كيف أكتب بحث بمساعدة AI؟
في كمية مهولة من الأبحاث بتطلب مننا كطلبة في الجامعات وبكون مصدرك الشبكة العنكبوتية بس لمن تبحث بتلقى مصادرك المتوفرة هي ويكبيديا ومواقع ما فيها فائدة رهيبة.
بعد ظهور أدوات الذكاء الصناعي إتسهلت الحكاية دي والحمد لله.
أهم حاجة هي كتابة الأمر بصورة صحيحة عشان يديك نتائج كويسة، ممكن تغير الصيغة أكتر من مرة لحدي ما تحصل على النتيجة المُرضية ليك.
وبرضوا لغة الأمر مهمة شديد، نحن عندنا نقص كبير في المصادر العربية، فكونك تحصل على معلومة بالعربي وموثوقة صعبة شديد عشان كدا بنصح إنك تستعمل الإنجليزي للبحث وتترجم(بالطريقة البتعرف ليها) بعداك.
ممكن برضوا تستفيد منه إنه يديك أسماء مراجع تستفيد منها في الصور؛ الدكاترة بحبوا صور المراجع.
طبعََا تطبيقات ال AI الممكن تستفيد منها كثيرة شديد وأنا بستعمل حاليََا CHAT GPT بس المجاني لكن المدفوع أكيد أرهب وبديك خيارات أكثر وممكن تشوف GENIMI أو الحاجة المتوفرة عندك لكن صراحة META AI ما كويس في النقطة دي ومصادره بسيطة وما وافية.
ونصيحة نصيحة البحث ما تخليه كتابة وبس لا أفهم البتكتبه عشان تستفيد.
#عشان_نتعلم
#آيه_حسن

اللهم لا تجعل مصيبتنا في ديننا ولا تجعل الدنيا أكبر همنا.
#عشان_نتعلم
#علمني_دعاء
#آيه_حسن

كطالبة من طلب جامعة الخرطوم حاجاوب بنزاهة وبناءََا على تجربتي.
المرة دي حأتكلم بتسلسل مختلف ما بنسبة التصويت.
__
لمن إمتحنت شهادة وجاني قبول من جامعة الخرطوم كلية الطب البيطري صراحة حسيت برهبة شديدة وللآن بحس بيها للآمانة.
رهبة من المكان والناس؛ المكان بالنسبة لي كان حاجة مقدسة شديد والناس كنت بشوفهم ناس مبرزين شديد (ودا ما بنفي وجود ناس مبرزين في جامعات ثانية).
-
موداهم العلمية كويسة :لمن خشيت لقيت موادنا العلمية صعبة ومليانة معلومات بتأسسك كطالب بصورة كويسة وبتخليك عارف حاجات كتيرة وحتساعدك تختار مجال تخصصك بعدين.
الدكاترة الواضعين المناهج ديل للآمانة ناس بعيدة شديد وكل واحد متخصص في جزء مختلف ومجتمعين في قسم واحد فتخيل موادهم العلمية كيف (التنوع بولد الإبداع).
_
بعدها بقيت بعاين للدكاترة ديل شوية، لقيتهم زي ما ذكرت ناس فاهمين، مليانين علم.
يمكن بعض منهم ما بعرف يوصل المعلومة كويس بس لمن تركز بتفهم.
ومختلفين في درجاتهم العلمية فهناك حتلقى المحاضر، الدكتور، والبروف وحتى الأُستاذ فحتفهم يعني حتفهم.
--
أجي لي أهم نقطة وهي مجتمعهم فأنا لمن خشيت الجامعة كنت متخوفة شديد من مجتمع الجامعة عشان شخصيتي مقفولة شويتين. بس لقيتهم ناس ما بتعدوا حدودهم مع بعض ومتكاتفين شديد ودا ظاهر شديد في إضرابتنا الما بتخلص وتحديدََا البتكون بسبب الرسوم للناس اللسة ما دخلوا. وناس راكزين وعندهم مستوى وعي فردي ومجتمعي عالي تبارك الله.
وصراحة وللأمانة أنا جزء من أفضل دفعة على الإطلاق في كلية الطب البيطري بشهادة الكلية كلها وهي الدفعة ٨٣،دفعة متكاتفة همها بعض فهي أفضل mini community في الكلية وعلى مستوى الجامعة كمان.
في الختام بقول إذا إنت عايز تمشي بفهم وتتأثر بمجتمع بمثقف ومتعلم بصورة كويسة وناس قريبة من مستواك الفكري تعال الخرطوم؛ حتشوف مجتمع متنوع من الناحية الثقافية، التعليمية،البيئية وحتى السياسية (بس أبعد من السياسة😂).
#عشان_نتعلم
#آيه_حسن

السودان ما مُحتاج دكاترة!
من كنت صغيرة وللآن نسبة كبيرة من الناس اللاقيتهم في حياتي كان حلمهم يبقوا دكاترة ولمن كبرت لقيت نص السودان دكاترة.
ياخ عندنا هوس مرضي بالطب.
في السودان عندنا إكتفاء ذاتي من الدكاترة جد والله أي زول قرر يعمل كلية أو تخصص بخته طب طب ليه؟
باقي التخصصات هامشية شديد والله وللأسف أهم التخصصات نسبها بسيطة، خصوصََا التربية مع إنه نهضة اليابان والصين والدول الرهيبة دي كانت بالمعلم، بوقروا المعلم وعندهم أصعب إمتحان هو إمتحان قبولك في كلية التربية بس نحن العكس تمامََا؛ وبعدها بنجي نشتكي من إننا ما بنفهم من الأستاذة يا عزيزي هم ما مؤهلين أساسًا زي الناس(أساتذة زمان معتمدين على خبرتهم بس الجيل دا حيسوي شنو؟).
نحن محتاجين لمجالات ثانية وأغلبها أدبية، عايزين ناس بتفهم كيف بيقودوا الدول، كيف العلاقات العامة بتتبني وكيف بتأسس مؤسسات دولة سواء مالية أو غيره بصورة كويسة.
بس طبعََا كلامي دا ما بعني إنه ما تقروا طب، لا بالعكس حققوا رغباتكم بس إنت هل شفت خيارات ثانية؛ يمكن تعجبك.وما تدخل مجال الطب بس عشان رغبتك عشان صدقني حتتعب شديد، إذا مستواك الأكاديمي ما أحسن حاجة وما قادر ترفعه شوف مجال ثاني.
نحن بنعاني شديد من الأخطاء الطبية السببها دكاترة ما مسؤولة وما مدربة وإذا وزراة الصحة طلعت تقرير بوفيات الأخطاء الطبية لآخر ١٠ سنة حتشوفوا شعاع(طبعََا غير الما مسجلة).
عايز تقرأ طب عشان القروش ما تقرأ؛ ما حتقدم حاجة للمجتمع.
كلامي دا يمكن ما يعجب ناس كثيرين لكن دي الحقيقة.
#عشان_نتعلم
#آيه_حسن

.

من أكثر الحاجات الكان نفسي أطورها قبل فتوة الجامعة والحتحتاجوا تطوروها هي soft skill أو المهارات الناعمة وهي بتشمل التواصل الفعّال وغيره.
بس كيف قدرت أطورها بصورة مُرضية بالنسبة لي؟
الموضوع أبد ما كان هيّن فأنا إنسانة ما بحب إختلط شديد بالناس ولا بعرف إتعامل كويس.
وقتها كان عندي هوس إني أطور نفسي في نقاط معينة وكان تطوير شخصيتي من ضمنهم فبحثت عن الموضوع وعن كورسز أو برامج تدريبية للحاجة دي.
لقيت كورسات في معارف، إدارك وغيرهم بس أكثر واحد كان بسيط وغيرني هو كان من مؤسسة الغرير وهي مؤسسة إمارتية تقريبََا عندها إهتمام بتطوير حاجات كثيرة في الفرد وأهمها المهارات الناعمة بس للأسف العمر محكوم (كان ١٦ سنة وقتها).
وأهم حاجة هي تطبيق الإتعلمته ودا كان الجزء الأصعب بس بديت أكسر الحاجز دا. طبعََا كوني طورت المهارات الناعمة حقتي ما بعني إني إندحت مع الناس! لا أنا وصلت المستوى البضمن إني أكون علاقات هينة وما تتعدى حدودي البسمح بيها والكورسز دي ساعدتني أرسم حدود أوضح أي زول إتعامل معاي ما بحاول يتخطاها.
--
في الختام؛ تطويرك لنفسك بشمل حاجات كثيرة بس كلها بدون شخصية بتمتع بمهارات ناعمة ما حتقدر تبرزها، فحاول تدرس نفسك وبعدين تطورها.
#عشان_نتعلم
#آيه_حسن

السلام عليكم ورحمة الله وبركاته
المنح الدراسية فرص كويسة شديد لتبادل المعارف والثقافات ولازم تعرف إنه ما أي شخص بتتاح ليه الفرصة.
لمن خلصت دراستي الثانوية بديت أشوف برنامج المنح ولقيت أغلبها بتمنح للطلبة المتفوقين أكاديميََا ودي حاجة طبيعية عشان ما في زول حيمول زول ما متهم بدراسته.
بعده لقيت في حاجات بتقوي ليك فرصة قبولك وهي المهارات بأنواعها سواء ناعمة أو خشنة:المهارات الناعمة زي التواصل الفعال وغيره والخشنة زي إستخدام الحاسوب أو معرفة اللغات الأخرى(تحديدًا الإنجليزية) بصورة كويس.
وبديت أطور لغتي الإنجليزية( وحأكتب ليكم بوست بإذن الله بالطريقة ) ودخلت كورسز حاسوب أونلاين وأهم حاجة هي كورسز البرامج المكتبية زي power point and word.
بعد ما حسيت نفسي بقدر أقدم للمجتمع جيت للبارت حق التطوع وتطوعت في منظمات ومبادرات بس أهم حاجة إنك تطوع في منظمة مسجلة في العون الإنساني (عشان شهادة التطوع) وواصلت فيه لفترة الحمد لله.
وطبعََا بعد تقرأ كتير بتظهر ليك ميولات جديدة زي التنمية المستدامة وغيرها فبحتث عن الموضايع البتهمني وأخدت فيها كورسز بشهادات مُعتمدة (الشهادات بتنفعك) .
بعد كدا جيت لموضوع الcv عملته بنظام ATS وكنت كل مرة بجدد فيه الحمد لله.
وبعد كدا جيت لموضوع الخطابات، خطاب النية الحمد لله في كل المنح القدمتها كتبته براي وخطاب التوصية تحصلت عليها من أساتذة ودكاترة جامعيين ومنظمات والشهادات الطبية من طبيب.
أهم حاجة لازم تعرفها إن موضوع المنح ما ساهل عشان ما في جهة أو منظمة حتديك دعم مالي بالصورة دي وإنت شخص غير مسؤول فلازم تشتغل على نفسك وتوريهم من خلال شهادات، الcv وأثناء الإنترفيو إنك بتستحق دعمهم.
ولسة مواصلة في تطوير نفسي بالصورة البتناسبني وبإذن الله خير.
#عشان_نتعلم
#آية_والمنح
#آيه_حسن

▪️صارحني لتلقي النقد البنّاء بسرية تامة

▫️ هنا يمكنك إرسال أي رسالة إلي , أنا مستعد لمواجهة الصراحة 😅 .
-

لأي سؤال في موضوع المنح وغيره إن شاء الله 🌟

بذكر نفسي وإياكم إنه كل محتويات القناة المُفيدة صدقة ووقف لوالدي حسن علي صالح رحمة الله تغشاه 💙.
فإن أصبت فمن الله وإن أخطأت فمن نفسي والشيطان.
ربنا يرحمه ويغفر له ويحشره في الفردوس الأعلى مع الصديقيين والشهداء وحسن اولئك رفيقا ✨.
#عشان_نتعلم
#آيه_حسن

💌 لقد تلقيت رسالة جديدة
✉️ المحتوى : ↓↓
السلام عليكم ورحمة الله
كيف حالك ي ايه ان شاء الله طيبة
انا طالبة ف سكول 022 😀
لو سمحتي عايزة اعرف اكتر عن موضوع المنح وعن تطويرك للغتك الانجليزية
وشكرا❤️
----
💡يمكنك الرد على هذه الرسالة .
____
عليكم السلام ورحمة الله وبركاته
طيبة الحمد لله، إنتِ كيف حالك؟بإذن الله حأتكلم عن الموضوعين قريبََا بإذن الله 🌟.

DIECT DICTIONARY
أفضل dictionary لطلبة المجالات الطبية وعموم الناس 💣.
كطالبة مجال طبي كنت بعاني إنه أغلب تطبيقات الترجمة ما بتترجم كويس، أحيانََا ترجمة حرفية للكلام وأحيان ثانية ما تقدر تترجم لحدي ما دلتني إنسانة جزاها الله خير على التطبيق دا.
تطبيق ترجمة OFFLINE بس فيه ميزت زيادة في حالة وجود نت. مع الترجمة بجيب تعريف، مُرادفات، جُمل، ورسومات للكلمة البحثت عنها.
فيه ميزة حلوة شديد وهي الظهور أمام التطبيقات فممكن تترجم به وإنت فاتح شيتك في التلفون عادي جدََا،
بس عيبه إنه ما بشتغل في الأجهزة اللي تحديث نظامها قديم شديد.
#عشان_نتعلم
#تطبيقاتي
#آيه_حسن