بكاء السيدة الزهراء ارواحنا لها الفداء

اللهم طهر قلبي بحب الزهراء..

#الرواية_الفاطمية_الاولى
#تراث_سيد_جواد_ذاكر

كلميني فاطمة.. انا علي


يغص الفاگد بصوره مو الا بشراب الماي
يخنگه الجان اله نسمه ويحرگة الي جان افياي
الفکد يكسر موازين العمر كله ويسوي الشويه هواي
يخلي الجان اله بكلشي مشوره وراي يصفگ بيده تايه راي


كلميني فاطمة.. انا علي


الج بين الضلوع يفز الف نتاك بيه لجمه
الج وين والج ياحيف الج ياروحي يايمه
علي تكلف تفاصيلج لو وجهج ردت رسمه
بي سطره وطبع جف جور  بي عين ادمعت هضمه


كلميني فاطمة.. انا علي


يزهرة روحي يمراية علي البيها يشوف الكون
يضحكة بيت مات البيت وصار بغربته مدفون
بيه ساعة مناحة وليل عتب واولاد يتباجون
اليوديني الج لو طيف اصيرله شكثر ممنون


كلميني فاطمة.. انا علي



انغبگ وجهج يلب حشاي وطك ضلعج كصب ناعم
شكد لاحج لهيب النار النفس دخان يترادم
مامشيوفه يالدفعوج مثلج ماكو من ادم
وهسه اعله اللسن ينكال طبو واضربو فاطم


كلميني فاطمة.. انا علي


بيت الله انرفع شبرين من كال ال و ان ادفع
حرمة بلا خمار تصيح الحگ ياعلي واسمع
غضب رب العرش الها من محسن بده يوكع
عين الدنيا كلها دموع لمن فاطمه تدمع


كلميني فاطمة.. انا علي

______

طالب الصالحي

يصعب عليه فاطمة يحضنها التراب
مافارگت بالي وبعدني مگابل الباب

'"""""""""""""""""""""""""""""""""""""""""""""""""""""""
فاطم انه جيت لگبرج تعنيت تمنيت انه بلحدج يضي عيوني
جيتج بلا روح بس ذكرى وجروح بس ثوب طايح عالگبر لگوني


فوگ الارض حيدر بقى خيال
راحت من ايدة زهرة الدلال
اثار دم ضلت على الجدار
ماتنمحي من الذاكرة محال


واليفگد يضل بلهفته متاتي الاحباب

'"""""""""""""""""""""""""""""""""""""""""""""""""""""""
ياوحشة البيت لو الها رديت يلاگيني بابج وانضر البسمار
يحضرني موضوع تكسير الضلوع والسطره اذكر واشتعال النار


زمره اهجمو يافاطمه عليج
وبلا خمار اشكفتي بس بديج
واقعه كسرت كاسر الجيوش
وحلته بدمعه للگبر يجيج


محني عليج وذابحة فراگج والمصاب

'"""""""""""""""""""""""""""""""""""""""""""""""""""""""
فاگد حنانج خالي مكانج وحسين لوشاف ام تجي  وي ابنها
دمعه بعيونه من يسألونه وين الگبل جنت بوسط حضنها


يمسح دموعه المجتبى ويحضنه
ويكله راحت ماكو رده لمنه
زينب تجي كالعاده بيها كسره
وتكول ياهو الي بعد يلمنه


اطشرنه بعدج يالحنينه بسج غياب

'"""""""""""""""""""""""""""""""""""""""""""""""""""""""
راح العمر راح بس دمعه ونياح خلص يريته وانتهى بعجاله
قربج اجي كون وامليها العيون من شوفتح گلبي ارتجه وصاله


طال الهجر يافاطمه شوكت
نلتقي بحسرات الفکد صحت
محني وشلت فوگ المتن نعش
بيه روحي شايلها لمن شلت


بعدج بقه يهزني تره حتى الهوى الهاب
'"""""""""""""""""""""""""""""""""""""""""""""""""""""""

طالب الصالحي

سامره باحزان ودمع طلعت وكلها تنادي
عاشر انوار المصفى مسموم هذا الهادي
وبدارة مدفون __ودمعه بالعيون
_______

عاشر ضلع من فاطمة اتهشم بين الغربه
عاش العمر كله بهضم صعبه يتعوض صعبه
بسامره روحه وكربله عايشه باله وگلبه
الهادي مصايب عمته ونيرانها الي تلهبه


يتصور حبال السبي وكونه يضيک بعينه
هو الباله الطف تره بس الله كون يعينه

يخلصها محزون _ودمعه بالعيون

______

اجتمعت الشيعه نادبه يبن الجواد بدمعة
خلف الجنازه سيدي تشيع الاكوان السبعه
وبلا عمامه العسكري شگ ثوبه يمك ينعه
يصعب عليه وداعك ويصعب عليك تودعه


حاسر عليك العسكري وبگلبه صارت لوعه
بلل جفنها جنازتك من كثر سيل الدمعه

باقي بلا لون _ودمعه بالعيون

______

ياموحش غروب الرحت اشبه بيوم العاشر
بس سيدي دفنك حصل من دون سحكة حافر
ماضلت اعضائك عله رملة الطف تتناثر
وصحبتك يمك ماصحت ياناس الا من ناصر


مابيدك ابنك سيدي ينذبح ضامي بنبله
احا يعملة كربله مامنها تحصل عمله

جم ضلع مطحون_ودمعه بالعيون

______

ياسيدي هذا عهد نبقى نقيم مصابك
ونبقي نتزاحم سيدي كلنه على عتبة بابك
يابو الحسن هاي امنية تحسبنه من احبابك
نبقى الك كلنه خدم وكلنه فده لترابك


يبن الرضا نريد الرضا عنه يروح الزهره
نقيم العزاء ونفتخر نلطم عليك ونقره

شوف اليعزون_ودمعه بالعيون


______

طالب الصالحي

اللحن👆

زينب يا غريبة الله شمصيبة
................................................
المصايب يا خلك وي زينب شعدها
غريبة وينسبـــــــي يا حيف مرقدها
هضيمة أم الخـــــــدر بالشام وحدًها
لا خوان عدها ولا أهــــــــــل عدها
عاشت غريبة وماتت غريبة
الله شمصيبة
.................................................
يا ناس المشت للشــــــام مجتوفه
تدور عن كمرها ورادت أتشوفـه
عازة الليــــــلة والله عازة أجفوفه
يجي أيشيل النعش عباس ويطوفه
تنادي النجيبة أمنين أجيبة
الله شمصيبة
.................................................
لحد كطع النفس وي موتهـــا أتكابر
شاف أجروحها وضل واكف وحاير
شصاير بيها زينب ويلـــي وشصاير
شيب أرموشها من ليـــــــــلة العاشر
حالتها عجيبة والهسه تريبة
الله شمصيبة
......................................................
هاي أول سنه مـا نوصل الحضرة
ولا مجلس نصبنه ولا عــــزه نقرة
أمشونه الكمر هاشـــم نلتمس عذرة
ونواسي حسين وأمه فاطمة الزهرة
ونقرة المصيبة والمدمع نحيبة
الله شمصيبة
....................................................
التموت بلايا أهل لامن عشيرة
تضل وحشــة جانازتها وأسيرة
حيرة زينب المــــــا منها حيرة
غريبة وناسها مــــا عدها غيرة
محنتها رهيبة يا ناس الحبيبة
الله شمصيبة
.....................................................
خادم خدمة الحسين
الشاعر
محمد الموالي

ويلي اعله زينب اه ويلي
لغربتها باد وراح حيلي
_______

اعيون كون ابجيلها اعيون
وبكل كتر عزيات لأم عون
ماعدها اهل ماضلًو اعزاز
ايشيعونها وبحرگة يبچون


بالشام ماتت غربه بالشام
وعيونها شگد شالت الام
من زارها قباض الارواح
جن گال زينب موتها العام


ليلي عساه بس نوح ليلي

_

ناشف دمعها هواي ناشف
ع الخوه واكلاف الطوايف
ياذيها حد الموت موقف
طبتها مچتوفه بمضايف


بالبال كل الصار بالبال
كل الحچي الي عليها ينگال
ياخارجيه وين اخوتج
بس روسهم برماح تنشال


بحركة يدمعه اهواي سيلي

_

والماي ابد ماقصر الماي
شايل عليهم كلش هواي
من بعد موت حسين ضامي
احچيله للماسامع بهاي


بتراب يممها بالتراب
الماي لغسلها شلون ينجاب
لزينب ولا واحد يشيع
وين الگه اكبر من هالمصاب


احجيلي وين الگاه احچيلي

__

الماشاف ضيمج كلشي ماشاف
يستگوي بيج الگلبه خواف
لبوة علي ورغم المصايب
منها الزلم ترجف وتلتاف


زينب وماادراك زينب
يطگ عرگ ابو فاضل ويغضب
لو بين اخيال العقيله
الموت اجاها وليه تندب
بالشام


ويلي اعله زينب اه ويلي __


طالب الصالحي

كُلشي أنتهى ومات الحلم
وبعيون زينب ينرســــــم
شام
الهســـــــــــه محنية ضهر
عشت ومتت مــــــن القهر
شام
......................................................
يا روحي الجروح أهواي أبدي بيا جرح منهن
ألمشت وي روس أخوتي أشلون من يا راس أحسبهن
أبدي من جــــرح عباس وجان أجفوفه مطلعهن
لو من راس أخوي حسين حيرة أوصاله شيلمهن
من الخيــــــــــم للتل جنت
أركض ومدري شكد طحت
شام
والهســــــــــــــه محنية ضهر
عشت ومتت مــــــــــــن القهر
شام
...............................................
من ظهرية العاشر بدت قصة معانتــــــــــــي
من عفت الجثث عالكاع ومشيت أكبال شماتـي
جنت من ألتفت عباس أشوفه يمحـــي خطواتي
وأجفوفه أعله راس حسين يفين وأجري دمعاتي
ومن أنضرب أسمع صدى
عباس و ينكط نـــــــــــــده
شام
والهســــــــــــه محنية ضهر
عشت ومتت مــــــــــن القهر
شام
..................................................
من طبيت ويلي السوك وبأذني الشماته أسمع
ما عدها أهل خوان تجـــي الهاي المره تفزع
مشيت وكاطفونه أحجار وليه وجان منها أروع
من أنصاب أخوي حسين راسه وبالدمه أتوزع
وطبت القصر جانت أشد
من السبـــــــــي الله واحد
شام
والهســـــــــه محنية ضهر
عشت ومتت مـــــــن القهر
شام
.........................................................
كل هاي الجروح وجان بيه أمن الخيم جمرة
من الشام لأرض للشام زينب رجعت أمكدرة
عشت وبيه جـــــان الشيب يومية يشب عمرة
لحد كطع النفس عباس أريدة وداعت الزهرة
أتمنيته يحضر دفنتي
وبيده يشيــع أجنازتي
شام
والهســــه محنية ضهر
عشتت ومت مــن القهر
شام
.........................................................
من طبع التموت أتريد خوان التجي وتحضر
وأخوتي مذبحين وضال واحــــدهم سليل البر
آه الشام ويلي الشام مدري شضاملــــي وأكثر
ويلي وحتى زواري تجيني مــــــــــا بعد تكدر
حال الصحن مثل الضعن
من أنسبى وشاف المحن
شام
والهســــــــه محنية ضهر
عشت ومتت مــــــن القهر
شام
.......................................................
خادم خدمة الحسين
الشاعر
محمد الموالي

وصلت الكربله يحسين مشايا
من الشام أجيتك شايله الرايا
أمشي وأعثر أبهمي     غريبة ولا ولي يمي
من الشام أجيتك شايله الرايا
......................................................
طحت من طولي من شفت الخيم رمدة
غيــــــــر أجروحه خويه الفاكد أشعنده
اليعيش بـــــــلا ضوه يستوحش الوحدة
أجيتك جيـــــــــــــــت ألمخنوكه بالشدة
أجر أنفاسي بالكوه       ماتت ريحة الخوه
كل أحلامي طاحت آيه آيه
من الشام أجيتك شايله الرايا
.......................................................
ركضت اركاض يـوم العاشر ونحرك
وصحت يحسين زينب وصلت الكبرك
يالمعودني أغفــــــــى من أشم عطرك
ما تكعد تضمنـــــي الحضنك وصدرك
بيه شصار لو تدري     يحسين أنكسر ضهري
أمشي ويمشي ضل راسك ورايا
من الشام أجيتك شايله الرايا
.......................................................
علـــــــى الموعد أجيتك بيه ما بيه
وآنــــه أمن المشي والسوط محنيه
مثل ما ضاع أصبعك ضاعت أبنيه
لا تحسبنه أبشرك ماتت ارقيـــــــه
شبكت راسك وطاحت     ومن كثر البجي ماتت
طفلة او وينها اويـــن السبايا
من الشام أجيتك شايله الرايا
.......................................................
يحسيـــــن الكلب ما يحمل الفركـــه
مثل الخيل عيــــــن الشامت أتسحكه
رغم طول الدرب والحسره والحركه
أشم ريحة كمر وأتخيــــــــــل الملكه
للعبـــــــــاس وديني     عسن بلكت يلاكيني
ولــو أجفوفه ضلت عالمسنايا
من الشام أجيتك شايله الرايا
..................................................
أريد أوياي تمشي الكافلي وسأله
أكله السوط فــــوك أمتوني من صله
أجيتك وآنــــــه مدري ميته لو عدله
أفراكك واليسر يا خويه شيحمله
عفتني يابو فاضل     ومشيت بلايا كافل
الحمد لله أعله راسك والعبايا
من الشام أجيتك شايله الرايا
.......................................................
خادم خدمة الحسين
الشاعر
محمد الموالي

عزاء أهالي النجف يوم الأربعين

كتب: محمد منذر العذاري

في صباح يوم الجمعة 20/ صفر الخير/ 1447هـ الموافق 15/ 8/ 2025م توجهت برفقة السيد الوالد الدكتور منذر العذاري إلى كربلاء، وقد دخلنا كربلاء بعد الساعة التاسعة صباحاً من جانب قنطرة السلام، فسرنا نحو مرقد قمر بني هاشم (ع) ومن هناك توجهنا لمنطقة ما بين الحرمين، وعندها لمحت عيني بعض الشباب يهرولن وهم يحملون قطعة موكب النجف الأشرف ويرددون الأهزوجة المشهورة:

هز الراية.. وجاب الماي.. بيوم السابع

فالتحقنا بأفراد الموكب ودخلنا إلى الصحن المقدس، وهناك بدأ ترديد الأهازيج المشهورة:

أجرك الله يا علي. بالحسين واولاده

يا أهالي النجف يا حي وهلا
گوموا نتلگة العقيلة بكربلا

وكذلك أبيات شهيد المسيرة عباس عجينة:
اسمع العباس نادى.. يا هلا بهاي الضيوف
شلون أأديها التحية.. وأنا مگطوع الچفوف

وفي تمام الساعة 10:42ص ارتقى المنبر الرادود هادي مريطي، وبدأ بكلمة شكر لخدمة الروضة العباسية وبعدها بدأ بإنشاد قصيدة للأديب صباح أمين من وزن العگيلي مطلعها:

يا خوية لگبرك ردونا

وأخذ بالقراءة مع تفاعل الحضور تحت رفرفة الرايات في وسط الصحن المقدس، حتى وصل إلى أبيات النزلة وجاء في أولها:
يعباس اليوم جبنا لكل گبر
جروح يوم الظمى وجروح اليسر
انت عفت حسين من ذاك الظهر
ما دريت شصار بيه وبينه

وعند نهاية الموشح اخذ بقراءة المقطع المشهور:
لا وحگ دمك ودمعة كل طفل
روسنا ما دنگت يابا الفضل
يعباس احنا خواتك ما نذل
يزيد ذليناه وما ذلونا

مع تفاعل منقطع النظير من الحاضرين حيث طلبوا من الرادود اعادة المقطع عدة مرات، حيث قرأه لسبعة مرات ثم ختم المجلس في الساعة 11:07ص وعاد المعزين إلى حسينية المشاهدة.

اما في الصحن الحسيني كالعادة بدأ الشيخ هادي مريطي بكلمة شكر للكوادر التنظيمية ثم هتاف (لبيك يا حسين) واستذكار لشهداء انتفاضة صفر 1977م مع قراءة الفاتحة لخدمة الحسين (ع) ورواد منبر الأربعين الشيخ عبد الحسين ابو شبع، الشيخ وطن مچي، الشيخ علي حسين التلال، بعدها بدأ بإنشاد قصيدة مطلعها:
علي ومن يتلگاه.. يوم الآمه
رجع ليك بعيلتك.. رجع راسك وياه.. يوم الآمه

ولا يخفى على المطلعين ان هذا الطور من الأطوار التراثية ولعل ابرز من اشتهر بقراءة هذا الطور هو المرحوم عبد الرضا الرادود

القصيدة المرجعية

كتب: محمد منذر العذاري

كُتب الشعر وقُرأ في رثاء مراجع الدين العظام ومنهم السيد محمد كاظم اليزدي حيث رثاه الشاعر مهدي عباد العبايچي بقصيدة تلاها الرادود عيدان تويج السباك مطلعها:

شلون ترضى بالفرات ايغسلوك.. وجدك حسين الچفن ذاريه
ان چان انتَ تغسلت واتچفنت.. حسين ظل اعلى الشمس ظهرية

وكذلك قرأ الشيخ ياسين الرميثي في رثاء السيد ابو القاسم الخوئي قصيدة مطلعها:

هذا ابو القاسم صريع الغدرة.. يا بقية العترة
عظم الله الاجر.. الك يا راعي الأمر
يا بقية العترة

وقد استطرد الشاعر لذكر شهادة السيد محمد باقر الصدر في أبيات القصيدة.

بقيت هذه القصائد تجارب فردية نادرة، حتى شهادة المرجع السيد محمد محمد صادق الصدر، حيث كان لهذا الشخص تأثير مختلف في المجتمع العراقي والوسط الحسيني والأدبي فهو المرجع الوحيد الذي قرأ قصائد لطم من على منبر مسجد الكوفة، وقام بالدعوة لإحياء الشعائر الحسينية كافة.. وعند مقتله قرأت في رثائه مئات القصائد في مختلف مدن العراق وحتى في دول الخارج واستمر هذا الأمر حتى الوقت الحاضر، وشارك فيه معظم الشعراء الحسينيين، وقد تنوعت القصائد في طرحها بين من يؤكد على أهمية الثأر للسيد الشهيد، وبين من يندب الحجة المنتظر (عج)، وبين من يستذكر ادوار السيد الصدر في مقارعة الطغاة، وبين من يقارن بين السيد الشهيد وأجداده من أهل البيت، وبين من اخذ الموضوع من الجانب العاطفي واستذكر علاقته وحبه لشهيد الجمعة ونجليه.

قصيدة للشهيد رحيم المالكي قرأها الشهيد الشيخ علي الكعبي من على منبر الجمعة في جامع الحكمة:
ثارك يالصدر ثارك.. دين برگبة إحرارك
ثارك ما يضيع الثار.. لا والواحد القهار
ابد ما تنطفي نارك

قصيدة الشهيد غالب شنيع الجبوري:
تصيح النجف والكوفة.. دم الصدر منعوفه
جيل ايذكر بجيل.. هذا الصار ميزيل
تصيح النجف والكوفة.. دم الصدر منعوفه

قصيدة تلاها الشهيد علي النداوي للشاعر احمد عايد في مجلس اقامه الدكتور منذر العذاري في منطقة الشلال التابعة للمشخاب:
كلنا نصيح عاهدنا.. من منطق عقائدنا
لسان الحال هو الگال.. وتبقى تردد الأجيال
تظل بالصدر قائدنا

وقرأ بعدها قصيدة قريض مطلعها (يا أبانا يا شهيد)

قصيدة من نظم السيد حسين الحجار قرأها السيد نعمان الفحام في مجلس الدكتور منذر العذاري:
هل يحسين.. دمع العين
الك يا والد الأحرار

قصيدة قرأها الرادود كرار ابو غنيم للشاعر علي السلامي:
دين الرسول وشرعه.. يودع شهيد الجمعة
هذا الجرح ما يلتام.. هالليلة دين الإسلام
يودع شهيد الجمعة

قصيدة رتلها الحاج ابو بشير النجفي للشاعر حيدر العاصي:
احبابك نون ونوح.. نسچب دموع الحزن
أنادي بدليل الملچوم.. غدرو صدرنا المظلوم
نسچب دموع الحزن

ومن قصائد الرادود علي يوسف للشاعر ابو هاجر السوداني:
يا سائلي عن فارس الكوفة
هذا الأبد ما ننسى معروفه
عشگناه.. الله بيه نجانا
عشگناه.. سيد الحنانة

قصيدة للشاعر جواد الحمراني قرأت في اوبريت مشترك بصوت الرادود احمد الساعدي والرادود علي الدلفي، مطلعها:
طلع فجر الصدر بآذان جبريل
وعيون ابرهة تنتظره والفيل

قصيدة قرأها الرادود علي الدلفي من نظم السيد عبد الخالق المحنة مطلعها:
وينك..
كل جمعة اسأل وانسئل.. وينك
وأقراها بعيون الطفل.. وينك
ارجعلي بعدك مو سهل.. وينك

ولم يقتصر رثاء السيد الشهيد على شعراء ورواديد العراق بل اتسع لبقية الدول العربية فقرأ الرادود جعفر القشعمي عدة قصائد في رثائه وهناك قصيدة مشهورة مطلعها (من صدر الى صدر تمر الأعوجية.. باضلع زكية) للشاعر المرحوم غازي الحداد وقد قرأت لمرات عديدة وممن قرأها الرادود فاضل البلادي