بس يمكن اكو شي اذة العباس أكثر من هاي اللحظة ... من سمع صوت الحسين يبچي عليه

تخيل لا سامح الله يصيرلك شي وتسمع اعز واحد عندك وأكثر واحد يحبك... يبچي عليك

ويختمها عبد الامير الفتلاوي ويمكن محد وصف اخر لحظة بحياة العباس مثل هذا الوصف

پچه اعله حسين وحس عباس بالموت ... او نفسه فاضت أو شافه گضه فوت

انگطع نفسه وأخوه انگطع ظهره

يـا مـن رأى العباسَ كر ... عــلـى جـمـاهير الـنـقدْ
ووراه مـن أبناء حيدر ... كــــلّ لــيــثٍ ذيِ لــبـد
أنبئت أنّ ابني أصيبَ ... بــراسـه مـقـطـوع يــد
ويـلي عـلى شـبلي أما ... لَ بـرأسه ضــرب الـعمد
لـوكان سـيفك في يد... يـك لـما دنـا مـنك أحـد

ـــــــــــــــــــ'
والي يأييد ويدل ويثبت أنه العباس واخوتة كلهم طلعوا للمشرعة هو رثاء ام البنين

يـا مـن رأى العباسَ كر ... عــلـى جـمـاهير الـنـقدْ
ووراه مـن أبناء حيدر ... كــــلّ لــيــثٍ ذيِ لــبـد

صينية القاسم

مشهد صينية القاسم بنص الهول مال بيت جدي لمن بيبيتي الله يرحمها چانت تسوي قراية بوكت صدام وتطلع النسوان من بيت جدي لبيت جيرانهم وهم يجيبون صينية ... ياس وشموع بيضة وماعون بي حنة وبخور وچكليت

ومشهد بيبيتي الله يرحمها تحچيلي قصة شلون لمن عمي الچبير من چان كلش صغير - بخمسينات القرن العشرين - وكلش مصخن وما چنت تدري شتسويلة ويطيب ... وفاتت السباية ... وبيبيتي لحگت السباية وباطراف أصابعها جابت حنة من صينية القاسم ورجعت مسحت بيها گصه عمي وراحت منه الصخونة وطاب

وأتذكر شلون چانت الملاية تگول " شعلوا شموع جاسم بصيوانه " ويشعلون هاي الشموع وتقرا وبيبيتي تبچي ... و بعدين " طفوا شموع جاسم بصيوانه " والبچي يصير اكثر

وبقيت هاي الصينية على طول موجودة ... وبقيت حتى من كبرت يجيني منها شمعة، تجي چكليتة، يجي منها شي حلو ... وما اتذكر سنة گطعت بيه ونستني

والصينية ذيچ ... صارت ببيتنة وبيوت عماتي وخالاتي واخوتي ووين متروح موجودة

وكت صدام ... منع ... مو منع ... بكربلا ... بغير مكان ... على طول موجودة ... تريد تنجح، تريد شي، تريد طلب ... أخذ شمعة والسنة الي تجي ترجع شموع

وكبرت وعرفت القاسم شنو قصته ... وشنو عرسه ... وشلون الحسين زفه ... وقريت وشلون حتى برواية الامام الصادق الي يحچي بيها المقتل القاسم وتذكراه واسمة رغم ما الرواية كلش مختصرة ومابيها تفاصيل ... الامام الصادق يگول ويوصف شلون الحسين من طلع من المدينة
" وحمل أخواته على المحامل، وابنته وابن أخيه القاسم بن الحسن بن علي عليه السلام  "

وشلون الحسين اندعى من طلع للمعركه... وشلون راح قتل قاتل القاسم قبل ما يروح للقاسم المطبور ... وشلون حط صدره على صدر القاسم ورجع للمخيم ... شلون رجع ... شچان يحچي وية القاسم ... شلون أمه وبنات النبي يشوفون الحسين هيچ شايله وجابه  ... وصوت عبد الزهرة الكعبي يقرا ابن نصار

امبارك بين سبعين ألف جابوك * ابدال الشمع بالنشاب زفوك
عن الحنا بدمع العين حنوك * على راسك املبس نبل ينثر

وجابه و مدده ما بين اخوته * بچى عندهم يويلي وهم موته

تخيل الحسين القاسم مقتول على صدره ويريد ينزلة من صدره للگاع ... اتخيل شلون الحسين شگد معتني وشگد على كيفه وبالهون بالهون ... بهداي بهداي نزل القاسم من گلبه ونيمه علگاع بصف علي الاكبر

جابه بين إخوته ومدد أيديه ... بچه عنده وعدل رجليه
مدري شگال گلبه أمن انحنه عليه ...

تخيل الحسين شلون نام بنصهم... شلون تمدد بينهم ... شگال؟!

واكو شي بالقلب كلش يأثر ... مچان اكو واحد باقي للحسين من انقتل القاسم ... لا اولاد لا اخوان ... محد عزه الحسين بهذا الولد ... محد طيب خاطره ... محد هون عليه ... محد خفف عليه مصيبته

الجيش كله شامت بي " وسمعتهم يقولون: هذا القاسم بن الحسن بن علي " الحسين راجع للمخيم والقاسم على گلبه والجيش يصيحون هذا القاسم بن الحسن

فبقت هاي الصينية واجب ... بقى عزا القاسم واجب ... بلكت شوية يطيب خاطر الحسين بهذا الشباب العزيز ... بهذا العريس

الناس تنتظر ليلة العباس ... واني انتظر ليلة القاسم

وأهل كربلا شگد عدهم قصص على هاي الليلة ... شگد ناس طلبت بهيچ ليلة المعجزات وحققها الحسين لخاطر هذا القاسم العزيز

وأتذكر بال٢٠١٩ بمثل هيچ ليلة ... واگف بباب الزينبية ... بحد الباب ... وبدت يقرا الشبيه و نزلت على ركبي ورفعت ايدي وگتله لخاطر هذا القاسم ابن اخوك الي كسر گلبك ... وطلبت الما چنت اتخيله يصير ... وصار

الأَوْلَى : أَفعل تفضيل بمعنى الأَحقِّ والأَجدرِ والأَقرب

وهاي اساس المعركة والفرق المستمر لحد الان

اكو سني بالكوكب كله ... بالتاريخ كله ... يگولك أنه ال محمد همة الأقرب والأجدر والأحق بالنبي؟! ... لا ... ماكو

السنة كلهم بلا أي استثناء... عبر كل العصور ... عدهم الصحابة همة الأجدر والاقرب والأحق بالنبي ... واذا يدخلون الامام علي والحسن والحسين... فأكثر ما ممكن يوصلولة هو أنه يصيرون بمستوى الصحابة ... اذا مو صحابة معينين احق وأجدر واقرب للنبي منهم وهمة يجون بعدين

هذا علي الاكبر تگطع علمود يگولولة شلون وبيا حق تگول انتوا وهذا الحسين وجدك أولى بالنبي من الي احنا نگول همة أولى بالنبي

على شنو انسلبت فدك مثلا؟! علمود يگولون لفاطمة انتي حتى حق ميراث من النبي ما عندچ ... انتي حتى بهذا المستوى الطبيعي مال كل البشر الي يصير الآباء وأولادهم ... انتي صلة بالنبي حتى بهل مقدار هم ماعندچ

ماعدكم اي حرمة ولا صلة بالنبي ... الأحق والأجدر هو يزيد لأن سليل خط الصحابة

تاسوعا يوم حوصر فيه الحسين (عليه السلام) وأصحابه رضي الله عنهم بكربلا واجتمع عليه خيل أهل الشام وأناخوا عليه وفرح ابن مرجانة وعمر بن سعد بتوافر الخيل وكثرتها واستضعفوا فيه الحسين صلوات الله عليه وأصحابه رضي الله عنهم وأيقنوا أن لا يأتي الحسين (عليه السلام) ناصر ولا يمده أهل العراق - بابي المستضعف الغريب -

اكو الحسين الي ما إله شبيه ... الحسين المظلوم المقتول بلا ذنب ... الحسين الي فوگ الانبياء ... الي ماكو اي بشر يقاربه أو يماثلة ولا نقاط مشتركة بينة وبين غير انسان

واكو الحسين الي خلقتة الكتب السنية والي تبنوا هواي شيعة غُبر ... وتبنوا الزيدية
والي اكو منه عشرات اذا مو مئات النسخ بالتاريخ ... مجرد أنه هذا صدف أنه سبط النبي محمد ... وقابل لأن يجي اي واحد يگولك اني مثلة واحسن منه

الحسين الي شاف وتحمل بلاء ما صار على اي نبي قبله ... والي تحمل اذية من اعتى عتاة الكفرة والمنافقين ... الحسين الي شاف كل ابتلاءات أصحاب الكساء الي ما چان الها هدف الا الكفر بيهم

الحسين شاف عمر وأبو بكر وعثمان ومعاوية وشاف شنو صار من يوم وفاة النبي لهذا اليوم ... شافهم من هجموا على بيتهم وشنو صار ... شاف الامام علي طيلة فترة الخلفاء وشاف مكرهم وحيلهم وكفر الناس وشاف الجمل وصفين وشاف اخو الحسن وشنو صار وياة

وهو يسمع من يوم ولادته انت مقتول ... وأولادك راح ينقتلون واخوتك ينقتلون واصحابك ينقتلون وخواتك وبناتك يروحن اسارى نفس أسارى الترك والروم في أشد المصائب والهموم

اعظم مصيبة وفجيعة واعتداء وظلم ... الما صار على نبي من الأنبياء من قبل ولا راح يصير بعده

أهل الكوفة يدرون الحسين علية حكم اعدام من يزيد ... يدزولة تعال ننصرك ... بعدين همة نفسهم يقتلوا طاعة وقربة ليزيد ...

وگف هيچ ليلة بين الخيمة والعسكر ويباوعلهم ... ويشوف قوم ابراهيم الي جمعوا نار وحطب علمود يحرگوا لمجرد گال ... مجرد گال الهتكم مو صحيحة، شاف قوم ثمود الي اعتدوا على الناقة وقتلوها لمجرد أنه النبي صالح گال لا تعتدون عليها، شاف قوم لوط الي هجموا على بيت نبيهم بغير ذنب منه، لمجرد گال مجرد گال لا تخزوني في ضيفي، شاف قوم الي هستوهم شايفين موسى فلق البحر وكادوا يقتلون هارون لمجرد گاللهم لا تعبدون العجل، وشاف الي رادوا يصلبون عيسى وصلبوا الحواري الي فدا عيسى لمجرد أنه مجرد گال أنه هذا وضعكم مو صحيح

شاف كل الكفر والعناد الي شافوا الانبياء ... وشاف التوحش الي ماكو نبي شافة ... وشاف الاصرار على الجحود والإنكار الي مالة مثيل

يعترفون هو سيد شباب الجنة ... بس مع ذلك يقتلوا ... مثل ما الأقوام السابقة چانت تعرف هذولة أنبياء ... بس يكفرون بيهم

ومثل ما الله صنع قصص الانبياء علمود تبقى ... صنع قصة الحسين علمود تبقى

والتفت الحسين للخيم وشاف زينب واگفه ... ومحد يدري منو الحسين لو شنو بلاء الحسين مثلها

ولگاها مجمعه كل أطفاله وكل اخوانه وكل اولاد إخوته وبنات اخوانه وكل العائله ... وعيونها تگول هاي اخر ساعات كلنا مجموعين... هاي آخر ليلة عائلة علي وفاطمة ملمومين

خلي نتجمع بخيمتك يحسين

يمكن كلهم تجمعوا بخيمة الحسين ... هسه صح عطاشى ... بس ميخالف ... خلي نتوادع الليلة ونتوادع باچر

يمكن الحسين گعد وگعد بنياته بحضنه ... مثل ما چانوا يگعدون هو والحسن بحضن النبي

رقية على جانب وحميدة على جانب ... وجاب علي الاصغر وياهم ... جاب اولاد مسلم، صاح للقاسم وعبد الله بن الحسن، وگدامه العباس وإخوته وعبد الله بن مسلم، وعون ومحمد اولاد زينب، وبناته وإخواته وكلهم داير ما دايره

اذا هو قبل ما يوصل كربلاء جمعهم وبچه عليهم ... بهاي الليلة شنو سوة وياهم؟!

اذا اصحابة جمعهم وسلاهم وطيب خاطرهم، لعد وليداته وشبابه وبنياته شيسويلهم؟!

يجوز ... يمكن جابهم وقبل اماكن جروحهم وضربات السيوف الي راح تصير بيهم باچر مثل ما چان النبي يسوي بي وباخو الحسن

يجوز بأس عبد الله ابنه وعبد الله بن الحسن واولاد مسلم الصغار من مناحرهم ... لأن ذولة قسمتهم الذبح ... حتى علي الاكبر جابه وشمه من منحره ... لأن علي الاكبر اول جرح بي چان سهم اجاه بمذبح رگبته ... قبل طعنه الرمح وقبل الطبرة
يحضن القاسم ويبوس رأسه ويبوس راس العباس وعيونه، ويشاقي اولاد مسلم وعبد الله بن الحسن مثل ما چان جده النبي يشاقي هو وأخو من چانوا صغار

ويلم بناته رقية وحميدة  وبنات الحسن يظفر شعرهن ويعدل تراچيهن ويبوس خدودهن ورجليهن

وياخذهن لعمامهن وإخوانهم يودعوهن ... شلون نيمهن لليتيمات باخر ليلة ...

نيمهن وگال كان يا ماكان ... بيت وباب محروگ

لو زينب چانت تلولي وتگول
على حسين ... على حسين ... يبوية الگلب مهموم عله احسين
يبويه الفزع جرار عله احسين ... يبويه والفزع دار عله احسين
يبويه الزلم والخيل عله احسين ... يبويه مساهره اعله حسين
يبويه طايره الروح عله احسين... يبويه الگلب مجروح عله احسين
يبويه الحزن والنوح عله احسين... يبويه والعزه دوم عله احسين
يبويه گطعوا الماي عله احسين... يبوية كربله كلها عله احسين
يبويه ترجف اعضاي عله احسين... يبويه دظهر اليوم عله احسين
يبويه عراگ والشام عله احسين... يبويه اوبيهم الزوم عله احسين

ثم قال: إن الله جل ذكره لما خلق النور خلقه يوم الجمعة في تقديره في أول يوم من شهر رمضان، وخلق الظلمة في يوم الأربعاء يوم عاشوراء في مثل ذلك يعني يوم العاشر من شهر المحرم في تقديره، وجعل لكل منهما شرعة ومنهاجا، يا عبد الله بن سنان!
إن أفضل ما تأتي به في هذا اليوم أن تعمد إلى ثياب طاهرة فتلبسها وتتسلب، قلت: وما التسلب؟ قال: تحلل أزرارك وتكشف عن ذراعيك كهيئة أصحاب المصائب، ثم تخرج إلى أرض مقفرة أو مكان لا يراك به أحد أو تعمد إلى منزل لك خال، أو في خلوة منذ حين يرتفع النهار ... وتحول وجهك نحو قبر الحسين عليه السلام ومضجعه، فتمثل لنفسك مصرعه ومن كان معه من ولده وأهله وتسلم وتصلي عليه وتلعن قاتليه وتبرأ من أفعالهم، يرفع الله عز وجل لك بذلك في الجنة من الدرجات ويحط عنك من السيئات، ثم تسعى من الموضع الذي أنت فيه إن كان صحراء أو فضاء أو أي شئ كان خطوات، تقول في ذلك: إنا لله وإنا إليه راجعون، رضا بقضاء الله وتسليما لأمره، وليكن عليك في ذلك الكآبة والحزن وأكثر من ذكر الله سبحانه والاسترجاع في ذلك اليوم.

القيمة الكربلائية و القيمة النجفية

بيبيتي الله يرحمها - مو هذيچ ام صينية القاسم... الثانية - تطبخ تمن وقيمة من نهاية الستينات أو بداية السبعينات ... چانوا كل عاشر محرم يرحون من بغداد لكربلاء ويطبخون هناك للزوار والي يعزون ... من صار المنع تحول الطبخ بالبيت ببغداد - هواي اذا مو معظم الطبخ هذا أصله حتى بيت جدي الثاني تحول طبخهم بالبيت ببغداد بسبب المنع -

المهم ... هاي بيبيتي الله يرحمها تسوي قيمة كربلائية ... القيمة هاي مربوطة ب " الرحى " ... القيمة الكربلائية القديمة يستعملون بيها حمص مو مال هلوكت يحطون " لپه " مال عجم ويگولك هاي حمص مجروش وهية بالصدگ بزاليا صفرة مدري شنو

المهم ... قبل محرم بيبيتي الله يرحمها تجيب الرحى وتجرش الحمص مال القيمة ... واللحم يصير قطع ... والحمص المجروش ينحط مباشر بالجدر بلا تنگيع ولا دوخة ... وماكو ساعات چرخ طويلة ... مجرد طبخ على نار قليلة وتحريك مستمر

والبهارات تنطحن بساعتها ... والتمن يتفرگع ويندار علية هيل ومي ورد بالاخير

القيمة الكربلائية تحتاج لحم كلش أكثر من النجفية ... وحمص أقل من القيمة النجفية ... وبهاراتها أكثر تنوع بس الوقت طعمها اطيب

علمود تسوي جدرين من النوعين نفس الحجم انت تحتاج ضعف كمية المواد للكربلائية ...

بهارات القيمة النجفية: هيل دارسين كمون هواي عرگ حار وجوزة بوه وفلفل اسود
الكربلائية نفس هاي بس هم حبه حلوة وكزبرة وكبابه

النجفية طيبة ورهيبة ... بس الكربلائية القديمة كلش بهواي اطيب ... هسه جايبيلنة قيمة عجمية يگلي كربلائية

وللاسف الشديد العظيم الچبير ... أهل كربلاء ديتفنون ويبدعون بتضييع تراثهم وعاداتهم ... ويمكن همة أكثر ناس زاهدين بتراثهم ... بين فئة لا أبالي ... وبين فئة كاتلتها دودة التجديد المسخت لو دودة التميز المسخت ... يريد يتميز بسرعة وبلا تعب ... لو يجدد هم بسرعة وبلا تعب

مو يگعد يوازن ... اني شعندي؟! هذا التحديث لو التجديد هو احسن من الي عندي لو أقل جودة ... هو الهدف اني اقدم جديد لو الهدف اقدم شي الجودة مالتة عالية؟!

والعتبات هم على رأس القائمة... حتى طريقة قراية المقتل المعتادة ... هم ديمحوها ويبدلوها ... والبدائل كلش رديئة

شبيكم متگلي شبيكم؟! بعدين يجي يگلي أهل كربلا دينقرضون ... انتوا دتقرضون روحكم بروحكم

بس يعرفولي مال مشية كربلائية ... بس هاي فالحين بيها

دتعلموا من أهل النجف... تراثهم خشبة وگواني منگعة نفط اسود ( والله احب المشاعل ) ... ولازميها بيدهم وسنونهم ... قرايتهم بس طورين لو تلاثة ... انتوا هواي عدكم أكثر

بس انتوا مضيعين أولها وتاليها ... كاتلكم التجديد والتميز " السختچي المسخت " ... على رأسهم إدارة العتبات الموقرة

هو صدگ الجنة بس للشيعة ؟!

المتوقع أنه الجواب يكون واحد من اثنين
اي بس الشيعي يطب للجنة وهاي البشرية كلها من الطول للطول بالنار
لو
لا الجنة يطبها السني (لكون الدين السني صحيح) والدرزي والزيدي والملحد والشيعي

ــــــــــــــــــــــــــــــــــــــ
بالواقع هيچ نوع أجوبة هيه مجرد استنساخ للفكر الإسلامي السني المعفن وتصديره بغلاف شيعي وخلق نماذج افكار تعيسة غبرة تسمم عقول شباب الشيعة ... وتأييد هيچ نمط افكار هو مجرد تعاسة وبؤس يخلقة الإنسان لنفسه ويحبس نفسه بي

صح عدنا روايات اذا تقرأها وحدها ممكن تنطيك هيچ فكرة وهذا صوچك لأن ما قريت البقية

البشر انواع وأصناف وحسب معتقداتهم الدينية بيهم هواي درجات وتدرجات بين ما يسمى مؤمن وكافر ... الدنيا مو بهيچ نوع ابيض واسود
اكو درجات كلش هواي بالنص

ثانيا ... احنا بهذا الزمن مالتنا نقاء التشيع وصحتة وال presentation مالتة هو مو بمستوى نقاء وصحة وسلامة التشيع بعهد الائمة، واحنا لا زين مثل ما رادونا الائمة وبالواقع احنا كل الشين الي ما رادوا ... واحنا ما عرفنا نجتر مودة الناس الهم ... وصرنا أعوان لأعداء الشيعة بتشويه وتحريف وأنه نمكنهم يستأكلون بال محمد ونصد الناس عن سبيل الله ومستوى الجهل العظيم

فما ترهم نطبق موازين الأحاديث نفسها علينا مثل ما أنه موازين التعامل وية ذهب عيار ٢٤ حباية و٢١ حباية ... تختلف كلش هواية عن موازين التعامل وية ذهب عيار ٩ ... فرق كلش چبير

ثالثا ... مرحلة الكفر والعناد والجحود ... هيه مراحل تجي بعد اليقين والمعرفة وتوفر كل القناعات بس انت بقرارك واصرار تعاند وتكفر ... سواء بالائمة أو كلامهم أو ما يستتبع ذلك

وهاي حصر الناس بين بس لو مؤمن لو كافر قديمة والائمة ما قبلوا عليها واكو رواية طويلة وحوار بين زارة والإمام الصادق... وشلون زرارة يعتقد أنه الناس بس مؤمن وكافر والإمام يرده ويگولة هذا حچي الخوارج

والروايات تحچي عن فئات تتسمى المستضعف والي هو لا كافر ولا مؤمن والي " اتركهم حيث تركههم الله " والي الله يشاء بيهم " الطبقة الذين لله فيهم المشيئة " وهواي فئات

والكفر والنصب هو شي القاعدة مالتة " ليس بكافر إذا لم يجحد "

زين ... احنا بالروايات مو عدنا الشيعة يدخلون الجنة وبس همة و بس؟!

اي صحيح

بس اكو بعد روايات اقوى من هاي ... اكو روايات اقوى تگول أنه الشيعي يشفع للمو شيعة ويدخلهم للجنة لأن چانوا خوش اوادم وياة

الشفاعة هو هم مفهوم شيعي قديم واصيل دفنوا عمايم تالي وكت ... مثل ما دفنوا التقية والرجعة وحقوق الإخوان وحاربوهن وكفروا بيهن... الشفاعة هم جزء أصيل چبير بالفكر الشيعي هم دفنوا وحاربوا

عدنا روايات أنه فاطمة الزهراء تشفع لشيعتها وتاخذهم للجنة ... ونفس الروايات الله يريد يظهر قدر الشيعة للعالم ويخليهم يشفعون لبقية اهلهم وجيرانهم وحتى " خويديمتي " يعني الخدامة الي بالبيت ... والله يجيز شفاعتهم بيهم ويستنقذوهم من النار .

هيه فاطمة الزهراء تگول " شيعة شيعتي " بعد ما تگول شيعتي وشيعة ولدي... يجون فئات ثانية

الشيعي يگول ل الله ... هذا جيراني بالدنيا چان ما مأذيني خلي يطب للجنة ... هذي وحدة بالبيت چانت تخدمني ... الله هم يگلة لخاطرك راح يدخلون الجنة

اكو بالروايات الشيعي يشفع لصديقة " ولايزال يشفع في جيرانه وخلطائه ومعارفه "... والنواصب الي چانوا ما يصاقوا أو يتقربون منه لأنه شيعي يگولون " فما لنا من شافعين ولا صديق حميم "

والشيعة يشفعون للي يصنعلهم المعروف واسعفه في الحاجة

الروايات توصف الشيعي " فسار فيها إلى جنات النعيم هو وإخوانه وأزواجه وذرياته والمحسنون إليه والدافعون في الدنيا عنه "

بالروايات الائمة يوم القيامة يبعثون صحابتهم الخلص يشفعون ويخلصون ناس من النار ... مثل سلمان وأبو ذر و المقداد أو الحسين يدز اصحابة ... هذولة الائمة يدزوهم فينقضون كالصقور  وياخذون الي يشفعولة مثل ما الصقر يأخذ الصيد مالتة ... بعدين " وإنا لنبعث على آخرين محبينا من خيار الشيعة كالحمام فيلتقطونهم من العرصات كما يلتقط الطير الحب "

وهاي طبعا واكيد مو لاستحقاق ذاتي من الشخص ... هذا فضل لخاطر الائمة الله ينطي للشيعة والي يحبون الائمة

من عدا أنه مثلا القدماء واحد منهم يگول لو القيامة الناس يصيرون مليون صف ... الحسين وحدة يشفع ب٩٩,٩٩٩ صف من هاي الناس ... والأنبياء والمرسلين والحسين يشفعون بالصف الباقي

والروايات قيدت الفئة الي ما ينشفع بيها وقضيتهم مسدودة " النواصب الي يعرفون بس يجحدون والمنافقين " واكو الي گال عليهم الامام إن من الشيعة بعدنا من هم أشر من النصاب " يعني الواقفة والزيدية

أما هاي عامة البشرية الي ما يعاديك ولا يأذيك لكونك شيعي وهو هم لو انعرض عليه التشيع الصحيح بعلم الله چان قبلة ... والا ما يرهم نحاسب العالم لأن عبالهم التشيع هو هذا مال خامنئي ومقتدى والمقاومة

والشيعة الي يشفعون هم حددتهم بشرط " بعد أن صان الولاية والتقية وحقوق إخوانه "

وهاي اخر رواية " فأحبوا شيعة محمد وعلي، وجدوا في قضاء حوائج المؤمنين، فإن الله تعالى إذا أدخلكم معاشر شيعتنا ومحبينا الجنان نادى مناديه في تلك الجنان: يا عبادي قد دخلتم الجنة برحمتي فتقاسموها على قدر حبكم لشيعة محمد وعلي وقضاء حقوق إخوانكم المؤمنين، فأيهم كان أشد للشيعة حبا ولحقوق إخوانهم المؤمنين أشد قضاء كانت درجاته في الجنان أعلى، حتى أن فيهم من يكون أرفع من الآخر بمسيرة

خمسمائة سنة ترابيع قصور وجنان."

واحنا الشيعة المفروض أنه احنا متصممين كمصدر خير ورحمة للبشرية ... احنا ندخل للجنة ونأخذ الناس ويانه ... مو مثل ذولاك الي يتمنون كل الدنيا بالنار

وهم شوف شلون اهم شي تحب عامة الشيعة وحقوقهم شگد عظيمة ... وشگد هذا مستخف بي هسه بحيث ولايتك لمحمد وعلي والحسين مو هيه الأصل عد الشيعة حاليا ... ولايتك ليا مرجع وليا حزب وليا مقاومة وحبك لغزة والقدس ورئيس الوزراء والحشد وبيت الصدر ... ويسلبوك حقوقك ويأذوك حسب موقفك منهن ... مو يشوفولك حقوق لأن يشوفون ايمانك بمحمد وعلي

وهو سيد فاقد ما ينلام ... الافكار السنية الي اخذها من بيت الصدر واضحة وهذا دربهم وطريقهم وهيچ خرط عادي وطبيعي

خير ان شاء الله ؟! اول حريق؟ اخر حريق؟!

لا مو اول حريق ولا اخر واحد ... چم حريق وحرايق وكارثة وكوارث صارت وچم عامل مات وچم عامل وگع من بناية تحترگ؟! لو نسيتوا مجمع الليث؟! لو مستشفى الناصرية ؟! لو چم مستشفى احترگت ... ناسيهن؟! لو چم فندق ؟! لو قاعة الاعراس؟!

اذا ناسيهن ... فطبكم الف ستميت مرض

كلها وانتوا نفس الخطأ ينعاد كل مرة ... نفس الخطأ وتگعدون تبچون وتتبچبچون ... من اول مرة يصير حريق وكارثة - لو العراق مال اوادم - يگعدون يگولون السبب الي صار والمواد السريعة الاشتعال ومخارج طوارئ ... وتنحل أموركم

بس انتوا شعب عظيم وعدكم اهم شي القضية الفلسطينية والمرجعية

ف بالعافية عليكم كوارث فوگ كوارث ... وخلي تفيدكم بيانات الاستنكار والتعزية والكلاوات

كل مرة نفس الخطأ ... فلا تبچون من تنعاد نفس الكارثة

هاي اليهود خابصين الدنيا وعيونهم على بيت المقدس لأن يعتقدون أنه هاي الصخرة الي جوة قبة الصخرة هيه المكان الي ابراهيم راد يذبح ابنه عليها ... ويقدسوها وهيه قبلتهم وحلم اجيالهم ... لأن مكان الي ابراهيم إمتثل لأمر الله وراد يذبح ابنه على هاي الصخرة ... الي صارت قدس الأقداس

هاي المسيح معلگين الصليب على رگابهم وسووا عيسى إله ... لانه يعتقدون هو من قدم نفسه للصلب وامتثل للبلاء الي كاتبه الله عليه اثبت عظمته وتضحيته بنفسه طاعه وامتثال لأمر الله ... وهاي مريم عظيمة لأن صبرت على الآلام ابنها ... صبرت أنه بني إسرائيل يتهموها بشرفها والله هم بسرعة نطق عيسى ودفع عنها

هاي المسلمين قبلتهم الكعبة ... شنهيه الكعبة؟! مكان الي ابراهيم حط اسماعيل وهاجر بنص الصحراء وعافهم وراح ... وهاي الكعبة والحج كلها قصة اسماعيل وبيت اسماعيل وعطش اسماعيل وهاجر سعت وطلع مي ... كلها مجرد امتثال ال ابراهيم للي الله كاتبه عليهم وابتلاهم بي

وهاي كربلاء ... ابتلاء ال محمد وامتحانهم وامتثالهم للي الله كاتبه عليهم ... وهو أعظم بكلش كلش هواي من الي الله ابتلى بي اي نبي

هذا الابتلاء العظيم الي اخر جزء منه ينختم يوم ٢٠ بصفر من زينب ترجع بيدها راس الحسين

بدت القصة من يوم ما مات النبي ... وكل واحد من اهل الكساء الله امتحنه ... وهذا امتحان الحسين

ابراهيم حط هاجر وإسماعيل ٣ ايام بالصحراء ورجعلهم وشاف طالعلهم مي ومستقرين وآمان

والحسين حط عيالة ٤٠ يوم شافوا كل انواع الالم والضيم والقهر ... شافوا الم يشوفون اهلهم ينقتلون ... ويعطشون ... ويهجم عليهم الجيش ... ويسلبوهم ويحرگون خيمهم ويرعبوهم ... ويروحون أسارى بيد العدو ... وسلمهم للشماتة والاعداء يشتفون بأسرهم ... وروس اهلهم علرماح فوگ روسهم

والحسين إمتثل ... وزينب امتثلت

"ابراهيم قالت له هاجر: يا إبراهيم لم تدعنا في موضع ليس فيه أنيس ولا ماء ولا زرع؟ فقال إبراهيم: الله الذي أمرني أن أضعكم في هذا المكان حاضر عليكم "

وحسين " عگب ما جاب كل الصبر ليها * ركب غوجه و للميدان سدر " وهو مسلم لأمر الله الي شاء أن يراني قتيلا و يراهن سبايا

واليوم ال محمد ... الحسين وزينب سووا كل المكتوب عليهم ... وكربلاء الي بيها قصتهم عدنا اكبر وأهم وأعظم من الكعبة وزيارتة اهم من الحج

هاي كربلاء الي الحسين استنقذ عبادك من الضلالة وحيرة الضلالة

تعرفون ليش استنقذ؟! مو ينجي؟!

واحد يجي ينجيك من موقف ... انت احتمال تتأذى بي لو لا ... ويجي يخلصك
بس انت تحتاج المنقذ وانت فعلا تعرضت للاذى... الحسين طلع ويطلعك من الجهالة والضلالة ويستنقذك منها وانت بنصها وغارگ بيها ومتأذي بسببها

الحسين وزينب الي أعظم من ابراهيم وال ابراهيم وعمران وال عمران وانبياء بني إسرائيل كلهم ... الي لو تجمع كل ابتلاءاتهم وامتحاناتهم ما توصل لجزء من ابتلاء الحسين وال الحسين

رجعت لكربلاء ورجعت راس اخوها ... وخلصت سبيها... ورجعت الدنيا نفس لحظة الي الاوائل رجعوا الامام علي وتلاگت امها فاطمة وياة وقميص النبي على راسها وهيه منهكه من الي صار " ضرب قنفذ فاطمة بالسوط على ظهرها وجنبيها إلى أن أنهكها وأثر في جسمها الشريف"

وهو بنفس الدوافع " استذلالا منك لرسول الله (صلى الله عليه وآله) ومخالفة منك لامره وانتهاكا لحرمته "

وهيه زيارة الأربعين شنو؟! تجي تشهد تگوله للحسين ولزينب أنه اشهد انتوا سويتوا الي عليكم ... اني اشهد انتوا خلصتوا امتحانكم وبلائكم

واشهد معناها "أعلم" أو "أقرّ" بشيء ما ... اني ادري واني اعترف واني متاكد انت يا حسين كذا كذا
وَأَشْهَدُ أَنَّ اللهَ مُنْجِزٌ مَا وَعَدَكَ
اللّٰهُمَّ إِنِّي أَشْهَدُ أَنَّهُ ... وَبَذَلَ مُهْجَتَهُ فِيكَ لِيَسْتَنْقِذَ عِبَادَكَ مِنَ الْجَهَالَةِ ، وَحَيْرَةِ الضَّلالَةِ
وَأَشْهَدُ أَنَّكَ وَفَيْتَ بِعَهْدِ اللهِ
حَتَّىٰ سُفِكَ فِي طَاعَتِكَ دَمُهُ وَاسْتُبِيحَ حَرِيمُهُ

الخ

اشهد انه انقتل واشهد أنه هذني راحن سبايا ... اشهد يا الله أنه نفذوا كل الي كتبته عليهم ... اعرف واقر واعترف بيهم وبلي سووا وصار عليهم


واليوم ٢٣ صفر چان اخر يوم لزينب بكربلاء ... وخلصت قصتها وخلص امتحانها ... نهاية القصة هاي والباقي مجرد تنتظر هيه وكل السبايا تنتهي حياتهم

ودعته ليله العاشر ... ودعته ظهر العاشر ... ودعت جسمه يوم ١١ ... ودعت راسه يوم الاربعين ... وهذا اخر وداع وتطلع للمدينة ... لا الحسين ولا راس الحسين ولا قبر الحسين... ولا كربلاء ... خلص تودعه زينب وترجع للمدينة ... يمكن اصعبهن هذا

شايفين ذولة الزوار من يخلصون ويرجعون لأهلهم همة وجناطهم ويتلفتون ... تشوفهم بالباص كاعدين ويبچون وعيونهم تدور بلكت يشوفون طرف المنارة لو القبة ... تمشي السيارة وعيونهم تندار على جهه الامام

ذولة الناس العاديين ... زينب وليلى والرباب وام كلثوم ورملة وسكينة وباقي الحرم ... الله يساعدهم شلون طلعوا من كربلاء... ويدرن بعد ما راح يرجعن ... طلعن من كربلاء وماباقيلهن بس قصص كربلاء ... قصة الحسين وقصة العباس وأخوة العباس... قصة علي الاكبر وقصة القاسم وقصة عبد الله بن مسلم وقصة عبد الله بن الحسن وعبد الله الرضيع وقصص اصحاب الحسين ... غمضن عيونهن على صورهم ... وطلعن من كربلاء وهنه يسمعن صدى صوت المعركة ... طلعن واخذن تذكار من ترابها الي فعلا مو مجاز ولا خيال ... بي دم الحسين ودم احبتهن

الله لا يضيع اي واحد تعب بهل طريق وهاي الايام والله يعودكم للسنة الجاية وتگولون هذي ليالي محرمك عادت علينا

ونشهد إن الحسين بن علي عليهما السلام عند ربه عز وجل ينظر إلى موضع معسكره ومن حله من الشهداء معه وينظر إلى زواره وهو اعرف بحالهم و بأسمائهم وأسماء آبائهم وبدرجاتهم ومنزلتهم عند الله عز وجل من أحدكم بولده وانه ليرى من يبكيه فيستغفر له

صباح الخير... كل عام وانتوا بخير ومن الخير وفوگ الخير وجوة الخير وجايين من الخير ورايحين للخير ... انتوا واهلكم وكلمن تريدون

ويرزقكم صحة وعافية وعقل ورزانة وفلوس ... وراحة بال ويچفيكم شر كل حقنة وغثة وقنقينة وكل مدير أو مديرة مطي او مطية ....

المهم ... عيدوا ورفهوا عن نفسكم وعن اهلكم بلي تگدرون علية ... وشوية بالغوا ... اليوم خوش يوم ويستاهل

ويعودكم كل سنة وكل عام

وكانت وجبة الإفطار الصباحية ... ريوگ رقم واحد ... پان كيك مع پيستاشيو كريم و ستروبريز ثم چوكليت كوكيز ... وطبعا اكيد چاي ... نحن قوم لا نشرب القهوة

ترة احنا السبب الأساسي الاصلي نحتفل ونعيد هو هذا " وتدعو الله عليه ويستجيب الله دعاؤها في مثل هذا اليوم " هسه يجي واحد يگول والثاني مدري شيگول ... بكيفهم

اكو دعاء اندعى والله استجاب بهذا اليوم والنبي احتفل بي قبل ما يصير ... هسه اذا ما تعتقد أنه هلك هيچ يوم ... تگدر تعتقد أنه منهجه وفكرته واختراعة القائم على أساس الكفر بال محمد راح يهلك بالمستقبل

يوم عظيم ... و دعاء عظيم الله استجاب وحققه أو راح يحققة بهذا اليوم

الله انطه فاطمة الزهراء مرادها ... شلون ما نفرح؟!

18 - تفسير علي بن إبراهيم (وَقَالَ قَرِينُهُ هَٰذَا مَا لَدَيَّ عَتِيدٌ (23) أَلْقِيَا فِي جَهَنَّمَ كُلَّ كَفَّارٍ عَنِيدٍ (24) مَّنَّاعٍ لِّلْخَيْرِ مُعْتَدٍ مُّرِيبٍ (25) الَّذِي جَعَلَ مَعَ اللَّهِ إِلَٰهًا آخَرَ فَأَلْقِيَاهُ فِي الْعَذَابِ الشَّدِيدِ (26) ۞ قَالَ قَرِينُهُ رَبَّنَا مَا أَطْغَيْتُهُ وَلَٰكِن كَانَ فِي ضَلَالٍ بَعِيدٍ (27) قَالَ لَا تَخْتَصِمُوا لَدَيَّ وَقَدْ قَدَّمْتُ إِلَيْكُم بِالْوَعِيدِ (28) مَا يُبَدَّلُ الْقَوْلُ لَدَيَّ وَمَا أَنَا بِظَلَّامٍ لِّلْعَبِيدِ (29) يَوْمَ نَقُولُ لِجَهَنَّمَ هَلِ امْتَلَأْتِ وَتَقُولُ هَلْ مِن مَّزِيدٍ (30)

: قال: ال مَّنَّاعٍ: الثاني، و الْخَيْرِ ولاية أمير المؤمنين عليه السلام وحقوق آل محمد عليهم السلام،

ولما كتب الأول كتاب فدك يردها على فاطمة عليها السلام منعه الثاني، فهو * (مُعْتَدٍ مُّرِيبٍ) * (الَّذِي جَعَلَ مَعَ اللَّهِ إِلَٰهًا آخَرَ) * قال: هو ما قالوا نحن كافرون بمن جعل لكم الإمامة ...


عن محمد بن علي، عن أبي عبد الله عليه السلام في قوله: * (إِنَّ الَّذِينَ ارْتَدُّوا عَلَىٰ أَدْبَارِهِم مِّن بَعْدِ مَا تَبَيَّنَ لَهُمُ الْهُدَى ۙ الشَّيْطَانُ سَوَّلَ لَهُمْ وَأَمْلَىٰ لَهُمْ (25) ذَٰلِكَ بِأَنَّهُمْ قَالُوا لِلَّذِينَ كَرِهُوا مَا نَزَّلَ اللَّهُ سَنُطِيعُكُمْ فِي بَعْضِ الْأَمْرِ ۖ وَاللَّهُ يَعْلَمُ إِسْرَارَهُمْ


( إِنَّ الَّذِينَ ارْتَدُّوا ) * عن الايمان بتركهم ولاية أمير المؤمنين عليه السلام:
* (الشَّيْطَانُ سَوَّلَ لَهُمْ) * يعني الثاني. وقوله : * () ذَٰلِكَ بِأَنَّهُمْ قَالُوا لِلَّذِينَ كَرِهُوا مَا نَزَّلَ اللَّهُ) * هو ما افترض الله على خلقه من ولاية أمير المؤمنين عليه السلام.

تفسير علي بن إبراهيم : قال علي بن إبراهيم في قوله: * (لِيَحْمِلُوا أَوْزَارَهُمْ كَامِلَةً يَوْمَ الْقِيَامَةِ ۙ وَمِنْ أَوْزَارِ الَّذِينَ يُضِلُّونَهُم بِغَيْرِ عِلْمٍ ۗ أَلَا سَاءَ مَا يَزِرُونَ) * قال: - يعني يحملون آثامهم - يعني الذين غصبوا أمير المؤمنين عليه السلام وآثام كل من اقتدى بهم، وهو قول الصادق صلوات الله عليه: والله ما أهريقت محجمة من دم، ولا قرعت عصا بعصا، ولا غصب فرج حرام، ولا أخذ مال من غير حله، إلا وزر ذلك في أعناقهما من غير أن ينقص من أوزار العالمين شئ

ـــــــــــــــــــــــــــــــــــــــــــــــــ

ايام ما چان الشيعي يفتح عينه علدنيا يسمع هيچ حچي ... الخطباء والشيعة والعلماء هذا حچيهم ... محد چان يستغرب ولا يحلل ولا ينظر

بس احنا بدلنا هذا الحچي بكلشي يخطر على بالك ... عرفان وكلاوات الوائلي وتعال تمدح المراجع ... ومناظرات السنة وگال البخاري وحچة النعالي

السنة هم لا حبوكم ولا تقبلوكم ولا صاروا شيعة ولا بطيخ ... مجرد الشيعة انمسخوا وصاروا جهلة وغبران

واني هم ابد نهائيا مو وية توجيه هذا الحچي للسنة ولا النقاش وية السنة ولا الحوار ولا التحدي ولا المناظرة ولا الاحتجاج على السنة ... ماعلية اي علاقة بيهم

اني اريد الشيعة تعرف هلحچي وهاي هيه ... بالصنطة ... بيناتنا ... يتعلمون يفتهمون وبس

بس احنا عدنا اهم شي القدس والوحدة الإسلامية... كرفكم كلكم طريق القدس أن شاءالله

وهيه نفس السالفة ترة ... الجماعة الي عدنا هم كارهين السالفة وكافرين بيها ... بس بدل ما ينكروها كامل ... حرفوها وگالوا هيه ترة بس علحكم