اليوم محمد اللامي سألني خوش سؤال عجبني فگلت اجاوبه هنا هم للفائدة:

يريد يعرف شنو هاي الرموز اللي تشبه الأسس اللي هي ° و +

هذني باختصار :
ال ° تعني حذف ويعني ماكو انتاج لجزيئة كاما او الفا او بيتا
واذا تلاحظون بالجدول اكو deletion يعني حذف

اما ال + فتعني اكو إنتاج للجزيئة بس مو كامل جزئي واذا تلاحظون بالجدول اكو
Nondeletion
يعني غير محذوف.
فمثلا عدنا هاي الرموز:
1- β°
هذا يعني حذف كامل للبيتا وماله انتاج
2- β+
تعني انتاج جزئي لبيتا

ونفس الشي وية الألفا
α+

وعدنا بالجدول رموز مركبة يعني شنو؟
يعني مرات عندي حذف جزئي او كلي ببيتا او الفا سوة يعني بجزيئات 2
وهكذا
......
@abdiq96

واني اتصفح الفيسبوك شفت سؤال من احد الزملاء مثل ما موجود بالصورة كدامكم.

ونزلت اشوف الأجوبة وشفت هذا الجواب(كما في الصورة) لاحد الاشخاص اللي مكمل معهد + تقنية طبية ومتعين بخدمة تتجاوز ال 10 سنوات.

وجوابه بين طن اغلاط ارد عليها:
1- يكول مقاومة الانسولين وهي عدم دخول السكر الى كريات الدم الحمراء!!!!
تخيلوا بس تخيلوا وياي اذا كريات الدم الحمراء تعتمد عالانسولين معناها ماكو انسان عالكرة الارضية عايش!
لان كريات الدم الحمراء تظل على مدار 24 ساعة تشتغل ولازم طاقة مستمرة ولازم انسولين مستمر ما ينزل ابد!
زين من تجوع من تصوم واللي عدهم سكر نوع اول واللي عدهم سوء تغذية هذولي كلهم ما عدهم انسولين معناها الكريات الحمراء تموت معناها البشر يموت!!!


اذن كريات الدم الحمراء لا تحتاج ولا تعتمد على الانسولين لان الناقل مالها GLUT1 وهذا ما يحتاج لانسولين اللي يحتاج فقط ال GLUT4

وبعد اكو خرابيط اخرى مال مقاومة الانسولين البنكرياس ما ينتج كمية كافية!
وبالاخير ختمها بعبارة الانسولين يساعد على حرق الدهون!!
هو اصلا حتى الدهون تنحرق لازم ماكو انسولين!
من اكو انسولين راح يصير عندي خزن دهون
بغيابه يلا يصير lipolysis
......
@abdiq96

#سالفة_عالماشي
بتقارير تحليل النطف من تجي للحركة تلگي بعض التقارير 3 اقسام:
- active or progressive
- Sluggish
- immotile
وبعض التقارير تلگي 4 اقسام:
- rapid progressive
- slow progressive
- Sluggish
- Immotile

فشنو السالفة شنو الصحيح ؟؟
السالفة وما بيها انه منظمة الصحة العالمية اول شي قسموا الحركة لاربعة اقسام
اللي هي:
- التقدمية السريعة (فئة A) Rapid progressive
- التقدمية البطيئة (فئة B) Slow progressive
- غير التقدمية البطيئة (فئة C) Sluggish
- غير المتحركة (فئة D) Immotile
( التقسيم تشوفوه بطبعة 1999 )
بعدين شنو اللي صار؟
شافوا انه المختبريين يواجهون صعوبة بالتمييز بين الفئة A و B
فگالوا خلي ندمجهن سوة نعتبرهن 1 ال progressive ما يحتاج A و B سريع وبطيء فقط نخلي Progressive حتى نسهل على المختبريين
( التقسيم تلكوه بالطبعة الخامسة سنة 2010)

بعدين كالوا احنا شلنا علاقة اذا هم المختبريين ما يفتهمون ولا يطورون انفسهم فهاي مشكلتهم ينجازون خلي يتعلمون ويميزون بيناتهن فخلي نرجع للتقسيم القديم ( 4 فئات) وفعلا رجعوا اله بالطبعة الخامسة سنة 2021

فالخلاصة: التقسيم الصحيح ابو 4
وسلامتكم
......
@abdiq96