ليلة علي الأكبر عليه السلام 😭
ليلة التاسعه

#الاكبر
9 محرم كأني بالحسين ع يخاطب زينب ع

علي طاح .. يزينب غدرو الاكبر علي طاح
علي طاح .. رفع جفه اوداعآَ يلولي صاح
برحيله انهدم حيلي .. ونهاري صار ليلي
علي طاح علي طاح
********
يزينب گومي ليه وعاونيني
بعد ما اگدر اوكف ساعديني
يريت الموت ياخذها سنيني
ولا شوفنه دامي بهاي عيني

من الجراح .. يون الگيته ياخويه من الاجراح
من الجراح .. يصب دمه ودليلي عالولد ناح
اريد هنا تجيلي .. ونهاري صار ليلي
علي طاح .. علي طاح
********
ادور بالجثث دلالي ذايب
واعاين والگه الاكبر عالترايب
صحت معقوله عني وليدي غايب
وتعوف حسين ابوك بهالمصايب

اعله اديه .. حضنته وراسه خليته اعله اديه
اعله اديه .. ويكلي فدوه الك روحي هديه
وجروحه تشتكيلي .. ونهاري صار ليلي
علي طاح .. علي طاح
********
يخويه من الدمه لا ماعرفته
شفتهه اعله الأرض مرميه جثته
يگوم يصد عليه شكثر ردته
اهوايه اذاني من طالت سكته

السفر وين .. ندهته تروح يابويه السفر وين
السفر وين .. گوم وياي وحدها النساوين
منو يبرد غليلي .. ونهاري صار ليلي
علي طاح .. علي طاح
********
شبكَته أبين اديه والوالد صاح
اثاري لجمته ياخويه الاجراح
يزينب شلته بيدي وهم رجع طاح
الشمر يضحك يگلي عافك وراح

يصيحون .. بقه حسين بغرب ضلو يصيحون
يصيحون .. وعله دموعي اونيني هم يشمتون
نمرد زينب دليلي .. ونهاري صار ليلي
علي طاح .. علي طاح
********
يزينب ارد انشدج عندي جلمه
شلون بهالوضع وانطيه لمه
ضايع بالدمه ومحجوب رسمه
وطفه نور الولد من سيل دمه

عله الهام .. اخاف تموت من تنضر عله الهام
عله الهام .. حنينه امه وعليها اهواي الالام
جروحه ضمديلي .. ونهاري صار ليلي
علي طاح علي طاح
********
شفت موقف يخويه شكَد جرحني
انحنيت اعله الولد بيده شبگني
مسح دمعاتي هاي التجري مني
وداعأَ گال يابويه وتركني

عالمصاب .. ملائك والارض ونت عالمصاب
عالمصاب وضوه حته الشمس من الحزن غاب
مشه روحي وخليلي .. ونهاري صار ليلي
علي طاح علي طاح
********
لخادم علي الاكبر (ع) سجاد الكربلائي





https://www.tgoop.com/alaa66klf

قصيده نزله للاكبر ع

الله اليستر من هديت. وبعمك من اتنخيت
ياابوو فاضل. ياابووفاضل
""""""""""
كلك غيره وكلك زود
وعندك رايه وعندك جود
بالعسكر رديت اردود

ومايرضه يقاتل. ياابووفاضل
"""""""""
بجسمك ربك حط الحيل
يمتعب رجاله وخيل
طارف عينك من تشيل

وتشوف الكافل. ياابوفاضل
""""""""""
لاترحم گلك عباس
گتله اتدلل يانوماس
عدهم كون تضيگ انفاس

ياهو الي يقابل. ياابو وفاضل
""""""""""
ماضلوا من صار ازماط
بالعسكر چن وحده الحاط
هوس هوسه وذب رباط

يم زينب واصل. ياابووفاضل
""""""""""
حيهم محد حي ويصيح
يگوم الفارس ضل ويطيح
جرد سيفه وصارت ريح

يبسها الحاصل. ياابووفاضل
"""""""""""
يتمرجل ضل بالميدان
غاير بيها بدون اعنان
الحافر يلهب چن بركان

والناس تسائل. ياابوو فاضل
"""""""""""
كرار وجده الكرار
سيفه وصوته يلهبن نار
الصد للأكبر ضل محتار

ياحرز الشايل. ياابوو فاضل
"""""""""""
حرز الكافل حرز حسين؟
ضلت تنشد عين بعين
ياهو الهد الهد منين

مايرضه يحامل
"""""""""
اسألكم الدعاء
خادم ابي الاحرار
ضياء الكناني





https://www.tgoop.com/pagy007

[ نعي الليله التاسعه ]

ــــــــــــــــ

يـ تاسع ليله مدري اشنحچي نتحيّر
علي ايموت و محمد وي علي الاكبر
هيچ حســين ضــل الليله ما يگدر
ينگل جـدمه گوه وجدم بي يعـثر

ــــــــــــــــ

سكنه اتگول شفته وحالته صعبه
علي من طاح أحسّن بي وگف گلبه
أول مـره اشــوفه ايتيّــيه ابدربه
گعد عنده يقبّل جســمه ويگلبه

ــــــــــــــــ

بس الفاگـد ابنه ايقـيّيم الحــاله
الأبو امن ايموت گبل اوليده اشواله
گعد يم ابنـه هيچ وگــام ينـعاله
مدري اشــچم عزاء حسـين سواله

ــــــــــــــــ

مهدي التقي






https://www.tgoop.com/pagy007

🌷9

علي الاكبر وينك شوف بويه بعينك
......___......
.....-----......
يوم تاسع من محرم بالخيم تدريهه
امك وزينب تريدك بويه صد اعليهه
وباجر اخلافك يغالي الهضم ياذيهه
انه حالي حال فاكد والدموع اجريهه
انته اغلا اولادي
يا شبيه الهادي
افراك بيني وبينك
.....___.....
.....-----.....
اه من تجفي يغالي شلون بويه بحالي
من بعد شخصك يغالي بس حزن يصفالي
شلون من اتروح مني وي كمرنه الغالي
وانطي وجهي وين عكبك للاه العالي
عمن بويه عيوني
الوحدي لتخلوني
يبني طاهر طينك
.....___.....
.....-----.....
حان الاوداع يلكبر بويه شاهد زينب
سكنه وعيالك يغالي بس تنوح وتنحب
و باجر النار ابخيمهن من بعدكم تلهب
عندي بس طلبه يبويه وانته كد المطلب
خلي اشمن نحرك
بويه ضمي الصدرك
ويل وفيت ابدينك
.....___.....
.....----.....
و نور وجهك ذكراني بالرسول الخاتم
من افارك وجهك انه الموت اريده ولازم
اليوم اشوفك عل منيه ها يبويه عازم
شلون بويه من اشوفك عله الغبره نايم
وياك تطلع روحي
وما ابطل نوحي
اشفت من اسنينك
.....___.....
.....-----.....
امودع ابرب البريه والمصايب مارعني
حتى لو ايوب مثلي هم جزع من الفني
فركتك هزت كياني ياعلي وزيدت وني
كلهن التمن عليه من عكب عينك واجني
وكلهن التمن سوه
ريتي غصت بالهوه
يل تركت احسينك
.....___.....
.....-----.....
حسن صالح العيساوي





https://www.tgoop.com/alaa66klf

( وداع الابن)

علي الاكبر من هوه حسين طاح إوياه سوه

كل ابو حاسب للأبد ابنه يظل إوياه سند
وحسين ظل ابلا ولد ودعاه ابنه ونِوه

اصعب لحظات الحياة ٱتودع ابنك للممات
تظل عايش حسرات والابن بالظلمه ضوه

حسين ودع عوده ويدري العزم بزنوده
وهد على الجيش ابزوده وضيگ عليهم الهوه

ابن غانم من گرب من علي راد الطلب
وجه ابو اليمه غرب وگلبه إعليه انچوه

نشدت ليله شل خبر يحسين شو وجهك صفر
ياليله گصداله بكر ايحسبونه احساب اللوه

صاحت ابجاه الولي ياربي رد ابني الي
من دون باقي اهلي من شوفه گلبي ماروه

صارت غُبره بالحومه لا خبر لا معلومه
ساعه وظهر جيدومه شاگ راسه والطاسه سوه

رد عليهم اردود ابن الفراسه والزود
التمت عليه ال جنود ومن الطبر سيفه إلتوه

سمع صوت اونينه ادركني يابو اسكينه
انجرح چبد احسينه وبعد ما ينفع دوه

ولگه الاكبر مچتول اتمدد الطول بطول
وياه وظل ابلا حول الفرگه صعبه والنوه


( جمعه الديلمي





https://www.tgoop.com/AlaaAlFahad8080alaa

( شبيه النبي)

يا رسول الله شببهك
طاح برض الحومه
او والده گلبه انكسر
من شاف فيض ادمومه



السجاد نادى الاكبر ياخويه الفرگه وعد
اطني ايدك خلني اگوم واعله صدرك استند
روحي ما ترضه يخوي اتروح وحدك منفرد
اتمنى وياكم اروخن احمي ظهرك من تهد
انت ماشي للحرب
بجفاك خليت الگلب
فوگ علتي زوديت أهمومه



من بني هاشم بطل صوته رج الوادي
انا علي بن الحسين وابن الامين الهادي
احمي اعيال الرسول وروحي لجله فادي
كلمن يعادي ابن النبي يعني لله إمعادي
اتركو هاي الارض
واستغفرو ابكل فرض
عساكم من امم مرحومه




صاح بيهم من زعل اليوم امرغ اخشومكم
ابوحل الهزيمه القاهره ومن دموم انحوركم
وٱتصير مأكل للوحوش الليله اخلي الحومكم
وسيفي ردد لي قسم سوء العذاب ايسومكم
البيه زود ليتاني
خله ايصيح هذا آني
إله اغير ارسومه




ابن غانم گال آنه والا بيك افجع ابوك
ادنه گله يابكر تره گومك غرروك
ايگولون تنعد إبألف وانت قدرك صَعَلوك
جابك المگبور حضك خلي ربعك ينقذوك
كر عليه ابن حسين
وهامته قدها نصين
وحز راسه اگبال ربعه وگومه




ابو اليمه صاح ابنچ يم علي ادعيله
دارت عليه اجموعهم وٱدري العطش هد حيله
بيَني لبينه الجيمان حالت مكر وغِيله
وسمع صوته ادركني وهد ابو السجاد متعنيله
حسين ذب روحه اعله روحه
داميه وتنزف جروحه
مسلوب درعه والطاسته وٱهدومه

حسين رد لمخيمه مكسور وبروحه الهم
يم عون خبري ليله بيتها اليوم انهدم
طاح الاكبر بالمعاره وصفك ايديه ونتدم
سكنه صاحت يويلي عل الاخو المشيم
حسين صَبَّر عليهن
الجاي اصعب يجيهن
لا تشمتن عُمر بيَّ وگومه




( جمعه الديلمي)





https://www.tgoop.com/alaa66klf

زلـــــزال… حملت علي الاكبر
من صال… صـوت النصر كبر
** * *
هذا ليث الموزمه.. سوه بالطف ملحمه.. سيفه ضل يگطر دمه
امن ادماهم
ضجه صارت نينوه.. ارماد طشهم بالهوه .. أظلمت وبــلا ضوه
خلاهــــــم
يبس ارياگ الزلم ... بيهم ايطش ويلم ... منــه مـا واحـد سلم
ذلاهـــــــم

بالسيف… خلص رگبـهم كر
زلـــزال… حملت علي الاكبر
*
ريح صرصر فزعته... نار كبره ابخزرته ... موت أحمر ضربته
ياويلهم
كل معسكرهم شرد… ماثبت منهم احد ... وگفته وگفت اسد
مابينهم
اگبالهم تاه المفر ... من درو سيفه انشهر … سوه من دمهم بحر
هد حيلهم

والجيش… من فزعته اتحير
زلـــــزال… حملت علي الاكبر
**
عل جحافل من يشد.. بروسهم يحصد حصد.. ذكر الگوم بأحد..
وبخيبر
بي مراجل حيدره.. وعمه سبع الگنطره.. اسد وگت الزمجره
ويتبختر
عاصفة نار ويهب.. سيفه ضل يلهب لهب.. منه كلمن يقترب
يتحــير

سجيل… يمطر على العسكر
زلــزال… حملت علـي الاكبر
**
فارس وحيد وكلف.. گابل السبعين ألف.. سوه بحر امن النزف
بطفوفه
ضهضب وهد ابزعل .. صاعقه الاكبر نزل ..موت موسيف انحمل
بچفوفه
ابينهم ضل يرتجز.. چن رعد صوته ويهز.. بكر ابـن غانـــم يفـز
من خوفه

ويگوم… مثل الاســـد يزئر
زلــزال… حملت علـي الاكبر
*
لو كشخ بمذهبه .. يبتســــم للنايبه .. يخسه جيش الناصبه
ايهز طوله
فرهه فر المسبحه.. لاچهم لوچ الرحه.. سوه بالطف مذبحه
وشهدوله
مايهم بكبر عدد.. اجموعهم صارت بدد.. يطلب امن الله لمدد
وينــوله

كـرار… وكت الحرب مافر
زلزال… حملت علـي الاكبر
**

الخادم
✍ كامل السعيدي





https://www.tgoop.com/AlaaAlFahad8080alaa

ليلة العاشر من محرم
ااااه يازينب 😭

فزاعية مجلس عبدالله الرضيع (ع) محرم 1444هـ
…
مذبوح جابولي الطفل
الله ايكون ابعوني
….
صعبه علي يالغالي
جابوك يبني تالي
منظرك يتراوالي
ذبحوك يبني تالي اوفجعوني
….
اوليدي اجاني منذبح
اودمه يكت اومنسفح
للابد يبقه هلجرح
ياريت انه يالولد ذبحوني
…
هلطفل ماعنده ذنب
واعليه دمعي دم يصب
موقف علي كلش صعب
امصاب الولد ساطرني اعله اعيوني
…
امصابك يعز اعليه
والدهر غادر بيه
فتح اعيونك ليه
اوعاين ييمه اعليك شاحب لوني
…
امصاب الطفل بجاني
واتهيجت احزاني
مذبوح رد اوجاني
مذبو ح طفلي كان الله ابعوني
….

ام احسان الخاقاني





https://www.tgoop.com/pagy007

مربعة مجلس عبدالله الرضيع (ع) محرم 1444هـ
….
حبيبي يا حبيبي طفلي يالغالي
عله فگك ييمه مدمعي هالي
…..
صعب يبني اشوفك سابح ابدمك
هاك ارضع يغالي من صدر امك
در يبني لبنها اوجايه يمك
تگلك يمه ماجانت عله بالي
….
ماجانت ابالي يالولد يبني
اشرفنك ترد مذبوح تفجعني
امصابك يا حبيبي حيل لوعتي
دمعي ما يبطل يضل للتالي
….
يفطمونك ييمه ليش يعيوني
ليش الياسبب يمه اويفجعوني
عله طفلي اوحبيبي منخطف لوني
ترد ليه ذبيح ايجيبك الوالي
…
ترد مذبوح يبني اوشابحه اعيونك
لبالي ييمه العده ايرحمونك
تاليها ييمه ابدم يسبحونك
يا نور البصر يوليدي يالغالي
….
يزينب عمته شوفيني اشبيه
صبريني تراني حيل مابيه
ضيم الدنيه كله جلجل اعليه
تشب نيران فگد ابني ابدلالي
…

ام احسان الخاقاني




https://www.tgoop.com/alaa66klf

نعي لزهراء وهي تنعى الحسين ع


وحك الما لها كبه واحضره
احاجي الماتهل عينه واحذره
اتعنه الماتم اوليدي واحضره
واشوف الي بجه والون عليه
................
وينه الصاح يامظلوم يحسين
الناصب ماتمه وياي يحسن
عيونه لو بجه بيه يحسن
يشوفني من ادك باثنين اديه

نعي

اتعنه يشيعه المأتم ابني
وانكل اجدامي عله اليحبني
انه جايه ولحسين وني
............
انه جايه واسحل بالاجدام
باثنين اديه الطم عله الهام
يلجمن بضلعي ذني الايام

............
وينه اليهل وياي عينه
انه كاعده واسمع ونينه
والصاح زينب ياحزينه
............
يفطر دليلي الصاح زينب
وعله مصابها اسمع تنحب
صايح يزينب والدمع صب

............
نحيلة حيل خلاها دهرها
كسره الدهر زينب كسرها
محد جرع همها وصبرها
.............
يمحبين كلكم ساعدوني
عله ونت اوليدي عاونوني
مصيبة كربله شلعت عيوني

.✍ام زينب كربلاء غير مبري الذمه من ياخذ الكلام وينسبه له او يحذف الاسم من كتاب المآسي الفاطميه





https://www.tgoop.com/pagy007

نعي الليله العاشره ليله الحسين ع
**
ضل حسين وحده ايدير بالعين
ولا ناصر بكاله ولا بكه امعين
اعله حسين الزلم ملتمه صوبين
اشبيها الخيل داست صدر الحسين


ذبلان ذبلان وجها امن الشمس يا ناس ذبلان
عطشان عطشان. اشلون ايموت اخوي حسين عطشان
ميدان ميدان. لعبت فوك صدره الخيل ميدان
عريان عريان ثلث تيام ضل حسين عريان

بالمجاتيل بالمجاتيل. ادورنه رحت بين المجاتيل
اشمالها الخيل اشمالها الخيل هيج امكسره صدره اشمالها الخيل
يهدم الحيل يهدم الحيل حال حسين كلش يهدم الحيل
لو جلجل الليل لو جلجل الليل اتعنه للجسد لو جلجل الليل

امسلبينه امسلبينه. حرام حسين صحت مسلبينه
كاسرينه ضلع لحسين بالطف كاسرينه
ماخذينه. تره المحبس امن ايده ماخذينه
كالبينه جا ليش اعله وجها كالبينه


ويسيل دمه. ويسيل دمه لكيته اعله الترب ويسيل دمه
جسمه جسمه. انه امن الكاع الم اشلون جسمه
ونحت يمه ونحت يمه. لفيته بعباتي ونحت يمه
من الزمه من الزمه. اخاف الجم اجروحه من الزمه

ما يحجي وياي. حاجيته اشكثر ما يحجي وياي
مو عادتك هاي. صحت يبن امي ابد مو عادتك هاي
ما شارب الماي. صايرله اشكثر ما شارب الماي
سويتله افياي. عله جسمه اوكفت سويتله افياي

**
الشاعر
تحسين الخفاجي





https://www.tgoop.com/pagy007

يوم العاشر موت // وحسين ابلا صوت
داست صدره اگبالي الخيل
هالموقف هـد مني الحــيل
يوم العاشر موت
   
©©©©©
رد ميـمونه …. خالــي ابـدونه
شفته وحدب ضهري ابهاي
هلت عيني .… الفگد حسيني
وضلـت تهمـــل دم اومــاي
امن الخيم صحت ابصوت ضليت احاجيه
في الك طـــــولي اليوم يحســــين اسويه
كم وصله جسمك صــار وشــكم جرح بيه
وللسلب ثوبــك ناس تتـــــراكض اعلــــيه

لاتبطي عنه اشعطلك
ضيمي اهواي ـ رد اوياي ـ ياخويه يحسين
ياماي عينـي اتوسلك
شيل الواي ـ كثره اعداي ـ حاطتني صوبين

عاتبته ابمبچاي … ويجاوب بهداي
گلي اتعـــــــذر منچ حيل
هالموقف هد مني الحيل
يوم العاشر موت
          
©©©©©©

فاضت روحه …. كثره اجروحه
شفته امــــــــدد عالتربان
رحت اتعــــثر …. ظهري امكسر
هد حيلي اصواب الوليان

امعــذب دليلي اهـواي ومشــيب الراس
لايمي اخــوي احســــــين لايمي عباس
حرمه وحــرت مابين خيل ودمه وناس
عگب الاهل ضليت مجروحه الاحساس

الف وتســــع مية جرح
ابجسمه الگيت ـ وحتاريت ـ شيضمد الجروح
نوره امن ألمخيم يشح
صعبه اهواي ــ تاه الراي ــ ومعذبه الروح

وحدي ابنص اجناب… والعدوان اذياب
نسـوه وغـربه وخوف وليل
هالموقف هــد مني الحـيل
يوم العاشر موت

©©©©©
جسم احسيني …. شفته ابعيني
رضنه اخيول العدوان
كســــرن ظلعه …. وسـلبو درعه
وظل امطبر بالميدان

مـن كثر طعن السيف لا ما عرفــته
شيـبت مــن بلــــواي لمن وصــــلته
اســــــمع يون بهـــداي لمن حضنته
ولن خنصره مگطوع بعيوني شفته

من حاطته اخيول الكفر
من كل صوب ـ حتى الثوب ـ من عنده سلبوه
طلعن بناته امن الخيم
صاحن صوت ــ گبله انمـوت ــ والدنه خلوه
هذا ابن الزهراء …. لتسفكون ادماء
ومدمعهن عالوجنه ايسيل
هالموقف هـد مني الحــيل
يوم العاشر موت

©©©©©©

ارجـــع وآني …. ابلايه اخواني؟
من هاي اهون عندي الموت
اشلون الغالي …. ايمـوت اكبالي
وما احمل نعشـــه ابتــابوت

مـن زغــر سني المــوت ياريته اجاني
اولاشوف اخوي حسين ينذبح ضامي
بالطــف تركنـــي وراح زهـــرة زمــاني
ما يـــدري بالچـــــــتال مــن شتــماني

وتحيــــريت ابغربتي
ابلايه اخوان ـ والنيران ـ شبت بالخيام
وطفالي فــرت بالفله
مــذعورين ـ ملچومين ـ من هول الايام

عندي اهواي اطفال …. امضيــعين الكفال
شافو بس سوط وتكبيل
هالموقف هد مني الحيل
يوم العاشر موت
©©©©©©

لو چن ليلي ــ ينهد حيلي ــ اول ليله اتمرني ابخوف
ليل الحادي ــ ابهذا الوادي ــ مرعوبه اومابين اصفوف

ماضل شــــريف انخاه اويفزع اليه
يحرسلي هالنسوان من جيش اميه
لاســــــتر لاصــــــــــيوان خلو عليه
وخــــواني عالتـــــــربان كلهم رميه

ضعيت چم طفله وطفل
بين الخيل ــ بهذه اليل ــ ما عندي كفال
يرضاهه سبع الگنطره
ايضل مطروح ــ وخته اتروح ــ مچتوفه بحبال

بعده اتستر بيش ــ وآنه ابنص الجيش
اخلاف الكافل شفت الويل
هالموقف هـــد مني الحيل
يوم العاشر موت
®®®®®®

الخادم
كامل السعيدي




https://www.tgoop.com/alaa66klf

#الحسين
10 محرم كأني بالسيده زينب تخاطب
الحسين (ع) ليلة العاشر عندما ودعها

تودعني يحسين ياخويه و تروح
لو تمشي للموت جا شلي بالروح
باجر اضل بلا سند .. وي ضيم الجروح
لتعوفني بنوح .. لتعوفني بنوح
****
هاي آخر ليله يمك ارد ابوسك بالنحر
ودمعة الاطفال تنزل وگلبي نصين انفطر
شلون بينه بغرب باجر وياخذك مني القدر
ومن إندبك وابجي وانعه خدي يحسين انصطر

بس الاشد هاي ها كافلج وين
وتزيد الالام يشتموني يحسين
شلون اصبر كَبال الرمح .. والراس مذبوح
لتعوفني بنوح .. لتعوفني بنوح
****
اكعد وياي ارد اسولف عالخويه البالزغر
لا أبالي تروح عني ولا ابالي امشي زجر
وياك كل ضني يخويه اگضي لحضات العمر
مادريت البيهأ اختك ما كلت شنهي الأمر

محتاره عالكاع لو باجر اطيح
شلون ابقه وياك واطفالك تصيح
تعذرني اعيفك عالثره .. بس جثه مطروح
لتعوفني بنوح .. لتعوفني بنوح
****
عگب گعدتنه وحجينه ما اريدنها الحياة
خويه ترضاها حميتك عالترب خدي يبات
سياط والالام وسبينه جروحنه وهم نايبات
طلبتي وياك أروحن خل يوافيني الممات

يحسين اخذني لصدرك اشمه
شگد شايل جروح جرحي دضمه
يالبيك عطر امي صفه .. وبصدرك ايفوح
لتعوفني بنوح .. لتعوفني بنوح
****
باجر أبين اليتامه وحايره بوسط الغرب
من اشيلن طفل يوگع طفل ثاني وينضرب
سكنه خويه تلوذ بيه من الشمر لمن گرب
وفاطمه كل لحضه تسأل والدي منين الدرب

والدمعه تهمل من كل العيون
ومساهره الليل مانامت اجفون
طفالك تحشم ما تجي .. عالگاع مطروح
لتعوفني بنوح .. لتعوفني بنوح
****
مگيده باجر اديه ويا هو اليفل الحبل
جبراََ اعله الناگه اصعد وستر ماكو اعله الهزل
والاشد من هاي كلها ونار گلبي تشتعل
من التعب لو طفله وگعت ما رضوها تنحمل

يضربون السياط اعله متون الاطفال
وياعمه ويلاه تتشكى هالحال
وشگد اشاگف بالضرب .. وسوط العده يلوح
لتعوفني بنوح .. لتعوفني بنوح
****
من اطب ليزيد ينشد وين زينب كافلج
وين الحسين وحميته ليش عافوج اخوتج
لا أهل لاكو عشيره وهسه صرتي بغربتج
جنتي اميره بجال اخوتج هسه ذبلت وردتج

وبمجلس ايزيد تنضرلي الارجاس
باجر يصيحون جاوينه عباس
يشمتون جي دمعي يهل .. بخدودي مسفوح
لتعوفني بنوح . لتعوفني بنوح
****
لخادم الحسين (ع) سجاد الكربلائي





https://www.tgoop.com/pagy007