حبيبي بكل زمان الغربه وياك
حته بمجلسك قلة اليعرفوك
ودمعتك شرِكة صارت مو اعله امصاب
يبجون لوضعهم يله يبجوك
يقدسون الكبر من خيرك وصار
وينسونك حبيبي وما يقدسوك
يشوفوك بصورهم لسه عطشان
ومي بجفوفهم بس ما يشربوك
ما خفف دمعهم من الاسهام
اكو اگلوب ابجييهه اسهام زيدوك
ما حبوك يا مولاي لله
جي تارس اديهم همه حبوك
وما عندي اعتراض وكلي تقصير
ملك قابلهم المن يحجي مملوك
بس مولاي احبك واحترگ جاي
ليمته تضل غريب وما يسمعوك
ليمته توكل امثالي لحم طير
وانته اعللرمل يحسين متروك
حبيبي اتعذرك بس احترگ جاي
وانه اسوء منهم وبدموعي مشكوك
بس راجيك اضل وياك كنّاس
امن اليبچوك مو من اليبجّوك

#سماعي

كل ليلة..يم گبرچ اتعنه بهضم
واحچيلة..وبجروحي يا زهره اضم

ها ياللحد..بلكت ترد
الجانتلي كلشي وحته ام..كل ليله
____
هذا انه التحبي صدگ..حاچيني يا زهره
من عگب عشرتنه صرت..اوية المگبره عشره
امنيتي اشبگ مُحسنچ‌..مو اشبگ بگبره

عايش على قيد الدمع..
كسرة گلب كسر الضلع
مو فاطمه الي تندفع..ومحد يحاميهه

اتذكر..من صحتي يا حيدر مدد
شكداسهر..وگلبي يون راحت بعد
ها ياللحد..بلكت ترد
الجانتلي كلشي وحته ام..كل ليله
____
انه علي بس مو علي..يم گبرچ اتغير
حصدو خضارچ بالخشب..وبس ثوبي باقي اخضر
شما اشتم تراب الگبر..بيه الجرح يكبر

ومكسور من يمچ ارد
واتراب بيدي امن اللحد
بنص بيتنه الكله البرد..بترابچ ادّفه

متغير..وبعيوني مرسوم الحزن
متحير..شيصّبر اجروحي التحن
ها ياللحد..بلكت ترد
الجانتلي كلشي وحته ام..كل ليله
____
نقص بحياطينه دفو..ومابي ضوه بيتي
كل ليل ما بي فاطمه..يوازي الهوه بريتي
وضل حالي جن حال الشجر..بتراب عافيتي

يا بت محمد مختنگ
بكل حرگة عالباب انه ادگ
ويتلف جفوفي الحرگ..التلّف اجفوفچ

نيرانه..تركت على جفوفچ اثر
وهذا انه..العفتيني وحدي اويه السهر
ها ياللحد..بلكت ترد
الجانتلي كلشي وحته ام..كل ليله
____
وگلبي يدفعونه بقو..كلما يدفعونچ
يا فاطمه انه علي ..مشتاگ لعيونچ
يا زهره خايف هالعمر..لا يطول ابدونج
(ابكي مخافة ان تطول حياتي)

يا اخر سوالف هلي
گبر‌چ يفاطم منزلي
دورتي لو لا عن علي..وحنيتي لأيامي؟؟

يم بيتي..نتگاسم المي والهوه
حنيتي..لايامنه الچنه سوه
ها ياللحد..بلكت ترد
الجانتلي كلشي وحته ام..كل ليله
____
يا حيلي بس حيلي اندفن..وعايش على عطرچ
الخلني ليهسه عدل..المي والهوه وگبرچ
اشكد تارس اترابچ بچي..بكد ضييم البعمرچ

ضلع العرش ضل منكسر
ياساتره حته الستر
بثايبي ضل عطر الگبر..عطره اليهديّني

يا زهره..وي موتتچ كل موتتي
وشيصبره..الضايگ وجع من غربتي
ها ياللحد..بلكت ترد
الجانتلي كلشي وحته ام..كل ليله

اللحن👇

لحن قصيدة
(كل ليلة)

#لأم_البنين صلوات الله عليها
#دكه_ونص او #شور_فزعه

على الخدمه
اذا سولفنه رباط الحچي ام عباس
بلا روس وولدها الها رفعوا راس
تدور حسين متدور كلام الناس

علماني..حبهه اول درس بالحب علماني
مو مكاني..والمكان الما يذكرك مو مكاني

حي ام عباس
سيرتها دلتني دربي..واطتني هالمسئله
ابنادم الما يذكرك..ما عندي ذكره اله
وحيل استعز بصحبته..الشايل عطر كربله
____
نست كلشي
وذكرت بس عشكها وصفّت النيه
حسين يگلها يمه ودنگت هيه
ما رادت اسم هيج العبوديه

وره ضهره..فاز كلمن شمر اسمه وره ضهره
احله شهره..من يگول حسين اعرفك احله شهره

حي ام عباس
لخاطر حسين واخوته..ضحت بسم بي ربت
وجي ما تفكر بسمها..للخدمه صارت بخت
اولى المدارس لبنها..واربع زلم خرجت
___
يبوفاضل
ابد لتكول خوية لسيد احسانك
يبني من تطيح جفوف ذرعانك
يله اتطيح يا سيدي امن السانك

توصي ابنها..كون كل ام بالحسين توصي ابنها
يضل لبنها..ينذكر بالخير دوووم يضل لبنها

حي ام عباس
وهوه ابطنها ابوفاضل..تغذيته يتنفسك
اكبر من الدنيا كلها..عده حجم محبسك
وطاهر المرضع يبين..من دمعته بمجلسك
_____
بغيابه
ما ذكرته جي ما ناسيه عيونه
وكل مغرب تضل تدعيله محزونه
اللهم عجل رجعت ضعونه

انتضاره..الغاب امامه منها تعلوم انتضاره
بكلبي ناره..خل يموت وما تموت بكلبه ناره

حي ام عباس
من غاب مهدي زمنهه..بدمعتهه نطرت يرد
وخير انتظار لامامه..بدموعه يبقه العبد
اقوى سلاح المدامع..للمهدي من تستعد

‏لحن ((على الخدمه))

(ليلة ام البنين)
#نزال

لمت الويلاد رفعت هامهه
بعد بدوية وتشد احزامهه
ام الابطال ..... ام الابطال
@@@@@@@@@@@@@@@@
حشمت بفحول هاشم
رفت اشوارب زلمهه
بكثر ما راحت وردت
داخت الكاع بجدمها

هاي ايام المراجل ينفرد بيها النشط
يمه و الشاهين يفطن يعرف اعليمن يحط
الرگبه تتبره بنحرها هيج اريدنا شرط

شدت العصابه فوگ الهامه
ولدي هاي الشمس يمكم شامه
ام الابطال
@@@@@@@@@@@@@@@@
جابت اعلوگ امن ابوهم
شدت بجف الهواشم
لو حجه حسين وأمركم
دنگ وگله انا خادم

حطت بكل ايد واحد سدر كافور وجفن
ما اعرفه ولا اريده اليرد ما بي من هذن
يمه صيرو عيون ذيب شما علاويكم غفن

زودكم بيض سواد الديرة
جروحكم نزفتها مو دم غيره
ام الابطال.... ام الابطال
@@@@@@@@@@@@@@@@
غتره الكرار جابت
حزمت بيهه گمرها
المشرعه حرمه وتريدك
يلوگن جفوفك مهرها

مني للكل هالوصيه وبألاخص لجل الگمر
لا تحسبوها حرايب ونسه احسبوها وسفر
ندري بالصياد يگنص يمه لو يلگاله بر

عفيه ولدي الما خطو بالصيده
جيبو كل راس الحسين يريده
ام الابطال ..... ام الابطال
@@@@@@@@@@@@@@@@
جابت ارغيف الولدها
وانطت لكل زلمه واحد
حار بيه انتو استلذو
طعمه يخرب لون بارد

هاي حكمه اخذوها مني البارد اتكرها العرب
حارين اولادي هيبه يفهه يمكم كل حطب
حسين كلما هز نخلكم غضب وكعو مو رطب

خل يتيه كل سبع مشراده
روسهم فصلوها يمه گلاده
ام الابطال ... ام الابطال
@@@@@@@@@@@@@@@@@
يمه صيرو لضهر اخوكم
سند وازماط وحزم
شدو راية بخت يمي
احجاية اريدن من زلم

بالشدد تحلة المواقف والحسين بشدته
كون حته النسمه لتغث ما تمر يم ريتّه
ويمه انشفو وموتوا سكته ورطبة ختضل جربتّه

ما مرضعته وحليبي ينكره
الما يصب دمه لعزيز الزهره

#ثكيل
ام البنين عليها

شيبقاله..الراح امن اديه خله
يا روحي..المّن بعد عدله
_______
يا روحي عدله المّن بعد..وگلبچ خذاه الحافر
لو بيدي ميته من وكت..گبّل الذبح والعاشر
الينصر الله بكل شدد..ما عنده بالطف ناصر

سرجه انلوه ومخزي رجع ميمونه
ماي ووكع ما كدرو يلمونه
والسلبه ما يستحي امن عيونه
ام البنين شيسوه عمري ابدونه

وحسيني..مات وسبو اهله
يا روحي..المّن بعد عدله
_________
جنت انتظر كل قافله..بلكت ترف ريشاته
خل ينكطع عني الهوه..ولا تنكطع نضراته
وجاني بِشر ينعه وصرخ..ترسوها دم شيباته

ما يگضي حيلي امخلفه عباس انه
مات الحُسين وحيلي راح اهنانه
مثل الحمام التنكسر جنحانه
گلبي انكسر يم خيمته العطشانه

ضل ضامي..وگصتّه النهر كله
يا روحي..المّن بعد عدله
________
خدامه نص بيته عشت..ما گتله (يمه)بمره
خوفي عليه لا ينلچم..ويتذكر امه الزهره
اولا عندي بضلوعي كسر..ولا عيني ضلت حمره

أمن ال(يمه) اخاف عليه جنت عاشگته
و هسه الرماح بكربله شايلته
حسين انذبح المّن سبوو عايلته
وولده رطب كلمن يطيح بوكته

واسهامه..بنص گلبه تندله
يا روحي..المّن بعد عدله
_______
بخيامه جم عش انبنه..وابلا رحم حرگوهن
الما طلعن بكل العمر..من الخيم طلعوهن
واعيونهن مو للبچي..بس للاسف بجوهن

مرّن بأخوهن والبواچي لنوحه
وفز وسمّع اصواتهن مبحوحه
وضل الحسين يضم بقايا جروحه
مثل الضرف من يضم ورقه بروحه

وبروحه..زاد الضمه عله
يا روحي..المّن بعد عدله
_______
يخنگني ضل ماي الشرب..وتعرضلي صور(ت)ة مقتل
بيهه النهر مجرم حرب..وده العقيله اعللتل
ليهسه لحسين بعطش..يا ريجي لا تتبلل

بالماي اغص چي منگطع عن اهله
هوه السبب خله اخته فوگ التله
الگطعّوا گلبهم اسود امن الكحله
موتي يروحي المن بقيتي عدله

ما ساوم..موته اولا ذله
يا روحي..المّن بعد عدله

#شور_فزعه
لأم البنين صلوات الله عليها

مو ام لا مرت والد..عشت وياك خدامه
يا لذة عبوديتي..كلبي لسلمك اسلامه
شهري الما اخدمك بي..ما معدوده ايامه

گلبي يشرب من حنانك..يالتعطشك مشرعة
اختصر عمري بنضرتك..أنه وولدي الاربعه

يا مولاي
الله حقق امنياتي..من علي اختارني مرته
يا حسين وكل دعائي..بنص صلاتي يخصك انته
ربي ما ريدن اجيبن..ولد ما يرضه بخدمته
.....................................................................
طبع كل بدوي ترحالة..وعكست انته الطبع بيه
السفر ما گمت احبنه..عشت جو العبودية
ونسيت اسمي الكُلابيه..صرت هسه الحسينية

واليعيش بجو بخدمتك..ياهو يكدر يوصله
يا حسين الحب عذابك..مدري ليش اتدلله

يا مولاي
العلى امحبتك گلبه قابض.. كالذي قابضله جمره
ووقف صار الكم حليبي..يصير خادم ياهو اكبره
والينسبونه الخدمتك..يجل مقامة الله ويقدره
.......................................................................
قريت بسوره الاخلاص..وصبح الاخلاص امنيتي
وحقق امنياتي الله..وانطاني اعلگد نيتي
بالسورة اربعه الايات..واربع ولد ذريتي

الله گدرني ونطاني..لضهرك اخوان وحزم
وسيدي مقصره اعتذرلك..عندي بس اربع زلم

يا مولاي
قل هوه الله هوه احد..وانته الاوحد لله دربه
والمثال اعللحجيته..لليحبك راح اضربة
الله حيل يعز صلاته..اليسجد وكصته اعلتربه
...........................................................................
دليِل العاشگ النية..اغمض عيني واندلك
اليدورك كون ينسه اسمه..وسحگت اسمي أنه لاجلك
الغاية والوسيلة انته..اليريدك بيك يوصلك

على ولدي بسمك انعه..يا حسين امن المهد
سيدي الجرب دمعتك..ما يفارگهه بعد

يا مولاي
ضحه ابراهيم بابنه..ويذبح اسماعيله صرّح
وانه احب وردت اضحي..وماكو من التضحيه اوضح
اربع انحور لغلاتك..يا حبيبي بكيفك اذبح

اللحن👇

#شور_فزعه
شهادة السيدة زينب

وين الشاف خيام ونار وضل مرتاح
ووين الگام يطفي بروحه نار اخيام

شوفت گبتج يا مولاتي ادور اگلوب
ادور خادم اقصى احلامه يموت بشام

لتخليني اويه الما راحو يخت حسين
وابقه الوحدي ابيت احزاني شلون العام


بيه اطفال ما تسكت
تريد تشوفج وتهده
بعدني شما يمر طاريج
انه ودمعي نتبده

مدي احبالج امن الهزله مولاتي
جريني أنه ودمعي ومناجاتي
واهاتي
اباب الشام اهاتي

بجي امناشغ اريدنج تبجيني
جيبي ارماد من الخيمه وانطيني
راويني
خرابه وقصر راويني
________
لهفه طفله تصيح عمه الماي الماي
هيج اللهفه بروحي تصيح گبة ام عون
ارد اتباهه بشيبه شوطه اعليج تصير
اغبط ليحبون اخيامج و يشيبون
مو مسجون الشدو ايده وضل محبوس
الما شد ايده بابج لخضر ضل مسجون

احترگ يم بابج بنيتي
وشيبي براسي يبقه ارماد
الجزع والموت ما مريود
بس ابابكم ينراد

السفر للشام يم عون اختلف يمنه
لا ركضت ورانه اخيول لا طحنه
بس زرنه
مرتاحين من زرنه

ماكو احبال لاكو هزل ويانه
محد بينه متغربات نسوانه
وممشانه
بهيده بهيده ممشانه
__________
اباب الساعات ابجي بهيده يگلي الراح
اهل الشام بدمعه خادم ما راضين

شبجي بهيده شتردوني اقنع واسكت عود
وانه مناطر هاي الروحه من سنين

بزوارج ما رحمو ناسيش اهل الشام
معناها بضعنج يا زينب شمسوين

بأزقة الشام من امشي
عيني اعللسطوح هواي
واتخيل ضعن مگيود
يفوت بهالازقه هاي

والسجاد حگه امن ننسئل واحتام
شنو الاذاك جاوبهم الشام الشام
عيون تنام
ما خله العيون تنام

ارزقيني اشرفن بالخرابه جروح
كافي تروح خدامج وانه الما روح
يحله النوح
مگبل يله يحله النوح
_________
ناس لمشهد ناس لشامج جاي تروح
وبس انه الما زاير گلبي شكد فشلان


لاني كاعد يم بابج الاخضر يم عون
ولاني الكاعد يم بابك ها يالسلطان

لاني المشتم عطرك ليغير الاگلوب
ولاني المشتم من صحنج ريحه دخان

غريب ابين هالصحنين
وبقيت بدمعتي حاير
يمته امن السفر ارجع
وهلي يسموني يالزاير

اخافن عمري يگضي ابلايه گبتكم
واموت حسرتي جانت زيارتكم
امروتكم
العمر يركض مروتكم

وصيتي بگلب مجوي لا يدفنوني
هلي لام عون لو للرضا زورني
واخذوني
وراهه لگبري اخذوني

#سماعي
شهادة السيدة زينب

بكلشي اولام اريد وياك..حته امصابي كون اولام
مثل ما سيف ذباحك..ذبح صمت العقيلة الشام
يالخدك بقه برمله..على تراب الخراب انام

نشّف كلشي بينه العطش سلبّنه
وما نشف الخوه ولا حليب امنه
ويهضمنه الفكد يحسين يهضمنه

خوتنه اكبر من ذبح..واكبر امن اخيام ونار
لمصابك بگلبي جمر..بگلب الفواجد ما مار
________
اريد ابجي اريد ابجي..بعد بيه لمصابك نار
لا انه المتت يحسين..ولا انه النسيت الصار
ما ريدن اقصر وياك..سبيي وحبلي مو اعذار


بعز هوسة الشام اتذكرك وانعه
واصيح احااه اخوي الما سلم ضلعه
مو انته اليموت ومحد يشيعه

الميت الما فوكه بجي..معناها وحده امن اثنين
لوماله اهل لو منفرد..واثنينهن مو بحسين
_______
اواسي امصابك بكلهن..واريدن موتتي تواسيك
ودفنتي لخاطرك وحشه..مثل ما وحشه دفنو بيك
وماريدن بجي فوكاي..فوگك ما لحكت ابجيك

وكت ما خلة زينب تنهضم فوگاك
اخذ حرگة اخت ما لحكت تنعاك
من تالي بأشاير حجيي انه وياك

يالبربعينك عاودت..والراس رديته وياي
لو لاربعيني تعتني..شتردلي والراح هواي
________
أنه الما رايده التشييع..واسباب الهضيمه هواي
ما لحكت اشيعك ليش..وما لحكت اشربك ماي
محد عوناني اعليك..محد كال اخيتك هاي

ليش اعتب وادور دمعة اخواني
حسين وماكو اخوته انذبح وحداني
موت الوحدك يا گلبي لتاني

ما دامك بغربة متت..صار الغريبة اسم ام اعون
وبلسانك اسمي وبس بعد..غيرك لسن خيسكتون
________

‏اللحن

القصيدة لخادم الحسين
ابومهدي الدراجي

نعش الحرمة من ينشال كون اخوانهه تشيعة
بس زينب هذاك اليوم لا تشّيع لا دمعة
تابوتج ضل بأرض الشام
ينزف من حزنج الالام

&&&&&&&&&&&&

تعبانه وغفت بالليل شافت طيف بي حركه
شافت خيمه نص نار يمها اطفال محتركه
وشافت بالسبي النسوان
جن امتونهن زركه
التكلهه انتي ياهو انتي
كالت زينب بشهكه

خل نسأل زينب هل حرمة ياهية
بالرؤيا و گالت هاي اني المسبية

زينب هاية ام الشام اُم الضيم و الغربة
كلمن شافها اعله النوك صدك ينكسر كلبه
ما عندج جا ليش خيام
تابوتج ضل بأرض الشام

&&&&&&&&&&

شلونج يا غلات حسين اسولفلج حكايه طف
روحج صعدت اعله التل وعليج جيش هل مصطف
بعده ضيمج من خيل يأخت حسين ما يوصف
راسملج خيال الطف وكلبج عالضعن مرهف

خل نسال زينب هم طاحت علوية
وهم اجدام اطفالج بالطف مچوية

جرح الطف فلا عالبال ولا حزنه ولا ضيمة
اول تالي زينب هيج ما عدها ستر خيمة
ويكسرها الطف كسرت جام
تابوتج ضل بأرض الشام

&&&&&&&&&

حلم زينب خذاها لوين يوم العاشر و صبحة
زينب ميته من عاشور من العلكمي وجرحة
من شافت اخوها حسين راسه يعاين برمحه
درب الشام ياهل ناس كطعها كطعت السبحة

زينب و الشام شكد جان متانيها
كل خطوة هناك تذكرها بماضيها

زينب تندفن بالشام ما جانت ترى ابالي
وتشيعها ناس اغراب مابيهم اخو غالي
ما صارت يأهل الاسلام
تابوتج ضل بأرض الشام

&&&&&&&&&

زينب هاي ديرة موت ما ترهم المگدارج
دارج كربلاء اتصير و العباس خطارج
كبرج كون يم حسين شنهي الشام واختارج
تكسر خاطر الكرار زينب باجر اخبارج

بالشام و لو كالو زينب مدفونه
عباس يدخن من كبره يشوفونه

تبين عازت العباس لو شالو نعش اخته
واول تالي هاي تصير زينب تندفن سكته
لا خوان و لا خدام
تابونج ضل بأرض الشام

&&&&&&&&&&&&
شفت نعشج بلا عباس ع التشيع يتأخر
ماكو الهواشم صوت لا فزعت علي حيدر
كلهه تصيح هاي منين والسجاد يتحسر
تابوتج ثكيل ام عون والحمال ما يكدر

وزينب ياهو يروح يفزع كافلها
بس غربة يشيعونج زينب كللها

بالتابوت تضل محتارة ام الغربة يسموها
محتار السجاد بهاية يعين الله الشالوها
اعيونج بالغربة تنام
تابوتج ضل بأرض الشام
&&&&&&&&&&&&&&
أبو مهدي الدراجي

لكل خدام الحسين اليحتاج يسوي بوستر او غلاف
اشتركوا بالقناه وراسلو الشباب

العمل #مجاني

<< ببركة الصديقة فاطمة عليها السلام وتوفيقها>>
                     🔹نختص  بتصاميم 🔹
البوسترات الحسينية - غلاف يوتيوب - غلاف قصيدة
https://www.tgoop.com/sdeka313

اتعطليتو يهل زينب عني حيل اتعطليتو
ما نسيتو
حاشه خوية ما نسيتو
ادري بيكم اهل نخوه وما نسيتو
بس شضل اليمته اتاني
كلشي اجاني
الشام  اجاني..الموت اجاني
وانتو يا خوان زينب ما اجيتو
هواي مرن بيه واتنطر تجوني وما اجيتو
وما نسيتو
ادري بيكم اهل نخوه وما نسيتو
هواي يخواني المواقف
الجنت اتاني حجاية منكم
صاحو اسمي وما حجيتو
يالبقيتو اجروح بيه لا كتلتوني وراكم
ولا كطع نزفي بجفاكم
جنت زينب
من جنت امشي بحماكم
يا اهل زينب ردتكم
حركو الخيمة وردتكم
وهسه حركو كلب زينب
كومو طفو كلب اختكم
احترك كلبي وكلشي  نار
منين ما اندار نار
وماكو ليطفي حركنه
مايهم بالشام حار
كلشي نار ..كلشي نار
وما طفِيتو اجروحي بس انتو انطفيتو
يهل زينب عني حيل اتعطليتو
رجعو بتكم
رجعو بتكم
لمعت الزينه بقصرهم
وماكو لمعة سيف منكم
يهل زينب والله شده
روسكم ردتهه اديه
واسمي ضل بالقصر محد كام رده
والهضيمة
اخوة خيالة مثلكم ياهو عده
وهاي شده
يا وكت خوية وكتكم..رجعو بتكم
بحبل ادية ما دريتو
يهل زينب عني حيل اتعطليتو
بكبري ميته وما اجيتو
يهلي غير المات يرتاح بمماته
وانه گبري بكل زمن شام وشماته
كمت اصيح وين المدلل خواته
وما نسه العباس اخته
ميت ودزالي ذكره
دزلي شباج بغربتي
وكلشي بالشباج شايل جان عطره
ما نساني وما نسيتو
بس يخوتي اتعطليتوا
صاحو اسمي ما حجيتوا