#ثكيل

ادعي لامي اعللحليب
ضگتك بدرهه حبيب
جاذبيت الحب لبنهه..اشكر الله صرت ابنهه
...............................................................
ابطن امي وطول اشهرهه التسع
غير القرايات ما عدهه طبع
البچي البيه انگطع وامي تصب دمع
ان شاء الله حبل السبي هم ينگطع

من الثواب البالعزه..ابطن امي تغذيتي
من عالم الذر للرحم..ضل مجلسك بيتي

علمتني ابچي عليك..وانه صارت روحي بيك
خدمتي وارثهه عنهه
اشكر الله صرت ابنهه
.....................................................................
قبل اول شربة اليه امن اللبن
شدت بجفي علگ من الصحن
منهه نذرتني ومدامعها جرن
لكل مره مضيعه ولد من الضعن

وانه اعلدين امي صرت..تحيّني تعزيتك
يحسين رباني اللبن..وحسبوني تربيتك

من وعيت وشفت نور..علمتني الجمعه ازور
الخدمه صارت ديني منهه
اشكر الله صرت ابنهه
.....................................................................
اصغير وجانت تكعدني الفجر
بيدهه تحزمني وانه المبتشر
امن الطفولة لهسه امي اعللنذر
العشره الاولى( بجمرته) يضل الجدر

شما نطبخ نصد صورتك..متعلگه فوگانه
وعدنه عقيدة ومعتقد..بالزهره ويانه

وجنه وي جدرك نفور ..نكابل الصورة ونزور
وچان موكبكم وطنهه
اشكر الله صرت ابنهه
......................................................................
شما كبر زنيجلي وياه اكبرت
وبين نعيي امي ونعي الناعي عشت
من حضنها لحضن مجلسكم رحت
يعني ابنكم وابن دمعتكم صرت

مثل العلگ ياسيدي..يشدني اسمك والتم
واترجه يگرب عاشرك..وقمصانك ابلا دم

وكل سنه تنعاد هاي..تريد ماي وماكو ماي
وامي ما فكت حزنهه
اشكر الله صرت ابنهه
..........................................................
الحمد لله فطرة امي فطرتي
الحمد لله بس مجالس عشِرتي
وياك يربطني الحليب ودمعتي
من هوان الدنيا اعوفن خدمتي

مولاي انه ودمعتي..امن الزهره للزهره
وندري احنه باليحضر عزه...بگبره تجي تحضره

وراح تحضرني واشوف..طولك وما بي سيوف
بفضل امي وفضل ونهه
اشكر الله صرت ابنهه

#ياحسين
#شور


اشربوا الماء هنيئاً..انهُ ماء مباح
ليش محد كلك اشرب بعاشرك ذاك الصباح

وصل بيك العطش يحسين
لغواش وضلمت عيونك
ومن قل شوفك المفروض
هلك ولدك يدلونك
واحد واحد انتخيت
وكلهم ما يسمعونك
النهر ما خله الك عوان
بعزازك بده يخونك

العطش حاوط كلشي بالطف بي جمال
عيونك وولدك واخوتك والمخيم والدلال
من النداوه والترافه للضمه وضيم الحبال
___
اشربو الماء هنيئاً..انه ماءً مباح
وانته كد ما باقي ضامي..حته بلسانك جراح

معناها بطلاع الروح
تطلع منك الكلمة
عطشان وصحت عباس
بحس مبحوح صحت اسمه
والبعينه نهر ذبلان
كلشي اتصحر برسمه
العطش كطّع جفوف الماي
وبعد يا جود الي يلزمه

جوده ضل ينّدي غيره امن السهام
وعكب جفه اقرو عالماي السلام
امن الضمه ضل ماكو مهرب بالخيام
___
اشربوا الماء هنيئاً..انهُ ماءً مباح
وانته من كد ما عطشته..حته لون اشفاك راح

ثوبك لونك ومحچاك
كلشي الناس سالبتك
وابد ما كدرو يسلبون
رحمتك سيدي وبختك
بدت حرب السقايه اعليك
لحد ما فطرّو شفتك
ورغم كل الجروح البيك
الشغل فكرك خيم اختك

اجروح باقي وغيرتك همّت عليك
اقصدوني ضل يصيح كلشي بيك
شباقي منك حته عدوانك تجيك
__
اشربوا الماء هنيئاً...انه ماءً مباح
وانته ضامي وجبدك انفت..امن العطش ما تستراح

بكثر ما حاوطوك اعداك
الهوه ضيع طريقه امنين
النفس مالك تسمعه الناس
من كد الضمة يحسين
العطش كدما مأثر بيك
ضل ينشاف شوف العين
كلشي بشفتّك مرسوم
يا عباس جودك وين

النهر من يمته عليكم عنده راي
حسين وحدك والعده الدارت اهواي
وعطش خوه وعطش نخوه وعطش ماي
___
اشربوا الماء هنيئاً..انهُ ماءً مباح
وانته ما تفطر مثلنه..تفتطر بسن الرماح

نهاية كل ضمه بالماي
ونهاية كل نهر بضماك
عافك كلشي بالطف ليش
بس العطش ما عافاك
وحق جدي انه عطشان
ورحم بالناس ماكو هناك
محد شال بماي بجود
محد كلك اشرب هاك

تحلفلهم عالعطش بس ماكو صوت
محد يلبي نخوتك هايه موت
والنفس من ريجك الضل ما يفوت

#رزقهم

مصطفى صادق اللامي

#شور

مشتاك احبك صدك
مشتاك الك احترك
مشتاك اعيشك عشك
كضني امن اديه..لخاطر رقية
لا تيهه درب البجي

كضني امن اديه وخليني يمك
هالدنيا خاف تنسيني اسمك
تهضمني ناس هواي التخدمك
ووحدهه تبجي مكسوره امك

الزهره اخ الزهره محد يدري بيهه
ياهو سامع بينة المحزونه ونعيهه
ياهو لم دمعتهه وضل يبجي لبجيهه
_
افردني يالمنفرد
رجعني يمك عبد
وللدمعه الاولى ارد
انضرلي نضره..لا دمعي اخسره
ومن عالمك انبعد

هد بيه جونك ربيني عبدك
ماعدي غيرك يالكلشي عندك
احركني موقف بلل وجنتي
خاطر تحط اخدودي اعلخدك

وي خيمكم كلبي خلطه ورزقه ناره
يالي دمك خالط دم جون وسماره
بيه انفخ حبك وانطيني وقاره
_
ارد اوكف لخيمتك
ارد اشعر بغربتك
ارد اربة وي دمعتك
كلبي وضجيجه..قلة حجيجه
وقلة الصدك بالكلب

حته بغفلتي صايرلي همي
شما عنك ابعد تبقه انته يمي
تجرني امن اديه بأربع صابع
ذبلانه شفتك واتصيح اسمي

يا ذبيح و تدعي لكلبي بالهداية
يمته احس بحرورة و اهات الضماية
يا ضحاية ويمته نصيرلكم ضحاية
_
اغفل وروح بذنب
واسمع خيم تنلسب
وتجبرني ابجي واحب
يفجعني سلبك..واجفل واحبك
حبي بألم مرتبط

جرحك يجدد حبي ودمعتي
بحركت خيامك صارت حركتي
كون اهجر اهلي لخاطر خيامك
ضل خالي ضهرك صاحب نعمتي

غيرتك تجرحني وتجبرني اريدك
اوساده بيدك تصنع والدم تارس ايدك
اتنازع اعلخيامك وانته بدم وريدك

لطلب اللحن

#شور_فزعه

بسم الله بسم علي.حِل حبك بوجداني وي اللبن
حب الله حب علي..ولي اباً يهواكَ يابو الحسن

صورة لحضرتك ابيتي ذاك..وبلهفه اصدها واركض اجيك
جنت بفطرتي يمها اروح.. بحب و طفولة اقبّل أديك

علي علي..عبدك وافتخر من يوم الولادة
علي علي..امي صيحت يالذكرك عبادة
علي علي..حرز اهل الصدك ذكر اهل السعاده

ياعلي بمروتك
_________
بسم الله بسم علي..نخوه وشجاعه وغيره خط مذهبك
كف الله كف علي..وكل الرجولة انخلقت من شاربك

يا قالعاً لباب اليهود..العجزت تهزه كل الجفوف
نغمة فقارك احلة امان..بمّضارب الحرب والسيوف

علي علي..يرتاح النبي من يسمع فقارك
علي علي..سيفك سيدي شفراته انتصارك
علي علي..مشيلي العمر بأمرك واختيارك

ياعلي بمروتك
___________
بسم الله بسم علي...حيدر خفايا الباري الما تندرك
دين الله دين علي..الما مؤمن بتنصيبة دينه شرك

اشهد ان حيدر امير..واعللولاية ماله شريك
يابو الحسن لكيتك وجود..وخير الله كله من صُنع اديك

علي علي..دون البوب ابد ما تنطب مدينة
علي علي..بوب الله الوصي وديّان اعلدينة.
علي علي..كنز الرب علي واشيائة الثمينه

ياعلي بمروتك
________
بسم الله بسم علي..كون البرائة اوياكم قول وفعل
فعل الله فعل علي..والسوه فعل اعداكم ما ينقبل

هوه التبري مو بس كلام..كون البرائي دينه التزام
وحبي وقياسه وي الامير..شكد عنه راضي گلب الامام

علي علي..مفتاح السمة بجفوفك مكانة
علي علي..باء البسملة وتنزيلة وبيانة
علي علي..قبل الذر علي مولانه اشترانه

ياعلي بمروتك
_________
بسم الله بسم علي..ما عندي غير عيونك وكت الشدد
عون الله عون علي..بكل شده صاح الساني حيدر مدد

حته النبي بوجوده نخاك..أمن اتأمرت عليه الطغات
وأامر كلتله يا بو تراب..بمجانه ياهو غيرك يبات

علي علي..نخوة فاطمة بكل شده انته حاضر
علي علي..يا شيخ النجف يا در النواضر
علي علي..ترنيمة عشك وتحط عالمشاعر

ياعلي بمروتك

عن سلمان (رضي الله عنه) قال سمعت رسول الله (صلى الله عليه وآله وسلم) يقول: (عليه السلام)الحسن والحسين ابناي، من أحبّهما أحبّني، ومن أحبّني أحبّه الله، ومن أحبه أدخله الجنة، ومن أبغضهما أبغضني، ومن أبغضني أبغضه الله، ومن أبغضه الله أدخله النار.

على حب الكريم🤍🤲

لكريم ال محمد صلوات الله عليهم
#دخيلك_ياابوالقاسم

حسن يضماد دين الله حقنت الدم
فرق بين السلام وبين الاستسلم
صدف محار صلحك حته تحمي الدين
يلؤلؤ كلشي ينذم وانته ما تنذم
من باب الشجاعة نسولف بصفين
ناگة شرك عاگر وانته ما مهتم
سيفك صكر بر ويذبح استنگاه
وبس النزع هدمه اكبالكم يسلم
شلاكي بضهرك القاسم ويطلع هيج
يكطع زفته وللموت يتحزم
جا شمسوي بيهم سيدي بدنياك
حته اجنازتك بسهام تتخذم
ومن باب الجمال برسمك احتاريت
وعرش الله بعضمته بنورك اتوسم
المعبد والعبد يالحسن والاسلام
وريشات الرسم واللوحه والمرسم
بفضلك علي كبته ابلا راية ثار
وطبرتك ضيعت تاريخ ابن ملجَم
دلو البير انته الضيعك عطشان
الما يندل حضرتك بالضمه اتيمم
وتنضم الاشياء الغالية امن الناس
وكلش غالي عند الله وصرت مبهم
مو شغلة ضلامة قلة اليذكروك
بتعب يلة الذهب يطلع امن المنجم
وتره الما يذكر اسمك يالحسن مضلوم
رخي احزامه يضل لجرح الامخيم
وانته الما تسد باب بوجه خطار
بسدة بابك الوادم بقت تحلم
امن ايد ام البنين الزاد حار بحار
وليرك على صحونك سيدي امقسم
رغيفك عطره جاب التاية ودلاه
وبكل المدينة العطر ضل ينشم
وبلا مرقد بقيت تخاف تنسد بوب
وانته السانك البس على الهلا اتتعلم

مقابر الانگليز والبقيع ...؟؟
https://youtu.be/PyMS3U5ZGJQ
#البقيع_مطلبنا

للسيدة نرجس صلوات الله عليها...
#ثكيل

نرجس وجودچ جامع اتلث اديان
اول انجيل بحضنه شايل قرأن
وحمَلچ بي سر التوراة
نحسب عمرج بالايات
____
عيسى ومحمد بالحلم..كعدو وصارت خطبة
يخطبوچ رادو للحسن..والمَهر ابنه و گلبه
وگلاله عيسى أامر امر..انتم اهل مو غربة

طلبو ايدچ يا قدسية..وگلتي اخذو البيه وما بيه
ومريم كالتلچ يا نرجس..راح انسميچ العلوية

والزهره اجت تتبارك وفرحانه
وتتشكر اتگول الحلم لمانه
المثلچ خلف لا ما مات
نحسب عمرچ با لايات
_____
بأول علامات الحرب..حلمچ بده يتفسر
ابعينچ عرض موقف وهب..أوگلتي عادي اتيسر
ردتي تضوگين السبي..لخاطر خوات الاكبر

تسبيحات الزهره انفاسچ..ايضيع الحب لو شاف احساسچ
لمأسرينچ بيچ احتاروا..شكد حلفو مولاتي براسچ

بسوگ الجواري الهادي دزلچ شراي
وايا سكوتچ بي الف راي و راي
وبسامره جفنچ بات
نحسب عمرچ بالايات
__
چي غاليه عند الحسن..مولاتي ضل عرسچ سر
سامره جانت كربلة..وجنتي انتي مثل الخنصر
زرع وتعب ل(١٣) اتلطعش..بس يمچ انتي يخضر

كلها ادورچ جود بعاشر..بيچ حسين وبيهم حافر
لو ما وگفاتچ يا نرجس..منعيش اليوم ولا باجر

وجانت حكيمة البير وتضم اسرار
شافت محمد بيچ صارتلچ غار
اتطول يم اسمچ صفنات
نحسب عمرچ بالايات
_____
نرجس لأن بزرچ ضوه.. ما بان حمَلچ مره
جنچ ام عيسى بالحمل..هم حضرتلها الزهره
وبحضنچ اوليدچ ربه..اربات الحمام بحضره

ام مو
(وسر الله بحضنچ ضل يكبر..والزهره اوياچ اشكد تسهر)
(ومن صغره المهدي امحزمته..حته يضل لثاره اموزر)

وضميّتي ابنچ بالگلب من الناس
متكفلة بالمهدي كفالة عباس
ما قصرتي وخوش اربات
نحسب عمرچ بالايات
____
مرتين طبيتي السجن..والسجن دنگ يمچ
وچم شام يتشمت اجه..بس عثر من صد رسمچ
ما يدري زينب حفضتچ..وغيرتها تمشي بدمچ

زينب وكتچ انتي الصرتي..شراية دين وما بعتي
جنتي بگلب المهدي الابهر..وبگلبة لهسه وما متي

وامسهله امر للمهدي باجر لو عاد
يداعي النصارى (ه) يگلهم لأمي احفاد
يمحسبة لكل الزينات
نحسب عمرچ بالايات



كل القصيدة هيه روايات عن حياة السيدة نرجس ولكن بتوضيفي الشعري🙏🏻❤

#ثكيل

للامام الصادق صلوات الله عليه

حلم..ركعتين الزياره بصحنك العامر
حلم..صحنك بي لشبه لحسين بالعاشر
شما توكف اتطيح المناره
والشيعه محرومه الزياره
_________
المريض يسافر..لطبيبه ويحصل دوه
ومريضك انه..ولزيارتك كلبي هوه
علك عازلك..بس وين اشده من اجي
واباوع كبرك..وي الترب صاير سوه

ولو زرتك صدك مولاي..خجلان اكعد بكترك
فشله اكبور اهالينه..صارت اعلى من گبرك

حلم..وحلم ازيارتك سيدي يبجيني
حلم..اصد لمع القباب وتنترس عيني
گبور اهلي اعلى شكد جساره
والشيعه محرومه الزياره
__________
لنفرض جيتك..وارسملي گبه اعللترب
الهوه يخربهه..اوي ال النبي كلشي حِرب
الزياره اقراهه..يم يا حجر من الكبر
وشدك واستأذن..وكل باب الك ماكو امن اطب

محد قدر النعمه..النعمه بجفنا واتبدت
بوب التوبة تفحلي..بوب الصحنك انهدت

حلم..من نفسي اللئيمة اشكي بعتابك
حلم..اخذ صوغه لامي امزوره ابابك
لبگلبه جمره اتعيشه ناره
والشيعه محرومه الزياره
_________
من اطب للمجلس..يالصادق بدمعي انكسر
مكاني شكبره..وما عندك لصحنك شبر
الفضل من عندك..من كمت اجي لمجلس
واشكرك حاير..وكل شكري يحتاج لشكر

بفضلك عندي صاير بيت..وصحنك بالترب صاير
يالمعلمني ازور حسين ..ما يمك ولا زاير

حلم..شلون الناصبي يحرس على حدودك
حلم..وين الجعفرية ووينها جندوك
كلب اليحب وينه قراره
والشيعه محرومه الزياره
__________
الوصال يدور..عاشك يضحي بكل وكت
ورقية الشاهد..حبت وماتت عالطشت
ردت دعوتهه..تدعيلي ما اضيع فرص
اذا اوصلك..ما ريد ارد نفس الرحت

فرق ازياره المرتاح..عن ازيارة العاشق
وملهوفه تجي الزهراء..تزور بجعفر الصادق

حلم..قبل لا احلم بسجده على عتابك
حلم..كون احلم شلون ابني أنه ابابك
بنيانكم حلم الغياره
والشيعه محرومة الزياره
_________
بوجاهت امك..من الله نطلب هالطلب
البقيع نطبله..عماله ونشيّد الگبب
اذا شاء الله..وصار البناء بحضرتك
العطش من عدنه..ماي امن ابوصالح شرب

طلب لو بينه ذره حب..يصير ومرقدك يشهد
الحب يخلق معاجز كون..ونريد اعجازنه الغرقد

صدك..ما ريد الحلم واقع اريدنه
صدك..ما ضل شي بناء الصحن مطلبنه
والحلم يتحقق مساره
والشيعه محرومه الزياره

الخصائص وما ادراك ما الخصائص

عالم مولاتي فاطمة عليها السلام
#عالم_الزهراء

عالم الزهراء..جوه ما ينوصف
انكسار ونوح..بس حنان وعطف

عالمها يبدي امن الدمعه الاوله
وتشيب وتبقه بحب طفولة
يلم جفها دمعك وترتبه گلبك
وبس يمها تلگه الحب اعلصوله

اتداري الروح..وترحم بأحوالي
كلها اجروح..بس تداوي امثالي
كلشي يروح..وفاطمة تبرالي
.........................................
عالم الزهراء..كلشي بي منفرد
ما يقدر املوك..بس يقدر العبد

حزني الاعرفه يكئب المشاعر
وحزن الزجيه يطيب الخواطر
امعيشتنه حب ورحمه ومحنه
وعيشتها باب وطف وحوافر

باب ونار..وزهره تدفع بيهم
والبسمار..زاد جورة اعليهم
بخدها شصار..الله لا ينطيهم
...............................................
عالم الزهراء..ما يحده سكن
وي كل ادموع..بخد اليحب ضعن

نتسوطن بحبها والمصيبه
غصبو فدكها وضلت غريبة
ومن دار اهلها هم شيلوها
جي تبجي عن والدها الحبيبه

الثاني فلان..تغثه منهه الحسره
ودار احزان..علي حط للزهره
لحد الان..تبجي بي منكسره
...................................................
عالم الزهراء..نادر بكل امر
تجبر المكسور..ام ضلع منكسر

تأمن حياتي الرايح أمنهه
بعالمهه يفرق قدوة حزنهه
شكبره سبيل الماي بخدمته
يذكّر اليجونه بمصاب ابنهه

أشرب ماي..واذكر الما ضاگه
الماله افياي..ويابسات ارياگه
وابجي لهاي..موحنينه الناگه
.............................................
عالم الزهراء..مختلف بالحزن
بي ابن مذبوح..وام كسيره وتحن

اتبدل كساء العدهه وتغير
وشالت قميص امبجيهه واحمر
هذا القميص بجفهه تخيط
يخيول أمية الله اكبر

اقدس عين..انتو شو بجيتي
شجابج وين..يا صدر مسيتي
بطول حسين..كلشي ما خليتي

#شور_فزعة

عيش كل يوم بحياتك..جنه اخر يوم خدمه
وماي لا يوصل جمرتك..جمرتك يا كلبي ذمه

دنيا هاي
الموت بيهه ابلا وكت..
وتبدي تحصد شزرعت
وتبقه بس ذكرى وصور

دنيا هاي
والزرع دمعه حصد
بحضن ابو الاكبر كعد
ويحضر بدفنة الكمر

اؤمن يكلبي وابچي لمصابه..تالي مصيرك جوه الترابه
يشفعله ياهو وياهو اليحضره..المامؤمن بدمعات الخرابة

كلشي يموت وكلشي يروح وتبقه دموع العين
وين يضم وجهه امن الزهره الما باجي اعلحسين
__
هواي ناس تموت عدنه..وقلة يبقة بخير ذكرة
وقلة تنخط فوك اسمهم..خادم الزهره اعلگبرة

ما يفيد
لا خليل ولا صديق
بعينك يضيگ الطريق
وكلشي ليحيطك ضلام

ما يفيد
والعمل يبقه مصير
اوية الحرك خيمه تصير
وي اليطفي الخيام

شكد تبقه عايش تاليهه تخلص..امن املاگه ربك ما بيهه مخّلص
تلاكي الهك كون بدمعتك..يا كلبي لين لموتك ترّبص

شجابه اللاكه ربه بحدقه اوية الناس الباجين
وين يضم وجهه امن الزهره الما باجي اعلحسين
__
خلي يا كلبي طموحك..تموت باجواء العزية
مو بعيده النشغه تكتل..نشغت وماتت رقية

ومايموت
واليحب لا ما يموت
دمعته لمحبوبة قوت
يعيش وي ناعي الجرح

ما يموت
الحبه صادق يبقه ضِل
ايكاسر شموس الهزل
وكل محرم ينذبح

دنيا وابد ما بيهه سلامه..يا گلبي اشري حسين وخيامه
وادعي بحصيرة يشيعوها جثتك..شيهنه بحياته السلبو امامه

باجر ينحط كلشي ونوكف ونتجازه اعللزين
وين يضم وجهه امن الزهره الما باجي اعلحسين
__
اتذكر الطفله العليلة..وخل يموّتك انتظارك
ممر هاي الدنيا النه..وبيدك تحددها دارك

بين اديك
اختار يا دار التريد
حسين واحبابه العبيد
لو جنهم والضياع

بين اديك
لو تصيره بخيره لو
تاكل امن ايد العدو
وتنحشر وي لتباع

سل سيفك لضعنه وتاني ثاره...حب جرحك وبلكي اتطفي ناره
المن وقارك والي تحبه..بسيف الاعادي شيبة ووقاره

والما ذب روحه اعللخدمة باجر يوكف وين
وين يضم وجهه امن الزهره الما باجي اعلحسين

#هذه_القصيدة هدية لروح الشاعر
#زيد_عدنان_الزيدي

@Safe477 لطلب اللحن

لولادة مولاي الرضا صلوات الله عليه

بمولد الضامن وثامن الساده
كل گلب كل گلب اعلن اعياده

الليلة ميلاد الرضا..الليلة ميلاد الرضا
...............................................................
يا أنيس انفوسنا وحبنا وقراره
الفرح مثل الحزن هم بحراره
كون كلمن يفرح ترزقه ابشاره
لمشهدك يا سيدي يحصل الزياره

نبتهج نبتهج بهجة ميلاده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
ليوم ميلاد الرضا انطر واتاني
فرحتي تقربني من صاحب زماني
ابتشارات وهلا ونحسب ثواني
ينولد مولانا ليحقق لااماني

يا هلا يا هلا والمحب ناده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
يا عزيز اختك المعصومه الكريمه
فرح گلبي بمولدك مولاي ديمه
الشمعه من اشعلها الك تنطيني قيمه
ورجعتني رأفتك فطرة سليمة

سيدي سيدي يدلل الراده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
يا شمس طوس الابد ما قل ضواهه
يا روؤف التكرم الحب والوجاهه
يا أنُس روحي وغزلها ومحتواهه
كبتك تحرك مشاعر من هواهه

واليحب واليحب يطلب امراده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
دمعة الفرحة عزيزه اعلينه تصبح
وگلبي وي سلطان عشگه بدمعه صرح
انه لو ما افرح الكم المن افرح
غلط كلشي بدنيتي وبس انتم الصح

والبجه والبجه دمعه ايفاده
كل گلب كل گلب اعلن اعياده
الليلة ميلاد الرضا..الليلة ميلاد الرضا