للحجاب اهتديت💚✨

ما أنا بصلي .. و بقرأ قرآن .. و بحاول أرضي ربنا .. ليه يحرمني ؟ .. ليه يمنع عني الـ انا عايزه ؟ .. ليه أتوجع كده ؟ .. ما أنا بعمل كل حاجه ؟ .. أنا معتش قادر لا اصلي ولا أقرب من ربنا .. أنا كنت فاكر إنه هيكرمني .. بس محصلش .💔

------------

س/ عارف المشكله فين بالظبط ؟♥️

المشكله إننا عندنا عقيده غلط جوانا بتخلينا نعامل الإله كما نعامل البشر من غير ما نحس، يعني: زي ما بعملك كذا كذا " المفروض " أنت كمان تعملي كذا كذا، و لما متعمليش زي ما بعملك يبقى أنت كده بالنسبه مش موجود، لا شئ !

مين الـ قالك إن ليك على الله حق ؟ مين الـ قال ان حد فينا ليه على ربنا حق علشان بس بيصلي ولا بيقرأ قرآن ولا بيطيعه ؟

أنا مقدرة جدًا الحالة النفسية الـ ممكن توصل حد للدرجة دي من الحزن و الشك و الزعل لكن لازم " نلزم الأدب " في نظرتنا للإله مهما حصل، معنى إني زعلان إني عبدت و ملقتش فـ هسيب العبادات إني ممكن من غير ما أحس أكون فاهم إني كده بضر الإله تعالى الله عن ذلك ؟

أنت بتصلي ليك ..
و بتقرأ قرآن و بتطيع و بتتصدق و بتصلي قيام ليك ..
أنت بتعرف ربك علشانك مش علشانه سبحانه ..
أنت الـ بتُجني ثمار علاقتك بالله أو أنقطاعك عنه، أنت فقط ..

* اقرأ الحديث القدسي ده كدا :
"يا عبادي لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا
يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا "
.

أنت إسمك بتعبده لأنه أهل أن يُعبد أعطى أم منع، الواحد فينا بيبقى عامل زي الـ معاه مليون جنيه و جيه حد خد منه 10 جنيه، يقعد يعيط على العشره جنيه فـ ميحسش بـ باقي المليون الـ معاه .
لا قدر الله و ربنا يسلم كل الـ بيقرأ :
قولي لو حصوة واحده ظهرت في الكلى ألوقت عندك و ده وارد جدًا و قعدت تتنطط من الألم، يا ترى تساوي كم صلاه صليتها ؟
.
يعني لو طالك الكانسر في أي جزء من أجزاء جسمك حالًا ( و حوالينا مليون سبب يوصل للكانسر) و حرمك النوم و طعم الأكل و طعم الحياه كلها قولي كم صفحة من القرآن تساوي إنك ميجيش ليك مرض لعين زي ده ؟
.
يعني لو شرقت و أنت بتشرب حالًا و شوفت نفسك بيروح منك و كنت حاسس إنك هتموت و محدش عارف يعملك أي حاجه ، يا ترى كم صدقه تساوي إنك متتعرضش للحظة زي دي ؟
.
يعني لو عينيك جالك فيها التهاب حاد بسبب أي ميكروب منتشر في الجو حواليك خلاك لا قادر تبص في نور ولا عارف تفتحها، شايف كم ركعة قيام تساوي إنك تشوف كويس ؟
.
* بقولك كده ليه ؟ علشان أقولك إن زوال النعم الـ إحنا " متعودين " عليها دي سهله أوي و أسباب الزوال حوالينا في كل حته، بس لأننا بنعبد إله عظيم بيحفظ و يحمي، بالرغم إن شرنا إليه صاعد و مع ذلك خيره الينا نازل ، نعمه من دول كفيلة تكون ساجد طول عمرك شاكر عليها، نعمه واحده بس ، و الـ داق عارف كويس يعني ايه حرمان صحة و ألم .

-----

عارفه إن صعوبة الأحداث بتخلي الواحد فعلًا ميقدرش يتحمل كتير، بس بالله قولي لو أنت مكملتش في صلاة و قراءة كتاب زي القرآن هتصبر إزاي ؟ هتجيب منين قوة للتحمل ؟ هتجيب منين بصيص نور ؟ طيب هتجيب منين سكينة تفضل مصاحباك ؟ هتجيب منين نور في بصيرتك يوصلك للحل ؟ منين كل ده ؟ يعني لما تبعد عن مصدر النور الدنيا هتنور ؟

الطبيعي أما أخاف أكتراللجوء للرحمن يبقى أكتر ، لأنه الوحيد الوحيد الوحيد سبحانه الـ كل شئ مقهور بين يديه ( الناس و الأحداث و الشيطان نفسه ) كل شئ مقهور بين يديه، بس الدنيا إمتحانات و لازم كل واحد يبان الـ جواه :

"أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لا يُفْتَنُونَ "

سواء بالخير أو الشر، سواء أمتحان نعمه أو نقمة، دي ورق بيتحط قدامك، هتفضل عبد ؟ هتفضل تعبده مهما حصل ؟ بتعبده مهما حصل لأنه بتحبه لذاته مش بتحبه لعطائه بس ؟
هنا بيتباين الناس، ده أختبار علشان تظهر مكنونك قدام نفسك، انا بعبد ليه، خليك حريص تطلع من الإمتحانات دي بـ " إِنَّا وَجَدْنَاهُ صَابِرًا ۚ نِّعْمَ الْعَبْدُ ۖ إِنَّهُ أَوَّابٌ ".

تطــــــــلع " نِعم العبد " لحد أخر ثانية عبد حقيقي لله، ولا أهتزت عبوديتك لله، أه أتضايقت، أه بكيت، أه كرهت بعض الأحداث ، أنت بشر، بس عارف إن إلهك عظيم حكيم، يحبك.

الإختبار دي كده كده ضيف و هيمشي، أحسن صحبته ، خليه شاهد ليك مش شاهد عليك، يوم القيامه يرفعك درجات مش ينزلك لقاع جهنم بسبب إنك خدته عذر للبعد عن أرحم الراحمين، و إفتكر إن ايوب عليه السلام بعد 18 سنه ابتلاء يوم ما دعى قال " و أنت أرحم الراحمين " لسه شايفه أرحم الراحمين = ))

و علشان كده تجربة أيوب أثبتت: أن حب المؤمن الصادق لربه لا يمكن إقتلاعه من القلب مهما حدث !

71 views05:05