چم مريم

ترسم فرگتك كل معاناتي       ياهو اليطفي وياي خيماتي
ياصاحب الجود         تمنيت موجود
**
تفارگنه وفراگك صعب     وعيوني ظلت عالدرب     يالماخذ وياك الگلب     وينك
ارجعلي مو وكت الهجر   محتاجتك خويه شكثر   عباس اجه بسوط الشمر   وينك
مو طبعك يبو فاضل               زينب ما تحاجيها
انهض حرگو اخيامي              وگوم وياي طفيها
اليتامه عله الجمر داست    وخويه انجوت رجليها

محتاره بين الخيل ويتامي      والنار ياعباس بخيامي
ودمعي عله الخدود         تمنيت موجود
*****
بجفاك كل حيلي انهدم     تانيتك اشگد بالخيم    انهض يشيال العلم     لينه
فرگنه ياخويه الدهر     واختك يعباس بخطر    مارجع من عندك خبر     لينه
مابين الزلم والخيل        نركض والدمع يجري
وينك يالجبتني وياك     ياخويه انسلب خدري
الزينب حضروها النوك         ياعباس ماتدري

اشلون بيه من اصعد الناگه      وما ضن بعد عباس نتلاكه
ومانرجع اردود     تمنيت موجود
**
من خذت جودك ورحلت     والماي اجيبنه گلت      عباس خويه طولت    تدري
تعنيت يم المشرعه     وشفت الجفوف مگطعه    شيحملها هاي الفاجعه   تدري
اجيتك خويه شجايه      وصحت انهض يبو الغيره
ومن شفت السهم بالعين       طحت وكبرت الحيره
عگبك يا ابوفاضل راح        من ديره انسبي الديره

ما اريد اعوفك ورجع بدونك      عباس ايتامك يتانونك
يردونك تعود      تمنيت موجود
*****
من طحت حسيت بخطر     حسين اعتنالك للنهر    منك رجع محني الظهر     حاير
شيب بساع بفرگتك        وطيح يخويه خيمتك        بعينه يدير بغيبتك        حاير
ضعنه بطيحتك عباس            وحسين انكسر ظهره
وعلى صدره الشمر شفته           خويه يگطع بنحره
شال اعله الرمح راسه        وبالخيل انسحگ صدره

ضامي انذبح ومسلبه اهدومه   ومن الشمس متغيره ارسومه
والجبد ممرود        تمنيت موجود
*****
من بعده مفجوعه صرت  وين انطي وجهي تحيرت  عالمشرعه بعيني درت   ردتك
خويه تمنيتك عدل     من صعدوني عله الهزل     وبجفوفي عباس الحبل  ردتك
شافوني العده عباس          الما ينشاف ابد ظلي
تتفرج عليه الناس          او وين خوانج اتگلي
وبعد ضيم السبي والشام    بيه شرايح ايخلي

مسبيه راح امشي وعوفنك    وماضن بعد عباس اشوفنك
الاخو مفگود        تمنيت موجود
*****
تمت
ميثم العمري

صاحب الجود

منهـاج محـرم الحـرام ١٤٤٧هــ

( للخـــدمـــه)

لاوين اروح ومن اضل وحدي
هوه الوسيله اوغيره ماعندي
        انطي الوجه وين
        من دون الحسين
اوغيره ماعندي    اوغيره ماعندي
-------------@@@------------
حسين عافيتي وانه بلاعافيه بدونه
حسين ماعايفني لحضه اوتبره الي عيونه
الي ماعنده حُسين ابدنيته اشلونه
وين يتلفت عليمن منهو اله عونه
   ساكن أمامي بگلبي وابروحي
   هوه طبيبي اوبلسم اجروحي
            يوليني البين
          من دون الحسين
اوغيره ماعندي   اوغيره ماعندي
------------------@@@-------------
راحتي وانسه انه تعبي لو رحت يمه
اتردلي روحي لو ضريحه عطره اشتمه
گلبي يم ابن الزچيه يجلي كل همه
خدمته ذمه ابرگبتي اومحله هالذمه
    بس هوه اليه اوما اريد اكثر
     شنهو اليريده العنده ابو الأكبر
           ما اعشگ اثنين
            من دون الحسين
اوغيره ماعندي    اوغيره ماعندي
-------------------@@@----------------
وجهي لاوين انه اديره ابليه محبوبي
اوهوه نور الي يضوي ضلمة ادروبي
تعكس الدنيا من اعوفه اوتمشي مگلوبي
لوختم كتب الخليقه اوعاف مكتوبي
      عشگه تجاره اوتربح الصفقه
      اوكلمن يعوفه الله ميوفقه
           ريت اتعمه العين
            من دون الحسين
  اوغيره ماعندي    اوغيره ماعندي
----------------@@@----------------
ابدون ابو السجاد عمري ما اعدنه
لون ماابچيله دمعه ولا اجر ونه
عمري ينعد بالمجالس والهه اتعنه
خادم اوموتي ابخدمته هيچ اتمنه
   الطمه اعله صدري هذا موضوعي
     لضلوع امامي اكسر اضلوعي
           ما اوفي الدين
           من دون الحسين
اوغيره ماعندي      اوغيره ماعندي
------------------@@@--------------
صعبه من يزعل عليه اوخالي رد چفي
الزهره تحضر بالمجالس وانه ما الفي
ياعذر ساعته اگوله اوشنهو اليكفي
لو اضحي بعمري كله احس ما اوفي
     شنهو العذر من فاطمه الزهره
     والعاف ابنهه ايطيح كل گدره
           چا گدري امنين
            من دون الحسين
  اوغيره ماعندي   اوغيره ماعندي
---------------@@@-----------------
لو متت واهلي ابحفرتي هالو اترابي
لو مشت من عندي كلهه اهلي واصحابي
ماكو انيس اهناك اليه وشنهو اجوابي
وتارك انه الماتركني واغله احبابي
    كون انه اريده لومتت باچر
   بالوحشه ابو السجاد الي حاضر
          والموت مو زين
           من دون الحسين
اوغيره ماعندي    اوغيره ماعندي

لخادم الأمام الحسين
       الشاعر
ابو عبدالله الشمري

نعمة الحسين ع

ابدي بدللول وتلچمني چلمات
المن تلولين يم الولد مات
لوليدي مايرهم ذبح     راسه زغير اعله الرمح
...............................
ها يالمشيت وروحي ضلت عندك
يكتلني يا عبدالله فارغ مهدك
حسبتك انخلص عمرنه انه اوياك
ياورده موش اولام نومة لحدك

اهزن بالمهد وادري المهد خالي
عبدالله نساني وخابت آمالي
الولد يهل الولد تدرون بي غالي

گالولي مذبوح واصرخ سلامات
المن تلولين يم الولد مات
وبحالتي ايطول الشرح. لوليدي مايرهم ذبح
........................................
من يغفه جان اتضل اله مشتاگه
روحي اولا متعوده اعله افراگه
حاجيني رايح واكبل اليل اشلون
وفرگة الموت البيهه ما نتلاگه

متعوده اشوفك يبني واشتمك
واناغيك وتفر مابين حضن امك
هسه ابين اديه وسابح ابدمك

يالعمرك اكماط وآخرته نشغات
المن تلولين يم الولد مات

الرگبه اقل من الجرح.    لوليدي مايرهم ذبح
........................................
لحضيني رد وعوف يايمه الماي
لاج الدليل ابروحتك يبني اهواي
كلما اتطول ردتك زاد الخوف
بالمشرعه امتانيك سهمه الرماي

بالدنيا شلي غيرك يعبد الله
اعله نحرك خايفه الرمايه توصله
ياشريان روحي اعله سمك اصمله

والموتتك هاي بانت علامات
المن تلولين يم الولد مات
ياموتي كونك تنجرح    لوليدي مايرهم ذبح
.......................................
بليل  افز  ويفز  حنين  البيه
واتدني كاروكك اجفوفي اعليه
وبلا شعور افتر وادور بالبيت
هلبت اگول اوليدي عود ليه

ابكثرما هلت وناحتلك اعيوني
على الگومه عبد جيب اليكوموني
اشعندي غيرك وبالطف يفجعوني

خليت الادموع بعيوني اتبات
المن تلولين يم الولد مات
يانعمة الله لاتشح     لوليدي مايرهم ذبح
.........................................
ياطفهم اتلجميني شمسويه اوياج
وگليلي عبدالله الطفل بيش اذاج
هذا الاعز تدرينه حتى من الروح
ام البله حگه الحسين السماج

يذباح الرضيع شبيك وشمالك
تگطع منحر ابني وشنهي سوالك
يعبد الله الرمح ما ضنتي كفالك

راسك اثر بيه للرمح فتحات
المن تلولين يم الولد مات
عينك اگبالي وتنفتح.    لوليدي مايرهم ذبح


خادم اهل البيت علي الزرگاني

وردة المهد

#أنت_موضوعي



. مــا عندي غيرك موضوع   نـوح ومـجـالـس ودمـوع

                     نـاذر حـيـاتـي لــ خدمتك
                     مـتـهـمـنـي نـاس العافتك

                         *---------------*---------------*

ما تـنـحـزر بـعـض البـشـر   مــا اخـلـي ايـدي اعلـيـهـه
خـلـيـت ايدي بـخـدمـتك   وبـس عـشـرتـك شـاريـهـه
الــــوادم اتــروح و تـجـي   الـخــدمـه ويــن ألـگـيـهـه
وفـقـنـي أظلن بـالــعــهــد   وعـالـكـلـمـه مـن احچيهـه

  مـــاهـمـن لــ كـل الـنـاس   اتــفــاخـــر ورافـــع راس

                     ملكت شعوري امحـبـتـك

                        *---------------*---------------*

يـالعشـرتـك عـشـرت وفـه   بـطـعـم الـدمـع مـمـلـوحـه
كـلـش قـلـيـل لـحـضـرتـك   الـخــادم يـــقـــدم روحــه
الــــوادم إتـحـب الــفـــرح   مـحـد يـحـب اجــروحـــه
مـخـتـلـفـه أحسّن حالـتـي   راحـت دلــيـلـي ابـنـوحـه

  احچيهه الك يالمحـبـوب   يكفيني دمعي المصبـوب

                     موبيدي روحي العشگتك

                        *---------------*---------------*

ويـــاك اريـدن دمــعــتــي   وغـيـرك فــرح مـــا ٱريـده
خليني بـصـفـوف الـخـدم   ومــن الـخــذاهــم بــيــده
مــن الــيــســلــم رايــتـــه   ويـنـطـيـهـه بـيـد اولـيـده
آخـــر حـيـاتـه و يـفـتـخـر   و اسـمـك يـظـل ايـعـيــده

  يـمـلـكـنـي غيرك مـا ريـد   بـخـدمـتـك جـاهي ايزيد

                     مـولاي اموت بـخـدمـتـك

                        *---------------*---------------*

ماعوفـك انـطـيـتـك وعد   وأدري الـوعـود احچـايـه
نــاذرهـن سـنـيـنـي تــــره   ابـنـوح و لـطـم وقــرايـه
اليعـتـرض خـل يـعـتـرض   كـلـمـن عـلــيــه بـــرايـــه
قــرّبـنـي وٱقـبـل دمـعـتـي   تـفـكـيـري بـس ابـهــايـه

اتـبـاهـه لٱجـلك مـنــذور   وايـامـي كـلـهـن عـاشـور

                     مـا انـسـه يـوم امصيبتك

                        *---------------*---------------*

ياصاحب الصاحب صدگ   عـالـفـطـرة مـن حـبـيـتـه
مـنـطـيـنـي جاه ومـنـزلـه   مـشـرفـنـي دوم ابـصـيته
مـتـربـي آنـــــه بـمـأتـمـك   و تـاج الـشــرف تـربـيـتـه
شـكــراً أگــولــن ســيــدي   خــيــرك عَـلَـي صـبـيـتــه

كـبّــرنـي صـيـتـك مـولاي   مـتـفـضـل بـخـيـر هــواي

                     خــلــيـنــي لازم رايــتــك

                        *---------------*---------------*

✍خادم الحسين ع
الشاعر رعد الجريخي

أنت موضوعی

السلام على فاطمة العلية بنت الحسين ––ع
         ـــــــــــــــــــــــــــــــــــــــــــــــــــــ

يا بــويه من امشــيت ــ مـاظـل ضوه بالبيــت
كلشي غريب ـــــ كلشي غريب ــــ حته الهوه
ـــــــــــــــــــــ ــــــــــــ ـــــــــــ
ابيتي غريبه انه احس والليل مــوذاك اللــيل
الجـان يجمـــعنه بأابـــو هسه يمر بيـه بــويل
ولاشوفن اطراف الضعن ولاشوف مسراهه الخيل
كلشي انطفه حتة الشمس بس الدمع ظل ايسيل
لحضانك اشـتاگيت ــــــ  ماظــل ضوه بالبيت
كلشي غريب ــــ كلشي غريب ــــــ حته الضوه
ــــــــــ ـــــــــــ ـــــــــــ ـــــــــــ
الديوانك اركض من احن ملهوفه اجي لديـوانك
مابي سـوالف ياهــــله يابويه خالي امجــــانك
واشتم مجـانك وانذهل مابي حنان احضانك
ويابيتي ماريدك بعد مثل الگبــر جـــــدرانك 
من غيبـتك ونيت ـــــ ماضـل ضــوه بالبيـــت
كلشي غايــب ــــ كلشي غايـب ــــــ حته الهوه
ـــــــــــــــــــــ ـــــــــــ ـــــــــــ
اتمنه روحي  ويه الضـعن يابويه امشـي اتمنه
وعبد الله اناغي عن گرب وتمـوت بيه الونـــه
ونفرح ويلتم الشمل وجـــسام بيـــده الحنه
ورمــله تنادي ياهـــله بسكيـــــنه صارت جنه
بس بالأمل ضليت ــــ ماضل ضــوه بالبيــــت
كلشي غريب ــ كلشي غــريب ــــ حته الــــهوه
ـــــــــــــــــــــ ـــــــــــ ـــــــــــ
بالبيـت انه ودمعــتي ونــــجمه حزيـــنه اويانه
نبجي نضل حد الصـبح عالسـافر اومــــاجانه
ولاطـــارش المـــنه وصل عـن موطنه ودلانه
يومية نوگـــف عالــــدرب هلبت يجــي عنوانه
  منتضره يالــماجيت ـــ ماضـل ضوه بالبيت
كلشي غريب ـــ كلشي غريب ـــــ حته الــــهوه
ـــــــــــــــــــــ ـــــــــــ ـــــــــــ ــــــ
ياعين ظــلت يادمــع مــاطــاح مــن اغيابك
كل مغــربيه انه اشب واطفـه من اشم اثيابك
يالحظنك عليه بعد ادفه بحـضـن مـحــــرابك
منتضره اضل كل الـعمرلاتـنسه بويه احبابك
من سافرت ناديت ـــــــــــ ماضل ضوه باليت
كلشي غريـب ـــ كلـشي غريــب ـــ حته الــهوه
ـــــــــــــــــــــ ـــــــــــ ــــــــــــ ـــــ
الشاعر خالد جودي العارضي

ضوه البيت

بسم القل هوه    رمله والضوه     جاسم والحديث أبتده
قرءآن الوفه    وحي العاطفة  يتبدى مثل الندى
يمه
.........................................................
يا حلم عاش بخيالي    وياتعب ذيج الليالي
وتعبي ورباي
يا ذخر شلته المشيبي    يوم المبارك حبيبي
زفتك هــــاي
شمعة أسنيني وغلاتك    يمه جاسم وأشحلاتك
نجمة بسماي
جاسم ييمه أهناك بالحومه عرسك
ربيتك الهاليوم ما تغلـــــــى نفسك
العمك أعتني   وأكباله أنحني   وأستأذن وطب للحرب
يا ليث الوغى    والمبتغى    يغلب وما ينغلب
يمه
.........................................
يمه يملوحة حجينه    عمك أعيونه علينه
أو وحده حاير
كسرة الخوان كسره    هيبته وأحزام ضهره
أهلال صاير
حيرته ما صح مثلها    جبل ما يحمل ثكلها
بلا مناصر
من طيحة العباس كافل خدرنه
وحشة لذيذ الماي وحشة خيمنه
يا يمه أستعد     كونك من تهد   أتكحل أعيون السمه
فوت بهيبتك   يمه وغيرتك   وأكسر قرار الضمه
يمه
.............................................
ألولد بعيون أهله     غالي يمه حسين أغله
وبيك أفدي
لو طحت يا يمه فدوه    حسين عمك والله يسوه
الدنيا عندي
أتوكل أو أخذ الوصية    العمك أو أدي التحية
كون جندي
هاك الدرع والسيف ورث الحسن هاك
جاسم ييمه أوصيك تتحنه أمن أدمـــاك
يا ضي الشمس   بثياب العرس   أتوكل وطبلهم ضوه
أوكف عالزلم    بصرار وعزم   وخلهم يدورون الهوه
يمه
............................................
نزل جاسم كله غيرة    وأبتسم شيخ العشيرة
بهمه وبزود
لمع فقاره وتبختر    والتفت لحسين وأشر
وخط الحدود
ما وصل لحدوده واحد    الزلمه بيهم ركض شارد
أوليدي هادود
الما لاحه سيف الموت خوفه يذبحه
غير العطش جسام ما وصل صبحه
نيران الضمه   أمست مضرمه    ودلالي يا ويلي أنفطر
طاح الوحًده     واسهام العده    نزلت على أوليدي مطر
يمه
.................................................
أمن الخيمه شفته أعتناله  محني ضهره وكوه شاله
ويلي لحسين
خطوه يمشي وخطوه يعثر  صاح رمله وفًه وأكثر
جاسم الدين
ضحه لجل الدين دمه    ويفتخر يا رمله عمه
سلوة العين
كتله الولد يحسين فـــــدوه وغلاتك
ألمهم أنته أتعود أفيــــــــاي  البناتك
طفيت الشمع   وأجريت الدمع   ألمن بعد حنه وعرس
مذبوح الولد    يا طير السعد    وضل ويلي نايم بالشمس
يمه
....................................................
خادم خدمة الحسين
الشاعر
محمد الموالي

وحي العاطفه

العليله

وحدي انه وعلتي    عفتني
بيه تخنگ عبرتي      عفتني
گمت اسولف للگلب
كلش ابعيد الدرب    عفتني عفتني


خلافك الدنيه يبويه مستحيله
صاحي مايحملهه تحملهه العليله
ياهو غيرك لوضجت بويه اشتكيله
سافرت والسفره شوصارت طويله
قابل اشطوله العمر
حتى اظل انه انتظر     
فاطمه بعازت دلال
طول اغيابك تعال     عفتني عفتني

انه وجروحي بقينه انون سويه
من يجي غروب وتحل  بيه المسيه
عيني للدمعات احس صارت سبيه
جدامي ماتحملني لرض الغاضريه
گلبي بجفاكم يون
ياكل بروحي الحزن   
تدري ميفيد البچي
ولايرد مجفي الحچي   عفتني عفتني


ادري  مترد  وانه  گتلك  رد  عليه
حيل ملهوفه اعلى خوله اختي ورقيه
ورد  احط  عبدالله  بويه  بين  اديه
خاطر اتناسه المرض ونسه الاذيه
رد علي ياسلوتي
شملي لمه ويه خوتي 
افرح ابلمت الشمل
وحدي بالدار انه امل   عفتني عفتني
.

عادت الينتظر يحسب بل ثواني
روحه بيه معلگه وماضن نساني
هسه يدري بغبته شگد جاي اعاني
من تركني ماتت ابروحي الاماني
كل دقيقه تمر جرح
فارك اشفافي الفرح 
شوفت الاعمى الضوه
ونت  العله  الدوه    عفتني  عفتني


صوت مدري منين اجاني وگلي اگلچ
مايرد  غايب  دمع  ويرده   دمعچ
ياهو گتله  انت  وگلتلي  مايردلچ
كلي انه احساسچ اليبچي اعلى خلچ
اطرد الوحشه بشمع
راح اضملك دمع  
حالتي شگد مئلمه
انه بنتك فاطمه عفتني عفتني
تمت
محمود رحيل

عفتني

السلام عليكم جميعاََ اي شخص عنده قصيده محتاج لحن انه بالخدمه عيوني الكم
@Eng_alhabeeb

دعم مؤسسة منبريون الحسينية
#افضل قناة للنعي
https://www.tgoop.com/+P0VV4bLqtzuKdcQS
#للاشتراك بالدعم @ahmed_alziwar0