#_туризм

ТАШВИШЛАРНИ БИР ЧЕТГА СУРИБ....

Ўзбекистонимиз ўзининг сўлим ва бетакрор табиати ,шахару қишлоқлари, пурвиқор тоғлари, жаннатмонанд боғлари, осори атиқалари билан дунёнинг манаман деган жойлари билан беллаша олади.
Давлатимиз раҳбари раислигида жорий йилнинг 9 апрель куни бўлиб ўтган “Ҳудудларнинг туризм салоҳиятини янада ошириш ҳамда хорижий ҳамкорлар билан амалга оширилаётган инвестиция лойиҳаларини жадаллаштириш” юзасидан ўтказилган видеоселектор йиғилишида ҳам юртимизнинг туризм салоҳиятни янада ошириш бўйича амалга оширилиши зарур бўлган вазифалар ҳақида фикр билдирилди ва мамлакатимизда туризм соҳасини ривожлантириш борасидаги ишлар танқид қилинди.
Йиғилишда сўнгги йилларда ички туризмга кўрсатилаётган эътибор туфайли маҳаллий сайёҳлар сони 23 миллионга етганлиги, ( ваҳоланки, 2017 йили бу рақам бор-йўғи 5 миллион кишидан иборат бўлган экан) лекин бу борада ҳали қилишимиз зарур бўлган вазифалар кўплиги, баъзилар, ҳатто ёнгинамиздаги Самарқанд, Бухоро, Хива ва Шаҳрисабзни бориб кўрмаганликларини афсус билан таъкидлаб, ҳар ойнинг битта шанба ва якшанбасини “Оила ва меҳнат жамоаси билан саёҳатга чиқиш куни” деб эълон қилганлиги ҳамманинг кўнглидаги гап бўлди десак адашмаймиз.
Биз таҳририят ходимлари ҳам ўтган галги “Сўқоқ” сафаридан сўнг саёҳат навбатини юртимиз марвариди бўлмиш бетакрор водий томонга буриб, Наманган шаҳрида ўтказилаётган анъанавий халқаро “Гуллар фестивали”га йўл олдик.
Ангрен шаҳридан ўтиб машҳур “Қамчиқ”довони сари кўтарилар эканмиз, довон йўлларининг текис ва равонлигидан, ёзнинг жазирама вақти бўлишига қарамай, довон четидаги тоғларнинг худди илк баҳор чоғларидаги каби кўм-кўк гулу майсалар билан қопланганини, тоғлардаги бетакрор ёнғоқзору арчазорларни, мукаммал даражада қўрилган ер ости йўлларини кўриб, қалбимиз ҳаяжондан жунбушга келиб, инсон ақлу тафаккурининг, қудратининг қанчалар кучли эканлигига яна бир бор тан бердик ва мана шу иншоотлар ўзимизнинг юртдошларимиз томонидан бунёд этилганлигидан қалбимиз чексиз ғурурга тўлди.
Довонда шаррос ёмғир ёғаётганига қарамай, термосларга қуйиб олганимиз аччиққина қаҳва хўплаб, пурвиқор тоғларга боқар эканмиз, Ўзбекистонимизнинг манаман деган юртлардан қолишмайдиган табиати, географияси, наботот олами борлигидан фахрландик.
Водий йўлларидаги бепоён ўрикзор, олмазору гилосзор боғлардан ўтиб борар эканмиз, шундоққина йўл бўйига тоғдек уюб қўйилган, сўнгги вақтларда бозорларда мутлақо кўринмай кетган беқасам тўнли ҳандалакларни кўриб тўхтаганимиз заҳоти сотувчи қиз қўлимизга шираси чакилллаб томиб турган, каржланган ҳандалакларни тутқазди. Ҳандалаклар шунчалик ширин ва хушбўй эдики, бир вақтлар- олис болалик чоғларимизда еган тилёрар ҳандалаклардан асло қолишмас эди.
-Биз ҳандалакларнинг ҳақиқий турини сақлаб қолганмиз. Улар ҳеч қандай мева билан чатиштирилмаган, ҳандалаклар ер танлайди, тошлоқ ер бўлмаса кўкармайди, шунинг учун истаган ҳандалакни олсангиз карчлаб бераман, уялтириб қўймайди, - дейди ёшгина сотувчи қиз ишонч билан.
Йўл бўйи учраётган боғлардаги, мевасининг кўплигидан ерга эгилиб қолган олмаю шафтолизорларни, бир қаричи ҳам бўш турмаган ерларни кўриб, водийликларнинг ҳақиқатан ҳам меҳнаткаш, ишнинг кўзини биладиган одамлар эканлигига яна бир бор тан бердик.
64-халқаро гуллар фестивали ўтказилаётган Наманган шаҳрининг Бобур боғидаги гўзал манзараларни кўрган кишининг хуши бошидан учади десак муболаға қилмаган бўламиз.
Боғдаги биз ўзини кўриш тугур, ҳатто номини ҳам билмайдиган, нақадар гўзал ва бетакрор гулларни ва улардан яратилган, боши охири кўринмайдиган гулзорларни кўриб: ”Отангизга баллией, наманганликлар,”- дедик беихтиёр.
Боғнинг ўзида ташкил этилган гул бозорига кирган кишининг бу ердаги ранг-баранг, бири-биридан гўзал ва бетакрор, лекин нархи ниҳоятда арзон гулларни кўриб саросимага тушиб қолиши аниқ.

Гулларга ҳавас билан боқар эканмиз,“Биз бир дона ўсмани ердан чиқаролмай ҳалакмизу, булар мана шундай бетакрор, уруғи дунёнинг қайсидир бурчакларидан келтирилган, аксариятининг эса ўзлари яратган бири-биридан гўзал ва бетакрор гулларни қандай етиштирдилар экан,”- дея гулларнинг соҳибларига тасаннолар айтдик.
Гуллар шунчалар кўп, гўзал ва турфа хиллигидан қайси бирини олишни билмай юравериб, бир дунё гул сотиб олганимизни билмай қолибмиз.
Гулларимизни кўрган ҳайдовчининг хуши бошидан учиб кетганини кўрганимиздан сўнггина машинанинг имкониятини унутганимизни пайқадик. Лекин энди кеч эди. Чунки гулларни ташлаб кетишга асло кўзимиз қиймаганидан, машинанинг юкхонасидан тортиб, салонигача жойлаштириб, беш-олти соатлик йўлга икки киши сиғадиган жойга уч киши ўтириб келсакда, гулларимизни бешикаст келтириб олдик.
Эътиборли томони шунда эдики, биз борганимизда халқаро гуллар фестивалининг очилганига ўн кундан ортиқ вақт бўлиб қолганига қарамай, боққа одам сиғмас, ҳамманинг кўзида ҳайрат ва ҳавас, ҳамма ҳаяжон билан гулларни, гулзорларни суратга олиш билан овора эканлигини кўриб, одамлар юрагидаги ошуфталикни, ҳавасни, гулга, гўзалликка ташналикни кўриб хаёлимиздан Ўткир Ҳошимовнинг ”Одамлар нега бўйрадеккнина ерларига гул экадилар, у ерга картошка ёки пиёз экканларида ҳарна қозонларига тушар эдику, чунки бунинг отини маънавият дейдилар,”- деган гаплари беихтиёр хаёлимиздан ўтди.
Аслида ош фестивали, қовун сайли каби тадбирлар ҳам ўтказилади. Лекин улар гуллар фестивали каби одамларни ўзига чорламайди. Чунки биз фестивалда Қозоғистон, Тожикистон, Туркманистон, Қирғизистон, Россия, Украина каби давлатлардан келган кўплаб сайёҳларни учратдик. Боғ хизматчиларидан бирининг айтишича, чет эллик сайёҳлар боққа асосан кечқурун келишар, чунки боғ тунда ранг-баранг чироқлар ва мусиқа садолари остида янада гўзал ва бетакрор манзара касб этар, рангли чироқчалардан гуллар шаклида ясалган композицияларни кўрмаган киши армонда қолар экан.
Афсуски, бизнинг саёҳат режамиз бир кунлик бўлгани учун боғдаги тунги бетакрор манзарани кўриш имкони бўлмаган бўлса ҳам, бир олам завқ билан қайтдик.
Ҳа.Юқорида келтирганимиз каби юртимиз гўзал ва бетакрор. Бу гўзалликлардан баҳраманд бўлиш учун эса бир оз вақтингизни ва маблағингизни аямасангиз бас. Дунё кезишга имконим бўлмаяпти дея ўксинманг, Ўзбекистонимиздаги каби гўзал ва бетакрор жойларни бошқа жойларда учратишингиз қийин.
Чунки турли сабаблар билан дунёнинг турли жойларида бўлдик. Лекин ишонинг, у ерларда ўзимизнинг юртимиздаги каби гўзалликларни учратмадик. Бу ҳеч қандай муболағасиз, чин дилдан айтган сўзимиздир.

Башорат Сатторова
журналист.

@piskenthayoti