دعوة للبكاء في ليلة شهادة الحنونه

زلم الضعن حاچونه..تنامون تتلگونه...؟؟
انه ادري ليرد لاهله..يلگاهم يتانونه

جايبه الروس بلهفتي
وگمت ادور ملگه منكم
صيحة المستحية اصيح
لا تفززكم اختكم
ادرو متوا وانذبحتوا
بس أمل عندي بلبنكم

الينولي ويحشم اخوته
من يصيّح يذبحه صوته
گوه احشمكم يخوتي
_____
بآخر امل ضلينه..تفكون حبل ايدينه
ولكربله تحدونه..ونرجع مثل ما جينه

نرجع بريشات كافل
ورايته تكسر علينه
مثل ما جينه امن اهلنه
نرجع ابلا حبل ادينه
صعبه ينكلي غريبة
ابيت اخوي البالمدينه

حته لو ذب حبل اديه
فكدك يضل جرحه بيه
فگدك اخشن من حبلهم
____
مشتاكه بس خجلانه..رديتلك حيرانه
يحسبنه خاف الكافل..وماكو بنات اخوانه

ابلايه خولة ولا رقية
ولا صفيه ولا شريفه
سكته ناحن سكته ماتن
النشغه تكتلها العفيفه
شجره ضعني ووكتي مايل
والسبي اعلن خريفه

زينب وردت كسيره
جان موتي ديره ديره
وجيتي الكم هاي موته
_____
جية العتب مو لوني..الجاباني شوك عيوني
مشتاكه واطلب منكم..عن طلعتي تعذروني

العذر منكم يا غياره
عن طلعتي ابلا حماكم
عن شكو نسمه غريبة
طبت لريتي بجفاكم
والوراكم عمر تمشي
نامت بخربه وراكم

ابرولي ذمتي يا هواشم
عرفوا اسماء الفواطم
وغربة كامت تحجي اسمهن
___
الروس ندفن بيهن..ودمعاتي تجري اعليهن
يم يا جرح من نحرك..شيباتك نخليهن

انعه وافرح جبت راسك
يعني دفنك كمل هسه
وساعت الانضر جراحك
فرحي مثل الموت احسه
مغسله راسك يا حبيبي
بدمع عيني الما احبسه

تراب كبرك راح اهيله
وادفن العشره الطويلة
اموادع اجروح وسبيه

يا قاضي حاجات اليدك بيبانك
الحاجاته انته منين يبدي يطلبك

مولاي احبك بس بعدني شما زور
ايدي اعلشباجك واطلب حُبك

امتانيك تعصم دمعتي بنضره عين
وترفع الحاجز بين گلبي وگلبك

موكب عطش يحسين انصب بالروح
وخلي النوايا البيه ماي اتشربك

مرات ابجي لغربتك وانعه الصار
ومرات دمعاتي التطيح اتغربك

مرات يم بيتي واحس قربي عليك
ومرات يم صحنك واخسر قربك

ما مفتهم قانون حبك مولاي
ولا اعرف شركض اجدامي بدربك

انته السهل واول سهل ما مفهوم
وشلون بينه لو وصلنه لصعبك

الطير الذليل الجنحه كالو معيوب
مهيوب صار امن ننحسب وي سربك

بعيوبي يا مولاي حسبوني عليك
ولهسه محتار الگلب شيحسبك

محبوب والد غالي مالك للروح
احتاريت دمعي اعللوجن شيكتبك

ومحتار يا باب الادكه والكاك
الحاجاته انته منين يبدي يطلبك

مولاتي#العليلة
ورجوع الضعن الى #المدينة

من كالوا ضعنكم بالدرب جاي
كعدت اعللدرب احسب بالضعون
باب البيت عفته بضهري مفتوح
وحضرت المكان البي تكعدون

اسولف ويه كلبي وانه اتنطر
بيا لهفه يصدلي من يجي الاكبر
وكبران الطفل يرجعلي اتصور

رحت امسح خشبة كاروكه..وعطرته وحطيت اوساده
هنه اشجم يوم شجم ساعه..وعامر يرجع بيت الساده
_
وشكو حاجة تحبها اختي رقية
اباب الدار بيدي حضرتها
طفله بعمري تتعب من سفرها
وراحتها بنزلها يم اختها

خذتني ام البنين ولزمت ايدية
وكالتلي الضعن هسه على جيه
ومن الفرحه ما عانني رجليه

واتذكر خيّاله اخواني..حاطو عماتي وهودجهن
ويا هسه ترد الخيّاله..الجانت تمشي النوك بسدهن
_
بله خيّاله رد ضعن الغياره
والاوجوه المشن مو هنه هنه
وحته النوك مو نوك الهواشم
ما هنه هزايل نوك اهلنه

وين حسين ابوي الطوله خيمتنه
وين الراية ذيج الفوك عمتنه
بيا هزله التجي الكه رقيتنه....؟؟

لا رايتنه ولا حاملها..ولا طفلتنه الجوه الرايه
وين حسين ووين الاكبر..مو كال ارجع وانطه حجايه
__
حلم ريته حلم مو ضعن الاحباب
ابد هاي العبي لا مو عبينه
راحن بس سواد ايخجل الليل
حمر يا وسفه ردّن للمدينة

اسئل بلكت تكلولي متحلمه
ساعات ويرد حسينج وزلمه
بدورة وجهه تخنك طفلته النسمه

مو يدري امحضرلته اثيابه..وبيدي امعطرتله امصلايه
يا فرحة الما تمت بوية..واول فرحة تصير قرايه

الى مولانا الشهيد
#المُحسن_ابن_علي

اول شاهد اعللصار
يروي عن هجوم الدار
نشغه محسن تسولف
الحدمن واصل البسمار

اثار الجريمه..طفل بالعتبه دامي
شاهد عالمصيبه..ويعرف بالاسامي
ياهو الي دفعها
منو كاسر ضلعها
منو نزل دمعها
يعرفهم المحسن

كل ايد انمدت زجر
كل دفعه موت وغدر
يعرف محسن بالسبب
شخله عيون امه حمر

شهيد وشاهد اعليهم
وجوب العن بأساميهم
_
ما شم الهوه وذبلان
اول شهكه اله دخان
سابگ ولد ابو عالموت
وصار اول نعي وقربان

مذبوحه الطفوله..ابسمار الهضيمه
قبل السم والطفوف..بيك اول جريمه
الاحقاد الدفنية
ومنو بگلبه ضغينه
الضد دار الحنينه
يعرفهم المحسن

جرحه و حقه المغتصب
النگلو كارات الگصب
اتلث تيام اهل الحقد
تحط يم بيبانه حطب

الجهنم مستقر ليهم
وجوب العن بأساميهم
__
محروم الطفل محروم
دللوه ما سمعها بيوم
ما فك عينه وسط اكماط
فك عينه بحرگ ودموم
تكبيرة ولادة..محد بأذنه كبّر
الشوفه الاولى لأمه..خدها صاير احمر
اسباب الضلامه
بخدها والعلامه
السبلو هالسلامه
يعرفهم المحسن

الأم شما تدنه الابن
يدفعوها اهل ال وأن
بين الدم بين الدفع
جان اموادعهم خشن

الگلب غيري ارتضه بيهم
وجوب العن بأساميهم
__
بعينك شفت ابو الحسنين
اموصه امقيد الجفين
ردت تنصره بس الحال
حدك بس نضر هالعين

عشت اهات الحسين..من وصلوا خيامه
حاول مثلك هواي..بس ما صح قيامه
صرعه بس غياره
حسين بكلبه ناره
والقصدو خماره
يعرفهم المحسن

باب الزهره اعليها شب
ونيران اخيام ولهب
كل حادث لال النبي
شيخين الفتنه السبب

الحقد اول فتاويهم
وجوب العن بأساميهم

#ثكيل
#للسيدة_الزهراء
صلوات الله عليها

عدنه اليموت بعمر الورود
اعلسباب موته اهواي نسئل
وعمر الزچيه ١٨ عام
ااسئل ضميرك على المقتل

اتبرر للفاعلها
تشارك وي قاتلها
___
عوف التقيه بهالجرم..بضلم ام حسن لا تختصر
البسمار صح صاحب ذنب..بس قبله اسباب شكثر
محزونه جانت عالنبي..قبل الدفع قبل العصر
وواسوها امتها بو أن...يدفعوها تدفع تنكسر
 
ومو حزن حزنين جانن للبتول
حزن ام وحزن بت اعللرسول

هذا سكوتك عن الاسباب
بسمار فوگ الزهره چمّل
عدك امصاب وتلگا جيران
تحرگ بدارك گلي تقبل..؟؟
والنار ،،، من تقبلها
تشارك،،،،وي قاتلها 
___
مكروبة ولفرّج كرُب..عن  مؤمن  تحبه السمه
وتوها عمرها ١٨ ..شبسرعه مالت  فاطمه
ومن شوكت ضيگ الصدر..ليفرجه بسمار ودمه
شلون اعلريحانة علي..امتدت ايادي مجرمه

بابه يندگ ادري بالعنده مصاب
وليش عالزهره اندفع ياناس باب

دخان حاط الزهره دخان
وخلص دفع اخر عمرهه
بموقفك لو تنحسب عالنار
لو ماي واتطفي بجمرهه
يمك..لو متحلها
تشارك...وي قاتلها
___
مغمومة والغم باللغه..الكُرب اليذوب امن البدن
للباب راحت فاطمه..ورجعت خيال ام الحسن
احااه يا ذاك الجذع..حارم طفل من اللبن
راحتله حامل بالولد..ورجعت حمل وابن اختفن

مايله ام حسين مفجوعه اجت
بيا بخت كسروا ضلع بت البخت

بين الحطام وبين الارماد
مو بين اخوته انولد محسن
لتبرر افعال اليقتلون
وصير بجراح الزهره مؤمن
روحك..ما تسئلها
تشارك..وي قاتلها
____
كسر الضلع اخر جرم..من كاعها الزمره بدوو
مغصوبة ذى القربى بقت..ومن حقها الها ما نطوو
وغصبوا خلافه من علي..وبكاعها ما اكتفوا
عالدار نگلو بالحطب...وعالباب ركضوا فزّعوا

فمذ رآوها عصروها عصره
كادت بنفسي ان تموت حسره

حايط ونار واجه البسمار
وولية الدفع ما عدها اي حل
اللهُ اكبر صاح جبريل
خزانة الاسرار قد سل
تسكت،،، هم تسلها
تشارك،،،،وي قاتلها
__
مقتولة من كثر الضرب..الله اليشل الطگها
((طبگ الرمش لا بل اشد...باب الخشب يطبگها))
شيريد من عدها بعد..مو كافي ماكل حگها
مو كافي مكسورة ضلع..الدار لا تحرگها

جانت الزهره بكل نفس تتألم
تفاحه نزلت رجعت بفيض الدم

بس تسكت وما تحچي وتخاف
وياهم انته تصير حطاب
كافي تسد اذنك على الصار
واسئل ضميرك على الاسباب

الاسباب ،،، من تجهلها
تشارك..وي قاتلها
__

تكبّر فوك ابوك ويمك اعداك
وحدّت بالسيوف اكلوب ميته
اجنازه تصلي فوك اجنازه ما صار
طفل بس قلق موت هناك عشته
من اخر سجده للسرداب اهات
دربك فوك گلب امك ركضته
طف ثاني اعلنرجس رادو يصير
وقصة علي وليلى تعيدها انته
اخر رحمه لله امشرده تعيش
الله شلون تتهجر رحمته
خسرنه اهدعش كبلك وانسكت ليش
واخافن تضهر وهم نبقه سكته
الماي اتراوه بالسرداب ندمان
وراد اوياكم يصلح غلطته
أمام وأامن بسرداب الاجروح
وما أمن يضل يم دور امته
يصير نغربك واسمك نضم بي
غريب نكول عالنعرفهه قصته...؟؟
بني العباس راحو والوكت فات
يمته اسمك اكوله والگه لذته
الامه الخايفه الما سولفت بيك
صار سنين واسمك ما حجّته
لا تترجه صوت وخرسه الاحلوك
وبعيقك شاهد اعللحجي الگلته
لا خلوك تضهر حته تبني
ولا عاونوا ايد تريد گبته
السم مره بجبد والد تحس بي
ومره الثانية امن امتك شربته
الله يعضم اجرك والحچي هواي
ووحقك قلق موت وياك عشته