داست عليك الخيل مولاي
وفوگاها هم ماشارب الماي
حسين حسين يا ابا عبد الله
،،،،،،،
ارضه الحوافر تسحگ علـــــــيّه
بس كون اصيراً طاسة اميّـــــــه
بچفوف بنتك كون مملــــــــــــيه
ومن عندي يشرب نحرك اشويـه

لو خيمه اصيراً فوگك فيـــــاي
حسين حسين يا ابا عبد الله
،،،،،،،
ارضه السهام توزّع بـــصدري
وثنعش طبره ريتها بنحـــــري
ريت المثلث طلع من ضـــهري
وريت الرمل يابو علي حــدري

من حگي لمن افگد الـــــــــراي
حسين حسين يا ابا عبد الله
،،،،،،،
اتمنه گطعوا خنصر ايميــــــني
وبحجار گون الگوم ترميــــني
لو نبله اخذ منك بعينـــــــــــي
خل تنطفي وما اريداً اسنيني

من زغري هاي الأمنيّه ويــــاي
حسين حسين يا ابا عبد الله
،،،،،،،،
اتمنه كون اعيالي يسبــــوها
وبنيتّي كون العده ايضربوها
صعبه الاخت لمن يشتـــموها
لعيونك ارضه من يسبــــــوها

يالغالي ارضه واقبل بهــــــاي
حسين حسين يا ابا عبد الله
،،،،،،،
دون الشرف شنهي الرجل يسوه
وانه وحياتي اندارلك فـــــــدوه
يالعمتني معنه المــــــــــــــــــروه
موبيدي احبك والحسن گـــــــوه

حبك تملك گلبي وعضـــــــــاي
حسين حسين يا ابا عبد الله
،،،،،،
مرات اعيش بعالم احسـاسـي
والعبره تخنگ صدري ونفاسي
واتمنه كون اعله الرمح راسـي
وبصفي إخوتي مذبحّه وناسي

ماتطفي ناري دمعة ابچــــــاي
حسين حسين يا ابا عبد الله
،،،،،
محمد الفهداوي

رساله من العطش لرياگ الحسين
مكتوبه اعله جرف العلكمي سنين
وابو فاضل قــراها
وعقد مجلس وراها
ولطم حد ما نگطعن منّه چفين
،،،،،،،
اجه بنص الرساله الخاطها الماي
الحسين يموت عطشان

استعد يبن الزجيه حربك وياي
حرب من دون وجـــدان

هجير وحر ظمه ويظيع الفياي
تموت وتبقه عـــــــريان

صفگ عباس جفيــــــــنه
صرخ خويه وجرت عينه
عمت عيني يبو سكينـــه

كتب فوگ الجرف عباس بالسيف
بعزيز الروح هيجي ايصير ياحيف
غصص ممتد سراها
ابو فاضل قـــــــراها
ولطم حد مانگطعن منه چفين
،،،،،،
اجه بنص الرساله بنبله ينصاب
رظيعه بحظنه ويموت

ولا من دمه گطرّه تلوح التراب
رساله وللسمه تفـــــوت

على گماطه نقش وبمنحره خظاب
دمه بس جنه ياقوت

رغم ماميت ايشبگـــــه
ويغمض جفنه ويطبگه
ولا غالي اله اليبگـــــــــه

يضل محتار گوه ايرد للخــــــــيام
وتگله أسكينه اخوي من السهم نام

بخياله اتصوراها
ابو فاضل قــراها
ولطم حد مانگطعن منه جفين
،،،،،،،
اجه بنص الرساله زينب تصيح
على التل خويه يحسين

وترد للخيمه بس تگوم وطيـــح
وتضل بس تهل العين

سموم يصير حته بكربله الريح
ولا تبقه ألصواوين

العده يحرگون خيمتها
وتطفيها بعبايتهـــــــــــا
تَبجيّ الگاع دمعتهــــــا

تتنفس رماد وتبچي بحساس
حرگوا خيمتي وينـــك يعـباس
العده زينب تراها
ابو فاضل قـــراها
وطلم حد مانگطعن منه جفين
،،،،،،،
اجه بنص الرساله تسحگ الخيل
اعله صدره ونحره وعظاه

وبچه العباس ظلت دمعته تسيل
وصاح بصوت ويــــــــــلاه

المن يابو فاضل ضام الحيـــــــــل
العمر ماريــــــــــــــده والله

رغم ما طحن زنــــوده
شال عله الجتف جـوده
مثل هل خوه مريــوده

توجه راد عود أيودع الحسيـــن
ولن سهم المنيه صوب العيــــــن
طفه عينه وفراها
ابو فاضل قـــراها
ولطم حد ما نگطعن منه جفين
،،،،،،
اجه بنص الرساله زينب تروح
اعله ناگه الديرة الشام

بگد حسين اخوها تحمل جروح
وقهر واهــــــــــاة والام

اليتامه تصيح كلها عمه وتــنوح
تحير بحال الأيتــام

اعله رمحه ويلتفت ليها
ويصبرها ويحاچيهـــــــا
ودمعته تنزل عليهـــــــــا

شمايسمع بخيّته الغاليه تصيــــــــح
من رمحه الحسين اعله الثره يطيح

بثمن روحه شتراها
ابو فاضل قــــــراها
،،،،،،،

لخادم الحسين ع
محمد الفهداوي

عنده الشهاده عــــرس
قرر يضحي النفــــــس
وامه اعلگتله الشمـــــع
بالخيم بالخيــــــــــــم
،،،،،،
القاسم بدر عالگاع
ينثر عطر نعنــــــاع
من وجها بالحــــومه

وجدامه تزرع هيـــل
يشتمها نجم سهــيــل
يوم الفخر يومــــــــه

بعزم صال دحه ابطال بتاره
للجيـــــال للشبـــــــــال اثاره

حته الخــيم هلهلت
برجوزتـــــــــه رتلت
نور الحسن بي يشع
من هجم من هجـــم
،،،،،،،،
من صوول اعله عداه
والصارم بيمـــــــــناه
ضاع الدرب بيهــــــم

ركضوا ركض حفــاي
ومتيهين الـــــــــــراي
لمن اجه عليهــــــــــم

النفس ضاع بالســـباع من زوده
الحسن عاد حرز شاد بـــــزنوده

من وجها يگطر ضوه
ويشمه حته الهــــــوه
صاير جمـــــــــاله درع
من هجم من هجـــــم
،،،،،،
شچ رايته اعله الروس
وبجفه نبله وقــــــوس
ويلگط الــــــــــــــــقاده

شورطنه وي هلشــــــاب
خلصنه بالنشــــــــــــــاب
بيه شيمة الســــــــــــــاده

تربيت تغذيت حب عمــــــي
محبته مـــعزته بنص دمـــــي

عمي الحسين العشك
من گلبي احبه صـدگ
من زغري بي مقتنــــع
من هجم من هحــــــم
،،،،،،،
صاعد سبوگ الخيل
سيفه حجر سجــــيل
ضلوا يركعولــــــــــــه

دارس فنون الجــــود
من والده بيــــــه زود
مثل الجبل طولـــــــه

غده يصيد صناديد باعلومه
هتف اه حسيــــناه بالــحومه

اكرمنه رب البشـــــــر
النه الشهادة فخــــــــر
بس صوته ضل ينسمع
منهجم منهجــــــم
،،،،،،،،
چم ايه بالقرأن
رتلها بالمـــيدان
شمحلاها بلسـانه

كللهم احنه أنگون
ألتين والزيتـــــون
للراد يقـــــــــــرانه

كرامات كأيات جــيناكم
تكفرون تغدرون شفناكم

من ادخلنه أرض كربله
تلگتنه بالياهــــــــــــلاه
ضلت تهل الدمــــــــــــع
من هجم من هجــــــم
،،،،،،

لخادم الحسين ع
محمد الفهداوي

الكوفه اصبحت اهل الفيل
متاني الأمر عزرائــــيــــــل
بس مسلم يصيح بصـــوت
يمطر عليهم سجيـــــــــــــل
،،،،،،
من سرفن اردانــه
ضل يغلي بـركانــه
يستنگي ضل بيهم
ومدنكه عدوانــــه

بي من علي ملوحه
ابسلهم ايلوحـــــــه
وبصارمه يرســــــل
الوادي صقر روحـه

مسلم شبيه العبـــــــاس
غيره وشجاعه ونوماس
وعمامته حب حسيــــــن
تاج ولبسها اعله الـــراس

راواهم بسيفه الويـــــــــل
الكوفه اصبحت اهل الفيل
،،،،،،،
گلهم علي عمـــــي
يموت اليصل يمي
اله اشلع عيونـــــه
الرايد سفك دمـــي

انسابي معروفـــــه
خل تسمع الكوفـــه
موقف اريد اتــــرك
حته العمه يشوفــه

راح اني أترك عنـــوان
يقراه يضل كل انسان
انه ابقه ونتو تموتـون
هيجي بصريح القـرأن

يذكرني يبقه كل جيــــــل
الكوفه اصبحت اهل الفيل
،،،،،،،
حسين اشتره انفاسي
وتملك احساســــــــــي
وانه شلت حـــــــــــبه
ياوادم براســــــــــــــي

انتم ندبتولــــــــــــــــه
أقدم كتبتــــــــــــــــوله
من تنگضي الدنيــــــــه
كل چلمه مسؤلــــــــــــــه

عن سيفي وين تـــــــفرون
موهينه بينه تغـــــــــــدرون
القاضي سيفي اعله الروس
صَدر أحكام تموتـــــــــــــون

ما يسلم البينه ايعيـــــــــل
الكوفه اصبحت مثل الفيل
،،،،،،،
راح احكم بـصارم
متحمس وعــــازم
كتبوا وصـــــاياكم
يا ارذل الـــــــوادم

اسحگ جحافلكــم
ولوحدي انازلكـــــم
مومستواي انتـــــم
مجبور اقاتلـــــــكم

انه العشت بين ابطـــال
اكسر خشم كلمن عـــال
مسلم وبن عم حسيــــن
موجرمقان وبقـــــــــــال

من صولته كلها تميــــــــل
الكوفه اصبحت مثل الفيل
،،،،،،،
يدري بمگيدتهـــم
وعليها شردهـــــم
نص المعسكر طاح
منه بحفيرتهـــــــم

محد گرب صوبـــه
وما حركو ثوبــــــه
باسو رجل مهـــــره
يامسلم اتوبــــــــــــه

تهلهله طوعه تحيــه
بعمه علي من تناديه
يترك السيف بيمنــــا
يلزم الفارس يرميـــه

الروس اوصلت نجم سهيل
الكوفه اصبحت مثل الفيـل
،،،،،،

لخادم الحسين ع
محمد الفهـــداوي

اسمع ياقصـــر
ياهو الينتصـــر
ياهو اليبقه شامخ انه لو انتـــه
وينصاغ الذهب باچر على گبته
ياهو الينتصر اسمع ياقصر
،،،،،،،،
الحكم والخصم انت وأحكم بهايه
ياهو يصير گبره مثل الولايــــــــه
ياهو التنصبله بكل عزه قرايـــــــه
ياهو التعتنيله ناس مشايــــــــــــه

انت ازغر عمر
اسمع ياقصـــر
ياهو الترتفع من عدنه منزلتـــه
وينصاغ الذهب باچر على گبته
،،،،،،،
ياهو اليندفن ياهو اليضل عالــــــي
فنك فتره تصمد شامخ گبالــــــــــي
نصيحه ومني اخذها وداعت اطفالي
اليخلدك بس الحسين الوفي الغالـي

اترك كل شمر
اسمع ياقصـر
جلباب الشهادة روحي لابســته
وينصاغ الذهب باچر على گبته
،،،،،،،
القصر زامط بحيل ايزيد وتبختر
وگال اني اضل طول الدهر اگــدر
يبنيني يزيد بچفه من ازغـــــــــــر
وصيرن ند وحارب دولة المنبـــــر

حكمك يندحر
اسمع ياقصــر
راسك عنفوانك بالجدم دســته
وينصاغ الذهب باجر على گبته
،،،،،،،
ضل يحچي القصر وي مسلم بحيله
راح تموت لاناصر ولاعيلـــــــــــــــــه
وجسمك ماكو واحد يفزع يشيلـــــه
وينجر بالحبل والناس توميـــــــــــله

بهل موته افتخر
اسمع ياقصـــــــر
جسمي خله ينجر بالحبل ردته
ينصاغ الذهب باجر على گبــته
،،،،،،
انه باب الحسين ورحمة البــــاري
مامحتاج تعرف انته مقـــــــــداري
عد طوعه عفت تاريخي وخــباري
اثارك تزول وتبقــــــــــــــــه اثاري

احنه اهل الذكر
اسمع ياقصـــــر
وداعآ ياقصر كل الحچي گلته
وينصاغ الذهب باچر على گبته
،،،،،،

لخادم الحسين ع
محمد الفهداوي

فكلي عينك البيـها حياتـي
وكل امنياتي فكلي عينــك
بنص جبينك كل ذكرياتـــي
وداعت بناتي بنص جبينــك

قهر فگدك قهــــر
وعلي كسرة ضهر
فكلي عينك فكلي عينك
،،،،،،
من شفتها
بعينك النبله يبو عين الوسيعــــه
عاتبتــها
ليش طفيتي نظر خدر الوديعــــه

ما اشوفاً خويه دربي ودمعي هامـــل
بلا شعوري گمت اصيحن يابو فاضــل
زينب اختك تبقه ترظه بلايه كافــــــل
من بچيها الخيمه نگعت والمحامــــــل

ياكشختي زينب شگلها
راح الكفلها ياكشختــــي
ياسلوتي صعبه المثلهـــا
تفارگ املها ياسلوتــــــي
ترك بيه اثــــر
قهر فگدك قهر
فكلي عينك فكلي عينك
،،،،،،،
قبلتها
يمنتك والمحبس البيها لچمــــــــني
من شلتها
شفت فوگ الشذره دم جامد هظمني

گوه اجراً نفسي جيتك ياعضـيدي
كون گطعوا مويمــينـك خويه ايـدي
عذباني خويه جرك حز وريـــــــــدي
انته بوسة جدي طه فوگ جيــــــدي

گتلي خويه من اسمعتهــا
جروحي عفتها كتلي خويه
وانه بويه يمك صحتهــــــا
عيوني الطمتها وانه بويــــه
فجع گلبي الدهر
قهر فگدك قهــــر
،،،،،،،،،
ادري ضامي
طايح ويمك نهر يجري فراتــــــــــه
يامحامي
ياعفيف الماتصح مثلك صفاتـــــــــه

ياهو مثلك لجل اخيّه هيجي ســــــوه
بكفه كلها من احطن كل أخــــــــــــــوه
ترجح انت ما اجامل هيه گـــــــــــــوه
من اشوفك انسه همي وعزمي يـــگوه

ارد اشمك خويه على نحرك
مره على صدرك ارد اشـــمك
هذا دمك سايل بكتــــــــــرك
حيرني امرك هذا دمــــــــــك
نعصر گلبي نعصر
قهر فگدك قهـــــر
،،،،،،،
حته جودك
عليك شگ زيجه وبجالك دمعه دمعه
بلاوجودك
شلون اشيل الجود للخيمه وارجعــــــه

انته تنزف هوه ينزف شاهدتكـــــــم
مالي طاقه للمخيم خويه اردكــــــم
بنفسي اموتن عالشريعه هم مثلكــم
وانه ميت من حناني ابقه اشمكـــــم

أبقه اشمكم حته بمنيتــــي
واكتب وصيتي ابقه اشمكم
روحي چنكم انتم قضيــتي
ودمي وهويتي روحي چنكم

النهر صاح النهر
قهر فگدك قهــر
،،،،،،،،
راح اخلي
عمامتي وساده الوجنتك أبقه غافي
انت كلي
نام يابعد الگلب نوم العوافـــــــــــــي

راح اخلي گلبي يمك ما اريــــــــــــده
حسين اخيك شنهي نفعه بلاعظيـــده
والبواتر كلها تطلب دم وريـــــــــــــــده
حگه اخيك من حسرته يفرك ايــــــــده

فرهد الشيب كل شعره بيه
يابو الحميه فرهد الشـــــيب
بدرك يغيب ياعم رقــــــــيه
سوده علــــــــيه بدرك يغيب
ضرر بان الضرر
قهر فگدك قـــهر
،،،،،،،،
لخادم الحسين ع
محمد الفــهداوي

فراگك والمنيه مرورتهن سويه
انه الميته من ضعنك طلع للغاضريه
يحسين العماني هجرك موزماني
انه الميته من ضعنك طلع للغاضريه
،،،،،،،،
من كثر نوحي شيبي بجروحي وناري بنفاسي
الساكنّه بعيني صورة حسيني وتفتر براسي
يمته نتلاگه يذبح افراگه وينزف احساسي
خيمة الساده وقائد القادة هوه اعز ناسي

شما اقره الزياره تبچي تبقه داره
سلاماً عالحسين الفوگه داسة لعوجيه
يبن الزهره تدري هاَجَر عني عمري
انه الميته من ضعنك طلع للغاضريــــه
،،،،،،
موفگد ولدي اليمرد بچبدي فگد ابو اليمه
تنزل دموعي وتنحني ضلوعي من يمر اسمه
وانه ملچومه اشتم هدومه وغفه لوشمه
عيوني احس بيها الدمعه تچويها ورايده تعمه

ميته وابقه اتاني لمن ودعاني
انه العايشه ضلت على قيد المنيه

احجيها الحقيقه من اول دقيقه
انه الميته من ضعنك طلع للغاضريه
،،،،،،
من اجه الناعي زيّد اوجاعي ضل يحاجيني
گتله لاتبدي بالجره ابولدي اخبرني بحسيني
گلي عن جعفر بالطف توذر ودمّعت عيني
گلي عبد الله وجرحي أحس صله وسجدة سنيني

حاچاني بدمعته عن الكافل اخته
چفوفه تگطعن يم النهر راعي الحميه
ياوالد سكينه ذبحتني المدينه
انه الميته من ضعنك طلع للغاضريــــه
،،،،،،
ياضوه الديره امك بحيره وعازتك عازه
يبني ماتگدر الدفنتي تحضر تشيل الجنازه
ينخطف لونه وتنعمي عيونه اليفگد عزازه
تعبي الك فدوه جيتك حلوه يابو المجازه

ترضه ايشيعــوني غربه وماتجوني
ميته ويمه افتح حضني الك يبن الزجيه
بيت امك لحدها ياكبرة ولــدها
انه الميته من ضعنك طلع للغاضريــــــه
،،،،،،
اوي العليله انعه واذرف الدمعه والفجر ينطر
ترسم گبالي جثت الغالي ينزف المنحر
تراب الم بيدي بگد مواعيدي وابني الك منبر
ونعقد قرايه وجرحك برايه ينزف ويكبر

زينب من اجتلي عن الطف حجتلـي
گالتلي التحبينه انذبح بسيوف امــيه
يَم عون انه حالي ذبحتني اليالي
انه الميته من ضعنك طلع للغاضريــه
،،،،،،
لخادم الحسين ع
محمد الفهداوي

#قصيدة_للخدمة

اتمنى عمري بكد عمر نوح
ما يكفي لمصابك يمذبوح
لو شايل اكلوب ثنين
يتسجلن باسم حسين
ـــــــــــــ
فايض لك بجفني نبع
مفطوم اضل اعلى الدمع
شفتك ضوه عيوني وهويتك
تلسعني جمرات العشك
لو ما اشمك اختنك
وي كل نفس نسمه لكيتك

كل تايه ايشوفك امل يحيي الضماير نورك
لازم يذوب بكربله كل من يجي يزورك

وي كل نفس اتنفسه اوياي
واتذكرك من اشرب الماي
من تنزل ادموع العين
يتسجلن باسم حسين
ـــــــــــــ
أكبر جرح بجروحي الك
عيني بدمع تتوسلك
يا سيدي اتشوف انكساري
تلزمني لو جدمي زلك
يل كلبي غيرك ما عشك
غصبا عليه انته اختياري

موبس محرم كون اون مفجوع اضل ليليه
وي دمعة المهدي انتحب من يذكر المسبيه

يا حيره هاي اشلون اجازيك
المهدي من دم عينه تبجيك
والطم واريد الجفين
يتسجلن باسم حسين
ـــــــــــــ
يا مالك ارواح وصرت
فوك العقول اتربعت
سرك عجيب وما عرفته
شامخ تضل ابكل زمن
للما له اهل انته الوطن
وانه اليتيم انته الكفلته

يا رحمة الله الواسعه ما يوم سد بيبانه
نقسم عليك بفاطمة يا حسين لا تنسانه

طايح دمع عيني اعلى بابك
يا لجمة اجروحي بمصابك
لو مو جرح لو جرحين
يتسجلن باسم حسين
ـــــــــــــ
مو نزوه لو من عاطفه
حبي ابدراية ومعرفه
عشكك جنون وعن عقيده
اعظم بلاء اوياك اضل
ما انحرف ماشي عدل
وانته اليخدمك تلزم ايده

فاز التقبله ابخدمتك هنياله حضه اشكبره
ربحان دنيا واخره محضوض يا ابن الزهره

الخدمه البشر معناها ذله
هنياله يحسين التقبله
يتمنه عايش عمرين
يتسجلن باسم حسين
ـــــــــــــ
يا عشكي من يوم وامس
من اتنفس اشتمك واحس
نسمة هوى بصيف وتجيني
صرت ابغرامك منفطم
يل حبك ايدك بالعظم
من اشتاك لك تسمع ونيني

وياي اريدك كل وكت ما نفترك يالغالي
كل راس مالي ابخدمتك وانته التزكي اعمالي

يوم الكبر تحضرني اريدك
تاخذ كتابي اتوقعه بيدك
اعمالي لو بيهن زين
يتسجلن باسم حسين
ـــــــــــــ
نعيم ابوباقر الساعدي
اسالكم الفاتحة والدعاء لولدي ووالدتي

#قصيدة_للخدمة

هذا العمر بالموت خلصان
والما بجه على حسين خسران
ــــــــــــــ
يا ابن ادم اشما طولت دنيانا
ما دايمه ايامك جذب خلصانه
بس العمل باجر يروح اويانه
واعزازنه بالمكبره الدفانه

بيك العزيز يروح دفان
والما بجه اعلى حسين خسران
ــــــــــــــ
مثل النواعير الحياة ودارت
لاجدادنه الدنيا كبل ما دامت
وين الطواغيت الملوك الجانت
فوك التراب اخدود ترفه ونامت

خل يستغلها ايامه الانسان
والما بجه اعلى حسين خسران
ــــــــــــــ
بس العمل من تندفن يبرالك
للوارثين اتصير كلها اموالك
بس جلمه وحده وخلها دوم ابالك
هاي المجالس تسوه كل اعمالك

بيوم القيامه اتصير سلطان
والما بجه اعلى حسين خسران
ــــــــــــــ
كل الاعمال الزينة من تنويها
من الرياء وامن العجب صفيها
بس دمعتك لحسين من تبجيها
صفاها كلبك كل دغش ما بيها

يعني البجه اعلى حسين ربحان
والما بجه اعلى حسين خسران
ــــــــــــــ
كل واحد اويه الموت يختم عمره
هنياله كل من يحزن اويه الزهره
بيوم الحساب ام الحسين اتحضره
وايزوره ابو السجاد وايطب كبره

باجر تصير الدمعة ميزان
والما بجه اعلى حسين خسران
ــــــــــــــ
نعيم ابوباقر الساعدي
اسالكم الفاتحة والدعاء لولدي ووالدتي

#قصيدة_للخدمة

يا بلال اجروحي أذن للعزاء
فاطمة امطشر دمعها اعلى السماء
اعلن المهدي الحداد
والدمع منجل حصاد
والمصيبة بكربلاء
ــــــــــــــــــ
انعقد مجلس عزه بروحي ودمعتي اعلى الوجن تسعه
واذان اجروحي كل عاشور مأذن لجمتي اترفعه
حياة البرزخ التبدي بعد ما بيها خط رجعة
والي سافر متاع ايريد ومتاعي بغربتي الدمعة

وانه ماشي الحفرتي خالي اليدين
كل عمل ما عندي غيرك يا حسين
لسفرتي ما عندي زاد
والدمع منجل حصاد
والمصيبة بكربلاء
ــــــــــــــــــ
رمح فوك النحر يكتب مصيبة فاطمة الزهرة
بدمع غسلت قميص احسين واجت مفجوعه واتنشره
قميصه وبيه اثر طعنات وحوافر رضت ابصدره
النهر شاهد على العباس غيور وما شرب قطره

والجفوف اشتدت بلطم الضلوع
والجفن للمهدي وصل هالدموع
نرجو من عنده السداد
والدمع منجل حصاد
والمصيبة بكربلاء
ــــــــــــــــــ
لمحمد لافته امن اجروح كتبها بدمعة اعيونه
حضور الانبياء هناك لابو الزهره يواسونه
واهل بيت النبي بكل عام مجلسهم يعقدونه
القميص الينشر بالكون شيعتهم يشوفونه

كل شبر بالكاع مجلس بيه صار
والعزى منصوب باعماق البحار
والمصايب بازدياد
والدمع منجل حصاد
والمصيبة بكربلاء
ــــــــــــــــــ
التشابيه بحقيقه اتصير اذا حيدر علي حاضر
وبدت كل الصور تنعاد تشوف بكربله شصاير
واجت زينب تودع حسين اه يا ليلة العاشر
نعرض مشهد نحر مكطوع وصدر متهشم بحافر

والرسول يصيح يابني يا غريب
ضجت املاك السمة بونه ونحيب
انصبغت الدنيا بسواد
والدمع منجل حصاد
والمصيبة بكربلاء
ـــــــــــــــــــــــــــ
حياة ابلا دمع لحسين احس بيها اشكثر ظلمه
تره الما ضايك اللجمات صعب هذا الحجي ايفهمه
نخيت امن الله واهل البيت اموت واحيا بالخدمة
عليك ابداعة العباس ابد لا تسلب النعمه

ادعي بدموعي بصلاتي بكل قنوت
انه لو ما اللطم اعلى حسين اموت
والجرح شاهد حياد
والدمع منجل حصاد
والمصيبة بكربلاء
ــــــــــــــــ
نعيم ابوباقر الساعدي
اسالكم الفاتحة والدعاء لولدي ووالدتي

#قصيدة_للخدمة

حبك كهف يجمعنه
هذا الدمع بيه معنى
راسك خطيب اعلى الرمح يقره
كل من يخدمك يرتفع قدره
ــــــــــــــ
كل ايه رتلها النحر
تفسيرها حسين انتصر
ما يختلف معناها
دستور ايات الكهف
يتوضح اشجان الهدف
بالطف صور نلكاها
بحسين فتيه امنو
لابليس ابد ما جاملو
بالموت الك تتباها
...
يا من خدمتك جائزة هنياله من يلكاها
من شاف نورك بالعرش جبريل يتمناها

فطرس رجع له اجناحه
انته الكرم مفتاحه
هاي الحقيقة اعلى البعض مره
كل من يخدمك يرتفع قدره
يا سيدي الحسين
ــــــــــــ
الحمد لله والشكر
تقبلني خادم وافتخر
راسي بخدمتك عالي
يل رحمة الله رحمتك
يعني النجاة بخدمتك
بيك اعتقد ما اغالي
كل من خدم غيرك خسر
بس انته الي يخدمك كبر
اسمك قدر سوالي
...
كل يوم اجدد لك عهد وياك اضل للتالي
كل راس مالي بخدمتك حبك زكاة اعمالي

كل البشر خسرانه
وخدامك الربحانه
اليخدم شهوته الناس تحتقره
كل من يخدمك يرتفع قدره
ــــــــــــــ
حبك كهفنه ابكل زمن
بيك النجاة امن الفتن
بابك نجاة الامة
لو شركت لو غربت
ما اتهمنه دنيا اشما زهت
الخادم احسين ايهمه
دنيا المظاهر والطمع
وي كربله ما تنجمع
والينتقدنه انفهمه
...
غير النبي اوله ابد ما يتصف بالعصمة
واليحشر اوياهم بشر ينحشر باجر اعمه

غيرك جرح ما عدنه
وابن الحسن قائدنه
اليفهم درجته عشره من عشره
كل من يخدمك يرتفع قدره
يا سيدي الحسين
ــــــــــــــ
كل ما عله ابن ادم باسم
كدام نحرك ينهزم
مهما كبر عنوانه
واليلتجي لغيرك يذل
واحنه افتهمناها عدل
حبك ضوه ودلانه
بالمجلس ايلمنه الدمع
خدام باسم ننجمع
والمهدي ينعه ويانه
...
بعيونك الدنيا اصبحت من العطش دخانه
هذا الدمع ماي ونزل لشفافك العطشانه

سايل دمعها احبابك
بلكت نداوي صوابك
نواسي بدمعنه فاطمة الزهره
كل من يخدمك يرتفع قدره
ــــــــــ
كل ركعة من فرض الصبح
عيني اعلى نورك تنفتح
والمس جميل الطافك
من قسم ربك والفجر
يقصد لياليك العشر
خسران كل من عافك
بدموعي اكتب لك عهد
وياك خادم للابد
كلبه انعمه الما شافك
...
يمك اجه الماي وعطش خجلان دمعه وطافك
تكدر تفيض كربله بس يابسات اشفافك

بيك الفرات اتوسل
يرويك بس ما تقبل
يا من يحير الما فهم امره
كل من يخدمك يرتفع قدره
ــــــــــــــــ
نعيم ابوباقر الساعدي
اسالكم الفاتحة والدعاء لولدي ووالدتي

#قصيدة_للخدمة

هل دمعي ويه هلالك
ليلية اون واقرالك
وي دمعة القائم
اكضي العمر خادم
ـــــــــــــــــــــ
لو هل محرم كل سنة ترفع لك الناس اعلام
ترفع تعازي الفاطمة بهاي المصيبة الخدام
وانه المجالس بالكلب منصوبه الك طول العام
لمصيبتك يابو علي متحزمه دمعاتي احزام
ما يطفه جمر احزاني
مجلس مصابك باني
يبقه الحزن دايم
اكضي العمر خادم
ــــــــــــ
من عالم الذر سيدي وانه بمصابك ملجوم
وانه برحم امي انتحب لمصيبتك يا مظلوم
لمن اجيت الدنيتي صرت اعلى حبك مفطوم
من زغري خاويت الدمع والبس الك سود هدوم
ونيت الك من زغري
ودمعي لمصابك يجري
انحب ولا نادم
اكضي العمر خادم
ـــــــــــــــ
اتنفسك مثل الهوه بكل لحظه احسك موجود
ليلية ناصب لك عزه ودمعاتي يحسين شهود
اركض بلهفه المجلسك لو قره بحزنه الرادود
تلكاني كاشخ بالدمع والبس لك هدوم السود
مجلس عزائك بيتي
من منبرك تربيتي
ما همني كل لايم
اكضي العمر خادم
ـــــــــــــــ
يل علمتني اعلى العطف حبك عقيده وايمان
ربيتني اعلى المرحمه ورد الاسائة باحسان
وادري اليخدمك من صدك يحمل صفات الانسان
ما شايل بكلبه الغدر ما يوم يأذي الجيران
ربيتني اعلى الزينات
مو بس نعي وصب دمعات
قدوه انه للوادم
اكضي العمر خادم
ـــــــــــــــ
يا اسمى ايات العشك انته بشعر ما تنقاس
يا رحمة الله الواسعة بيتك جمع كل الناس
كل من يخدمك يفتخر تاج وشرف رفعة راس
يتعلم ادروس الوفه من طاح جف العباس
هاي الدروس اتعلمه
لا زم يصون الخدمة
وياك اضل عازم
اكضي العمر خادم
ـــــــــــــــ
جربت كل شي وما نفع ما طاب جرحك يحسين
بس امن اطب الحضرتك واشتم هواك اصبح زين
مشتعلة ضلت جمرتي ما تطفه بدموع العين
ما يكفي بس واحد عمر اتمنى عايش عمرين
ليش امن اشم اترابك
يبرد لهيب مصابك
بيك الكلب هايم
اكضي العمر خادم
ــــــــــــــــ
نعيم ابوباقر الساعدي
اسالكم الفاتحة والدعاء لولدي ووالدتي

#الخدمه ( احلامي عالمنبر )

يابو علي عندي حلم بهذا الحلم هايم
من زغري روحي بمنبرك خليني الك خادم
احلامي عالمنبر _ اتمنى الك تكبر
**
شفت انت اول مذبوح بابك ابد ماينسد
كلبي الك سلمته وحضرت ثوبي الاسود
دورت بين الوادم محد يشبهك محد
لو عدو انعام الله اولهن انت التنعد

الف انعم الله سيدي تندلك اجروحي
مثل الحمام بالصحن سلمت الك روحي
ادموعي من اسهر _ اتمنى الك تكبر
*
شفت اليخدمك من گلب وياك يبقه مدلل
بكل المواقف بينت ياسيدي انته الاول
لحباك اكثر مني من عنده اغار وازعل
اعمى بدونك سيدي وغيرك ابد ماندل

تاج وعلى راسي تضل وابقى انه ممنونك
لو لحضه عنك ابتعد مااسوه من دونك
تتركني مااكدر _ اتمنى الك تكبر
**
اليخطه ويريد يتوب يلگاك باب الرجعه
يگولون تاب وي احسين شمحلها هاي السمعه
مولاي جم واحد شفت بيدك تغير وضعه
غيرني خليني الك يوميه اصبن دمعه

يوميه ابجيلك ردت وي الي ينعونك
اعيوني خلهن ينعمن من فدوه لعيونك
واجروحي خل تكثر _ اتمنى الك تکبر
*
طول بعمري سيدي وارزقني دوم الخدمه
خاف من اموت وبالگبر مالگه هاي النعمه
يارحمة الله اعله البشر مجلسك اكبر رحمه
يتشرف ابنادم صدك من يرتبط بيك اسمه

ليضمن رضاك بخدمته شگد غالي عد الزهره
والباجي دمعه اعله الظعن لومات راح تحظره
بحماك يابو الاكبر _ اتمنى الك تكبر
***
عمري نذرته من الزغر متسمي باسم الضامي
من دون خدمه ولا لطم مو حلوه شفت ايامي
ياصاحبي يابو الوفه شديت بيك احزامي
تريد الصراحه والصدك بس انت كل احلامي

احلامي باتن عل الرمح يل عل رمح راسك
وشكبره حظي لو صدك تحسبني من ناسك
يالقبلتي المنحر _ اتمنى الك تكبر
***
تمت _ عباس فرحان

#ام البنين ( هلا بولدي هلا )

هلا بولدي هله _ يكشخت كربله
//////////////////////////////////
يذواقت حرب _ تحلون الصعب
بديكم كربله _ اريدن تنگلب

جفافيكم خضر _ يهب منهن عطر
والبراسه علي _ تحبه ام الخدر

گبل لاتمشون عندي احجايه
واحد لوحد يسلم الرايه
اذا عطشت بت علي تگلولها
يانهر زينب يعجبج مايه

الخدر بيكم حله _ يكشخت كربله
//////////////////////////////////
الربى بحظن الفخر _ يبين عالنهر
والبعينه اخو _ كسر عين الدهر

يحراس الظعن _ ابو اليمه وطن
قصيده المرجله _ لمن صاحو لمن

الرايد يبين الوفه بحروفه
بعينه وجه حسين كون نشوفه
واليموت بكربله ورايد يعيش
صوغه للزهره يودي اجفوفه

بصيطه المسأله _ يكشخت كربله
//////////////////////////////////
خلص وكت البجي _ يشرايت حجي
اذا مال الظعن _ عليكم يتجي

بشفايفكم ورّد _ اليه اقرو الحمد
وحرزكم بالحرب _ دعائي عن بعد

فرصه اجتكم يمه هاي الروحه
اربعتكم فايضين ملوحه
الجيش من يشوف واحدكم يجيه
كون من الخوف يذبح روحه

وصلتو لمرحله _ يكشخت كربله
//////////////////////////////////
همس بذني همس _ ابو فاظل امس
اذا اني الگمر _ اذن انتي الشمس

لگه بعيني الشرح _ الحسين الربح
اليلاگيه بسهم _ تحط راسه برمح

عاده عندك حلوه هاي العاده
ماتحب بالملگه بس القاده
بشاره وديلي اذا جفك يطيح
وانه ناذرتك نذر للساده

عله راسي عله _ يكشخت كربله
//////////////////////////////////
لخوالك بيك رس _ ابى وعزة نفس
اذا بالماي ذل _ العطش اعظم درس

واذا شلت اللوه _ وخفگ بيه الهوه
تدگ الروس كون _ مثل دگ اكهوه

طلبه عندي وبيها اعگد رايتك
يمه زينب والخيام بصايتك
يغار حتى الطير ويظم جنحه كون
من يشوف الريشه فوگ اعمامتك

يشيخ المرجله _ يكشخت كربله
//////////////////////////////////
تمت _ عباس فرحان

#العليله ( صوغة سفر )

ليرد لهله مسافر جايب صوغه وياه
وانتم ياهلي جبتو دمعه ونوح واه
هاي مو صوغه سفر ** هاي كسران الظهر
*******
عيوني ماشبعانه منكم _ ياهلا بجيت ضعنكم _ جيتكم خير
ثقو مل مني مكاني _ من كثر ماجنت اتاني _ وعيوني ادير
شلون الطير عليكم فرفح كلبي وشارد من سجان
ياعنوان الكم ويناسب لجيتكم ماصح عنوان
عطشانه هوايه لشوفتكم يالرد ظعنكم عطشان

ابجي ودمعتي تناطر جايمته ترجعون
كاسر گلبي جم باجر ومخلصتها اضنون
طول الباچر دهر ** هاي كسران الظهر
********
عمه شوطول سفركم _ وانه بالباب انتظركم _ فرحوني بخبر
شمعه اشعل كل مسيه _ بس ضعنكم ماله جيه _ ماله كل اثر
اشرد وي بالي بحسباتي وليليه احسب الف حساب
ابجي واتعب وانده صبري ياساعه ايدگون الباب
علعلني متانكم كلش ويذبح بيه بسيف اغياب

فاجئني الظعن عمه راجع بس نسوان
راح الفرحه گايدته شو راجع تعبان
شفتج وگلبي انعصر ** هاي كسران الظهر
********
وانه رحت اركض عليكم _ شفت اثر طابع بديكم_ وضحولي السبب
تفاجئت حمره عبيجن _ والسبي مبين عليجن _ وكثران التعب
مبينه من النوگ الجابتجن نوگ وهلگد تعبانات
وياجن ليش ولا رايه بس لاجنتن مسبيات
افرك بعيوني من الصدمه ماحسبالي العلويات

مسافه ناگه عن ناگه شو كل وحده بصوب
ضعنه اليشبه الغبشه راجع جنه اغروب
صار تمشن جم شهر ** هاي كسران الظهر
********
رحتو بس دوم اعله بالي _ تعبت شمع اليالي _ فرگاكم صعب
گلبي بالفركه جويته _ ولا وجه بيكم نسيته _ لكل حجره من اطب
اعتب عالما يسأل عني طفله لوحدي بوحشة ليل
اتحلم جن واحد طايح تروح وترجع فوگه الخيل
مذبوح بحلمي وماعرفه بس ادموعي اعليه اتسيل

عرفته البلحلم هسه هذا الغالي حسين
اخلافه عمه احسبوني انه وي الميتين
من دريت بهالخبر ** هاي كسران الظهر
********
علّتي زادت عليه _ من شفت ماهي رقيه _ زادت علتي
حيلي اذا تردون المه _ انطوني عبدالله اشمه _ وامسح دمعتي
ست اشهر عمره الفارگني احسب جنت الكاه كبران
جنت ارسم صوره العبدالله وافتر بيها اعله الجيرن
هاي الما تنحل والصعبه عبدالله ميت عطشان

رقيه صوغه ودتلي دمعه واه وشيب
بعبدالله انجرح گلبي جرحه شلون يطيب
خاطري وگلبي انكسر ** هاي كسران الظهران
********
تمت _ عباس فرحان

#( اول يتيمه )

بنتك يمسلم بالظعن اول يتيمه
مو يمك انه من متت هاي الهظيمه
انصبلك اكبر فاتحه هناك
يابويه لو ماخذني ويااك _ هاي الهظيمه
*********
شنهو صاير _ عمي حاير _ مو بوضعه
نخطف لونه _ وعله عيونه _ تلالي دمعه

كلش امحيرني عمي _ وهادله امتونه عباته
جنه راح يصلي وحشه _ وفرش سجادة صلاته
وجه المضيعله غالي _ وجه ابوجن يابناته

ينظرلي واحتار وحرت نظره غريبه
اعله رسومه احرف للحزن تقره المصيبه
حتارينه انه وعمي بجفاك
يابويه لو ماخذني ويااك _ هاي الهظيمه
********
گومن كلجن _ يمه التمن _ خل نشوفه
شو غالينه _ داير عينه _ صوب الكوفه

حسين داير وجهه عنه _ كلش امحيرني امره
ايد رافعها ويسلم _ وايد لازم بيها ظهره
هاي اول مره اشوفه _ محني ابوجن فوگ مهره

شو وضع ابوجن مختلف والساتر الله
وي الهوه مرسال اجه مدري شوصلّه
حاجيته بالمرسال حاجاك
يابويه لو ماخذني ويااك _ هاي الهظيمه
********
جمعتهن _ وليه خذتهن _ بلكي يحجي
صد عليه _ وكض اديه _ وگام يبجي

يسولف ودمعه اعله خده _وفوك راسي تمسح ايده
عمي كلش حيراني _ ماعرف شنهو اليريده
صرتي وحده من بناتي _ راح مسلم ياحميده

من اسمعت هذا الخبر گلبي فطرته
يبنيتي من فوگ القصر صارت شمرته
موش الحجر جفي يتلگاك
يابويه لو ماخذني ويااك _ هاي الهظيمه
********
يل عفتني _ كبر حزني _ وزاد همي
گام يبجي _ وگوه يحجي _ عليك عمي

نگع امتوني بدمعته _ من حظني وگام ينعه
اعله الوجه صارت وگعته _ وطلع من الظهر ضلعه
رايح الغالي حميده _ بعد مسلم ماله رجعه

عليه نغمى من اسمعت قصة غربتك
يعني بعد مانلتقي واشتم رگبتك
ياهو بغربتك گلي مراك
يابويه لو ماخذني ويااك _ هاي الهظيمه
********
شلون حالك _ ياهو شالك _ وكلها ضدك
بلا گرايب _ ولا حبايب _ بويه وحدك

تباوع اعيون الشماته _ وانت جاي ادير عينك
اسم الله محد گال بويه _ من طحت مجتوفه ادينك
وي الهوه مرتلي نسمه _ صوت جابت من ونينك

والنسمه جابت ونتك مسموع المها
محتاره بين اسمعها لو مابين اشمها
ما چنت اشمن ريح فرگاك
يابويه لو ماخذني ويااك _ هاي الهظيمه
********
تمت _ عباس فرحان

# مولاي القاسم ( حرز الخيام )

طلع حرز الخيام _ يحي الله جسام
شعر يقرا بطلعته
انا الزاعل شمعته
////////////////////////////////////////
يانسوان اخيام العفه - هذا الطالع گرت عيني
هوه وليدي وكل ما املك - بس ثوبته لوجه حسيني
طفى الشمعات وباوعلي _ للحومه يگول تزفيني
ارفض فكرة حنه بأيدي _ من دم اجروحي تحنيني

ما حار بين الامرين  _ رگض گال الحسين
وسجد لله بفرحته
انا الزاعل شمعته
////////////////////////////////////////
ياخيعون العدها تشارك _ بالطف تنطي وين الغالي
بيض وجهي وليدي القاسم _ ضحى بروحه وريح بالي
والكبرته بماي عيوني _ يامحلاه اتبده اگبالي
گتله اخسر عرسك يوليدي _ بس تربح عمك بالتالي

ترا التنطي ابنها _  ام حسن ترضى عنها
ورضى الزهره طلبته
انا الزاعل شمعته
/////////////////////////////////////
زفيته واخر هلهوله _ اختنگت بين گليبي وريتي
ياعامود البيت مودع _ شنهو اخلافك ضل ابيتي
خل الحومه تسولف ببني  _ وتشوف الوادم تربيتي
فدوه انطيتك لابن الزهره _ لوگالو باجر شنطيتي

ربى اربعطش عام _ فدى لهل الخيام
دمع عيني مسحته
انا الزاعل شمعته

////////////////////////////////////
قبل ايدي من ودعني  _ وضليت بگلبي المهموم
گتله اخر ذكرى من الوالد  _ گال انطيها لهذا اليوم
جان امنيته يشارك بالطف _ هاك وليدي البسله اهدوم
خل يذبحونك گدامي _  اشوه ولا اشوفك مسموم

يشيخ من افعال _ فقط عوزك ادلال
عطر فاحت غترته
انا الزاعل شمعته

///////////////////////////////////
بگد عثراتي اباب الخيمه _ شفت احسين اعليك اتعثر
جابك محني ويمشي بهيده _ حطك  بالخيمه ويالاكبر
التمن عماتك يمدلل _ مايتوصف هذا المنظر
مثل اشفاف حسين الضامي _ شافنك يايمه مطبر

تركلي رساله _ شفتها بدلاله
اثر جلمه اعله شفته
انا الزاعل شمعته
///////////////////////////////////
تمت _ عباس فرحان

#العاشر ( شو ماخضر )

بأطراف الخيمه دفنته وگلبي اتفطر
بدموع عيوني سگيته وشو ماخضر
ضليت ادور ماي _ يا رايح ويا جاي
****
يبن روحي شغلاتك _ يمن فدوه لحلاتك_ ياروح الروح
يل مونس خواتك _ السهم واصل لهاتك _ بحظني ومذبوح
اخذتك من صحاح الشوف للعميان
الك حدر العباه يم گلبي بويه امجان
كشفته وطلع من النحر نيشان

نحرك جن دره وتلمع يبعث ضوه
صدفه وصاباك مثلث باگ الهوه
ميت عضو من اعضاي _ يا رايح ويا جاي
**
ردت گبلك منيتي _ وصبغ دمك لحيتي _ من لون الدم
عبد يبني ويعمري _ ردت من يحنى ظهري _ بيك اتحزم
نحنيت وحدبت يوليدي من بعدك
مو انته اليشد ظهري صبح مهدك
شيوصل جدمي صوب اخيامي ويردك

سديت عيونك يبني وانت توقع
ارجع لخيامي حاير لو ما ارجع
تيهت بويه الراي _ يارايح ويا جاي
**
لمّن دمك نزفته _ ترس جفي وشمرته _ مالاح الگاع
حلم بعيوني اشوفك _ تسندني بچفوفك _ياحلمي الضاع
رجعت امشي لصوب اخيامي ومحدب
الحمام البسمه عبدالله متعجب
راسك كوه بويه بجسمك مجلب

ماكو اسهام بگد نحرك بس ماسلم
من المعزوله الصدري ماخذ سهم
ضل يضحك الرماي _ يارايح ويا جاي
*
ونينه گمت اسمعه _ السهم حيره شيطلعه _ حيل مأذيه
يزينب گعدي يمه _ اخاف تشوفه امه _ وتموت اعليه
الجنت من الصبح من رگبته اشتمه
تارس جفي اجيتج هسه من دمه
من ادفنه الگاع خايف زينب تلجمه

عبدالله وليدي واعرفه من الحر يفز
كون بنص گلبي اضمه ضمت حرز
سهم النحر بچلاي _ يا رايح ويا جاي
*
الاشم بخيامي عطره _ حفرت بأيدي گبره _ عبدالله زغير
كسر گلبي بنشغته _ صحت بويه وشبگته _ وعيوني ادير
بدم نحرك ادفنك تارس امتونك
بظهر اخيامي خاطر مايسحكونك
وي راسي برمح خايف يشيلونك

عن سحگ الحافر ادفنك يم الخيّم
زغير ومايحمل صدرك دوس وألم
والحافر اعله احشاي _ يا رايح ويا جاي
*
تمت _ عباس فرحان

#العاشر ( بنتك يبعد العافيه )


بتك يبعد العافيه عالجمر ركضت حافيه
هم عطش هم حر الشمس
جمره برجلها وطافيه
**
الخيل اجتك و انت نايم وخر عنهن بويه بساع
بويه جسمك من تدوسه يساونك راح وي الكاع
النه ايدك من شلتها منها شلون الخنصر ضاع
بويه غير انت السفينه وثوبك جان علينه اشراع

الدخان طب بعيني وبريتي ضل يجويني
خانكني ماضل عدي حس
لو كلمه بس حاجيني
**
النار ركضت عل المخيم وصارت منها الركضه بحيل
وبالاذن تلمع يبويه دره الترجيه وبليل
دم اذاني يجري شفته وعلى وجهي ضل ايسيل
بنص خرابه الكعده صارت ونسمع بس صهيل الخيل

والخيل عدهن عاده يسحكن بنات الساده
يابويه والمجروح اذن
شيحط حدرها وساده
**
والجمر چلب رماده لهسه ورجليه مورمات
والحبل ياكل بديه وتدري جفوفي شكد ترفات
بأذني واحد ضل يصيح ها ياطفله حسينج مات
حجايت الشامت ثكيله هدت حيل العلويات

ذاك الحجي يسمعوهن وكبالك يشتموهن
مطبوع صوط بكل متن
لو بجن ماخلوهن
**
صعدوني اعله الهزيله وراسك صاعد فوك رماح
كصار اديه ورمحك اطول شما امد ايدي ماينلاح
مخضر الدم بلحيتك من كد مامتروس اجراح
من يطگني ادير عينك التنطك بنته مايرتاح

تصدلي وتغير لونك واسمع حجي بعيونك
بدمعك تكلي شلونج
يابويه انت شلونك
**
والدرب بي بس شماته انا ابجي وهم يضحكون
جابو الماي ورفضته عطشانتلك مايدرون
هاي اول مره اشوفك تحجي وياي بلايه متنون
هسه نفرض لو شبكتك من تشبكني بويه شلون

حظنك الخيل تسحكه مردو مجان الشبكه
وجفوف ماعده الرمح
وجفوف ادي محتركه
**
من طحت من الهزيله بصحراء ومجتوفات اديه
الجمر يلسع مجانه ورد النوب الشوج اعليه
حرمه اجتني وقبلتني وبين ايديها غفيت شويه
محدبه ومورم متنها بس ماشفتها ويانه سبيه

امك يابويه اجت بحظنها حطتني وبجيت
موجوده بالعاشر امس
وي عمتي عل تل اوجبت
**
تمت _ عباس فرحان

#العاشر ( گوم صلي )

حسين وكت المغربيه _ كوم صلي
حطت التربه رقيه _ كوم صلي
يلي ماعايف صلاتك _ كوم صلي وي بناتك
**
اذن المغرب حبيبي كافي دمك لايسيل
حان موعدها صلاتك وانه مني اطيك حيل
وانتَ هسه الخيل يمك ماسمعته من الصهيل
يل مضحي بأبن گلبك وعن صلاتك ماتميل

ياترف مثل الحمامه _ ماهو نحرك
شلون اديت الاقامه _ ماهو نحرك
والرمح عابر لهاتك _ كوم صلي وي بناتك
***
شلون تتوضه يغالي وانت ماهو الماي يمك
عليك ماصح التيمم الرمل حار ويلجمك
اشلون اگلك گوم مدري وانت ترس الگاع دمك
يل مطشر عل ترايب گلي هسه شلون المك

واحنا محترگات ادينه _ شلون تنلم
وحتى هدمك ماخذينه _ شلون تنلم
طشر الحافر حلاتك _ گوم صلي وي بناتك
***
حاول النه تگوم بويه متانياتك كل خواتي
حتى اذا سجاده ماكو والله افرشلك عباتي
ولو هي شضال بيها احترگت اشلون امنياتي
تأخرت وانه اتاني لجلك معطله صلاتي

التسحگ الجمره برجلها _ شلون تركض
الگاع نار وشوج كلها _ شلون تركض
الخيل اجنه وساحگاتك _ گوم صلي وي بناتك
***
حيره مدري شلون توگف نايم بگلبك سهم
غيرتك بالهيمه اركظو تگول والحيل نهدم
ولا تشأر مانشوفك عالي دخان الخيم
التراجي من اذني جرهن حيل تارسهن الدم

التنصطر حيل اعل اذنها _ شلون تسمع
وانت حيل بعيد عنها _ شلون تسمع
يوم مر ماشايفاتك _ گوم صلي وي بناتك
**
وي حرگ هاي المخيم بويه ماينفع سكوت
تارس الدخان ريتي وياك احجي وماكو صوت
ال بلحبل مشدوده اديها شلون تدعي بالقنوت
لا تجي اوديلي ثوبك خل اشمنه واموت

الموت والله اهون عليه _ ضاله المن
ولا اعوفنك سبيه _ ضاله المن
لو تجينه متانياتك _ كوم صلي وي بناتك
**
تمت _ عباس فرحان