حنــا لنـــا شيـمه وقيمه وناموس
‏نبدي بهــا مـــع الوجيه الفليحه

‏اما يطــاولنا علـــى الـطايله روس
‏والا لحــد يحسـب علـينا مطيحه

‏من طاح بيدين السراحين مفروس
‏لو يتبع الصيحه ثمانين صيحه

‏نجامل العامل من القوس للقوس
‏لكن ترى بعض الخطا ما نبيحه

الجَناب السمح .. والوَجه الحَياوي
‏والكَلام الذَرب .. والنَفس النقيّة
‏والعَقل .. والدين .. والكَف الرهاوي
‏سَبع .. تَفرض لك حضور وقابليّة

مَن يحط أذنه على كل سَماعة
‏جات فرقا ما بَعدها تجمّاعي
‏إن تجمّعنا على العز والطاعة
‏وإن تفرقنا فجوج الله وّساعي

عندي على بعض العلاقات تشطيب
‏بعض أصـدقاي اللي تغيّر شطبته
‏من لا حسبنـي في كبار المــواجيب
‏طـال الزمـــن والا قصـر ما حسبته

ترى الحياء راعيه لو مامعه عرف
‏حياه بين الناس يرفع مقامه
‏َ
‏حتى لو انه لاحكو مانطق حرف
‏يجمّله صمته وقلة كلامه

يامحللين الهرج للهرج نقاد
‏وافضل مكانه للمودب سكوته

‏بعض الاوادم باول الهرج ينقاد
‏واصبح كما الكوره وكلاً يشوته

لـمتابعيني قدر لو ما تكلمت
‏وبالقلب شي ما نطق به لساني
‏ٰ
‏للي يتفاعل او يتابعني بصمت
‏شكري وتقديري وجل امتناني

عريب المجاني ما يقرب من المنقود
‏ ذلوله عن دروب الخطا والوطا بركا

‏وضعيف الروابع ترثة الشايب المعقود
‏يحسب المراجل كيف يسبق على المركا

‏ادمح خطا المخطين والحي لـ الحيّ
‏ما فيه درب إلاّ وفيه انحرافه

‏واذا اختلفت أنت ورفيقك على شيّ
‏فكّر .. وتدري انه على شي تافه

وإن شفت بين النّاس فتنة وتشهير
‏إلجم لسانك قـَبـل لا يــنـعـثـربـك

لاتشتكي للناس من ضيق الأوضاع
أكسب غناة النفس لو نممٌت جايع

‏كريم النوايا ما يبي للجميل ردود
‏يحده على درب الصخا طيب عاداته

يفرجهِا رب كريم عزيز الجّاه
يعلم بهِا يوم ضاقت الوسيعّه .

أحذر تغش الناس لو كان غشوك
غادر بصمت وخل خاطرك صافي

والدرب خله سمح لا تزرعه شوك
يمكن يجيبك يوم وتمر حافي

خلك على كل المخاليق غالي
بالبعد عنهم واحترامك لنفسك

واكرم رفيقك لا حصلك مجالي
وان شان طبعك مايزينك لبسك

بين القرايب لاتكابر وتغتر
والجار لاتهضم حقوقه ولو جار

ياللي تقول نواجه الشر بالشر
قل للمطافي تطفي النار بالنار

خل البشر تذكرك بالخير والطيـب
السمـعـة الـزيـنـه رصيد و غنيمه

أن جيت تلقى المسهلا والتراحيب
وأن غبت تمدحك النفوس الكريمه