موشح حول استشهاد سيدي ومولاي امير المؤمنين عليه السلام

تدري بفراگك صعب يابا الحسن
شلون يالغالي عفتني الهالمحن


تدري مابيه على افراگك ابد
انت والد وانت الي خيمه اوسند
خالي امجانك ولايمليه أحد

روحي ذابت والله مابيه اون

،،،،،،،،،،،،،،،،،،،،،،،،،،،،،،،،،،،،،،،،،،،،
بويه حگي لو اون صبح اومسه
الحزن يم بابي ياوسفه رسه
وينه عني الموت ياخذني عسه

لني اخلافك غريبه ابلا وطن
،،،،،،،،،،،،،،،،،،،،،،،،،،،،،،،،،،،،،،،،،،،،
اخلافك انت مابعد يسوه العمر
وتوجع اگليبي تره ايام التمر
ادري من رب البشر هذا الأمر

رمح صار اغيابك اوگلبي طعن
،،،،،،،،،،،،،،،،،،،،،،،،،،،،،،،،،،،،،،،،،،،،
نابت ابدلالي والابهر گطع
ياعلي امصابك تراه گلبي صدع
والالم يالوالي ببنيتك طمع

چنه خاواني ويضل طول الزمن
،،،،،،،،،،،،،،،،،،،،،،،،،،،،،،،،،،،،،،،،،،،،
چنه خاواني القهر مامن مفك
يسري وي دمي تراه بيه اشترك
والنظر بعدك يحيدر والله رك
عيوني من بعدك يبعد اهلي عمن

،،،،،،،،،،،،،،،،،،،،،،،،،،،،،،،،،،،،،،،،،،،،

خادمة ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN

قصيده حول استشهاد سيدي ومولاي امير المؤمنين عليه السلام

اسمعني بويه أو رد عليه
حيدر يحماي الحميه
لو ناوي عنه يالولي تروح
اتمنى تاخذني المنيه

مگدر على افراگك ابد تدري عليك امعلمه
ياذيني اشوفك تحتضر اوراسك تخضب بالدمه
امصابك صعب يالمرتضى بچه ملائكة السمه
عايفني وين ابهالزمن مو كافي راحت فاطمه

مابيها روحي اثكال الهموم
يابالحسن دلالي مهضوم

روحي تون شبعت اذيه
اسمعني بويه أو رد عليه
،،،،،،،،،،،،،،،،،،،،،،،،،،،،،،،،،،،،،،،،،،،،
ناوي البُعد يالمرتضى اوتتركني بعد. الزهره
شبعت اذيه إبلا رحم روحي گضتها الحسره
ما طابت اجروح الگلب لافارگتني العبره
دنياتي مارحمتني ابد وبحالي انت الادره
دنيه اشكثر راوتني احزان
مابيه اون اگليبي خلصان
نارالگلب ضلت سريه
اسمعني بويه أو رد عليه
،،،،،،،،،،،،،،،،،،،،،،،،،،،،،،،،،،،،،،،،،،،،
متعنيه الي بضيم وحزن يابوالحسن دنيانه
فدوه رحت لعمامتك ريتك تضل ويانه
ياهيبة حسين اوحسن نورك يضوي اسمانه
ماتسوه دنيه إبلا ابو بيت اوتهد اركانه
مابيه احمل والله فرگاك
صدگني اموت ابلايه عيناك

بوجودك الدنيه زهيه
اسمعني بويه أو رد عليه
،،،،،،،،،،،،،،،،،،،،،،،،،،،،،،،،،،،،،،،،،،،،
خليني اصد عينك يضي عيني ونظرها الغالي
ماصدگ تروح ويضل يوجع مكانك خالي
تتركني لا ماصدگت يابو الوفه يالوالي
اتمنى بعدك موتتي اي والله بويه اشوالي

ماتنحمل يالغالي الاشواگ
ظهري انكسر من ضيم الفراگ
بعدك اظل اصفگ بديه
اسمعني بويه أو رد عليه
،،،،،،،،،،،،،،،،،،،،،،،،،،،،،،،،،،،،،،،،،،،،
بعدك يغث حتى الهوى مايرهم الهالريه
عيني اذا ماشافتك اتمنى لو معميه
يالساكن ابوسط الگلب يابيت اهلنه او فيه
يصعب رحيلك يالابو ودارك تضل مطفيه


مثلك ابو ماظنه موجود
گلبي أنه دوم ابهمه موعود
مابطلت عيني جريه
اسمعني بويه أو رد عليه
،،،،،،،،،،،،،،،،،،،،،،،،،،،،،،،،،،،،،،،،،،،،
خادمة ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN

هوسات الئ السيده زينب
عليها السلام
┈┉ °°°•📿•°°° ┉┈
تضل مرفوعه فوگ الغیم وابد ماتنزل الرايه
استلمها من ابوه الحید وکلهاتعلم ابهايه
من یسمع يفز عباس اويتعنالک اعنايه

{ ايكص ايده/ ليوصل حدها}

الــشاعـرة ألـعلـويّــة بتول الهاشمي
┈┉ °°°•📿•°°° ┉┈
من يسمع يصول يجول اوترجف منه عدوانه
هذا الفارس المغوار وبيه امسمى عنوانه
اخو زينب كفيل اخته اولجلها فادي ذرعانه

{حيد امجرب/ وتشهد صولاته}


ام ✍️ حيدر العباديه عماره
┈┉ °°°•📿•°°° ┉┈
هذا الحيد ابو النوماس شجاع اوكلفه افعاله
هذا العجب الكتاب وتهاب العده اخياله
سبع وحزام اخوه حسين يسر گلب التعناله

{ تنومس بيه /ويوم الضيجه}


✍🏻 ام احمد الحميداويه
خادمة العقيله الهاشميه
┈┉ °°°•📿•°°° ┉┈
الرايه ترمز ليا ثار ولها السبب نزلوها
ما يدرون ما ننسه عملات الي سووها
من ذبحوا ابو الاحرار واخته بعده يسبوها

{شينسونه/ بدمانه الثار}

✍🏻#نبضي_حسين

┈┉ °°°•📿•°°° ┉┈

جبان اونزل الرايه هذا الظالم الغدار
لحد يوم الحشر ثابت وأبد ماينسي هالثار
طلابه عدل موجود وآله يوم اويجي المغوار

لاينسه المهدي /اوثاراته

✍️ام محمد تقي الموسوي

┈┉ °°°•📿•°°° ┉┈
تمــ بعون الله تعالى ــت
بقلـ🖊️ـم شاعرات اهل البیت ع
في رابطة دموع العقیله ع
لانجيز حذف الاسماء✋
☘️نسالكم الدعاء☘️
https://www.tgoop.com/KADMTAMALBNEN

قصيدة حول وداع السيده زينب عليها السلام لاخوتها وهم على رمضاء كربلا

اودع احباب يوميه دنيا و اوجرت بيه

ابهضمي لايخلوني
اريد اهلي يردوني

اودع احباب يوميه
...........................................

يهد حيلي وداع اخواني واحبابي
وسط گلبي ولا ينشاف أنه اصوابي
وحگ حيدر عليه ثگلت اثبابي
اعتب عالاهل ماسمعو اعتابي

ماتغمض تره اعيوني
اريد اهلي يردوني

تراها الروح موليه اودع احباب يوميه

...........................................
موليه يروحي من الخلگ ونت
ولايام اخوتي مالومه من حنت
حگها لو تون واعله المشو سلت
عشره يابشر وبساعه انفلت

ابفرگاهم يموتوني
اريد اهلي يردوني

جثث ياويلي مرميه. اودع احباب يوميه
...........................................
جثثهم عالارض واخذوني ميسوره
وبعيوني بقت ياهلخلگ صوره
مذابيح وعطاشى اخواني منحوره
واطفال وحرم تتباجه مقهوره

عدواني يهضموني
اريد اهلي يردوني

ابسبب زمرة بني اميه اودع احباب يوميه
...........................................
على الهزله يركبونه تره الليله
اوحرمه إبلا ولي ذبلانه ونحيله
مهضومه واون وتكفلت عيله
الياصوب الدمع ياعيني اتسيله

وسط اگليبي صابوني
اريد اهلي يردوني

بيت اومنگشع فيه اودع احباب يوميه
...........................................
على الراحو بعد ماشوف انه دربي
يعيني اعله المشو زيدي اوبعد صبي
دهري إبلا رحم صوبني ابگلبي
بعد المن يعيني اتناطر اوتربي

محمل فرگه يدروني
اريد اهلي يردوني

وتظل اعيوني مجريه. اودع احباب يوميه

...........................................
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا

https://www.tgoop.com/KADMTAMALBNEN

السلام عليكم ورحمة الله وبركاته خدام سيدي ومولاي الامام الحسين عليه السلام سوف نقوم بنشر القصائد الخاصه بشهر محرم الحرام من الهلال إلى اليوم العاشر تباعأ قربة إلى الله تعالى اسالكم الدعاء و الفاتحه تسبقها الصلاة على محمد وال محمد إلى روح والدتي جزاكم الله خيرا

قصيدة ولائيه لمولاتي الزهراء عليها السلام


شكراً لك يافاطمه. ابگد هالأرض ويه السمه

يلخدمتج افضل سند
ابقى أنه اخدمچ للابد

للموت اضلن خادمه شكرا لك يا فاطمه

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
للموت أضل اخدم الچ واتباهه أنه ابهالخدمه
گلبي اليحبچ مايهم بس ابرضاتچ همه
بالدمعه اكتب كل حرف اي والله وبكل كلمه
دمعي يهل لجلچ يضل ورويحتي متألمه
نذرتني امي من المهد
ابقى أنه اخدمچ للابد
روحي ابمحبتچ هايمه شكراً لك يا فاطمه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يل حبچ ابوسط الگلب واسمچ تربع عرشه
گلبي أنه چن طير ولگه بأجمل غصن ياعشه
لو اذكر امصابچ اون وعيوني دمعي اترشه
يامحله نگلات الجدم والمجلسچ تتمشه
مولاتي مني هالوعد
ابقى أنه اخدمچ للابد
عالمجلس أنه امعلمه. شكراً لك يا فاطمه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
وبخدمتچ روحي لگت بالدنيه لون اومعنه
وبدون حبچ فاطمه يالطاهره چا ضعنه
نقسم الچ طول العمر وبها القسم صرحنه
نخدم نضل لاخر نفس يالخدمتچ ترفعنه
يل مجلسچ خير اوسعد
ابقى أنه اخدمچ للابد
بنت الرسول العالمه شكراً لك يا فاطمه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
وفقيني فدوه ابخدمتچ يم الحسن أتوسل
ادري اليخدمچ فاطمه عمره ابد ماينذل
يلي سكنتي ابها الفكر ولساني بسمج رتل
عندي يمولاتي طلب خادم وجيتچ اسأل
اقسم وحق رب الاحد
ابقى أنه اخدمچ للابد

معروفه وكت الموزمه شكراً لك يا فاطمه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
استحلفچ بالمرتضى ساقي عطاشى الكوثر
او بلي انذبح من القفى اوظل منه دامي المنحر
اتوسلچ يا فاطمه شفعيلي يوم المحشر
وادري أنه چفچ بالكرم ممدوده ماتتعذر

يشهد علي رب الوعد
ابقى أنه اخدمچ للابد

الباري شخصچ كرمه شكراً لك يا فاطمه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN
٨ذو القعده ١٤٤٦

قصيده مربعه للهلال

اهلالك عذباني او دوهن أحوالي
محتاره اولچمني اليوم دلالي


لچم گلبي الهلال أو زيد اونيني
وانه املوعه أمن اصباي تدريني
اخلصهه ابقهر وبضيم يسنيني

شهرك لو يهل مايرحم ابحالي
༺༻༺༻༺༻
شهرك لو يهل يأخذ غوالينه
نضل نسوان والعدوان تولينه
رأسه اعله الرمح ويلوح والينه

محتاره وأصد بعيوني للغالي
،༺༻༺༻༺༻
گلي اشلون اصد بعيوني وانظرله
ياجرحي چبير وياهو اليشله
ماتشفى اوتطيب ابگلبي العله

حرمه أنه غريبه وماالي والي

༺༻༺༻༺༻
حرمه أويه الغرب والنار بضلوعي
سكته وبالگلب ياونتي او لوعي
تسيل وماتجف للدوم يدموعي

وكتال اخوتي يتبختر اگبالي
༺༻༺༻༺༻
چم غالي وعزيز البيك افگدنه
تسعر ماتهيد ابگلبي الونه
اموسد عالترب يبن امي اشوفنه

اصفگ بالچفوف ومدمعي هالي

༺༻༺༻༺༻
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا

https://www.tgoop.com/KADMTAMALBNEN
٨ ذو القعده ١٤٤٦

نعي للهلال

هل الشهر وعيوني هلن
ومن البجي لا ما يملن
نوايب كربله لروح سلن
༺༻༺༻༺༻
هل الشهر وذكرت الالام
ماتنسي يا ذيج الايام
بعد الگمر يسبوني ضلام
༺༻༺༻༺༻
بعد الگمر ضلمه الليالي
مالومه انه ومشدوه بالي
من اخوتي انه اشبگالي
༺༻༺༻༺༻
راحو هلي كلهم فرد يوم
وگبال عيني هدت الگوم
وتكتلو حلوين الرسوم
༺༻༺༻༺༻
ماينسي يمصاب اهلنه
ونص الگلب خلالي ونه
اطشرنه مايلتم شملنه
༺༻༺༻༺༻
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN
٩ذو القعده ١٤٤٦

قصيده ثگيله لوداع مولاتي ام البنين عليها السلام لاولادها

امودعين اوداعة الله ياجگر دلالي
حمليتو ابليله وحده والنزل ظل خالي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
حمليتو وادري يمه. هالسفر كلش بعيد
خايفه اعليكم تراني او روحي وياكم تريد
مااظن لو سافريتو هالگلب ساعه يهيد
والله احس گلبي أنه يطلع. دگته كل لحظه تزيد

فدوه ياولادي انذرتكم يمه لأجل الوالي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يمه اريدنكم يروحي. سور ويحيط الحسين
لاتبخلون ابچفوف او للسبط صيرو له عين
أنه لحسين اذخرتكم شيلو راسي يالبنين
صيرو سيف اوبيد اخوكم يقضي بيه عالظالمين

احسين هذا ابن الزچيه العزيز الغالي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هايه زينب يابو فاضل تمشي راح أمن الديار
ادري بيك انت اكفلتها امن الهوى اعليها تغار
لكن أوصيك ابوصيه لو زمنكم يمه دار
لاتخلي اختك يوالي. ايمرها ضيم اولا مرار

يابعد عين امك انت فرحتي وأمالي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لو يمر ضيم اعله اخوتك فدوه ضحي ابهالچفوف
لو برد سيفك يغالي خله ينحد بالسيوف
واعله روس اهل الضلاله. يبني خل سيفك يطوف
وبيمين الچف اريدن موت بعداكم يحوف

راسي بيكم ارد ارفعه يولدي بالعالي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اشما نضحي للزچيه والله هم يبقه قليل
الزهره بت طه نبينه حبها ابد ماله مثيل
اگطع ايد العينه رادت. بالخدر يمه تعيل
ما اريد ابخيمة اختك. ياسبع تسمع عويل

افتخر يبني اني بيكم راح اضل لتالي


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لخادمة ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN
١٢ ذو القعده ١٤٤٦

نعي حول ام البنين عند رحيل اولادها

يحباب الگلب سيرو علينه
نحن لوجوهكم يمه وبچينه
وعلى درب الاخذكم ناطرينه
༺༻༺༻༺༻
عالدرب أتاني اوماكو مرسال
مالومه دمع العين سيال
افراگك يبو السجاد كتال
༺༻༺༻༺
عالغالي ابد ما نمته ليلي
افراگه صعب هدالي حيلي
حاير يحسب بيه دليلي
༺༻༺༻༺༻

يوميه أصبح بس بالهموم
وليل اخلصه احسب بالنجوم
ماظن ترد حلوين الرسوم

༺༻༺༻༺༻

بس كونه سالم فدوه الاولاد
احسين روحي ونبض الفاد
اسأل عليه الراح والراد
༺༻༺༻༺༻

خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا

https://www.tgoop.com/KADMTAMALBNEN
١٠ ذو القعده ١٤٤٦

نعي للعليله عليها السلام

ايحملون وانه انظر بالعيون
ساعه و هلي عني يرحلون
وحدي اضل ياروحي اشلون
༺༻༺༻༺༻
وحدي اضل اشلون بيه
يا ريت تلفيني المنيه
حان الرحيل وهاي هيه
༺༻༺༻༺༻
حان الرحيل او ودعوني
راحو هلي بس ما خذوني
اعمن عليهم ياعيوني
༺༻༺༻༺༻
احلف يليلي ماانامه
ابنص الگلب صارت علامه
امودع يبويه بالسلامه
༺༻༺༻༺༻
امودع يبويه والله وياك
غالي يريت الروح تفداك
گلي اشيصبرني اعله فرگاك
༺༻༺༻༺༻

خادمة مولاتي ام البنين عليها السلام ام محمد تقي الموسوي نسألكم الدعاء و الفاتحه لروح والدتي جزاكم الله خيرا

https://www.tgoop.com/KADMTAMALBNEN ١٢ ذو القعده ١٤٤٦

نعي لعليله عليها السلام

حمل ضعنهم وانه اتاني
مالومه اون والهم خذاني
گلت الابو بس لا نساني

ردو علي يالحمليتو
༺༻༺༻༺༻
شو حملو كلهن خواتي
واعله المتن طاحت عباتي
بفراگهم يگرب مماتي

عافوني يلهب نار گلبي
༺༻༺༻༺༻
گلي السفر يا بويه يا ذي
دربي طويل ابها البوادي
گتله يبويه اشبع بواچي

مابيه عالفرگه تراني
༺༻༺༻༺༻
سار الضعن وابعد عليه
ياويلي احس جتني المنيه
خاوي الجسد هالخان بيه

عافيتي وياهم خذوها
༺༻༺༻༺༻
خافو علي من السفر ليش
يدروني ما ارهم ولا اعيش
بيمن اصبر ارويحتي ابيش

مل الصبر مني وهجرني
༺༻༺༻༺༻

خادمة مولاتي ام البنين عليها السلام ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN
١٢ ذو القعده ١٤٤٦

نعي لمولاتي فاطمه العليله عليها السلام


يعيني اعله المشو صبيها الدموع
گلبي امن الصغر يا ويلي مشلوع
فرگاهم صعب يسحن بالضلوع
༺༻༺༻༺༻
يعيني اهلج مشو ما ظن تشوفين
عگب اهل الوفه عميه تضلين
يروحي دوم عالراحو تونين
༺༻༺༻༺༻
ماينفع عتب گطعيه العتاب
منهم ايست راحو يا الاحباب
تتنطر خبر يا عيني عالباب
༺༻༺༻༺༻
اتاني اعالدرب مرسال منهم
عن حال اخوتي يطمني عنهم
اهلك ياگلب طول سفرهم
༺༻༺༻༺༻

من يوم المشو ما نامت العين
مشتاگه اشمن ريحة حسين
تعبتو الفكر اه يالمبعدين
༺༻༺༻༺༻
بعدراحو اهلنه اوما يردون
على احباب الگلب عميانه العيون
اخلص اليوم كله اشلون بشلون

༺༻༺༻༺༻
خادمة مولاتي ام البنين عليها السلام ام محمد تقي الموسوي نسألكم الدعاء و الفاتحه لروح والدتي جزاكم الله خيرا
١٣ ذوالقعده ١٤٤٦
https://www.tgoop.com/KADMTAMALBNEN

قصيده مربعه للعليله عليها السلام

اخذوني أو يالضعن هالمرحلين
فطر گلبي الونين اوصار نصين


اخذوني ياهلي مابيه اونن
گبل لا احچي هاي اعيوني هلن
اظن من البواچي مايملن

ابد ماينحمل يفراگ الحسين
༺༻༺༻༺༻
ابد ماينحمل يفراگ العزاز
چن روحي گضت وتريد جناز
لحبابه الگلب تدرونه يعتاز
وين انطي الوجه گلولي لاوين
༺༻༺༻༺༻
تريد الروح وياكم يالاحباب
مابيها على الفرگه والغياب
مالوم الدليل اعليكم انعاب

عفتوني يهلنه أوين ماشين
༺༻༺༻༺༻
تدروني نحيله والخلگ ضاگ
مابي حيل گلبي اويحمل افراگ
بعدكم مامشيتو والكم اشتاگ

لو طول سفركم تعمه هالعين
༺༻༺༻༺
اصبرها غصب وتسيل العيون
لو طال السفر يحبابي اشلون
تمر ايام وانتم ماتعودون

يروحي اويالمشو كونج تروحين
༺༻༺༻༺༻
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا ٩ذو القعده ١٤٤٦
https://www.tgoop.com/KADMTAMALBNEN

قصيده مربعه لنزول كربلاء

رد بينه لهلنه او لا تخلينه
ابغربه يالولي واعداك تولينه
༺༻༺༻༺༻
رد بينه لهلنه الگوم غداره
اظلن حايره ودمعاتي تجاره
يبن امي تون الروح محتاره

ما نحمل هضم يحسين تدرينه
༺༻༺༻༺༻
ما نحمل هضم والدنيا عياله
اظل وحدي يخويه العين هماله
لو مال الحمل وانغدر شياله

وراسك عالرمح أهنا يبو اسكينه
༺༻༺༻༺༻
راسك عالرمح ينشال يالوالي
حال الضيم عگبك يلولي حالي
يضل ممرود خويه اهناك دلالي

وسياط الشمر يبن امي تاذينه
༺༻༺༻༺༻
يحدينه الشمر يا حيف هالدوني
ومن بعد الكفيل اليحدي بضعوني
خلوني ارد هاليوم خلوني

عدوانك يخويه اشلون تحدينه
༺༻༺༻༺༻
امشي شلون گلي وابره عدواني
تتباجه الحرم وامبدله الواني
تضل عالگاع حيف امدده اخواني

غصب عنه يحيف الگوم تسبينه
༺༻༺༻༺༻
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
١٠ ذو القعده ١٤٤٦
https://www.tgoop.com/KADMTAMALBNEN

نعي لنزول كربلاء

صحت يحسين رد بينه لهلنه
يخويه كربله اطشر شملنه
نضل نسوان خويه ومحد النه
༺༻༺༻༺༻
نضل بس الحرم من غير والي
يضيع اهنا يبن امي دلالي
واضل امحيره وبالضيم حالي
༺༻༺༻༺༻
اضل امحيره وافرك باليدين
وانده ياهلي واهلي بعيدين
حرمه انه واظل بين الملاعين
༺༻༺༻༺༻
اظل بين الغرب حرمه وغريبه
واون اعله الكفلني منين اجيبه
تشب نار الگلب تسعر لهيبه
༺༻༺༻༺༻
تضل روحي غريبه وبين ظلام
عيني امساهره وما تگدر اتنام
على الراحو اون والطم على الهام
༺༻༺༻༺༻
خادمة مولاتي ام البنين عليها السلام
ام محمد تقي الموسوي نسألكم الدعاء و الفاتحه لروح والدتي جزاكم الله خيرا
https://www.tgoop.com/KADMTAMALBNEN

♦️تم نشر قصائد محرم هنا

👉 https://www.tgoop.com/sajad100w
👉 https://www.tgoop.com/sajad100w

دعم مؤسسة منبريون الحسينية
#افضل قناة للنعي
https://www.tgoop.com/+P0VV4bLqtzuKdcQS
#للاشتراك بالدعم @ahmed_alziwar0