إن الفتوى فيها حاجة مريبة وإنت مش مرتاح للموضوع😶

بس استنووووا😱
الكلام ده 👆 للمؤمن صاحب القلب السليم😅
يعني ميجيش واحد غرقان في المعاصي والموبقات ونقول له حلال وحرام يقول لك: هستفتي قلبي😌😎
أهه ده لو استَفْتى قلبه في الكبائر مثلا...قلبه هيقول له:
حلالٌ حلالٌ حلال 🙃
فلما تسمع كلام حد من بتوع الفتاوى إياها وحسيت إن قلبك مش مستريح للكلام..افرح...لأن قلبك كده يبقى سليم😁
واحنا عندنا القاعدة بتقول إييييه:
"يوم لا ينفع مال ولا بنون إلا من أتى الله
《بقلب سليم》" 👌

《الكلام بالتفصيل في شرح الحديث على موقع الإسلام سؤال وجواب》

فزيد بن عمرو بن نفيل كانت فطرته سليمة وكان فعلا صادق في بحثه عن الحق ،
عشان كده حس إن كلام النصراني مش مقنع بالنسبة له فسأله زيد : مفيش دين تاني،
فقال له النصراني : معرفش غير إنك تكون حنيف👌
فقال له : يعني إيه حنيف🤨
قال له : دين إبراهيم وقال له زي ما قال اليهودي،
فقال زيد بن عمرو بن نفيل:
يارب أشهدك إني على دين إبراهيم ..كلهم بيقولوا إن هو ده الدين الصحيح ،
فأنا على الدين الصحيح لكن أنا معرفش إيه طريقة العبادة بتاعته وإيه هي الشرائع بتاعته😞
فسبحان الله ربنا هداه إنه يعمل حاجات من دين التوحيد،
زي إنه مياكلش إلا من الذبائح إللي ذُكر اسم الله عليها،
وكان بيقعد ينصح الناس في مكة ويدعوهم للتوحيد،

وكان لو شاف واحد عايز يُوْئد بنته، يدفنها حية يعني كان يمنعه ويقول له أنا أكفلها لك وهصرف عليها لحد ما تكبر،
وكان أهل مكة بيؤذوه ويمنعوه إنه يدعو للدين بتاعه ده وكانوا بيطردوه برة مكة👌

وفي يوم من الأيام وهو قاعد عند الكعبة عدّى عليه واحد اسمه: 《أُمية بن أبي الصّلت》
وكان أمية ده على التوحيد وكان على طول بيقول شعر بيوصف الجنة والنار ومكنش بيعبد الأصنام وكان على علاقة بأهل الكتاب،
وكان مستني نبي آخر الزمان، فقال أمية لزيد :
هااا لقيت الدين إللي كنت بتدور عليه🤔
قال له زيد: أنا على الحنيفية دين إبراهيم بس معرفش حاجة عنه،
فقال له أمية: في نبي هيخرج واحنا مستنيينه عشان نتبعه👌

مين إللي كان سامع الحوار ده بين زيد وأمية🤫
شاب في بداية الثلاثينات من عمره اسمه:
《عبد الله بن عثمان أو عبد الله بن أبي قحافة》
خلينا نقول الإسم إللي اتشهر بيه بعد كده😁
كان اسم الشاب:《أبو بكر الصديق》
احفظوا الاسم ده كويس عشان له دور كبير جدا بعدين 👌

☆الحوار ده كان بعد قصة إعادة بناء الكعبة على طول يعني لما كان محمد بن عبد الله عمره خمسة وثلاثين عام.

في يوم من الأيام خرج زيد بن عمرو في سفر فقابل واحد من علماء النصارى فقال له:
الزمن إللي احنا فيه دلوقتي ده زمن خروج آخر الانبياء زي ما مكتوب في الإنجيل،
فرجع زيد بن عمرو لمكة عشان يستنى النبي إللي هيخرج وهو في الطريق طلع عليه ناس هجموا عليه عشان يقتلوه فقبل ما يموت قال :
يارب أنا ملحقتش أصاحب نبيك فمتحرمش ابني سعيد من صحبته🤲
وفعلا ربنا استجاب دعاؤه وسعيد بن زيد بن عمرو بن نفيل آمن برسول الله ﷺ وكمان بقى من العشرة المبشرين بالجنة🙊

☆شوفتوا إزاي قاعدة وكان أبوهما صالحا بتحصل في كل زمن زي ما قلنا في قصة الخضر مع الغلامين إللي اتكلمنا عنه في قصص الأنبياء👌
وزيد نفسه من أهل الجنة مات على التوحيد...إللي عايز الهداية من قلبه وأخذ بالأسباب عشان يهتدي ربنا سيهديه أكيد👌
غير إللي قاعد وعمال يقول يارب اهديني وهو مش بيسعي في طريق الهداية😑
شوفوا ربنا بيقول إيه :
"وَمَنْ أَرَادَ الْآخِرَةَ وَسَعَىٰ لَهَا سَعْيَهَا وَهُوَ مُؤْمِنٌ فَأُولَٰئِكَ كَانَ سَعْيُهُمْ مَشْكُورًا"

أهِي الآية دي بتلخّص قصة زيد بن عمرو بن نفيل،
هو أراد رضا الله والدار الآخر فآمن بالله،
وخرج يتعلم الدين الصحيح وعمل كل إللي يقدر عليه عشان يوصل لعبادة ربنا صح،
ثبت لوحده على الإيمان وسط مجتمع كله كفر وأمر بالمعروف ونهى المنكر ومقلش مليش دعوة👌
عشان كده ربنا تقبله وأدخله الجنة😊
يا ترى حالكم إنتم إيه ؟
خليكم دايما فاكرين :
"وَمَنْ أَرَادَ الْآخِرَةَ وَسَعَىٰ لَهَا سَعْيَهَا وَهُوَ مُؤْمِنٌ فَأُولَٰئِكَ كَانَ سَعْيُهُمْ مَشْكُورًا"

فكان محمد بن عبد الله في سن الأربعين بيخرج ويعتكف في غار في جبل اسمه غار حراء عشان يتعبد ويتفكر في الإله خالق الكون،
وكان بيتزود من الأكل والماء ويأخذه معاه👌

☆في هنا نقطة مهمة هوضحها عشان لو كان حد قرأها،
كان في حد قال وهو بيشرح السيرة:
《 إن السيدة خديجة كانت كل أربعة أيام بتروح تعطي رسول الله الأكل والماء، ورسول الله قاعد في الغار يتعبد،
وكانت عجوز وكان عمرها خمسة وخمسين سنة،
وكان رسول الله بيكرر الموضوع ده كذا مرة في السنة
وكانت بتطلع الجبل ومع ذلك ماشتكتش وكانت بتقعد جنبه ومش بتتكلم وتنزل من الجبل وتروح تاخد بالها من عيالها》

الكلام ده 👆غير صحيح إطلااااقا 🙅‍♂️❌

يعني غير إنه مش من المروءة أصلا ولا الرجولة إن رسول الله ﷺ يبقى قاعد ويسيب امرأة عجوز تطلع وتنزل جبل ولا حتى من أخلاقه نهائي،
وكمان تمشي في طريق وَعِر غير ممهد لوحدها،
وكمان امرأة عزيزة غنية جدا زي خديجة عندها عبيد هتخلي العبيد يقعدوا وهي إللي هتخرج توصل الأكل والماء لرسول الله ﷺ وتسيب أبنائها لوحدهم في البيت😑

ده كان لما زوجة من زوجاته تأتيه وهو معتكف في مسجد المدينة وبيوت نسائه كانت قريبة جدا من المسجد كان يسيب الاعتكاف ويخرج يوصلها زي ما هنشوف بعدين👌

كمان في الحديث الصحيح الصريح في البخاري هو نفسه قال إنه كان بيتزوّد من الطعام والماء لما يكون ناوي يخرج،
ولما الزاد بتاعه يخلص كان هو إللي بيرجع لخديجة ياخد زاد تاني وبعدين يرجع يتعبد👌
وكان بيخرج 《شهر واحد فقط》 في السنة بيتعبد ويختلي فيه وهو شهر رمضان،
وباقي الشهور بيمارس حياته الطبيعية ويمارس حياته كزوج وأب..يعني مكنش منقطع للعبادة ومضيع مسؤولياته👌

◇وعبادة التفكر إللي كان بيتعبدها رسول الله هي عبادة قلبية،
بتزيد الإيمان وبتخلينا نشوف عظمة الخالق وتدبيره للكون👌
هحكي لكم موقف حصل مع أحد أعرفه،
الموقف يُعتبر بسيط جدا لكن لو فكرنا فيه بتدبر هنشوف إزاي ربنا بيدبر الرّزق لخلقه👌
رجل اتفق مع زوجته إنهم هيتغدوا اليوم ده غذاء معين، فنزل راح مشوار،
بقدر ربنا يروح السوق يلاقي رجل بيبيع سمك فبعد ما اشترى منه وخلاص هيمشي شاف سمكة لوحدها فسأله على نوع السمكة دي لأنها جديدة بالنسبة له،
فقال له البائع : أنا كنت هشويها لنفسي خلاص خذها لأن حصلت ظروف ومش هعرف اشويها،
الزوج أخذ السمك ورجع البيت بيفتحوا السمكة إللي الراجل أعطاها له عشان ينظفوها لقوا فيها سمك صغير كثير السمكة دي كانت لسه واكلاه،
المهم قالوا: السمك ده كثير خلينا نجمعه في كيس ونروح نحطه للقطط.
ركزوا كده معايا السمكة إللي في البحر أكلت السمك الصغير والصياد خرج عشان يصطاد فاصطاد السمكة دي بالذات وتحصل له ظروف وميعرفش هو ياكلها،
عشان الرجل يأخذها ويروح البيت ويطلع السمك الصغير ده
ويحطه للقطة إللي بتمشي على الأرض عشان تأكله،
يعني رزق القطة إللي طبيعتها مبتحبش المية كان سمك من أعماق البحر 👌
إيه رأيكم في عبادة التدبر والتفكر 😁
وهتلاقوا أمثلة كثير في القرآن وفي انفسنا وفي حياتنا وحياة إللي حوالينا،
عبادة التدبر والتفكر من أعظم العبادات القلبية إللي بتزود الإيمان وتُعلّق القلب بالله،
وكثير من الناس مش بياخد باله منها وبيركز على عبادات الجوارح زي الصلاة والصيام وقراءة القرآن،
فابدأوا في عبادة التفكر والتدبر زي ما كان محمد بن عبد الله بيعمل في غار حراء😊

في السنة إللي تم فيها عمره أربعين سنة ، خرج محمد بن عبد الله عشان يتعبد زي كل سنة في غار حراء،
والغار عبارة عن فتحة في جبل والغار عشان حد يوصله لازم يتسلق الجبل،
فلو حد جاء يتسلق هيعمل صوت والشخص إللي في الغار هيعرف إن في حد برة بيتسلق الجبل،
فالمكان إللي هو فيه كان مكان منعزل تماما عن الناس عشان يقدر يركز في العبادة ،
مفيش في المكان ده أي انسان مفيش أي صوت نهائي هدووووء تااام وهو قاعد لوحده جوه الغار بيتعبد زي ما بيعمل كل سنة...فجأة لقى انسان في وشه جوه الغار😱
متخيلين قمة الرعب إللي هو كان فيها😶

احنا لو في البيت وسط أهلنا ودخلنا الأوضة وبعدين فجأة لقيت حد وراك من إخواتك مخدتش بالك إنه دخل وراك بيبقى قلبك هيقف من الخضة🙊

ده بقى كان لوحده خااالص وفجأة بدون مقدمات لقى قصاده الإنسان ده ...وياريته مثلا بدأ يِهَدي فيه ويقول له متخافش وبدأ يعرفه على نفسه،
لأ ...ده دخل عليه وقال له : اقرأ👌
كده خبط لزق 😳
فمحمد بن عبد الله بكل أدب وأخلاق عالية قال له: أنا مبعرفش أقرأ!!
مع إنه من حقه إنه ميردش على كلامه ويقول له:
إنت مين أصلا وجيت هنا إزاي وأسئلة كثيرة، ومع ذلك رد على السؤال 👌
راح الرجل حضنه حضن شديد جدا لدرجة إنه حس إن روحه هتطلع من شدة ضغط الحضن😰
فالرجل تركه، فمحمد بن عبد الله لسه بياخد نفسه راح الرجل قال له تاني: اقرأ👌
فقال له : أنا مبعرفش أقرأ!!!

فحضنه مرة ثانية لحد ما حس إنه روحه هتطلع وبعدين تركه وقال له تاني: اقرأ👌
فقال له : مبعرفش أقرأ!!!!
فراح حضنه مرة ثالثة لحد ما حس إنه روحه هتطلع برده😨
وبعدين تركه وقال له الرجل:

"اقْرَأْ بِاسْمِ رَبِّكَ الَّذِي خَلَقَ

خَلَقَ الإِنسَانَ مِنْ عَلَقٍ

اقْرَأْ وَرَبُّكَ الأَكْرَمُ

الَّذِي عَلَّمَ بِالْقَلَمِ

عَلَّمَ الإِنسَانَ مَا لَمْ يَعْلَمْ"

الرجل قال الكلام ده واختفى من قصاده😱

طبعا محمد بن عبد الله في قمة الذهول
إيه ده؟!!
قمة الرعب مع قمة الألم والعنف وإيه الكلام العجيب ده إللي أول مرة أسمعه؟!!
أنا أفصح وأبلغ العرب ..الكلام ده مش كلام بشر ... مفيش كلام زي الكلام ده!!!
ثم الرجل ده بيتكلم عن الإله إللي أنا بؤمن به من سنين لكن معرفش عنه حاجة،
تساؤلات كثيييرة وخوف شديد جدا خلاه ينزل من الغار ويطلع يجري بسرعة ،
لحد ما وصل لبيته ودخل على زوجته خديجة وجسمه بيرتعش من شدة الخوف وقلبه هيقف من الرعب وقعد يقول غطوني غطوني!!!

فخديجة لما شافته اتفاجئت أول مرة تشوف زوجها الطيب الشجاع الصادق صاحب الأخلاق العالية في الصورة دي😳

فعرفت إنها في موقف زي كده مينفعش هي كمان تخاف وإن زوجها محتاج حد يطمنه👌
فبدأت تهدّيه وتسأله إيه إللي حصل،
فحكى لها إللي حصل معاه وقال لها والله أنا خفت على نفسي !!!
فقالت له بكل هدوووء :
متخفش ربنا مش هيضيعك أبدا عارف ليه ؟
لأنك كنت بتُحسن لأقاربك بالمال أو الخدمة وغيرها،
وإنت صادق في كلامك عمرك ما كنت بتكذب، وكنت بتساعد الضعيف واليتيم وصاحب العيال الفقير،
وكمان كنت بتكرم ضيوفك وأي حاجة فيها خير مكنتش بتتأخر عنها👌
فهدأ زوجها واطمأن لكلامها كأنه تذكر إن صنائع المعروف تقي مصارع السوء 😊

مين الرجل إللي جاء لمحمد بن عبد الله؟
وليه عامله بالعنف الشديد ده؟
وإيه الكلام إللي قاله له ومشي؟
وهل رجع له تاني ولّا لأ؟

ده إللي هنعرفه الجزء الجاي إن شاء الله😁

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

https://www.tgoop.com/B_kBentAleslams
قناة الكتب التابعة للقناة♥

الحلقة التاسعة👇💛

#قصص_الأنبياء(٢)
#السيرة_النبوية_إيمان_شلبي
#الحلقة_التاسعة
#المدثر

وقفنا المرة إللي فاتت عند محمد بن عبد الله لما نزل من الغار وهو خايف وراح لزوجته خديجة وهو مرعوب من إللي شافه فزوجته قعدت تهدّيه وتقول له متخفش ربنا مش هيضيعك،
وقعدت تذكره بصفاته وأخلاقه وأعماله الصالحة فهدِي واطمأن😊
لكن برده مسابوش نفسهم للأوهام وياترى الرجل ده كان جن ولّا كان إيه بالضبط🤔
بدأوا يدوّروا مين إللي يقدر يفسر لهم إللي حصل ده،
فخديجة كان لها ابن عم اسمه ورقة بن نوفل فاكرينه😁
هي كانت عارفة عن ورقة بن نوفل إنه تنصّر وكان عنده علم كثير،
فشافت إن ده أنسب واحد يقدر يفسر لهم إللي حصل👌

☆وهنا خديجة رضي الله عنها بتعلمنا حاجة مهمة جدا وهي إننا نسأل الناس إللي عندها علم فعلا،
هي ليه مقالتش خلينا نروح نسأل الكهنة، ولّا سادات قريش💁‍♂️
لأنها عارفة إنهم مهما كان عندهم علم بسبب اتصالهم بالجن فمش همّ دول إللي هيدّوها الإجابة المضبوطة👌
وخصوصا إنها عارفة إن زوجها محمد لا يحب الكهنة ولا السحرة ولا الأصنام😑
فأخذت زوجها وراحوا لورقة بن بن نوفل وكان ورقة في الوقت ده شيخ كبير وأصابه العمى،
فخديجة قالت لورقة:
في حاجة غريبة حصلت فاسمع من ابن أخيك👌
فحكى محمد بن عبد الله لورقة كل إللي حصل معاه وإزاي إن الرجل حضنه جدا لدرجة إن كان حاسس إن روحه هتطلع😮

☆سؤال هنا😁
هو ليه جبريل عليه السلام حضن رسول الله ﷺ بشدة كده وخلّاه يتألم🤔
شوفوا،
جبريل عليه السلام من الملائكة وهو أعظم الملائكة وأشرفهم مكانة عند الله،
والملائكة دول مخلوقات بتعمل إللي ربنا يقول لها عليه،
يعني محدش فيهم بيتصرف كده منه لنفسه👌
فجبريل عليه السلام لما عمل كده مع رسول الله ﷺ كان بأمر من ربنا عشان يوضح نقطتين مهمين:
👌
◇أولا:
دي رسالة لنا إن يا أيها الناس محمد بن عبد الله ده بشر زيكم بيخاف زيكم وبيمرض وبياكل وبيشرب،
وبيحس بالألم فكل حاجة هيعملها بعد كده يستطيع أي بشر إنه يقلّده فيها،
يعني هو معندهوش قوة خارقة ولا حاجة...هو بشر👌

◇ثانيا:
العنف ده كله عشان جبريل يقول لرسول الله ﷺ بلسان الحال:
يا محمد انتبه إنت مش بتحلم..إنت مش بيتهيأ لك...ولا دي أحلام يقظة..
إللي بيحصل لك كده حقيقي ..انتبه كويس عشان الكلام إللي هقوله👌
فبدل ما جبريل عليه السلام يقعد يشرح الكلام ده بلسانه وصل له المعنى بإنه يحضنه بقوة ثلاث مرات💁‍♂️
وخصوصا إنه قال له اقرأ وجبريل عارف إن رسول الله ﷺ لا يعرف القراءة والكتابة،
زي ما المدرس بيقول للطلبة بتوعه اكتبوا فالكل بيستعد للكتابة،
فقال له اقرأ عشان يستعد لقراءة الكلام إللي هيقوله👌

ورقة بن نوفل عمال يسمع ويسمع وفجأة قال:
الله أكبر...إنت جاءك الناموس الأكبر إللي كان بينزل على موسى😲
ياريتني كنت صغير في السن...شاب قوي وأنا كنت هنصرك بقوة لما قومك يخرجوك من بلدك💪🏻

☆ورقة بن نوفل كان عارف إن الزمن ده زمن نبي وكان مستنيه عشان يؤمن به ، لأن وصف الزمن ووصف النبي ده كان موجود عند أهل الكتاب من اليهود والنصارى👌
محمد بن عبد الله بيسمع كلام ورقة بن نوفل...
ناموس أكبر إيه ...ومين دول إللي هيخرجوني من مكة؟
قومي ..أهل مكة يخرجوني أنا؟
الصادق الأمين؟
ده همّ إللي أطلقوا علي اللقب ده،
يخرجوني أنا؟
أنا إللي بساعد المظلومين والفقراء والأيتام وبكرِم الضيوف؟
يخرجوني أنا وأنا أشرف الناس نسبا ومن سادات مكة وحفيد عبد المطلب إللي الناس كانت بتهابه وبتعمل له ألف حساب؟
فقال له ورقة بن نوفل:
الناموس الأكبر هو جبريل إللي بينزل على الأنبياء..يعني إنت دلوقتي نبي😊
ومفيش أي أحد جاء باللي إنت جئت به ده إلا عُودِي،
يعني الناس بقوا أعداء له وآذوه😞

☆أنا عايزاكم تتخيلوا المشاعر إللي كانت في قلب محمد بن عبد الله في اللحظة دي🙊
تخيل نفسك كده وإنت لسه بادئ إلتزام أو واحدة مثلا عايزة تلبس النقاب،
وييجي حد يبدأ يقولك خد بالك الناس مش هتسيبك،
حتى أهلك هتلاقيهم بيعارضوك في كل حاجة وهيقعدوا يتريقوا ويقولوا أيوة يا سيدنا الشيخ وكلام كثيييير،

فإنت تستغرب...ليه..هو أنا هعمل حاجة غلط🤨
ده أنا هطيع ربنا وأحفظ نفسي من الفتن عشان أدخل الجنة😥
أهه ده نفس الموقف إللي كان فيه محمد بن عبد الله👌
طبعا هو دلوقتي مستغرب ومش فاهم يعني إيه أنبياء ولا إيه قصة حياتهم،
هو ممكن كان بيكون سمع كلمة من هنا على كلمة من هنا لكن ميعرفش أي حاجة عنهم نهائي😶

◇عارفين قصص الأنبياء إللي اتكلمنا عنهم، في الوقت ده مكنش يعرف عنهم أي حاجة خالص حتى ربنا قال له في القرآن:
"تِلْكَ مِنْ أَنْبَاءِ الْغَيْبِ نُوحِيهَا إِلَيْكَ مَا كُنْتَ تَعْلَمُهَا أَنْتَ وَلا قَوْمُكَ مِنْ قَبْلِ هَذَا "

فبدأ يتساءل: نبي...أنا...طب إزاي؟
معقول ربنا اختارني أنا من بين كل البشر عشان أكون نبي آخر الزمان؟

☆أصل النبوة دي يا جماعة بتبقى اختيار من عند ربنا😅
مش واحد مثلا يقعد يعبد ربنا ويجتهد في العبادة فربنا يعطي له النبوة🤓
النبوة دي اختيار من عند ربنا فقط👌
"اللَّهُ يَصْطَفِي مِنَ الْمَلَائِكَةِ رُسُلًا وَمِنَ النَّاسِ ۚ "

ربنا المُطّلع على قلوب العباد اختار محمد بن عبد الله عشان يكون هو آخر الأنبياء والمرسلين😊
واختار أطهر الناس قلوبا عشان هيكونوا معاه ويساعدوه في تبليغ الرسالة بتاعته👌
فلو أحد فينا كان يستحق إنه يكون في زمن الناس دي كان ربنا حطه فيه؛
لأن قلوبنا مهما بلغت من الطهارة والنقاء فعمرها ما هتكون زي قلوب الصحابة فهم أول من يدخل الجنة بعد الأنبياء👌

وإنتم هتشوفوا بنفسكم الصحابة دول عملوا إيه،
وساعتها احكموا هل فعلا الناس دي كانت تستحق إنها تصاحب رسول الله ﷺ ويكون لها المكانة دي ولّا لأ 😊

¤ ملحوظة مهمة 😁
حديث رسول الله ﷺ:
"إن من ورائكم أيام الصبر ، للمتمسك فيهن يومئذ بما أنتم عليه أجر خمسين منكم قال :
يا نبي الله ! أو منهم ؟ قال : 《بل منكم 》
ده مش معناه إن في حد هيكون أفضل من الصحابة،
لأن الصحابة لهم أجرين: أجر العمل وأجر صحبة رسول الله ﷺ.
وكمان رسول الله قال 《للمتمسّك》
يعني واحد متمسك بدينه مش بياخد من الدين إللي على هواه،
لأ، ده بيعمل زي الصحابة فيأخذ زي أجر خمسين من الصحابة بسبب إن《 المتسمك》 بدينه ده مش هيلاقي أحد يعينه وهيتحارب من كل الجهات لكنه هيفضل متمسك بدينه 💪🏻
فعشان كده ربنا هيعطي له أجر خمسين واحد من الصحابة ومش معنى إن الأجر أكثر منهم يبقى إللي أجره أعلى يكون أفضل،
وخصوصا إن رسول الله ﷺ قال :
"لو أن أحدكم أنفق مثل أحدٍ ذهباً ما أدرك مُدّ أحدهم ولا نصيفه"
يعني لو أنفق واحد فينا زي جبل أحد ذهب مش هياخد نص أجر واحد منهم تصدق بطعامه، فخذوها قاعدة:
أفضل الناس هم الصحابة 👌
وهنعرف من خلال السيرة من هُم الصحابة إن شاء الله😊

خرج محمد بن عبد الله من عند ورقة بن نوفل وهو محتار.. مشاعره متلخبطة...
ورقة بن نوفل قال له إنه نبي والرجل إللي جاله في الغار مجبش سيرة عن موضوع النبوة ده😕
وهو دلوقتي مش عارف يعمل إيه ولا إيه المطلوب منه أساسا🤷‍♂️
وعنده أسئلة كثيرة محتاج حد يجاوب له عليها،
بجد قمة الحيرة 😑
نحط نفسنا مكانه كده لما دماغنا يبقى فيها أسئلة كثيرة ومش لاقيين لها إجابة ومحتاجين حد يفهمنا بنكون محتارين إزاي؟
أهه هو حيرته كانت أشد لأن الوحيد إللي يقدر يجاوب على الأسئلة دي هو الرجل إللي قابله في الغار👌

بس هو خايف منه...ده كان هيموته...طب برده أنا عايز أقابله،
فكان محمد بن عبد الله في حيرة شديدة،
عدى يوم واثنين وثلاثة والخوف بدأ يقل،
والشوق لرؤية الرجل ده مرة ثانية بدأ يزيد لحد ما تمنى إنه يقابله تاني😮
لدرجة إنه بقى يخرج في الصحراء والجبال لعل الرجل ده ييجي تاني😅

هو عايز يفصِل الموضوع هل أنا نبي فعلا ولّا إيه؟
لكن الرجل مظهرش...استنى يوم ويومين وأسبوع وأسبوعين ومفيش حد...لدرجة إنه بقى حزين إن الرجل مجاش،
فبعد ما كان خايف من الرجل بقى هو إللي بيدور عليه😅
وده كان الهدف من فترة انقطاع الوحي👌
لأن حامل الرسالة لو مكنش متشوق وعايز الرسالة دي مش هيقدر عليها وهيستسلم على طول👌

☆زي الإلتزام كده وطلب العلم💁‍♂️
لو احنا من جوانا مش عايزين نلتزم بأوامر الله ومش ومتشوقين إننا نتعلم ديننا وشايفين إن الموضوع حِمل علينا مش هنقدر نكمل👌

◇العلماء على خلاف في المدة إللي انتظرها رسول الله ﷺ قبل ما ينزل عليه جبريل عليه السلام مرة ثانية،
فمدة فتور الوحي كانت ما بين ثلاثة أيام لأربعين يوم،
وده أرجح الأقوال لأن في ناس تانية قالت انقطع سنتين أو ثلاث سنين ،وده مش منطقي خالص حتى😅

◇وفي هنا برده نقطة مهمة 👌
وهي الحديث إللي بيقول إن رسول الله ﷺ كان بيحاول يرمي نفسه من على جبل عشان ينتحر بسبب حزنه الشديد لانقطاع الوحي، فجبريل كان بييجي له فيمنعه ويقول له إنت رسول الله حقا ،فيهدأ ويتراجع عن الإنتحار.

الكلام ده غير صحيح بالمرة🙅‍♂️❌

لأن ده مش حديث ده كان تعليق من واحد من التابعين اسمه الزّهْري على حديث لعائشة رضي الله عنها ،يعني مش حديث حديث عن رسول الله ﷺ ولا عن الصحابة👌
《المسألة فيها شرح كثير موجود في موقع الإسلام سؤال وجواب لمن أراد التفصيل》

خلال فترة انقطاع الوحي دي مات ورقة بن نوفل🙊
مات قبل ما يعرف إيه هي رسالة محمد بن عبد الله،
عاش باحث عن الحق مستني نبي آخر الزمان،
فربنا أكرمه إنه يقابل نبي آخر الزمان مات وهو ناوي إنه يتبع النبي ده،
عشان كده كان جزاءه عند ربنا إنه يكون من أهل الجنة، ويلحق بصاحبه زيد بن عمرو بن نفيل👌

في يوم من الأيام خرج محمد بن عبد الله لعله يقابل الرجل،
فا وهو ماشي فجأة سمع حد بينده عليه، بص وراه وكانت المفاجأة😳
منظر أول مرة يشوفه في حياته ...لدرجة إنه وقع على ركبته من شدة الرعب والذهول والتعجب وكل المشاعر إللي ممكن الإنسان يتخيلها 😶
مخلوق ضخم من نور له ستمائة جناح قاعد على كرسي والكرسي متعلق في الهواء بين السماء والأرض😲
"وَلَقَدْ رَآهُ بِالْأُفُقِ الْمُبِينِ"
ومن شدة الخوف والرعب قام يجري ورجع لبيته وهو بيقول لهم:
زمّلُوني ...دثروني...يعني غطوني.
فسمع صوت بيكلمه:
يا أيها المدثر ..قم فأنذر وخوف الناس وحذرهم من عذاب ربك لو لم يؤمنوا👌
وربك فكبر ..عظّم ربك عما يقوله عبدة الاصنام،
وثيابك فطهرها من النجاسات إللي المشركين مكنوش بيتطهروا منها،
واجعل قلبك وعملك طاهرين👌

والرُّجْز فاهجر..يعني اترك كل حاجة من الأقوال والأفعال ممكن تكون سبب في العذاب 👌
ولا تَمْنن تستكثر..يعني لا تعطي الناس العطاء وتستنى إنك تأخذ مقابل أكثر منه،
ولا تقعد تَمُن على ربك باللي هتتحمله من أعباء الدعوة،
تقول أنا بعمل كذا وكذا وبستحمل كذا...
ومتشوفش عملك إنه عظيم فتقول خلاص كفاية كده مش هزوّد من عمل الخير👌
ومتعملش طاعة لله وتطلب قصادها مقابل،
لكن اصبر لحد ما ربنا هو إللي يعطيك الثواب من عنده👌

☆يعني زينا كده لما نقعد نقول أنا بسمع كلام ربنا أهه وبعمل الطاعات ..ليه ربنا بقى بيبتليني.. فين جزائي على الطاعة..فين من يتقي الله يجعل له مخرجا...فين...فين...
نعمل ومنطلبش، نصبر لحد ما ربنا هو إللي يعطينا الأجر👌

ولربك فاصبر..يعني اصبر على الأذى في سبيل الله والدعوة وخلي صبرك على الأذى إللي هتشوفه ده لله👌

دلوقتي محمد بن عبد الله مبقاش إنسان عادي..بقى اسمه محمد رسول الله 🙊
حياته اتغيرت من اللحظة دي...بقى عنده رسالة..عنده هدف،
مهمته صعبة جدا..ويمكن تكون مستحيلة من وجهة نظرنا احنا كبشر😶
عارفين ليه؟
لأن مطلوب من إنسان عايش في قرية ناااائية لا تكاد تُذكر أصلا بين أهل الأرض في الزمن بتاعه، إنه يبلّغ أهل الأرض كلهم إن هو رسول من عند خالق الكون،
وإنهم لازم يتبعوه😐
أقرب لكم الصورة...تخيلوا واحد من قرى العالم إللي منسمعش عنها فجأة كده طلع وطلب من رئيس أمريكا وروسيا وكل بلاد وشعوب الأرض إنهم يتبعوه ويسمعوا كلامه..رد الفعل هيكون عامل إزاي😳
حد هيسمع كلامه... حد هيهتم بيه أساسا😅

أهه بالضبط كده ده كان مع محمد رسول الله ﷺ👌
لوحده في وسط الكرة الأرضية..مش معاه حد نهائي ..إزاي هيدعو الناس ويوصل رسالته😥

إن شاء الله الجزء الجاي هنعرف إيه الخطوات إللي بدأها
محمد رسول الله ﷺ عشان يقدر يوصّل رسالته 😊

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

https://youtu.be/53buBSvzg-w

جدول حفظ سورة البقرة وآل عمران في شهر رمضان 🤗♥️

مـهم جداً #شير_في_الخير

#خدمة_ركن_السعادة💛🖇️

الحلقة العاشرة👇💛

#قصص_الأنبياء(٢)
#السيرة_النبوية_إيمان_شلبي
#الحلقة_العاشرة
#بداية_الدعوة

وقفنا المرة إللي فاتت عند جبريل عليه السلام لما أنزل أول آيات القرآن على رسول الله ﷺ بعد فترة انقطاع الوحي وكانت الآيات هي:
"يَا أَيُّهَا الْمُدَّثِّرُ. قُمْ فَأَنذِرْ. وَرَبَّكَ فَكَبِّرْ.
وَثِيَابَكَ فَطَهِّرْ. وَالرُّجْزَ فَاهْجُرْ. وَلا تَمْنُن تَسْتَكْثِرُ. وَلِرَبِّكَ فَاصْبِر"
والأيات هنا فِعل أمر👌
والأمر لما بييجي من الأعلى للأدني يعني حد أعلى منزلة لأحد أقل منزلة يبقى لازم تنفيذه فورا،
فالأمر جاء لرسول الله ﷺ من رب العالمين يبقى لازم ينفذه👌
المشكلة بقى إنه هينفذ الأمر ده إزاي أصلا وهو مطلوب منه إنه يوصل الإنذار والرسالة دي لكل أهل الأرض😶
وأهل الأرض مش بس البشر ..لأ ده كمان رسول للجن😳
يعني هو رسالته لكل أهل الأرض من البشر وكمان من الجن،
فرسول الله ﷺ هو أول رسول للإنس والجن مع بعض،
كل رسول كان بيكون لقومه خاصة والجن ربنا كان بيبعث لهم رسل زيهم من جنسهم زي ما قال العلماء،
لكن محمد رسول الله ﷺ هو أول نبي ورسول لأهل الأرض جميعا من الجن والإنس إللي همّ الثقلين 😮

خلينا نركز مع بعض كده ونشوف أهل الأرض في الزمن بتاعه كانوا عاملين إزاي ،
عشان نشوف هل في تشابه بين زمن رسول الله ﷺ إللي بدأ فيه الدعوة وهو كان لوحده بمعنى كلمة لوحده،
وبين زماننا دلوقتي إللي احنا عايشين فيه وهل نقدر نعمل زيه ولّا لأ؟
خلونا نأخذهم واحدة واحدة ،نبتدي من البلد إللي رسول الله ﷺ كان عايش فيها،
وكل واحد فينا يبدأ يربط بين المكان إللي هو عايش فيه وبين وضع رسول الله ﷺ 👌

رسول الله ﷺ كان عايش في بلد كل أهلها بيعبدوا الأصنام وبيقولوا إن دي هي الألهة بتاعتهم،
طبعا مكنوش بيؤمنوا بحاجة اسمها إن في يوم قيامة ولا جنة ولا نار ولا إنهم هيبعثوا بعد الموت مرة أخرى😕
هي بس حياتهم الدنيا دي بيعيشوها بكل ملذاتها،
ويعملوا إللي هم عايزينه ويموتوا وخلاص انتهى الموضوع على كده،
ومش بس كده...ده المجتمع مع الشرك والكفر إللي هو كان فيه ده كان مجتمع فاسد 😑
شرب الخمر ده كان بالنسبة لهم زي شرب المية عندنا، التعامل بالربا ده حاجة أساسية في حياتهم،
الزنى بقى مقلكوش 😀
كان في خِيام كده معمولة وعليها زي رايات...يعني علامات معروفة إن دي خيام البغايا ومعروفة في التاريخ باسم الرايات الحُمر للي عايز يروح يزني، وكان كله عيني عينك كده😶
ده حتى الزواج كان داخل فيه زنى تخيلوا😳
يعني كان عندهم الزواج الشرعي بتاعنا إللي هو فيه مهر وفيه ولي وفيه شهود وإعلان الزواج ونوع الزواج ده أقرّه الإسلام عادي ،
وكان معظم الناس الناس بيتزوجوا كده ورسول الله ﷺ كان زواجه من خديجة زواج شرعي وأمه وأهله كلهم زواجهم كان زواج شرعي👌

كان في بقى أنواع تانية من الزواج كانت عجيبة 😮
أنا هقول لكم مثال واحد عشان مطولش عليكم وعشان تعرفوا حجم الفساد والضياع إللي العرب كانوا فيه قبل الإسلام ،
والتغيير إللي المفروض رسول الله ﷺ هيعمله والمشاكل إللي هتواجهه😶
تخيلوا إن الرجل كان يقول لمراته بعد ما تطهر من الحيض روحي لفلان من أشراف مكة وساداتها واستبضعي منه...يعني تزني معه وبعدين زوجها ميقربش منها لحد ما يبان إنها حامل من الرجل ده،
وبعد كده خلاص بقى يقرب منها عادي، كان بيعمل كده يرجو نجابة الولد يعني يكون ابنه ذكي وقوي🤓

والسادة كانوا بيرحبوا جدا بالشهوات إللي زي كده💁‍♂️
فطبعا أكيد هيحاربوا أي أحد ييجي يقول لهم إللي إنتم بتعملوه ده غلط أو في دين بيقول لكم إن الكلام ده ممنوع😑
متسألوش بقي في المواقف دي فين غيرة الرجل العربي إللي كان ممكن يذبح فرس بسبب إن مراته قعدت عليه عشان ميجيش راجل تاني يقعد عليه مكانها😅
ولا تسألوا عن مشاعر المرأة وهي رايحة لواحد يعاشرها بأمر من زوجها ومفيش حاجة اسمها إنها تعترض وتقول لأ🤐
هي كانت مجرد أداة تسمع وتطيع، ولا تسألوا عن اختلاط الأنساب وضياع الحقوق 😀

دي حاجة بسيطة من وضع البلد إللي رسول الله ﷺ نشأ وتربى فيها ،
والمفروض إنه هيغير الحاجات دي كلها، وأهل مكة مكنوش عايشين عالفساد والكفر ده سنة ولا اتنين،
ولا عشرة ولا عشرين ده كانوا عايشين عليه مئات السنين أجيال ورا أجيال😅
يعني الحاجات دي مغروسة فيهم...شاربينها كده وبتجري في دمهم👌
فإزاي رسول الله ﷺ هيغير الكلام ده وهو بشر زيهم 😳
كل واحد فينا يحاول يربط بين الواقع بتاعه وظروفه إللي هو عايش فيها،
والظروف إللي رسول الله ﷺ كان عايش فيها أيهما أصعب وأشد👌
هنطلع من مكة دلوقتي ونشوف العالم المحيط بمكة في الوقت ده كان عامل إزاي💁‍♂️
في الزمن ده كان في دولتين بيحكموا الأرض،
الدولة الرومانية كانت بتحكم نصف الأرض، والدولة الفارسية كانت بتحكم النصف الثاني،
وكانوا على طول هم الإثنين بيتخانقوا مع بعض عشان يثبتوا مين الأقوى😅

زي أمريكا والاتحاد السوفييتي زمان قبل ما ينحل وتبقى روسيا دلوقتي هي إللي القائدة للنزاع،
وكل واحد منهم عايز يثبت للتاني إنه أقوى ونفوذه أكبر👌
فتخيل نفسك كده مكان رسول الله ﷺ إنت تكون إيه بالنسبة لدولتين كُبار زي أمريكا وروسيا🙊

أهه ده بالضبط كان وضع رسول الله ﷺ لما ربنا بعثه عشان يدعو أهل الأرض ومنهم الفرس والروم😀
إللي هو بالمقياس البشري حاجة مستحيلة محدش يقدر يتجرأ إنه يفكر فيها بس😅
والروم دول كان طبعهم وحْشِي كانوا بيرموا العبيد للحيوانات يتصارعوا معاها وهم بيتفرجوا عليهم 😑

فالعبيد بالنسبة لهم مكنش لهم أي حقوق أصلا،
مع إن العبيد في الدولة الرومانية كانوا ثلاثة أضعاف الأحرار، حتى أفلاطون الفيلسوف المعروف صاحب فكرة المدينة الفاضلة[اليوتوبيا] إللي كان بيتخيلها في عقله كان بيقول :
إنه لا يجب أن يُعطى العبيد حق المواطنة 😤
مع إنهم من أهل البلد ..بس ملهمش قيمة عند الرومان😑

☆خليكوا فاكرين معاملة العبيد كانت عاملة إزاي عشان تشوفوا الإسلام عمل إيه مع العبيد👌

نسيب الرومان ونشوف الفرس 💁‍♂️
ودول كانوا حاجة كده فوق الوصف كانوا بيعملوا حاجة كل أهل الأرض كانوا بينفروا منها وكانوا بيعيبوا على أهل فارس الموضوع ده😮
كان عندهم زواج المحارم ده حاجة عادية جدا 😳
الرجل يتزوج أمه.. أخته...بنته...عادي جدا والموضوع كان منتشر بين السادة وبين عوام الناس🙊
وكان الناس بتقدّس الأكاسرة يعني ملوك الفرس وكان منتشر بينهم إن الأكاسرة دول في دمهم دم الإله،
لدرجة إن الناس المقربين من كسرى مكنوش يقفوا قصاده أو جنبه،
لازم يكونوا بعيد عنه أمتار وإللي عايز يدخل على كسرى لازم يحط على وشه قماشة زي نقاب كده عشان أنفاسه لا تلوث الحَضرة الملكية😀

نروح لأوروبا كانوا في قمة التخلف والحروب بينهم مستمرة،
مصر كان بيحكمها الرومان وكان فارضين على الشعب الضرائب الباهظة على كل حاجة لدرجة إنهم فرضوا ضريبة على إللي يموت 🙃
والظلم منتشر والاضطهاد والتعذيب😑
الهند بقى كانت العجب العجاب كانوا بيعبدوا كل حاجة لدرجة إنهم عبدوا أدوات الكتابة القلم والكراسة وعبدوا الفئران😅
والصين كانوا كفار عندهم ثلاثة ديانات منهم عبادة بوذا ،

☆شوفوا مهما تتخيلوا مش هتقدروا تتصوروا أوضاع الأرض في زمن بعثة رسول الله ﷺ كانت عاملة إزاي😓
تخيلوا إن رسول الله ﷺ بيقول عن ربنا في حديث قدسي :
" إِنَّ اللَّهَ نَظَرَ إِلَى أَهْلِ الْأَرْضِ فَمَقَتَهُمْ عَرَبَهُمْ وَعَجَمَهُمْ إِلا بَقَايَا مِنْ أَهْلِ الْكِتَابِ"
المقت يعني شدة الكره، فربنا كره البشر من كثرة الفساد في الأرض إلا ناس قليلة جدا من أهل الكتاب إللي استمروا متمسكين بدينهم الصحيح👌
فكانت الأرض في الزمن ده محتاجة حد يرشدها للطريق الصحيح.

حاولوا تقارنوا بين الوضع في زمن الجاهلية وحال الأرض دلوقتي سواء في بلاد المسلمين أو حتى في أي دولة من دول العالم ،
هتلاقوا إن في تشابه كبير جدا بينهم،
الزنا وقتل الأطفال والظلم والإلحاد والشرك والقتل والتعذيب والإغتصاب ..كل ده بقى منتشر في زماننا 😞

فالعالم دلوقتي محتاج الإسلام مرة ثانية👌
في المرة الأولى كان محمد رسول الله ﷺ ، والدور علينا دلوقتي إننا نتبع نفس خطوات رسول الله ﷺ عشان ننشر الإسلام ونبني أمة الإسلام مرة ثانية ،
خلونا نشوف المنهج والخطوات التي بدأها رسول الله ﷺ 😊
رسول الله ﷺ فهم دلوقتي تفسير الحاجات الغريبة إللي كانت بتحصل له،
زي إللي كان بيسلم عليه وهو ماشي وكان بيقول السلام عليك يا رسول الله.. عرف إن ده كان الحجر والشجر👌

أول خطوة عملها رسول الله ﷺ عشان يوصل دعوته هو إختيار الأشخاص المناسبين عشان يكلمهم في أمر الإسلام👌
ماهو مينفعش أي حد كده يروح يقو له أنا رسول 😅

احنا عايزين نحط أساس متين نقدر نبني عليه وعايزين إللي يصدقنا، ويساعدنا مش إللي يقول لك يا شيخة إيه التشدد ده، ولّا إنت اتجننت ولا إيه ..ولّا إللي يقعد يسخر منك😑

فهو دوّر على الناس إللي بيثق فيهم وعارف إنه لو قال لهم إنه رسول هيصدقوه وكمان يساعدوه ويقفوا جنبه 👌

ومش بس كده ده أنا لازم أكون عارف إن الشخص إللي أنا هدعوه ده بيحبني وبيثق فيّ، ماهو أنا ممكن أكون بثق في أحد وبحبه وهو مش بيبادلني نفس المشاعر وممكن يكون بيكرهني أصلا 😀
فأنا ممكن يكون كلامي صحيح ومقنع بس عشان الشخص إللي انا بدعوه به بيكرهني فمش هيسمع كلامي🤷‍♂️
فأول قاعدة في الدعوة هي إن يكون معاك الكلام المقنع وفي نفس الوقت تحببي الناس فيك👌

والناس هتحبك لما تكون أخلاقك ومعاملاتك زي أخلاق رسول الله ﷺ؛
لأن أكثر حاجة ممكن تجذب الإنسان في الشخص إللي قصاده هو حسن الخلق👌

وحسن الخلق بكل بساطة هو وجه بشوش بيضحك ،
مع كلام طيب جميل،
مفهوش شتيمة ولا احتقار ..وكمان إنك تحسس إللي قصادك إنك خايف عليه مش مجرد تقوله حلال وحرام وخلاص😅
وطبعا مش هتقدر توصّل للناس الإحساس ده غير لما تكون فعلا من قلبك حاسه💁‍♂️
لأن إللي في القلب بيوصل للقلب وهو ده إللي كان بيعمله رسول الله ﷺ😊

مين بقى الأشخاص إللي ينطبق عليهم الكلام إللي احنا قلناه ده في حياة رسول الله ﷺ 😁

أول واحدة كانت زوجته ورفيقة عمره وأم أولاده وإللي كانت دايما بتعينه على فعل الخير خديجة بنت خويلد 😊

فراح قال لها إن هو رسول من رب العالمين أرسله للناس عشان يدعوهم لعبادة الله وحده ،
وإنهم يتركوا عبادة الأصنام فآمنت خديجة على طول👌
ماهي متابعة الموضوع من البداية😅
وأكثر واحدة تعرف الرجل هي زوجته لأنها أكثر واحدة قريبة منه وعارفة مميزاته وعيوبه وعارفة صدقه أو كذبه💁‍♂️

وبعدين رسول الله ﷺ دعا ثلاثة أشخاص آخرين هم : 《عبد الله بن عثمان أو عبد الله بن أبي قحافة أو خلونا نقول : أبو بكر الصديق》
الثاني :《علي بن أبي طالب》 ،
والثالث : 《زيد بن حارثة》
رسول الله ﷺ دعاهم للإسلام،
مين هم الثلاثة دول وهل فعلا أسلموا زي خديجة ولّا إيه كانت رد فعلهم؟
واشمعنى العرب بالذات إللي ربنا اختارهم عشان تكون فيهم رسالة الإسلام؟
ده إللي هنعرفه الجزء الجاي إن شاء الله 😊

♡ملحوظة:
أي حد عايز يأخذ القصص وينشرها يتفضل أنا معنديش مانع نهائي.

#Eman_Shalapy

https://youtu.be/KbDf6MT5WV4

كيف اجهز نفسي وبيتي لاستقبال شهر رمضان🌜