لاحظ فرق السرعة بين المعالج CPU وكارت الشاشة GPU في التعامل مع الصور .

بعد ١٢ سنة وصلنا ل٣ الاف مشترك
ان شاء الله ماباقي شي على المليون مشترك 😂

بحكم التجربة
افضل نصيحة ممكن اقدمها للاصدقاء الي عدهم اطفال تدخلونهم دورات بالبرمجة .
البرمجة مو فقط مهارة جديده راح يتعلمها وانما حتى نمط تفكيره راح يتغير ويكون اكثر منطقية وواقعية وايجاد افضل حل لأي مشكلة تواجهه.

هذا الروبوت من تطوير احدى الشركات اليابانية قام بحل البازل كيوب بنصف ثانية .

تعقيبا على الاستفتاء الاخير ، برأيي البسيط افضل شي لتطبيقات الويب حاليا هو Nodejs (الجافا سكربت ) من جانب السيرفر والعميل اما مشاريع الذكاء الاصطناعي فالبايثون بدون منافس .
الجافا والسي شارب لغات قوية والكثير يفضلهم في العديد من المشاريع .

من الامور الخبيثة التي تمارسها منصات التواصل الاجتماعي ، انك لو نشرت شي عن فلسطين تقوم خوارزميات المنصة (Feeds ) بتخفيض التصنيف Ranking الخاص بمنشوراتك عند اصدقائك وبالتالي يقل الوصول و التفاعل مع المنشورات .
هذه الخوارزميات المفروض عملها يعتمد بالتصنيف على تفاعلك مع منشورات الاصدقاء ثم تعرض لك اي منشور جديد لهم ، لكن لو نشر صديق عن فلسطين شي سوف تخفيه او تضعه بآخر التصنيف وتطبق عليه نوع من العقوبة بحيث تخفض تصنيف كل منشوراته التالية ، وهكذا الا ان يترك النشر عن فلسطين لفترة .
ولأثبات هذا الكلام جرب ان تنشر شي عن فلسطين بالفيسبوك وتابع التفاعلات بعدها .

هذي العقوبة تجاوزو بيها المنشورات ، صارت تشمل حتى الستوريز والريلز و الغروبز و اقتراحات الصداقة .

الله بالخير
حتى نكتب وانفذ كود برمجي بأي لغة نحتاج الى مترجم للكود ومحرر لكتابة الكود ، بالنسبة للمحرر فهناك العديد ، وسابقا كانت المحررات بسيطة يعني ما تساعدك بأي شي .
بعدين صار شويه تطور بيها وضافوا بعض الميزات المساعدة مثل  Autocompleted ( الاكمال التلقائي) يعني يساعدك باكمال كتابة الكلمات بدل ما تاخذ وقت بكتابتهم وهذا اخصر هواي بالوقت وايضا بتصحيح الاخطاء البسيطة . بعدين دخل AI بموضوع الاكمال التلقائي وساعد المبرمجين هواي لكن مشكلته هنا AI يتعلم من الكود الي انت كاتبه ويقترحلك اكمال تلقائي .
وهذا نوعا ما ممكن يسبب مشاكل .
هنا شركة  OpenAI طرحت فكرة واشتغلت عليها وهي ليش ما نبني اداة تساعد المبرمج على كتابة الكود بالاعتماد على منصة  Github ، ومثل ما نعرف ان Github هو مستودعات بالملايين لمشاريع مفتوحة المصدر .
يعني بدل ما نخلي هاي الاداة تتعلم من المبرمج نفسه، تروح للGithub وتتعلم من بقية المبرمجين بطريقتهم بكتابة الكود وبالتالي راح تقترح اكمال تلقائي مبني على خبرة الاخرين وعملهم.
بالتالي تساعد المبرمج مو فقط بأكمال كلمة وانما مثلا بأكمال نص دالة Body وبقية الاجزاء بالكود بسرعة وبدقة تنظيمية عالي للكود Clean Code وتخمين حتى الاخطاء .
هذي الاداة اسمها Copilot
كمبرمج انصحك ماتستخدمها اذا كان مستواك بسيط ، صح راح تساعدك هواي لكن ابسط مشكلة ممكن تعجز عن حلها لهذا يفضل ترفع من مستواك البرمجي وبعدين تستخدمها .
والسلام

ادارة الوقت من الامور المهمة جدا سواء بالتعلم او العمل ،لكن للاسف اغلبنا يهمل هذا الموضوع .
عموما اكو ستراتيجية مشهورة وربما البعض طبقها من دون ان يسمع بها وهي تقنية بومودورو
هذي التقنية بسيطة جدا ، لما يكون عندك عمل دراسة (نسميها مهمة)
فيكون وقت مثلا ٢٥ دقيقة مخصصة للعمل عليها يسموها بومودورو ، و ٥ دقائق استراحة .وهكذا .
وقت العمل انت تحدده لكن يفضل يعادل وقت الاستراحة بثلاث مرات على الاقل مثلا ٣٠ دقيقة عمل و١٠ دقائق راحة وهكذا حسب ما تشوفه مناسب ، ويفضل خلال وقت العمل تبتعد عن اي شي ممكن يشتت تركيزك مثلا الموبايل او اي شي اخر.
هذي الستراتيجية ممكن تحسن من تركيزك وتقلل من التشتيت و الارهاق وتكون اكثر انتاجية في تنفيذ المهام .

الاخوة والاخوات
عيد اضحى مبارك كل عام وانتم بالف خير ، اعاده الله عليكم باليمن والبركة .

من اصعب الاشياء بالبرمجة هو كيف تقنع شخص متمسك بمبادئ البرمجة القديمة (الكلاسيكية) حتى يستخدم المفاهيم والتكنولوجيز الحديثة بالبرمجة.😂

هل من الممكن استخدام قواعد بيانات مختلفة في نفس النظام ؟ بمعنى ان يكون لديك نظام فيه قاعدة بيانات نوع SQL وقاعدة اخرى No-SQL هل من الممكن هذا ؟
الموضوع الاخر : العلاقات بين الجداول في قواعد بيانات SQL تكون بين جدولين ، هنا السؤال هل من الممكن ان تكون العلاقة بين الجدول ونفسه ؟
باب النقاش مفتوح
وسأحاول كتابة منشور عن هذا الموضوع بالقريب .

الله بالخير
اليوم العالم مخبوص بحدث عالمي كبير وهو الافراج عن الاسترالي جوليان اسانج مؤسس ويكيليكس الي كان محكوم ب١٨٠ سنة! .
والكل يعرف ويكيليكس وهي منصة نشرت وثائق امريكية سرية !
بس شلون طلع ؟ السلطات الامريكية افرجت عنه بدون اي توضيح !!!!
المشكلة مو هنا ، وانما اكو مجموعة مخترقين اسمهم Lockbit ( على الاغلب مجموعة روسية ) تأسست ب٢٠٢٠ (بفترة كورونا) هذي المجموعة تعتبر رقم واحد بعالم الاختراقات وكدرت تجمع اكثر من ١٥٠ مليون دولار خلال هذي السنوات .
هذي المجموعة قبل يومين نزلت بيان انو كدرو يخترقون البنك الفيدرالي الامريكي ويستولون على اكثر من ٣٠ تيرا بايت وهددوا بنشرها وانطوا مهلة الى يوم الثلاثاء الساعة ١١ مساءا !
الغريب هذي المجموعة ما طلبت مبلغ !! عكس عملياتها السابقة ، الامريكان تفاوضوا معاهم وعرضوا عليهم ٥٠ الف دولار !!! فالمجموعة نزلت بيان تستهزأ بامريكا !!!
اليوم المجموعة اختفت تماما من الدارك ويب !
على الاغلب ان اطلاق سراح اسانج كان ضمن اتفاق بين امريكا وLockbit لان تسريب ٣٠ تيرا بايت من بيانات البنك الفيدارلي الامريكي ممكن تسبب كارثة اقتصادية عالمية خصوصا امريكا شبه عاجزة امام هذه المجموعة !
بالمناسبة حاليا بالحملة الانتخابية الامريكية ترامب وعد باطلاق سراح شاب امريكي مسجون لدى السلطات الامريكية (محكوم بأكثر من ٣٠٠ سنة ) و هذا يعتبر من اشهر المخترقين بتاريخ البشرية ان لم يكن افضلهم ، ومنحه منصب مهم في حكومته حتى يواجه مثل هذي المجموعات !!!
والسلام

الله بالخير
من المفاهيم الي ممكن تصادفها في ادارة قواعد البيانات ، الانظمة ، البرمجيات ، الكلاود ...الخ هما Scale Out , Scale Up ، ف شنو يقصدون بيهم ؟
فرضا عندك تطبيق ويشتغل على سيرفر ، بعد فترة زاد الطلب على التطبيق وبالتالي السيرفر حاليا ميكدر يلبي كل الطلبات ف شنو الحل ؟
الاول - نرفع من موارد السيرفر يعني ممكن نزيد الميموري (الرام) وممكن نستبدل المعالج بأعلى .. الخ ، هذي نسميها بالتوسعة العمودية Scale Up يعني نرفع من موارد الجهاز نفسه ، بالتالي فهذي طريقة سهله ومابيها اي تعقيد ، بس المشكلة بيها ممكن توصل لحد بترقية موارد السيرفر وبعد متكدر تزيد اي شي .
الثاني- ليش ما نشغل التطبيق على اكثر من سيرفر ، وبالتالي كلما يزيد الطلب نكدر نضيف جهاز (كأنما جهاز بجوار جهاز ) وهذي الطريقة يسموها بالتوسعة الافقية Scale out .
التوسعة الافقية تنطيك مرونة كبيرة لكن نوعا ما تكون صعبة بالادارة وتتطلب بعض الاشياء مثل التطبيق يكون موزع (وهذا يحتاج مقالة كاملة حوله) وتوزيع الاحمال .. الخ اما عيوبها ، اكثر كلفة .

بالاخير دائما نستخدم التوسعة العمودية مع التطبيقات البسيطة ، بينما نستخدم الافقية مع التطبيقات الضخمة الموزعة خصوصا تطبيقات الويب .
والسلام

الله بالخير
تخيل لو عندك قرص مصنوع من مادة معينة مثلا مادة فائقة التوصيل ، لو بردت القرص (مثلا بالنيتروجين) الى درجة حرارة قريبة من الصفر فتكون مقاومة مادته قريبة من الصفر (يعني التيار يمر بي بدون اي فقدان للطاقة) ، فلو وضعت مغناطيس قريب من القرص ، فمادة القرص تطرد الخطوط المغناطيسية من داخلها وما تسمح بدخول اي خطوط ، لكن تبقى بيها مثل الثغرات الصغير تدخل منها خطوط مغناطيسية يسموها بالدوامات vertices وتستقر بداخل المادة وتكون معاكسة للمغناطيس الاصلي ، بالتالي هذي الدوامات تخلي القرص يتعلق بالهواء ( طايره ) فوق المغناطيس .، هذي الظاهرة يسموها بالقفل الكمي Quantum Locking .
وابرز تطبيقاتها القطار المعلق يعني يخلون مادة فائقة التوصيل اسفل القطار ويبردوها ،ويخلون بالسكة مغناطيس بالتالي القطار يكون عائم فوق السكة بدون احتكاك فتكون سرعته عالية جدا .
ابرز مادة فائقة التوصيل YBCO (يتريوم، باريوم، نحاس اكسيد) .
الفيديو يوضح هذي الظاهرة.
والسلام

الله بالخير
كمطور من اهم الاشياء الي لازم تحسب حسابها عند المباشرة بتطوير اي نظام هو الصيانة واكتشاف الاخطاء والتطوير .
لهذا لازم يكون عندك اطلاع وفهم للمعماريات البرمجية الي نقصد بيها كيف راح تكون هيكلية المشروع وماهي التقسيمات التي سوف تعتمدها ، لذلك هذا الموضوع مهم جدا ولازم تختار المعمارية المناسبة قبل كتابة اي كود برمجي ، اما اشهر انواع المعماريات فهي :
اولا - معمارية الكتلة الواحدة  Monolithic Architecture - وهذي تعتبر الاقدم والابسط بالمعمارية وهنا يكون المشروع عبارة عن قطعة واحدة بدون اي تقسميات كبيرة ، تعتبر سهله بكتابة الكود ، لكن مشاكلها تظهر بمرور الزمن فالصيانة والتوسعة ستكون صعبة .(اغلب مبرمجينا يستخدموها ) .
ثانيا -معمارية الخدمة الموجهة Service oriented Architecture - وهذي تعني تقسيم المشروع الى عدة خدمات مترابطة تتواصل بينها بالاعتماد على بعض البروتوكولات مثل WS , SOA . من مزاياها هو ممكن اعادة استخدام الكود او الخدمة اكثر من مرة وايضا بالتوسعة لكن مشكلتها بالبروتوكولات الي تعتمد عليهم الخدمات بالتواصل بينهم وحمايتهم بالتالي فهي تحتاج بعض المتطلبات .
ثالثا- معمارية الخدمات الدقيقة Microservice - نوعا ما مشابهه لمعمارية الخدمة الموجهة ، لكن هنا يتم تقسيم التطبيق الى خدمات صغيرة مستقلة (بينما هناك خدمات مترابطة ) . فرضا عندك مشروع يتعامل مع داتابيس ، فلو استخدمت الخدمة الموجهة فهنا كل الخدمات راح تعتمد على نفس الاتصال بالقاعدة ، بينما لو استخدمت المايكروسيرفس فيكون لكل خدمة اتصال خاص بيها بقاعدة البيانات .
عموما الخدمات الدقيقة تتواصل بينها بعدة طرق منها عن طريق API وهو الاشهر .وامكانية بناء كل خدنة بلغة معينة (لذلك فهي مستقلة ) .
نوعا ما معقدة وتحتاج وقت لكن من الناحية الايجابية تتميز بقابلية كبيرة على التوسعة .
(يتبع => )

يحتوي دماغ الانسان على مايقارب ١٠ مليار خلية عصبية لمعالجة البيانات .
(لَقَدْ خَلَقْنَا الْإِنسَانَ فِي أَحْسَنِ تَقْوِيمٍ)