هجم بيت الزمان اليشل چف حاتم
يگمط اشباب بيته اشباگ ب احباله
وهجم بيته اليحش العنبر بچفه
ويحير بلگمه اعياله..

اي والله يا #كريم الجسار

انا وخلي تسامرنا وحچينا
نزهة والبدر شاهد علينا ..
والعّذيبي يتنسم عبير الورد نشتم

چاااا نسيتي فلان انا الماصح
ورق وبورد چنتي اتكاتبيني
وچاااا نسيتي فلان انا ذاك الأجي
ولو جووا هلج تحت العبايه تلبديني

عبادي العماري
(سامحيني )

ترنيمه...*

يهون عليچ يا سمره
العواذل خاطري تكسره
يعيروني من أون عليچ
واذكر طيبة العشره
واشوف الدنيا بردي وهور
لا معيبر ... ولا عبره
تهت والروج دولبني
يمنه يجيني ويسره
يا سمره....
والف شهگه
والف شوغه
والف حسره
اشبگها بزبون الليل
اگله بداركم شرها
وتحوم عليچ ونّاتي
شبه فراشه عالزهره

وانتي بلذة احلامچ
وبفي الگمر نمتي
وسعاده معبعبه اكتارچ
وآنه بناري اتچوّه
واشمن ريحة انسامچ
واگولن بلچي تالي الليل
طيفي يخفگ جدامچ
وتشوفين الصواب البيه
وچم چويه انچوه بنارچ

ويمر الليل والعصفور
بخيوط الصبح بشّر
والصفصاف غنتله الطيور وراح يتبختر
والناعور ناغه البير غنه وصبّح البيدر
ويساسلني طري النسمات يگلي شمالك مكدر
اگله هناك ذنبي بعيد ماطور الهوى وحدّر
وآنه وحيد .... مالي عضيد
دربي بعيد واتعثر

زامل سعيد فتاح

الناصريه...*

*مدينة الحب والوفاء والجمال*

يالناصريه تضمين طيفي وخيالي ودنيتي المنسيه
يمشرغده بحضن النخل ومطوّگج
ماي الفرات وغافيه بشاطيه
مديتي زلفچ للچبايش والزلوف هناك
سابت بالحِسن مرچيه
تتنعثر بهور وگصب
والبردي والعگّيد صافي النيّه
ولجنوبه الناگل حسن
شذره انتي صرتي وصارلچ ترچيه
يالناصريه مضايف الما بطلت عاداته مبنيه
ترفع هواوين وتدگ گهوة جواد مهيله ونجديه
يا صنگر يناطح وكت
ما ينسم
ما ينثلم
عالي وثخين بفيه
يا بنت سومر من گبل
من اور من زقورته وماضيه

يم العذارى السابحات بفلك وردي وحالمه بگمريه
لو جفلچ برد الصبح هلهلتي بأنغام الهوى العذريه

ولو كلبدون المغرب يشر حمرته
نعيش الف ليله وليله هارونيه
ياهورنه الكلك حچي بشرابعك
ولدن سواليف الهوى العذريه
لا تنقهر لو عين شامت عابتك
ياهورنه وكل جدح ينضح ميه
يا ديرة الحلوين بكحيلة فريج
منبته وبدوبه

زامل سعيد فتاح

وانا منسي معلگ علئ ارفوف صبري
وحته صارررر اتراب بيه

الگاطع

ردت اغنيلك وگطعوا كل وتر
غافلتهم واعزفتلك ع الضلع

كاظم خبط

زعلان بس يازعل لمن ترد لصدگ
گبل المنادئ اجي وشلون جيه اجي
اركض ركض محترگ

"أمي طشت غيبتي بماي العصر ، والطيرة المعرسة أستحت"

علگت أبليل ألسطح شمعة وبخت
حنت ألسدرة وتحت فيها غفت

تغرف ألگمرة فرح بالشيلة
صادت بماي ألگمر نجمة جميلة

سولفت همي وبچت
غابت ألنجمة وعمت

-الشاعر ألراحل علي ألشباني-1967-

گالو اگوه تحملت تصبر سنه
وماهزتك لهواك طروه
ومادروني اسحن سحن بالروح
واخزن هالعذاب بسمل چلوه
ومادروني اضحك ضحك مچبود
چالمگيود گوه
خايف لساني البطر واضحك چذب
والنار جـوه
وصابر ...
وروحي بملام اللايمين ابتلت بلوه
حارت وياهم يذكروها المضه
وگالو شدعوه؟
واصبحت مثل اليهد وحيد جدام الزلم
واهو بعازة الخوه
ينولي وخالي الظهر مهظوم بدموعه يتچوه


عريان السيدخلف

واشكد انتظر
هو العمر مثل الخرز معدود

كاظم إسماعيل الگاطع

ولك كلبي حمامه هناك من تمشي يطك
جنحه ويطير وياك....

يلمامش بعد سجه كضيت وياك
بس هو العمر ماينكضي ابلياك


علي الشُباني

يا ليل...*

حيل اسحن بروحي سحن
ماگولن احاه وأون
ياليل صدگ مااطخلك راس واشكيلك حزن
فحطن نجومك والگمر
بعيونك السوده اندفن

وانه اعله نغمات الربابه لطيف محبوبي ادگ
ودلالي فاحن هيل والهاون يرن واصبع يطگ

لأهل العشگ .... ياليل
وك لأهل العشگ

صرنه الشموع لونة الولهان
نضوي ونحترگ
وانته تجر بذيالك وتتچبچب
وكلسه اتعثر .. غاد اشتمر ... ياليل
وك لم هدمك وغاد اشتمر

خلينه بسوالفنه نشر عالخلگ ضيم السمر
ما ينگدر
ماينعبر
ياليل وسعه اطراف حبنه ولا لجاريه تطر
چيم حزن ... چيم قهر
مطبگنه عامر ما انكسر

ايدك إلك.. تعجز وحگ عيناك
وتمل السهر
واحنه نظل نردح ردح
ونشع سواليف وشعر
اشمحلاك لو كيفك صحه وسيرت
بنجوم وگمر
وشمثگلك يا ليل لو چلچلت بغيوم وقهر

هم صدگت جفن المحب يغفه ويجن
هم صدگت طير الگطه يهودر ويطبگله جفن

حيل اسحن بروحي سحن
ما اگولن احاه وأون

زامل سعيد فتاح

هذا الموت جسرر للانهاية عليه
كلنا انفووت




12/5
ذكرئ رحيل الشاعر
عريان السيد خلف

چذاب...*

چذاب
دولبني الوكت بمحبتك
چذاب
روحي تمرمرت من عشرتك
چذاب
امش عن سچتي
گطان گلبي برفسته وشگ شبچتك
اوفيلك وتغدرني غفله ولا دريت بنيتك
واحسبتك ترد الوفه وتجازي ايد الربتك

وتريد ارد لا ما ارد
لو صرت بس انته الدوه ولا ارد الك
وانسه المضه
ولا انسه ذاك توسلي وشگات روحي الناگضه
خليتني عظم وجلد وعضاي كلها مرضرضه
مد وجزر كل عشرتك عشره بزعل يوم برضه

واشلون ارد مگرود
موش آنه اليطخ لضحكتك مثل العبد
آنه ادري بجفاك الگلب
ورده
وتموت
وتنمرد

وادري الشته وليله الطويل بوحشته يمرد الچبد
لاچني عيب ارجع بعد
چم زله واغفرها بحناني ولا كسرت بخاطرك
چم سايه منك بينت ما گتلك مگصر ولك
واسنين خمسه بعشرتك مثل الطفل ومدللك
ما حصلت غير السهر
غير المناشغ والقهر
چذاب يل داغاتك ولا تنطفي مد العمر
يل بدلت قداح حبي الغالب بشوچة صبر
خلينه بس نحرگ تتن ونسَمّع الوادم شعر

زامل سعيد فتاح

اي وحگك وانت اعز من اليمين
ولو حلفت بغير ماگتلك جذوب

انت انت وماعلي بالعالمين
الشرگت والغربت بينا الدروب

الحنين...*

يا دار اهلنه ولا حلت غيرچ دار
ولا مر على الخاطر نديم وسمّار
دوار ،، يا دار الوكت ،، مر ودار
ولن العمر ويه شاطي الحمّار
لا گيش بجزره وشلهه سباحه
والشط حدّار
يافي لعبنه ويا شناشيل الطرف
واحنه ازغار
يا فرحة دخول السنه ودار الحبايب تنزار
رد بيه يا ذاك العمر رد مشوار
يا دار اهلنه ولا حلت غيرچ دار

يا دار بس بينه الوكت مال وعال
وصرنه على لسان الخلگ
چلمة شماته وتنگال
اتلمس ذنوبي ذهب مامش دغش فد مثقال
واتنوع عيوبي نبع صافي وعتابه وموال
يا دار لولحني الوكت رمية غشيم ابمحچال
ولني بطرف غيمه ولا مصعاد بيها ومنزال
لا شرجي ويذبني المطر حالوبه من حال لحال
ولا شملت.. واتفسرت..؟
حتى المطر عام وحال
يا دار الحچي البلگلب ما ينحچي وحچيه اكبار
يا دار اهلنه ولا حلت غيرچ دار

زامل سعيد فتاح