يوم العاشر الموت ردته يمر عليه
واتلوع مع حسين. بأرض الغاضريه
هواي اتأخر اهواي كون بشحة الماي
ردته يمر عليه
*********
ساعة طيحت الأكبر ردت منك تجيني
ويا موتي تره ترحمني وتسكن ونيني
ما اتحمل افراك الاخو ينزف حنيني
ضهري منحني وتخلص بجي كلهن سنيني

وحزام الضهر راح. والأكبر بجيته
واليفكد اخو اهواي. يتمنه منيته
ما ضلي اخو اوياي. كون بشحة الماي
ردته يمر عليه
*******
مات الأكبر وانه انتظر يمته تمرني
وي رمله تره شفتك صبع قاسم تحني
اشكد اتوسلت بيك واخذني ما اخذني
تاخذ جاسم وانه تخليني اعله وني

وجه القاسم ينور. ومضويتنه شمسه
مو انت التمر بيه. ردنه يمرنه عرسه
رمله نادت ارباي كون بشحة الماي
ردته يمر عليه
********
ردتك وي كمر هاشم تمر يا موتي اليه
وي طيحة جفوفه ينتهي عمري الاذيه
وي كسرة ابوي انه ردت تلفي المنيه
تاخذ عمي وتخليني يا موت شقضيه

طاح الكافل وراح. والطيحه ثجيله
ضل متحير حسين وتنوح العقيله
ضل تايه بلا راي كون بشحة الماي
ردته يمر عليه
*******
حين الضل ابوي الوحده واسمع ينادي
ماكو ناصر الينصرني ضد هاي الاعادي
جم مره اطلعت وانت التردني يا حدادي
ما مقسوم اموتن وانفطر مني فؤادي

ابقه بخيمتي راد موتي وما يجيني
ويبقه وحده حسين وانه بنص ونيني
كلبي ما رضا بهاي كون بشحة الماي
ردته يمر عليه
*******
ويا موت الطفل لمن بجه وبعيوني شفته
وجهك راسمه يا موت شفته انه بدمعته
مكطوعه ركبتي ولا شفت كطعة ركبته
ماخذ روحي يا هالموت ولأمه انت عفته

وأمه بأسوء أحوال من شافت ابنها
ست أشهور ويموت يا مكثر حزنها
رايح ضوه عيناي. كون بشحة الماي
ردته يمر عليه
********
ضليت انتظر يمته تجي وبكلبي جمره
اشلون اتاخرت يا موت حين انكطع نحره
طلعت روحي يوم الداست الخيل اعله صدره
ما ميز صرت هذا الصدر لو هذا ضهره

بهاي الساعه ما اجيت. مطحونه عضامه
حركوا كل الاخيام. واحتار بيتامه
ما عدنه بقه افياي كون بشحة الماي
رديته يمر عليه

قصيدة شهادة الرسول الأعظم محمد (عليه وعلى آله افضل الصلاة والسلام)
________
الوداع الوادع يا رسول الله
********
فاطمه اتودع ابوها ابهالمسيه
وحيدره يصبرها ودموعه جريه
صارت الدنيا بعد عينه خلِّيه
واليتم خيم على قلب الزجيه

المصاب المصاب بس دمع والآه
******
خلة الوالد صعب واحد يسدها
وانمرد قلب أم حسن هيه اولدها
حيدر الرد الشمس بيده وبعدها
ما كدر روح النبي لبنته يردها

الجروح. الجروح. تنزف بفركاه
*******
اول أصحاب الكسه راح من ادينه
وضلمه صارت فركته بكل المدينه
صاحوا أصحاب الصدك ميت نبينه
وانت يا حيدر بعد عينه ولينه

الأنام الأنام. أصبحت تنعاه
********
وصه طه صحبته وكت المنيه
هله هله بحيدره وبنتي الزجيه
ما اريدن يمهم اتكرب الاذيه
همه بعدي اتمسكوا بيهم هويه

النعم النعم. همه عند الله
******
مات طه اوصيته صارت قديمه
والي وصاهم على الزهره الكريمه
خانوا بحيدر وأجوا ببشع جريمه
حركوا وكسرو ضلع بنته اليتيمه

الضلع الضلع. ضل تصب ادماه
******
الامه من بعد النبي نكرت عرفها
لقتل آله أصبحت همها وهدفها
طعنت بآل النبي وخانت شرفها
لهذا يوم الشيعه ما بطل نزفها

ينقتل ينقتل چيه علي مولاه

اللهم صلِ على فاطمة وابيها وبعلها وبنيها
والسر المستودع فيها

راحت الحبيبه         والمشه شيجيبه
والحزن ضهدها       نامت ابلحدها
والمشه شيجيبه
*******
من شيعتها وكملت            وتوجهت صوب الكبر
شايل عله امتوني السمه    واجدامي كل خطوه تعثر
  من شيعتها شيعت           روحي معاها والعمر
فركتها تكتل ياخلك            مثل اليتاني ابلا صبر

والحزن غزاني         والبعُد جواني
زهرتي شيردها         نامت ابلحدها
والمشه شيجيبه
**********
من وسدتها بالكبر             احمر جره اعليها الدمع
خفت التراب البلحد          ياذيها لو مر عالضلع
ياريت وياها اندفن            والنفس مني منكطع
ولا ابقه لحظه ابهالعمر      يكضيها حسرات الشمع

والدهر خذاها        اشكد صعب جفاها
بالحزن بعدها        نامت ابلحدها
والمشه شيجيبه
********
هلت التراب ويالدمع           وبقلبي ضل يغزي الجرح
وانتهت عشرتنه التي           مثل الزرع ويه الفلح
وبدنيتي كلشي انتهى          وماصخ صبح طعم الملح
مو مره مليون انلجم           يالزهره من يطلع صبح

والفكدله غالي       دمعه يبقه هالي
دنيتي وسندها      نامت ابلحدها
والمشه شيجيبه
********
من الألم ضهري انحنه          حنيت شجر وكت الهوه
واللي فكد غالي القلب           بعيونه ما تلكه الضوه
من فركت الزهره عَلي          هم وقهر قلبي ارتوه
اتمنيت انه ابهالمسه             نفس الكبر نمنه سوه
 
موتي ما لفاني        وياها ما خذاني
روحي هالمردها      نامت ابلحدها
والمشه شيجيبه
*****
أسمع ونين من الكبر           صوت ويهز عرش السمه
ارجع الى دارك علي               تنادي عليه فاطمه
واتكلي زينب تنتظر             بالباب يا حامي الحمه
طفله وخطيه لو درت           من امها هيه ميتمه

زينبك خطيه            تجرح الرزيه
منهو يبقه عدها        نامت ابلحدها
والمشه شيجيبه
**********
حتاريت من الي جره             ارجع اضل اتحيرت
واشلون اعوفن زهرتي           واشلون اضل اتمرمرت
  وبريتي مات الهوه               من ارجع لداري قررت
عفت الزجيه فاطمه               ولولادي بجروحي ارجعت

ارجع ودمعتي        تجري ياحسرتي
زهرتي لوحدها       نامت ابلحدها
والمشه شيجيبه
**********
اتلكتني زينب والحسن       وحسين والملكه صعب
سألوني وين امنه وحرت         موقف يكطع بالقلب
شنهو اجاوب يا تره            وضعي احسه يضطرب
كتلهم امكم فاطمه            نامت تره جوه الترب

انفجعوا بجوابي         اتشاركوا مصابي
واتركت ولدها             نامت ابلحدها
والمشه شيجيبه

اللهم صل على محمد وال محمد الطيبين الطاهرين وعجل فرجهم ياكريم
قصيده لولادة أمير المؤمنين عليه السلام

طير الفرح غرد بأسم الكرار
يحمل بشاره وبيها أجمل اخبار
رابع أصول الدين. ابتدت من الحين
********
طير الفرح جايب بشاره حلوه
ويكول صار ابهالمسه اللي يسوه
انشق جدار الكعبه لجل الكرار
وصار الأسد هاي المسه من اللبوه

اعظم ولاده وبس اله هاي اتلوگ
وبمولده انسدت اهوايه احلوگ
عرفوه كلش زين ابتدت من الحين
**'******
وي حيدره الحق انولد هاليله
وكل العلم والمعرفه بترتيله
فرحان هاي الليله قلب المختار
صار السند والحمل كله يشيله

من حقها كل الشيعه تفرح هاليوم
بمولد أمير المؤمنين القيدوم
لطه هو معين ابتدت من الحين
*********
حيدر علي هو أمير الشيعه
وحبه ابد طول الدهر من بيعه
لو ذبحونه وصار بينه الما صار
وي حيدره نبقه وجوب انطيعه

حب الولايه ما تغيره الارجاس
ولأن ابراسي ابقه مرفوع الراس
والشدد بسمه اتلين. ابتدت من الحين
*********
وي مولده جبريل زف ابشاره
من السمه حيدر نزل فقاره
وأهل الكفر يدرون شنهو الفقار
ناس افرحت ناس الدمع يتجاره

يدرون يمحي الباطل من اجذوره
وأهل الصدك كلها غدت مسروره
يا حامي هذا الدين ابتدت من الحين
********
من زغره جم اكماط كطع حيله
والسبب جان امه بعلي اتلوليله
ما تدري امه شنهو هاي الأسرار
بكل شده يحظر لمن اتناديله

يا ابو الحياره الحاظر بكل شدات
ايخيب ظنه اليندبك لا هيهات
والنعم يا ابو حسين ابتدت من الحين
********
اعظم فرح هذا المسه ميلاده
حيدر أمير وقائد اعله القاده
واحد علي وماله نضير ابهالكون
تشهدله كلها الي يحب والعاده

يا منبع الحكمه ولسان وأفعال
حقها تبغضك يا علينه العذال
بيك احنه مرفوعين. ابتدت من الحين

بسم الله الرحمن الرحیم
وصلِ يا ربي على محمد وآل محمد
نهنأ العالم الإسلامي والامة الاسلاميه ومراجعنا العظماء بذكرة حلول شهر أفراح آل البيت عليهم السلام شهر شعبان المبارك سألين الله أن يرزقنا ثواب هذا الشهر الكريم بحق محمد وال محمد

قصيده لهذا الشهر المبارك ونسألكم الدعاء

يا شهر الخير وأفراح أيامك بلسم لجراح
صار ابأيامك جم نور. وتضوي الدنيا بهالأنوار
*********
شهر وفرح بيه واجب بيه الأيمه تراقب يا شعبان
بيه ينولد جم كوكب كل الحزن بيه يذهب ياشعبان
تخيم علينه الفرحه وبينه يغزر ملحه يا شعبان
منعدمه كل آلآلمك. الله يدوم ايامك يا شعبان

بيامك تنزال اهموم. بفراح آل البيت اليوم
كل شيعي بشهرك مسرور. يفرح بفراح الأطهار
********
بيوم الثالث نتهنه بمولد امام الجنه. يا مصباح
احسين شع بنوره. كلها غدة مسروره يا مصباح
فتح خضار الورده. باسه النبي ابخده. يا مصباح
هذا سفينة ربنه . بيه النجاة وحبنه. يا مصباح

حب حسين اليمحي اذنوب افرح هلهل يالمحبوب
ذكر حسين يضل معمور. وضل عامر بفراحه الدار
**********
رابع ايامك بشره بمولد كفيل الحره يا عباس
حيدر علي بشخصيته الحره ابتدت تربيته. يا عباس
من الزعر كافلها. يلزمها ويدللها. يا عباس
هيه تبوسه ابأيده. وهوا يقدم اوريده. يا عباس

بدرس الخوه ينطي انواع كل نوع يطيحله اذراع
وتصيحه الحره مشكور يا عباس ويا مغوار
**********
ليل الخامس نترصده. . بمولد حليف السجده. يا سجاد
ابن الحسين الأول. واسمه علي يعني اول يا سجاد
وجه بدر ويلالي. نور كل الليالي. يا سجاد
يشبه ابوه برسمه وكامت تناغيه امه. يا سجاد

يا نور وطالع من نور يا كوكب بسمانه يدور
وبكل قلب اسمك محفور يا رابع بيت الكرار
**********
يوم اهدعش ننتظره يحمل ملامح ذكره بالأفراح
بمولد علي الأكبر من الولاده معطر. بالأفراح
بحضن الابو يناغيله. وخليها تهلهل ليله. بالأفراح
ريحة مسك من عنده. محله اليبوسه بخده. بالافراح

يا هنيالك ابن حسين. خل تدمع بفراح العين
يالاكبر لطف مذخور يالتشبه طه المختار
**********
بنص الشهر نتوجه. لمولد امام الحجه يا مهدي
اليملي الأرض بس عدلاً. ممليه جانت جوراً. يا مهدي
نرفع ادينه الليله. ونتوسل وندعليه. يا مهدي
عجل طلعتك لينه. من الظلم ملينه. يا مهدي

يمته انشوفك يا مولاي. وتروي العطشت بالماي
يمته انشوف الكل مذعور وبسيفك تاخذ جم ثار

يا الله
اللهم صل على محمد وال محمد
قصائد محرم الحرام لهذه السنه نسألكم الدعاء

اربع بنين وياك وديت. والمهم سالم ترد للبيت
يا ضي عيناي يا كل الراي
****
اطمن قلبك وقلبي وبنيني الاربعه تدري الك فدوه
يمن كلشي الك يسوه وفه ونخوه اريدنهم إلى الخوه
تروح وقلبي يلجمني يبعد الاربعه وبعدك شنو اليسوه
احس كل خطوه تمشيها احس موتك بده يكرب الك خطوه

بضعنك مشيت من المدينه وبعدك بقت روحي حزينه
لو باقي وياي يا كل الراي
*********
ييمه حسين انه ادري فقط بس اربعه بضعنك الك وديت
لجن ما بيدي شي يمه ولو بيدي الك روحي ييمه انطيت
يروحلك فده لطولك عزيز الزهره جا انته والك ضحيت
وانه كل غايتي ابولدي يضحون وتضل انت وترد للبيت

احلئ خبر لمن تعودون. ما يحلى شي غيرك بالعيون
يا هاي وهاي. يا كل الراي
**********
وصيتي الهم بشخصك وصية والده وتدري حنينه اعليك
واحس بضلعي يتكسر يحس بضلوعك الترفه ويعرف البيك
ويريت الخيل سحكتني وتكسر كل عظم بيه ولا ياذيك
يبن حيدر يبن فاطم يبعد الدنيا والبيها قسم نفديك

يا بعد قلبي وكل البتوت يايمه كبلك ريتنه انموت
يا طعم الماي. يا كل الراي
*******
يولدي الاربعه بيكم اصعد الهامه واتباها أمام الناس
يجعفر يمه عبدالله تره انتم تخلوني اصعد الراس
يعثمان اني اريدنك تضحي لخاطر احسينك لخير أنفاس
ويضحي بعينه واجفوفه انه ابني اريدنه الكمر عباس

يا كافل الحره العقيله يالتكضي الحجايه الثكيله
يبني الوفاي. يا كل الراي
********
انه المن جبت اربع إذا ما طاحوا اكبالك يماي العين
إذا ما قبلك اسمعها الأخبار التجي منهم خبر مو زين
قسم من عدهم اتبره ولا يتسمه بعد اسمي يأم ابنين
يبعد امك شنو عدنه عشيره هو بس واحد يغالي حسين

ياهوا العايش وسط ريه يمه انه بيك وانت بيه
يا لب احشاي. يا كل الراي
*******
ييمه ما ردت شكراً ولا تشكرهم أولادي على المكدور
ينعمة الله جا انت وقليله بحقك انقدم ييمه انحور
يغالي كل فضل منك تره البيه انه والاربع الف مشكور
مع اسمك انه اولدي تردد بينه هالوادم بشهر عاشور

نعمه جبيره ومو قليله. من ننذكر وي العقليه
يا نعم ارباي. يا كل الراي

الراحوا اهلها وخلوها بالدار
اتموت احسللها ولا تبقه تحتار
الدنيا ابلايه احباب. ما تسوه ذر اتراب
*******
يالنسيتوني وحدي عفتوني تدمع اعيوني وكلي حيره
بلايه احبابي ميته بمصابي. وانظر لبابي اوجهي اديره
التبقه ابلا ابو ولا اهل عدها
كلشي بالحياة يصير ضدها
تعيش بوحده واتموت ابحدها
وسيوفه الدهر بالنحر حدها

الورده تذبل. من تبقه عطشه
عمره يوشل لمحد يرشه
مثل الورده بمصاب ما تسوه ذر اتراب
********
تنزف اجروحي. ومعتلي نوحي وحايره بروحي وقلبي شيب
بويه يا همي ما تضل يمي. ولا بقه عمي
وعمتي زينب
كل العايله راحت عليه
لا سكنه يبويه ولا رقيه
بويه بداعت الزهره الزجيه
عبدالله دخليه اعله اديه

وحشه وخليه. داري بعدكم
ياهو اليه. مشتاقة الكم
اهلي صفووا غياب ما تسوه ذر اتراب
********
ما يفيد اعتب والدمع يسجب. والحجي يّأنب
والله يهلي
منشلع قلبي ميته يا ربي وتيهت دربي
ومات ضلي
كاتلني الألم وبراسي وهواس
ها يرجع ابويه عمي عباس
بلياهم صرت مختنكه الأنفاس
مجروحه ونزف من عندي الاحساس

يا ربي صعبه. ابقه وحيده
وبداري غربه. الفركه شديده
ما ينفع تره أعتاب. ما تسوه ذر اتراب
********
منكسر عودي وما يرد عوَّدَيَ حافر اخدودي
دمعي يجري
كاعده اتنطر امشي واتعثر. وقلبي يتفطر
وخلص صبري
بويه تدري كلش صعب الافراگ
وكل لحظه لصوركم قلبي يشتاگ
تچويني بعدكم نار الاشواگ
ودمعي فوك خدي بويه حراگ

كاتلني مرضي وجروحي كثره
وايامي تكضي. حسره اعله حسره
قلبي من المرض ذاب ما تسوه ذر اتراب
*******
بعيني مطفيه يهلي هالدنيه ماكو كل جيه
يهلي الكم
غازيه بروحي. كلهن اجروحي. ينسمع نوحي
من بعدكم

اليمته ماتت وخلصت حياتي
ضليت انتظر ساعة مماتي
لا خوتي اجوا لا جن خواتي
وحدي باقيه وي نايباتي

احضن صوركم ودموعي تجري
ضايع خبركم بس الله يدري

راسي من الحزن شاب. ما يسوه ذر اتراب
*******
صارت امنيتي. تحظر منيتي وبوسط بيتي
احس غربه
انه وخيالي ماكو الي غالي. ضاعت آمالي
والله صعبه
يهلي انسو ضلتها العليله
راح اتموت بهموم الثجيله
اتمنيت الكمر وي العقليه
وحسين اليخليني بشليله

احلى منيه ما بين ايديكم
وانسه الاذيه من أنظر عليكم
واترك جرح الصواب. ما تسوه ذر اتراب

يا عباس يا صاكر الخياله
*******
حط جربته اعله الجتف عباس شيخ الحومه
يا زلمه منهم كابله لونه انكلب وارسومه
وياهو التسأله عالكمر لمن نزل شنهو الصار
محد دره من الخلك كلها صفت مهزومه
بالزلم ضل يحصد رووس شجره وتحز بيها الفووس
من طبهم
عباس جن ملك الموت اسرع هجم من الصوت
راعبهم
فوك المهر كل هذا هوا السواه
لو يحط رجله اعله الأرض تصيح احا
********
من سرفن اردانه الكمر. وبخزرته ضل يذبح
والدم من اركاب الزلم بطف كربله ضل يطفح
عباس صاحوا لو علي نفس الشطر والضربات
ما ميزوا نفس الشبه بكتل الزلم يتمطرح
صاح الشمر وبأعجاب هذا الكمر لو أبو تراب
بالحومه
شيخ المراجل عباس والجيش طكهم وهواس
من ارسومه
من اول هجمته خلصه نص الكوم
مثل الصكر فوك الفريسه من ايحوم
*******
قطره ابحر كله الجيش وي كافل العلويات
يا فگره كلمن موجود ويا بخته صاحوله المات
احتارت الوادم هاليوم من الكمر وين اتروح
سبعين الف جن سبعين صاروا بكثر الضربات
حگها الزلم منه اتخاف اشويه عددها الألآف
سواها
راك الزلم بطف روك جن ابره بيهم ويحوك
راواها

لو مو حسين يصيحله اشويه اشواي
نسبة الدم الزاددت وموش الماي
********
ما ثنه طكاته ابد والتشهدلها العدوان
ما خله يسره وميمنه خله جثث كل امكان
من عنده خاف العلكمي ومايه نشف من الخوف
ما جنه بارد من نزل سواه مثل البركان
خلاه ابو راس الحار بالجربه غصباً من صار
وتأدب
راده يذوكه ويرتاح. عباس كبل المصباح
ما يشرب

صورت احسينه انرسمت بجف الماي
كبل الاخو ما ضاكه هذا الوفاي
********
اختلت موازين الحرب وانمحت هاي القاعده
الكثره كدام الكمر ما تسوه شي يم ساعده
اهنا فقط صارت تره هاي الشجاعه الها الصيت
ولمن يمر طار الكمر تلكه الصفه متواجده
والصفه بس للموصوف. عباس ما يعرف خوف
أطباعه
مثل الكتب صفهم صف. بيده تره شال الطف
من كاعه
وبيده ترف الرايه من صوب الصوب
عباس بالطف سواه الما مكتوب

الدنيا ضلمه ونحرك مضويها
بلا خدمتك كل طعم ما بيها
ياحبيبي يا حسين يا حبيبي
*********
بلا خدمتك ما نعيش ولا نكون
ولا يصب مدمع ولا اصلن عيون
احلئ شي في خدمتك هو الجنون
ولمصابك كل مصايبنه تهون

بلا خدمتك صحره كل دنيانه
وانت ماي الأرض يا مولانه
ياحبيبي يا حسين يا حبيبي
******
بلايه حبك شنو اليسوه انضحي ليه
واحنه بعنه ارواحنه بس نشتريه
يا نبع بس اليخدمك يرتويه
واليخدمك سيدي راضي عليه

بيها واهس خدمتك محبوبه
وخادمك تنمحي كل اذنوبه
يا حبيبي يا حسين يا حبيبي
*****
يا سفينة ربنا ولبيها النجاة
وبخدمتك كل طعم بيها الحياة
لومه نحرك ما عرفناها الصلاة
ولا عرفنه اسلامنه والمنزلات

انت شمعه وتضوي كل ادروبنه
فقط حبك باقي نص اكلوبنه
ياحبيبي يا حسين يا حبيبي
********
بقلق ضل العاده حبك يا حسين
تايه بدربه ولا يعرف لوين
الما يون لمصابك منقص ونين
احنه حبيناك حب مو عاقلين

خل يسمونه مجانين الحسين
نفخر بهذا اللقب طول السنين
يا حبيبي يا حسين يا حبيبي
*****
انت اول منذبح عايش صفيت
انذبحت ولاجن بذبحك عليت
كلشي لله يبو اليمه قدميت
وكلشي الله انطاك لجلك من نطيت

زرع حبك سيدي برواحنه
سيدي بذكرك تهيد اجراحنه
يا حبيبي يا حسين يا حبيبي
*******
يبقه حبك بالقلب والله يدگ
وكل سنه يتجدد ويانه العشگ
وابد مو نزوه عشگنه بل صدگ
نبقه مثل اخيامك احنه نحترگ

يبقه جمر اخيامك اياذينه
بكل محرم سيدي يجوينه
يا حبيبي يا حسين يا حبيبي

السلام على المصيوب في العين
السلام عليك يا قطيع الكفين
السلام عليك يا عباس
** ******
نضرها العايله هذا الكمر وبان اندهاشه
أطفال وحرم كلها تون صاحوا عطاشه
هذا النهر وانه الكمر متعطشوا حاشه
مثل الفراشه جنها سكينه والقلب بان ارتعاشه
صاحتله عمي. وشكبره همي
من المدامع بلل اخدوده وقماشه
صاح ونهض ياعمي بس صبريلي لحظه
هو انتفض. صوب النهر ويأدي فرضه
من الجره صبره بده منه يتلاشه
*******
الجربه اخذ بيده ومشه ودع عضيده
حسين ورحل راعي الوفه ينظر لأيده
ضل يلتفت ويصب دمع وعينه الوريده
صارت بعيده. لمة غوالي وطيحته صارت أكيده
صاحتله زينب والفركه تكرب
بعدك يبو الغيره أضل بالطف وحيده
راح الكمر. ويالروحته تكسر ضهرنه
يم النهر. من ينخسف هذا كمرنه
اباب الخيم سكنه بقيت هيه وحميده
*********
ساعه وسمع جلمة اخي من الشريعه
حسين انخمش قلبه وقلب اخته الوديعه
نفسه انكطع جدمه يعثر من هالفجيعه
بعينه الوسيعه ضاكت لمن شاهدن اجفوفه الكطيعه
كاره حياته. شاف الشماته
تضحك خبر موت الكمر كامت تذيعه
ضهره انحنه يالفركة الخوه كسر
يصرخ انه. راح انذبح من الشمر
بطف كربله ضل وحده هو ورضيعه
*******
لمن رجع صوب الخيم حسين بدمعته
وين الكمر راجع خلي سألته اخته
ما جاوب الحره ومشه وتحرگ عبرته
خويه فكدته طيح عمود الخيمه واعله الشاطي عفته
ياخويه ويليج. ميت كفيلج
صاير جروح اعله النهر هو وجربته

يعني انتهت قصة كفيل وي الخدر
والي بدت زينب أسيره وي الشمر
عينه بقت. صوب الخيم ياخويه شفته
********
زينب تون والعايله اتون اعله ونها
راح الكمر جاي الشمر تنظر متنها
ما ضل دمع من البجي امجرح جفنها
شكبره حزنها. الفكدت مثل راعي الوفه وخالي ضعنها
رايح كمرها يسعر جمرها
بحيره العقيله باقيه وكالميته جنها

بطف كربله. كلشي انتهى بعين الحبيبه
جم مشكله. يشيل الكلب وجم مصيبه
تبقه بألم. الشجرة إذا ميت غصنها

قصيده ع لحن يمه ذكريني
حوار بين مولاتي فاطمه الزهراء والسيده زينب عليهما السلام

يمه حضريلي بكربله شفت العذاب
وحدي واتألم واتحمل اشجم مصاب
نزفت اجروحي من ودعوني
وانتظر جيتج والقلب بحزانه ذاب
********
من المصايب شيبت حتى الرموش
وابنج الغالي سحكت بصدره الوحوش
مو دمع نزفت بل دم عيوني
وانتظر جيتج والقلب بحزانه ذاب
*******
يمه يازينب يمج ودمعي يسيح
وبعيني شفته ابني عالغبره ذبيح
يمه وي ابني ريت اذبحوني
وانتظر جيتج والقلب بحزانه ذاب
********
يم حسن شفتي شسويت ويانه هالناس
ذبحت احسينج وذبحت الغالي عباس
براعي الكفاله اشكد اجرحوني
وانتظر جيتج والقلب بحزانه ذاب
******
بنتي العقيله اتحملي هذا اليصير
والمهم يمه والدج يبقه الأمير
يمه ليألمج لو شتموني
وانتظر جيتج والقلب بحزانه ذاب
*********
تالي يا يمه امشي عالنوگ الهزيل
وأصبح كفيله من بعد عين الكفيل
بسم ابو فاضل اشكد ذكروني
وانتظر جيتج والقلب بحزانه ذاب
********
يم المصايب هايه مكتوبه عليج
تمشي أسيره والحبل يجرح بديج
وبضرب متنج جن اضربرني
وانتظر جيتج والقلب بحزانه ذاب

اللهم صل على محمد وال محمد
عظم الله لكم الأجر والثواب ذكره وفاة ام البنين عليها السلام

اربع بنين وياك وديت. والمهم سالم ترد للبيت
يا ضي عيناي يا كل الراي
****
اطمن قلبك وقلبي وبنيني الاربعه تدري الك فدوه
يمن كلشي الك يسوه وفه ونخوه اريدنهم إلى الخوه
تروح وقلبي يلجمني يبعد الاربعه وبعدك شنو اليسوه
احس كل خطوه تمشيها احس موتك بده يكرب الك خطوه

بضعنك مشيت من المدينه وبعدك بقت روحي حزينه
لو باقي وياي يا كل الراي
*********
ييمه حسين انه ادري فقط بس اربعه بضعنك الك وديت
لجن مابيدي شي يبني ولو بيدي الك روحي يغالي انطيت
يروحلك فده لطولك عزيز الزهره ابن حيدر والك ضحيت
وانه كل غايتي ابولدي يضحون وتضل انت وترد للبيت

احلئ خبر لمن تعودون. ما يحلى شي غيرك بالعيون
يا هاي وهاي. يا كل الراي
**********
وصيتي الهم بشخصك وصية والده وتدري حنينه اعليك
واحس بضلوعي تتكسر تحس بضلوعك الترفه وتعرف البيك
ويريت الخيل تسحكني وتكسر كل عظم بيه ولا تاذيك
والمثلث يفت جبدي ويصير احلئ خبر موتي على ايديك

يا بعد قلبي وكل البتوت يايمه كبلك ريتنه انموت
يا طعم الماي. يا كل الراي
*******
يولدي الاربعه بيكم اصعد الهامه واتباها أمام الناس
يجعفر يمه عبدالله تره انتم تخلوني ارفعه الراس
يعثمان انه اريدنك تضحي لخاطر احسينك لخير أنفاس
ويضحي بعينه واجفوفه انه ابني اريدنه الكمر عباس

يا كافل الحره العقيله يالتكضي الحجايه الثكيله
يبني الوفاي. يا كل الراي
********
انه المن جبت اربع إذا ما طاحوا اكبالك يماي العين
إذا ما قبلك اسمعها الأخبار التجي منهم خبر مو زين
قسم من عدهم اتبره ولا يتسمه بعد اسمي يأم ابنين
يبعد امك شنو عدنه عشيره هو بس انت يغالي حسين

ياهوه العايش وسط ريه يمه انه بيك وانت بيه
يا لب احشاي. يا كل الراي
*******
ييمه ما ردت شكراً ولا تشكرهم أولادي على المكدور
ينعمة الله جا شخصك وقليله بحقك انقدم ييمه انحور
يغالي كل فضل منك تره البيه انه والاربع الف مشكور
مع اسمك انه وولدي تردد بينه هالوادم بشهر عاشور

نعمه جبيره ومو قليله. من ننذكر وي العقليه
يا نعم ارباي. يا كل الراي

راح حيدر وانتهت أيامه. ضلت تون على الباب ايتامه
********
راح حيدر وابتدت قصة حزن
وضلت ايتامه على فراكه تون
من الإسلام انهدم ثاني ركن
وشنهو نفع الشجره لو مات الغصن

والاسلام ينوح لجل إسلامه ضلت تون على الباب ايتامه
&&&&&&&&&&&&&&&&&&&&&
حيره بعيون اليتامى جبيره
وبرحيله ياهو الها الحيره
هو احن اب هو صاحب غيره
يسوه بكلوب اليتامى ديره

واليتيم يرد علي من أحلامه. ضلت تون على الباب ايتامه
&&&&&&&&&&&&&&&&&&&&&
هسه حسوا باليتم واللوعه
خلة الوالد تره موجوعه
ياهو يمسح لليتيم ادموعه
لو برد ياهو اليدفي اضلوعه

ياهو ليحسب بعد بطعامه. ضلت تون على الباب ايتامه
&&&&&&&&&&&&&&&&&&&&&&
والعقيله گابلتهم بالبچي
تنحب وماضل بعد ينفع حچي
بعد النه هايجي لو ما يجي
تنوح وعله حسين ضلت تنتچي

حسين زادت من بجيها آلأمه ضلت تون على الباب ايتامه
&&&&&&&&&&&&&&&&&&&&&&&
ما نريده العيد بعد الوالد
بالفرح شيسوي بلا الفاكد
بالكلوب الحزن ضل متصاعد
ياوسف منه حرمنه الحاقد

ما كمل حيدر علي اصيامه ضلت تون على الباب ايتامه