ياحبيبي .. واتحاشى منك كلمة ياحبيبي
لانك أكبر من مجال الحب كله والمحبه

- سعد بن جدلان

يوم غيرك يبي منّي .. ولو ربع كلمه
كنت أسنّد عليك السالفة والقصيده :)

لا تنادي لـ المقفّي .. ولا تهيم بـ كل وادي
القلوب اللي تحبك ماهي بـ حاجة عزيمه

كل مالديت في النايفات من الجبال
‏شفت جرّة شرهتي .. طالعـه و محولّه

توطّنت الحياة، وكـل شيءٍ فالحياة آبيه
وجيت وطاح من عيني جميع اللي أنا آبي

وهاجرتك وأنا هاقي ، ياشيٍء ماني بـ هاقيه
تعلّق قلبي بـ وجهك .. ونوّخ عندك ركابي

يا كم ليلٍ يهود بك عتيمه للفجر وأسريه
ولا تدري إلى جيتك ، وجارة بيتك أدرى بي

ومرّيت الحكي غيمٍ يضايق بالصدر وسميه
تعدّا صدري الساكت ، وبلل سمعك "عتابي"

تعنّيت بـ خِطى شعورٍ تملل من سراب التيه!
بـ عمرٍ من مشاوير .. وبساطة حكي الإعرابي

حبيبي ماني بـ ناقص هيامٍ ما أنته بـ واديه
تعال .. وضحكتك وادٍ يهيمه كل ؛ متغابي!

تعال ؛ وشرهة غيابك على بالٍ ما تطري فيه
أنا اللي يبيّن حضورك بـ عيني ؛ قيمه غيابي

أنا النية ، وأنا المسرى ، وأنا الوقفة ، وأنا لبيه
إذا ما تقدر " يدينك " يغازل " دقها " بابي

أنا جاري عن النظرة ، وأنا العابر عن التشبيه
وأنا أسباب الوصل كله متى ما غابوا احبابي

على أنه عندي لكرهك كثير أسباب .. مدري ليه
تخيّرت أني أحبك .. ولا أدري وش هي أسبابي

انت لا مريت بالي عرفت اني بخير
وامطرت فيه القنوف ونبت فيه الزهر

عادي انْك تمر بالي ولكن مايصير
كل يوم تمر بالي وماتدري .. قهر

كنت أقول إنّ المشاعر عنْك توبتها نصوحه
و أثرها عمرٍ ما يعطى فيه عهد ولا ضمانه

- عبدالله السراهيد

"على ثورة الإبداع للمبدعين أوقات
يقولون ما في خاطري قبل لا أقوله."

"اللحظة اللي خايفين تفوت
نعيشها .. ولا نصوّرها؟"

حتى المكان .. استاحش احبابه ، وغادر أُلفته
ما عاد باقي فـ المكان الا .. عزيْز الذكريات

ماجيت أسمّعك الكلام اللي تبيه
‏جيت أودِع الذكرى القديمة فاللحد

‏خل الكلام الحاد والرأي الوجيه
‏يمكن يكون الإعتراف أقسى وأحَدّ

‏ماكنت وجه وبس من ضمن الوجيه
‏إنسان عاهدني على شي وجحد

‏أنت الشعور اللي ماقد حسيت فيه
‏وأنت الكلام اللي ماقد قلته لأحد

على شي مايسوى لقيتك حبيب وخل
مثل ماتفارقنا .. على شي مايسوى

- جاسم الزعبوط

الخاطر ان طاب من حاجه : عليها السلام
لو إنّها اغلى من عْيوني عَلَيّ .. عفتها

من اخر اللي بقوله واختصار الكلام
خوفي اني اخسرك مرحله طفتها

من شفت ماعاد في وجهك حيا واحترام
عيوبك اللي ما كنت اشوفها .. شفتها

الخاطر ان طاب من حاجه عليها السلام
لو انها اغلا من عيوني علي عفتها

من همهمات الوداع لصوت ترحيبك
راحت مع الوقت والنسيان همشها

نسوك حتى الطواري عيت تجيبك
والذاكره ماتعرفك .. لين اغششها

خلّي قديم الجفا و اخذي جديد الحنين
‏ما تنتجاهل مشاعرنا .. ولا تنّجحد

‏الارض للعاشقين اللي ماهم صادقين
‏" تعالي .. أدل غيمه ما عليها أحد"

من تكبر مع الوقت الخفيف المطيّر
مستعد اقلب الدنيا عليه ب ثواني

جيّد الرابعه ما عاش عيشة محيّر
له ورا كل غبّات الليالي مُواني

روح مع كل دربٍ تشتهيه وتخيّر
لين ما عاد تلقى الا بقايا مكاني

إن تغيّرت فـ الواجب علي أتغيّر
منت الأول عشان أصير لك لوّلاني

ياروح الحياه البائسه يأجمل الأحلام
‏تراني دخيلك لا تكثر علي اللوم
‏ٰ
‏انا خاطري خاطر يتيمٍ من الايتام
‏لاعاينت في وجهه دريت ان وراه علوم
‏ٰ
‏جلس عند وجهك واستحى لايقول وقام
‏وهو كل مايملك بعير وخذوه القوم
‏ٰ
‏تحنّين ياعينه من الشوق و الاوهام
‏تبينه ينام شوي ؟ وينه ووين النوم

لقى ذكريات سنينه اللي ورا قدام
‏وعلى شان خاطرها تبسّم وهو محروم
ٰ
‏محطات عمره كل ابوها قرار اعدام
‏ماتفرق معه لو يعدمونه وهو معدوم
‏ٰ
‏يبي من يضم يديه يومٍ من الايام
‏على شان عمره يبتدي من هذاك اليوم

‏-مدغم ابو شيبه

فاقد اللي زود بعده مانقّص من غلاه
‏من يبشرني بشوفه ويبشر بسعده ؟

‏مابقى في ساحة البال من ذكرى لقاه
‏غير تلويحة وداعه، وخذلان وعده

-عبدالله السراهيد